1 Sahˬpaˬ 4 - Akha

Sawˇlaˬmoˬ-euˬ gaˇ mˇ-eu yaw huiˬ yaw mahˇ deuˬ

¹ Sahˬ paˬ Sawˇlaˬmoˬ-aˬ, Iˇsaˬleˬlaˆ miˇ kʼahˬ kʼahˬ lah ni kʼoeˇ taˆ uˆ lahˇ-eu sahˬ paˬ pyeuꞈ-eu meh.

² Aˬ yawˬ-euˬ gaˇ mˇ-eu yaw huiˬ yaw mahˇ deuˬ-aˬ, heu loꞈ-ehˇ meh. Zaˬdoˆ-euˬ aˬ li Aˬzaˬyiˇ gʼaˬ-aˬ, piˇ ma meh.

³ Shiˇshaˇ-euˬ aˬ li Eˇliˆhawˇyehˆ hawˇ-eu Aˬhiˇyaˬ aˬ nyaꞈ nmˇ-aˬ, saˇ naˇ gaˇ mˇ-eu paw aˬ yuiꞈ geuꞈ-euˬ meh. Aˬhiˇluˆ-euˬ aˬ li Yeˬhawˇshaˬpaˇ-aˬ, jaˇ laˇ yuˇ-eu paw aˬ yuiꞈ geuꞈ-euˬ meh.

⁴ Yeˬhawˇyaˬdaˬ-euˬ aˬ li Baˬnaˇyaˬ-aˬ, guiˇ maꞈ kʼoeˇ taˆ uˆ lahˇ-eu gʼaˬ geuꞈ-euˬ meh. Zaˬdoˆ hawˇ-eu Aˬbyaˬdaˬ aˬ nyaꞈ-aˬ, piˇ ma meh.

⁵ Naˬdaˬ-euˬ aˬ li Aˬzaˬyiˇ-aˬ, miˇ kʼahˬ kʼahˬ zaˬ biˇ taˬ-euˬ kʼoeˇ taˆ uˆ lahˇ-eu sahˬ paˬ sahˬ ma deuˬ-ahˇ haw-eu pyaˆ-eu gʼaˬ geuꞈ-euˬ meh. Naˬdaˬ-euˬ aˬ li Zaˬbuˆ-aˬ, sahˬ paˬ-ahˇ nui noeˬ nui duˇ biꞈ-euˬ gʼaˬ geuꞈ-euˬ meh.

⁶ Aˬhiˇshaˬ-aˬ, sahˬ paˬ-euˬ nymˇ-ahˇ gaˇ mˇ-eu zaˬ kʼaˆ deuˬ-ahˇ haw-eu pyaˆ-eu gʼaˬ geuꞈ-euˬ meh. Aˬbaˬdaˬ-euˬ aˬ li Aˬdawˇniˇlamˬ-aˬ, myawˬ kʼaˆ bi mˇ-euˬ deuˬ-ahˇ haw-eu pyaˆ-eu gʼaˬ geuꞈ-euˬ meh.

⁷ Iˇsaˬleˬlaˆ miˇ kʼahˬ laꞈ kʼoeˇ, miˇ kʼahˬ kʼahˬ zaˬ biˇ taˬ-awˇ bi uˆ lahˇ-euˬ tsawˇ haˬ tseˇ nyiꞈ gʼaˬ Sawˇlaˬmoˬ tseˇ doˆ-euˬ meh. Tsawˇ haˬ kʼoeˇ deuˬ-aˬ, yawˬ ha uˆ lahˇ luꞈ-eu miˇ kʼahˬ laꞈ kʼoeˇ, sahˬ paˬ hawˇ-eu aˬ yawꞈ-euˬ miˬ sawˇ zaˬ deuˬ gʼaˇ duˬ dzaˬ dzaˬ dawˇ dawˇ taꞈ doˆ-awˇ, ya sha ha nehˬ leˇ-eu meh. Miˇ kʼahˬ kʼahˬ zaˬ tiˬ kʼahˬ uˬ duˬ-ahˇ, tiˬ kʼoꞈ laꞈ kʼoeˇ ba la tiˬ siˬ dzaˬ loꞈ dawˇ loꞈ ni ya taꞈ nehˬ-eu meh.

