1 Sahˬpaˬ 22 - Akha

Aˬhaˆ ya shiˇ meh lehˇ Miˇkaˬyaˇ ehˇ-eu

¹ Iˇsaˬleˬlaˆ miˇ kʼahˬ hawˇ-eu Suˇliˆ miˇ kʼahˬ yaw kaˬ guiˇ maˬ deuˆ ni nyiˬ kʼoꞈ jawˇ-euˬ meh.

² Ehˇ kʼawꞈ, Yuˇdaˆ sahˬ paˬ Yeˬhawˇshaˬpaˇ gʼaˬ Iˇsaˬleˬlaˆ sahˬ paˬ Aˬhaˆ jawˇ gaˇ laˇ-euˬ meh.

³ Aˬhaˆ-aˬ, aˬ yawꞈ-euˬ gaˇ mˇ-eu yaw huiˬ yaw mahˇ deuˬ-ahˇ ehˇ nehˬ-eu, “Suˇliˆ sahˬ paˬ-euˬ laꞈ-ahˇ neh, Giˇlaˆ miˇ kʼahˬ-ahˇ jaˆ-eu Laˬmoˆ meuˬ za kʼoꞈ ni aˬ dui tiˬ jeˬ-iˬ maˬ ya jahˇ-aˬ siˬ. Meuˬ kʼoeˇ meuˬ aˬ dui-euˬ meuˬ meh.”

⁴ Kʼoeˇ naˇ Yeˬhawˇshaˬpaˇ-ahˇ Aˬhaˆ ehˇ nehˬ-eu, “Nawˇ ngaˬ nehˬ-ehˇ le-awˇ Laˬmoˆ meuˬ-ahˇ guiˇ deuˆ leˇ ma loˇ.” Yeˬhawˇshaˬpaˇ ehˇ-eu, “Nawˇ kʼaˇ dah laˇ ngeh nawˬ nehˬ-ehˇ le-eu gʼaˇ duˬ ngaˇ lehˬ hmˬ dah taˬ-euˬ ma. Ngaˬ-euˬ yehˇ deuˬ hawˇ-eu mahˬ deuˬ kʼawꞈ lehˬ hmˬ jiˇ taˬ-euˬ ma.

⁵ Ehˇ kʼawꞈ, Sahˬpaˬ Miˬyehˇ-ahˇ jeˬ huˬ naˇ haˬ haw kaˇ-euˇ.”

⁶ Kʼoeˇ naˇ, Miˬyehˇ gʼaˇ duˬ ngehˬ dah-eu tsawˇ haˬ oeˬ yaˇ gʼaˬ-ahˇ Aˬhaˆ kuˇ uiˬ-awˇ ehˇ nehˬ-eu, “Giˇlaˆ miˇ kʼahˬ Laˬmoˆ meuˬ-ahˇ ngaˇ guiˇ deuˆ leˇ-eu tsaˬ nga loˇ, maˬ tsaˬ nga loˇ lehˇ ehˇ nehˬ laꞈ sheˇ.” Aˬ yawꞈ maꞈ ehˇ-eu, “Deuˆ leˇ-awˬ. Sahˬpaˬ Miˬyehˇ nawˬ-ahˇ bi gʼaˬ leˇ nehˬ laꞈ tehꞈ-a.”

⁷ Ehˇ kʼawꞈ, Yeˬhawˇshaˬpaˇ ehˇ-eu, “Sahˬpaˬ Miˬyehˇ-ahˇ mehˬ bawˬ mˇ haw-eu gʼaˇ duˬ, Miˬyehˇ gʼaˇ duˬ ngehˬ dah-eu nui gʼaˬ maˬ paˇ jawˇ meh loˇ.”