⁸ Sahˬ paˬ sahˬ ma kʼoeˇ tseˇ nyiꞈ gʼaˬ hawˇ-eu, aˬ yawꞈ maꞈ haw luꞈ pyaˆ luꞈ-eu miˇ kʼahˬ pehˇ tsahˇ-aˬ, heu loꞈ-ehˇ meh. Beˬhaˇ-aˬ, Eˇpaˬleˬ miˇ kʼahˬ gawˬ jawˬ gawˬ duˇ-ahˇ haw-eu pyaˆ-eu gʼaˬ geuꞈ-euˬ meh.

⁹ Beˬdeˬkeuˬ-aˬ, Maˬkaˆ meuˬ, Shaˬlaˬbeˬ meuˬ, Behˬsheˬmehˇ meuˬ, Eˇloˬ meuˬ hawˇ-eu, Behˬhaˬnaˬ meuˬ heu deuˬ-ahˇ haw-eu pyaˆ-eu gʼaˬ geuꞈ-euˬ meh.

¹⁰ Behˬhehˇsehˆ-aˬ, Aˬluˇboˆ meuˬ, Sawˇkoˬ meuˬ hawˇ-eu, Heˬpaˬ gahˬ kaˬ dawˬ tawˆ luꞈ kʼoeˇ taˆ haw-eu pyaˆ-eu gʼaˬ geuꞈ-euˬ meh.

¹¹ Sawˇlaˬmoˬ-euˬ aˬ buˇ Taˬpaˬdaˆ-ahˇ sheuˬ-euˬ gʼaˬ pyeuꞈ-eu Beˬaˬbiˇnaˬdehˇ-aˬ, Dawˇlaˆ gahˬ kaˬ dawˬ tawˆ luꞈ kʼoeˇ taˆ haw-eu pyaˆ-eu gʼaˬ geuꞈ-euˬ meh.

¹² Aˬhiˇluˆ-euˬ aˬ li Baˬnaˬ-aˬ, Taˬnehˇ meuˬ, Meˬgiˇdoˬ meuˬ hawˇ-eu, Yeˬzaˬleˬlaˇ meuˬ laꞈ oˆ Zaˬleˬdaˬ meuˬ dawˬ peh jaˆ-eu Behˬshahˬ meuˬ-euˬ gahˬ kaˬ ahˇ leˇ-ehˇ, Aˬbeˬlaˇmeˬhawˇlahˬ meuˬ hawˇ-eu Yawˇkaˬmeˬ meuˬ-ahˇ keuˆ ni haw-eu pyaˆ-eu gʼaˬ geuꞈ-euˬ meh.

¹³ Beˬgeˬbeuˬ-aˬ, Giˇlaˆ miˇ kʼahˬ Laˬmoˆ meuˬ, Giˇlaˆ miˇ kʼahˬ-ahˇ jaˆ-eu Maˬnaˇseˬ-euˬ zaˬ deuˬ uˆ deuˬ pyeuꞈ-eu Yaˬiˇlaˆ aˇ jeuˬ aˇ ca deuˬ jawˇ-eu pu deuˬ hawˇ-eu, Baˬshaˬ miˇ kʼahˬ-ahˇ jaˆ-eu Aˬgawˆ gahˬ kaˬ ahˇ leˇ-ehˇ, meuˬ meuˬ lahˇ yaw muiˬ paˬ-ehˇ gawˬ ziꞈ taˬ-awˇ, lahˇ kʼehˬ-ahˇ guiˬ shuiˇ laˇ gʼoˆ jahˇ ahˇ taˬ-euˬ meuˬ meuˬ ma koꞈ tseˇ meuˬ-ahˇ haw-eu pyaˆ-eu gʼaˬ geuꞈ-euˬ meh.

¹⁴ Iˇdoˬ-euˬ aˬ li Aˬhiˇnaˬdehˇ-aˬ, Maˬhaˬneˬ gahˬ kaˬ-ahˇ haw-eu pyaˆ-eu gʼaˬ geuꞈ-euˬ meh.