⁸ Aˬhaˆ ehˇ-eu, “Ymˇlahˬ-euˬ aˬ li Miˇkaˬyaˇ lehˇ myahˇ-euˬ tiˬ gʼaˬ jawˇ-a siˬ. Ehˇ kʼawꞈ, aˬ yawꞈ ngaˬ-euˬ gʼaˇ duˬ yaw muiˬ tiˬ jeˬ-iˬ maˬ ngehˬ dah nehˬ laꞈ-eu miˇ neh, aˬ yawꞈ-ahˇ ngaˇ bye dui dui nya. Aˬ myah luꞈ maˬ muiˬ-eu jeˬ tehꞈ-ehˇ ngehˬ dah nehˬ laꞈ-eu meh.” Yeˬhawˇshaˬpaˇ ehˇ-eu, “Nawˇ teu loꞈ-ehˇ ehˇ-eu maˬ tsaˬ-eu paˬ.”

⁹ Kʼoeˇ naˇ, aˬ yawꞈ-euˬ saˇ naˇ gaˇ mˇ-eu yaw huiˬ yaw mahˇ tiˬ gʼaˬ-ahˇ Aˬhaˆ kuˇ-awˇ, “Miˇkaˬyaˇ-ahˇ yaw kawˇ-ehˇ sheuˬ laꞈ-awˬ” lehˇ ehˇ nehˬ-euˬ meh.

¹⁰ Iˇsaˬleˬlaˆ sahˬ paˬ Aˬhaˆ hawˇ-eu Yuˇdaˆ sahˬ paˬ Yeˬhawˇshaˬpaˇ aˬ nyaꞈ-aˬ, sahˬ paˬ dm-eu dm gʼaˬ dm lmˇ dm-awˇ, Saˬmaˬliˆ meuˬ laꞈ nyiˇ jaˆ-eu cehˇ baw duˬ-ahˇ, dzoeˬ dzaˬ nuiˇ mahˬ kʼoeˇ taˆ nuiˇ luꞈ-eu meh. Miˬyehˇ gʼaˇ duˬ ngehˬ dah-eu tsawˇ haˬ dawˬ tawˆ luꞈ kʼawꞈ, aˬ yawꞈ nyaꞈ-euˬ mehˬ shi Miˬyehˇ gʼaˇ duˬ ngehˬ dah ngehˬ dah-ehˇ jawˇ-eu meh.

¹¹ Aˬ yawꞈ maꞈ laꞈ kʼoeˇ, Sheˬnaˬnahˬ-euˬ aˬ li Zeˬdaˬkiˇ gʼaˬ shmˇ uˬ coeˇ tehˆ-awˇ, “Heu loꞈ-ehˇ gʼeh-eu uˬ coeˇ neh Suˇliˆ tsawˇ haˬ deuˬ-ahˇ naw maꞈ guiˇ deuˆ-awˇ, naw maꞈ deuˆ gʼaˬ tehꞈ-a lehˇ Sahˬpaˬ Miˬyehˇ ehˇ-eu meh” lehˇ ngehˬ dah-euˬ meh.

¹² Miˬyehˇ gʼaˇ duˬ ngehˬ dah-eu tsawˇ haˬ dawˬ tawˆ luꞈ kʼawꞈ, aˬ yawꞈ neh kʼaˇ ehˇ-euˬ loꞈ-ehˇ ehˇ-eu meh. “Laˬmoˆ meuˬ-ahˇ guiˇ deuˆ leˇ-awˬ. Naw maꞈ gʼaˬ leˇ tehꞈ-a. Sahˬpaˬ Miˬyehˇ naw maꞈ-ahˇ bi gʼaˬ leˇ laꞈ tehꞈ-a” lehˇ aˬ yawꞈ maꞈ ehˇ-eu meh.

¹³ Kʼoeˇ ngeh, Miˇkaˬyaˇ-ahˇ kuˇ laˬ-iˇ-euˬ yaw huiˬ yaw mahˇ kʼoeˇ gʼaˬ Miˇkaˬyaˇ-ahˇ ehˇ nehˬ-eu, “Sahˬ paˬ guiˇ deuˆ leˇ naˇ gʼaˬ leˇ tehꞈ-a lehˇ, Miˬyehˇ gʼaˇ duˬ ngehˬ dah-eu tsawˇ haˬ dawˬ tawˆ luꞈ ehˇ-eu meh. Nawˇ kʼawꞈ kʼoeˇ loꞈ-ehˇ ehˇ-eu tsaˬ tehꞈ-a.”

¹⁴ Ehˇ kʼawꞈ, Miˇkaˬyaˇ ehˇ-eu,“Sahˬpaˬ Miˬyehˇ neh kʼaˇ bi ehˇ-euˬ jeˬ tehꞈ-ehˇ ngaˇ ehˇ ma lehˇ, dehꞈ luꞈ-eu Sahˬpaˬ Miˬyehˇ mehˬ shi ngaˇ saˇ jaˇ dzaˬ-eu ma.”

¹⁵ Sahˬ paˬ Aˬhaˆ-euˬ mehˬ shi Miˇkaˬyaˇ le keuˆ ngeh, “Miˇkaˬyaˇ-oˇ, sahˬ paˬ Yeˬhawˇshaˬpaˇ nga nyaꞈ Laˬmoˆ meuˬ-ahˇ guiˇ deuˆ leˇ-eu tsaˬ meh loˇ, maˬ tsaˬ-a loˇ” lehˇ sahˬ paˬ Aˬhaˆ naˇ haˬ ngeh, “Deuˆ leˇ-awˬ. Naw nyaꞈ gʼaˬ leˇ tehꞈ-a. Sahˬpaˬ Miˬyehˇ naw nyaꞈ-ahˇ bi gʼaˬ leˇ laꞈ tehꞈ-a” lehˇ Miˇkaˬyaˇ ehˇ-eu meh.

¹⁶ Ehˇ kʼawꞈ, Aˬhaˆ ehˇ-eu, “Sahˬpaˬ Miˬyehˇ-euˬ tsawˇ myahˇ uˬ moˆ nawˇ ngaˬ-ahˇ dawˬ ngehˬ cawˬ ngeh, dawˇ coe ni ngehˬ-awˬ tmˇ-awˬ lehˇ ngaˇ nawˬ-ahˇ aˇ myaˆ poˆ ya ehˇ nehˬ nmˇ.”

¹⁷ Miˇkaˬyaˇ ehˇ-eu, “Yawˇ bo-eu yaw sahˇ maˬ baw-eu yawˇ yawˇ maꞈ loꞈ-ehˇ, Iˇsaˬleˬlaˆ yehˇ deuˬ gawˬ jawˬ gawˬ duˇ doe ni cehˆ byaˆ taˬ-euˬ ngaˬ-ahˇ mawˇ laˇ miˇ-a. Kʼoeˇ ngeh jawˇ, ‘Tsawˇ haˬ heu deuˬ-ahˇ aˬ yuiꞈ geuꞈ-awˇ sheuˬ gʼeh nehˬ-eu gʼaˬ maˬ jawˇ-a. Aˬ yawꞈ maꞈ-ahˇ ciˬ cuˇ ni bi gʼoꞈ-iˇ-awˬ’ lehˇ Sahˬpaˬ Miˬyehˇ ehˇ-eu meh.”

¹⁸ Yeˬhawˇshaˬpaˇ-ahˇ Aˬhaˆ ehˇ nehˬ-eu, “Tsawˇ haˬ heu gʼaˬ ngaˬ-euˬ gʼaˇ duˬ yaw muiˬ tiˬ jeˬ-iˬ maˬ ngehˬ dah nehˬ laꞈ-a lehˇ, ngaˇ nawˬ-ahˇ ehˇ-euˬ maˬ tsaˬ nga loˇ. Aˬ myah luꞈ maˬ muiˬ-eu jeˬ tehꞈ-ehˇ ngehˬ dah-eu meh.”