¹⁵ Sawˇlaˬmoˬ-euˬ aˬ buˇ Baˬseˬmaˆ-ahˇ sheuˬ-euˬ gʼaˬ pyeuꞈ-eu Aˬhiˇmaˆ-aˬ, Naˬtaˬliˇ miˇ kʼahˬ-ahˇ haw-eu pyaˆ-eu gʼaˬ geuꞈ-euˬ meh.

¹⁶ Huˇshaiˇ-euˬ aˬ li Baˬnaˬ-aˬ, Aˇshah gahˬ kaˬ hawˇ-eu, Beˬlawˆ meuˬ-ahˇ haw-eu pyaˆ-eu gʼaˬ geuꞈ-euˬ meh.

¹⁷ Paˬluˇyaˆ-euˬ aˬ li Yeˬhawˇshaˬpaˇ-aˬ, Iˇsaˬkaˬ miˇ kʼahˬ-ahˇ haw-eu pyaˆ-eu gʼaˬ geuꞈ-euˬ meh.

¹⁸ Eˇlaˬ-euˬ aˬ li Shiˇmiˇ-aˬ, Beˬyaˬmiˬ miˇ kʼahˬ-ahˇ haw-eu pyaˆ-eu gʼaˬ geuꞈ-euˬ meh.

¹⁹ Uˇliˆ-euˬ aˬ li Geˬbeuˬ-aˬ, Aˬmoˬ sahˬ paˬ Siˇhoˬ hawˇ-eu Baˬshaˬ sahˬ paˬ Awˇgaˆ aˬ nyaꞈ neh uˆ lahˇ-euˬ miˇ kʼahˬ pyeuꞈ-eu Giˇlaˆ gahˬ kaˬ-ahˇ haw-eu pyaˆ-eu gʼaˬ geuꞈ-euˬ meh. Sahˬ paˬ sahˬ ma kʼoeˇ tseˇ nyiꞈ gʼaˬ uˬ taꞈ, miˇ kʼahˬ kʼahˬ lah ni kʼoeˇ taˆ haw-eu pyaˆ-eu tiˬ gʼaˬ paˇ bi jawˇ-euˬ meh.

Sawˇlaˬmoˬ uˆ lahˇ-eu aˇ yamˬ laꞈ kʼoeˇ baw le za le-euˬ

²⁰ Yuˇdaˆ miˇ kʼahˬ hawˇ-eu Iˇsaˬleˬlaˆ miˇ kʼahˬ laꞈ kʼoeˇ jawˇ-eu tsawˇ haˬ deuˬ-aˬ, iˬ ma laˆ shaˆ lawˇ deh-ahˇ ga-eu kʼaˇ shuiꞈ loꞈ-ehˇ myaˬ-eu meh. Aˬ yawꞈ maꞈ ya dzaˬ ya dawˇ dehˆ-awˇ, laˬ kʼaˬ cehˇ nui saˇ oꞈ-euˬ meh.

²¹ Uˇpaˬlaˇ lawˇ baˬ-ahˇ neh Piˇliˇtiˆ miˇ kʼahˬ-ahˇ keuˆ ni hawˇ-eu , Iˇjiˇtuˆ miˇ kʼahˬ-euˬ miˇ kaˬ-ahˇ keuˆ ni kʼaˇ jaˆ-eu miˇ kʼahˬ dawˬ tawˆ luꞈ, Sawˇlaˬmoˬ-euˬ miˇ kʼahˬ pyeuꞈ-eu meh. Aˬ yawꞈ-euˬ tiˬ ziˇ, aˬ yawꞈ maꞈ aˬ yawꞈ-ahˇ kawˬ doˆ nehˬ-awˇ, aˬ yawꞈ uˆ lahˇ-eu uˬ moˆ jawˇ-euˬ meh.

²² Aˬ yawꞈ nah yawꞈ Sawˇlaˬmoˬ loˬ-eu dzaˬ dzaˬ dawˇ dawˇ deuˬ-aˬ, cehˇ meu ngaˬ heˇ pehˬ, lawˬ loeˇ cehˇ meu tiˬ muiˇ pehˬ,

²³ kuˆ-ahˇ lahˇ-awˇ bi dzaˬ tsuˇ taˬ-euˬ mawˇ neˇ tseˇ mawˇ, pyehˬ taˬ-awˇ bo-euˬ mawˇ neˇ nyiˬ tseˇ mawˇ, yawˇ tiˬ yaˇ mawˇ uˬ taꞈ, kʼaˬ tsehˆ, ciˇ haˬ, ya ciˆ deuˬ jiˇ leˇ-eu meh.