¹⁹ Miˇkaˬyaˇ paˇ ehˇ-eu, “Sahˬpaˬ Miˬyehˇ ehˇ gaˇ naˇ haˬ sheˇ. Sahˬpaˬ Miˬyehˇ-aˬ, mˬ kʼoeˇ taˆ aˬ yawꞈ-euˬ nuiˇ mahˬ-ahˇ nuiˇ luꞈ-awˇ, aˬ yawꞈ-euˬ mˬ taˆ gʼaˬ kʼehˇ dawˬ tawˆ luꞈ, aˬ yawꞈ dawˬ peh yawꞈ luꞈ-eu ngaˬ-ahˇ mawˇ laˇ miˇ-a.

²⁰ Kʼoeˇ ngeh, Laˬmoˆ meuˬ-ahˇ Aˬhaˆ le-awˇ aˬ cawˬ neh bi sehꞈ ni, aˬ yawꞈ-ahˇ aˬ suˇ gʼaˬ mehˇ shuiˇ shuiˇ-iˇ nmˇ lehˇ, Sahˬpaˬ Miˬyehˇ ehˇ ngeh, mˬ taˆ gʼaˬ kʼehˇ kʼoeˇ deuˬ tiˬ gʼaˬ tiˬ jeˬ ehˇ-eu meh.

²¹ Kʼoeˇ ngeh, yaw sahˇ tiˬ sahˇ mehˬ hu paw doˆ laˇ-awˇ, Sahˬpaˬ Miˬyehˇ-euˬ mehˬ shi le-awˇ, ‘Aˬ yawꞈ-ahˇ ngaˇ mehˇ shuiˇ shuiˇ-iˇ ma’ lehˇ ehˇ-eu meh.

²² Nawˇ aˬ joˆ-ehˇ mehˇ shuiˇ shuiˇ-eu gʼeh te lehˇ Sahˬpaˬ Miˬyehˇ naˇ haˬ ngeh, ‘Ngaˇ iˇ-awˇ, Aˬhaˆ-ahˇ Miˬyehˇ gʼaˇ duˬ kʼaˇ ngehˬ dah nehˬ-eu deuˬ jaˬ myawꞈ myawꞈ ni jahˇ-iˇ ma’ lehˇ, yaw sahˇ kʼoeˇ sahˇ ehˇ kʼoꞈ nehˬ-euˬ meh. Sahˬpaˬ Miˬyehˇ gʼeh, ‘Iˇ-awˇ mehˇ shuiˇ shuiˇ haw-iˇ-awˬ. Shuiˇ tawˆ nya-eu baw le’ lehˇ ehˇ-eu meh.

²³ Heu-aˬ, aˬ joˆ-ehˇ pyeuꞈ dzeuˇ yaꞈ-euˬ gaˇ kawˆ meh. Nawˬ-ahˇ Miˬyehˇ gʼaˇ duˬ ngehˬ dah nehˬ-eu deuˬ jaˬ myawꞈ myawꞈ ni, Sahˬpaˬ Miˬyehˇ neh jahˇ nehˬ gʼaˬ taˬ-euˬ meh. Luˬ-iˇ seˇ-iˇ-eu jeˬ-ahˇ nawˇ ya tahˬ puˬ tehꞈ-a lehˇ, Sahˬpaˬ Miˬyehˇ neh ehˇ tsehˆ gʼaˬ taˬ-euˬ meh.”

²⁴ Kʼoeˇ naˇ, Miˬyehˇ gʼaˇ duˬ ngehˬ dah-eu Zeˬdaˬkiˇ gʼaˬ Miˇkaˬyaˇ jawˇ gaˇ le-awˇ, Miˇkaˬyaˇ-euˬ baˬ ba-ahˇ tehˆ-awˇ ehˇ-eu, “Sahˬpaˬ Miˬyehˇ-euˬ yaw sahˇ ngaˇ jawˇ gaˇ neh aˬ myah paˇ doˆ-iˇ-awˇ, nawˬ-ahˇ dawˬ paˇ ngehˬ cawˬ le taˬ.”

²⁵ Miˇkaˬyaˇ ehˇ-eu, “Nymˇ naˇ kʼah paw nawˇ ya cehˆ zaꞈ-iˇ-eu aˇ yamˬ keuˆ le ngeh, gaˇ kawˆ heu nawˇ ya siˬ duˬ tehꞈ-a.”

²⁶ Kʼoeˇ naˇ, Aˬhaˆ-euˬ gaˇ mˇ-eu yaw huiˬ yaw mahˇ tiˬ gʼaˬ-ahˇ Aˬhaˆ heu loꞈ-ehˇ ehˇ nehˬ-euˬ meh. “Miˇkaˬyaˇ-ahˇ paꞈ-awˇ, meuˬ-ahˇ uˆ lahˇ-eu gʼaˬ pyeuꞈ-eu Aˬmoˬ hawˇ-eu sahˬ paˬ zaˬ yo Yawˇshaˆ aˬ nyaꞈ jawˇ gaˇ nyehꞈ gʼeh nehˬ-awˬ.

²⁷ Ngaˇ tiˬ jeˬ-iˬ maˬ ca ni gʼoꞈ keuˆ laˇ ngeh keuˆ ni, tsawˇ haˬ heu gʼaˬ-ahˇ tawˬ-ahˇ nyehꞈ ahˇ-awˇ, kaˬ muˇ hawˇ-eu iˇ cuꞈ tehꞈ-ehˇ bi dzaˬ bi dawˇ-eu laꞈ kʼoeˇ bi jawˇ tawˬ-awˬ lehˇ ehˇ nehˬ lawˬ.”

²⁸ Miˇkaˬyaˇ ehˇ-eu, “Nawˇ tiˬ jeˬ-iˬ maˬ ca laˇ-ehˇ gʼoꞈ keuˆ le lawˬ naˇ, Sahˬpaˬ Miˬyehˇ ngaˬ-ahˇ gʼoe-awˇ dawˬ ngehˬ-euˬ maˬ ngeuˇ-aˇ. Ngaˬ neh ehˇ-euˬ dawˬ-ahˇ yawˬ gʼaˬ na luꞈ yaw muiˬ paˬ-ehˇ naˇ haˬ taˬ-awˬ.”

Aˬhaˆ shiˇ-euˬ

²⁹ Kʼoeˇ naˇ, Iˇsaˬleˬlaˆ sahˬ paˬ Aˬhaˆ hawˇ-eu Yuˇdaˆ sahˬ paˬ Yeˬhawˇshaˬpaˇ aˬ nyaꞈ, Giˇlaˆ miˇ kʼahˬ-ahˇ jaˆ-eu Laˬmoˆ meuˬ-ahˇ guiˇ deuˆ leˇ-euˬ meh.

³⁰ Yeˬhawˇshaˬpaˇ-ahˇ Aˬhaˆ ehˇ nehˬ-eu, “Aˇ nyaꞈ guiˇ deuˆ leˇ ngeh, ngaˬ-ahˇ aˬ cawˬ maˬ bi haw siˬ-eu gʼaˇ duˬ, ngaˇ mehˬ tsoeˬ pyehˇ-awˇ guiˇ deuˆ ma. Ehˇ kʼawꞈ, nawˇ gʼaˬ sahˬ paˬ-euˬ dm gʼaˬ dm lmˇ dm-awˇ deuˆ-awˬ.” Kʼoeˇ naˇ, Iˇsaˬleˬlaˆ sahˬ paˬ gʼaˬ aˬ cawˬ maˬ bi haw siˬ ni, mehˬ tsoeˬ pyehˇ-awˇ guiˇ deuˆ-euˬ meh.