²⁴ Uˇpaˬlaˇ lawˇ baˬ lawˇ deh-ahˇ jaˆ-eu Tiˇpaˬsahˇ meuˬ-ahˇ neh, nahˇ ma ga kʼehˬ paw jaˆ-eu Gaˬzaˬ meuˬ-ahˇ keuˆ ni, Uˇpaˬlaˇ lawˇ baˬ-euˬ nahˇ ma ga kʼehˬ paw jaˆ-eu miˇ kʼahˬ dawˬ tawˆ luꞈ-ahˇ, Sawˇlaˬmoˬ uˆ lahˇ-euˬ meh. UˇPaˬlaˇ lawˇ baˬ-euˬ nahˇ ma ga kʼehˬ paw kʼaˇ jawˇ-eu sahˬ paˬ dawˬ tawˆ luꞈ, aˬ yawꞈ uˆ lahˇ-eu uˬ moˆ jawˇ-awˇ, aˬ yawꞈ nehˬ-ehˇ miˇ kaˬ taꞈ-eu miˇ kʼahˬ dawˬ tawˆ luꞈ-ahˇ tsaˬ leˇ-awˇ dehꞈ-euˬ meh.

²⁵ Aˬ yawꞈ kʼaˇ dehꞈ kʼoeˇ keuˆ ni, Yuˇdaˆ miˇ kʼahˬ hawˇ-eu Iˇsaˬleˬlaˆ miˇ kʼahˬ laꞈ kʼoeˇ, Daˬ meuˬ-ahˇ neh Beˬlaˇsheˬba meuˬ-ahˇ keuˆ ni kʼaˇ jawˇ-eu tsawˇ haˬ dawˬ tawˆ luꞈ, yawˬ ha-euˬ aˬ gaꞈ yaˇ kmˇ hawˇ-eu siˬ guˬ guˬ yaˇ baw baw-ehˇ, saˇ lehˆ ni dehꞈ dzaˬ-euˬ meh.

²⁶ Sawˇlaˬmoˬ-aˬ, mahˬ laˆ lawˬ gʼeu-eu mahˬ deuˬ bi jawˇ-eu mahˬ mahˬ kuˆ oeˬ muiˇ kuˆ jaˆ-awˇ, dziˬ mahˬ tiˬ muiˇ nyiˬ heˇ mawˇ jawˇ-eu meh.

²⁷ Sahˬ paˬ Sawˇlaˬmoˬ hawˇ-eu aˬ yawꞈ-euˬ nymˇ-ahˇ kʼaˇ jawˇ kʼaˇ dzaˬ-eu tsawˇ haˬ deuˬ loˬ-eu dzaˬ dzaˬ dawˇ dawˇ gʼaˇ duˬ, biˇ paˆ taˬ-euˬ miˇ kʼahˬ kʼahˬ zaˬ tseˇ nyiꞈ kʼahˬ kʼoeˇ taˆ haw luꞈ pyaˆ luꞈ-eu sahˬ paˬ sahˬ ma deuˬ, tiˬ gʼaˬ-euˬ ba la tiˬ siˬ gʼaˇ duˬ loˬ-eu dzaˬ dzaˬ dawˇ dawˇ sha ha nehˬ-euˬ meh. Kʼaˇ loˬ-eu jeˬ dawˬ tawˆ luꞈ, aˬ myah luꞈ maˬ bi tsehˆ-iˇ ni aˬ yawꞈ maꞈ sha ha nehˬ-euˬ meh.

²⁸ Miˇ kʼahˬ kʼahˬ zaˬ kʼoeˇ deuˬ kʼoeˇ taˆ haw luꞈ pyaˆ luꞈ-eu sahˬ paˬ sahˬ ma aˬ yawꞈ gʼaˬ yawꞈ, yawˬ ha-ahˇ kʼaˇ daˇ-eu loꞈ-ehˇ, laˆ lawˬ gʼeu-eu mahˬ deuˬ hawˇ-eu mahˬ nui deuˬ bi dzaˬ-eu gʼaˇ duˬ, kʼaˇ loˬ-eu tsahˇ-ahˇ lawˬ loeˇ hawˇ-eu gʼoˆ yoeˬ tawˬ ha nehˬ-euˬ meh.

Sawˇlaˬmoˬ-euˬ zaˬ siˬ tsawˇ gahˇ

²⁹ Huiˬ dui dui-eu zaˬ siˬ tsawˇ gahˇ, naꞈ dui dui-eu noeˬ siˬ noeˬ mawˇ nya-eu jeˬ hawˇ-eu, maˬ ehˇ jiˇ coeˇ-eu nui gahˇ deuˬ, Sawˇlaˬmoˬ-ahˇ Miˬyehˇ biꞈ-euˬ meh.

³⁰ Nahˇ ma doˆ kʼehˬ paw jawˇ-eu tsawˇ gahˇ ahˇ-eu deuˬ hawˇ-eu, Iˇjiˇtuˆ miˇ kʼahˬ-ahˇ jawˇ-eu tsawˇ gahˇ ahˇ-eu tsawˇ haˬ deuˬ naˆ maˬ tseˇ, Sawˇlaˬmoˬ-euˬ tsawˇ gahˇ dzehˬ-eu meh.

³¹ Eˇzaˬlahˬ tsawˇ jeuˬ pyeuꞈ-eu Eˇdaˬ hawˇ-eu, Maˬhawˇlaˆ-euˬ aˬ li deuˬ pyeuꞈ-eu Heˬmaˬ, Kaˬlaˬkawˇlaˆ, Daˬdaˬ aˬ ha mehˇ nmˇ naˆ maˬ tseˇ aˬ yawꞈ tsawˇ gahˇ ahˇ-awˇ, tsawˇ haˬ zaˬ dawˬ tawˆ luꞈ kʼoeˇ taˆ aˬ cawˬ naˆ maˬ tseˇ tsawˇ gahˇ ahˇ dzehˬ-eu miˇ neh, aˬ yawꞈ nehˬ-ehˇ miˇ kaˬ taꞈ-eu miˇ kʼahˬ deuˬ laꞈ kʼoeˇ, aˬ yawꞈ tsawˇ myahˇ huiˬ dui dui-eu meh.

³² Aˬ yawꞈ-aˬ, dawˬ daˬ smˬ heˇ daˬ daˬ beh beh yaꞈ-awˇ, caˇ dawˬ tiˬ heˇ bymˇ dzehˬ ni yuˇ doˆ yaꞈ-euˬ meh.

³³ Leˬbaˬnoˬ miˇ kʼahˬ-ahˇ dehꞈ-eu shuˬ liˇ aˇ bawˇ-ahˇ neh, meuˬ meuˬ lahˇ kʼoeˇ taˆ dehꞈ-eu hiˇ soˆ baw duˆ-ahˇ keuˆ ni, aˇ bawˇ gaˇ kawˆ aˬ yawꞈ neh ehˇ taˬ yaꞈ-euˬ jaˆ-eu meh. Jeˬ zaˬ deuˬ, aˇ jiˇ deuˬ, miˇ tsaˬ-ahˇ joe joe-ehˇ cah-eu aˇ mawˇ deuˬ hawˇ-eu, ngaˬ shaˬ ngaˬ deˇ deuˬ gaˇ kawˆ kʼawꞈ, aˬ yawꞈ neh mehˬ taˬ tsoˆ taˬ yaꞈ-euˬ jaˆ-eu meh.

³⁴ Sawˇlaˬmoˬ zaˬ siˬ tsawˇ gahˇ ahˇ dui dui-eu gaˇ kawˆ, miˇ tsaˬ kʼoeˇ taˆ kʼaˇ jawˇ-eu sahˬ paˬ deuˬ ya gaˬ jiˇ-euˬ miˇ neh, tsawˇ haˬ pyehˬ gʼeh-awˇ, Sawˇlaˬmoˬ-euˬ dawˬ-ahˇ bi naˇ haˬ geuꞈ-iˇ-euˬ meh.