³¹ Suˇliˆ sahˬ paˬ-aˬ, aˬ yawꞈ-euˬ mahˬ laˆ lawˬ deuˬ kʼoeˇ taˆ uˆ lahˇ-eu yaw huiˬ smˬ tseˇ gʼaˬ-ahˇ, “Iˇsaˬleˬlaˆ sahˬ paˬ-ahˇ maˬ ngeuˇ naˇ tiˬ gʼaˬ-ahˇ-iˬ taˬ deuˆ” lehˇ ehˇ nehˬ taˬ-euˬ meh.

³² Kʼoeˇ miˇ neh, sahˬ paˬ Yeˬhawˇshaˬpaˇ-ahˇ aˬ yawꞈ maꞈ ya mawˇ ngeh, Iˇsaˬleˬlaˆ sahˬ paˬ nga lehˇ noeˬ-awˇ, aˬ yawꞈ-ahˇ tehꞈ-ehˇ ga jawˬ-awˇ deuˆ-euˬ meh. Ehˇ kʼawꞈ, Yeˬhawˇshaˬpaˇ guˇ doˆ laˇ ngeh,

³³ Iˇsaˬleˬlaˆ sahˬ paˬ maˬ ngeuˇ nya lehˇ naˇ haˬ siˬ-awˇ, maˬ deuˆ ni byehˇ-euˬ meh.

³⁴ Suˇliˆ yehˇ tiˬ gʼaˬ neh beuˆ gʼeh leꞈ-euˬ kaˆ myaˬ tiˬ myaˬ, sahˬ paˬ Aˬhaˆ dm lmꞈ-eu shmˇ mehˬ tsoeˬ-euˬ maˇ byoe-ahˇ maˬ noeˬ maˬ duˇ-ehˇ zaw leˇ-awˇ, Aˬhaˆ-ahˇ beuˆ tahˬ-euˬ meh. Kʼoeˇ ngeh, “Ngaˬ-ahˇ beuˆ zaw-euˬ miˇ-a. Mehˬ nah paw zeuˆ pyawˇ-awˇ guiˇ deuˆ luꞈ gaˇ neh iˇ doˆ gʼeh-awˬ” lehˇ, aˬ yawꞈ-euˬ mahˬ laˆ lawˬ teh-eu gʼaˬ-ahˇ Aˬhaˆ ehˇ nehˬ-euˬ meh.

³⁵ Guiˇ yaw kʼaˆ-ehˇ deuˆ luꞈ ngeh, sahˬ paˬ Aˬhaˆ gʼaˬ aˬ yawꞈ-euˬ mahˬ laˆ lawˬ laꞈ kʼoeˇ aˬ cawˬ-ahˇ kʼawˬ daˇ-awˇ, Suˇliˆ tsawˇ haˬ deuˬ jawˇ paw ciꞈ pyawˇ-awˇ jawˇ-euˬ meh. Aˬ yawꞈ-euˬ gʼawˇ mawˇ-ahˇ kaˆ myaˬ zaw leˇ-euˬ tsahˇ-ahˇ shiˬ yoeˇ doˆ le-awˇ, laˆ lawˬ uˬ kʼawˬ yoeˇ pymˬ-euˬ meh. Kʼoeˇ naˇ, uˬ ciꞈ uˬ taw taw le ngeh aˬ yawꞈ shiˇ tsehˆ-euˬ meh.

³⁶ Nahˇ ma ga ahˇ mawꞈ laˇ ngeh, Iˇsaˬleˬlaˆ guiˇ maꞈ deuˬ yawˬ gʼaˬ na luꞈ yawˬ ha-euˬ meuˬ-ahˇ gʼoꞈ-iˇ-eu gʼaˇ duˬ, dawˬ biꞈ gʼeh leꞈ-euˬ meh.

³⁷ Sahˬ paˬ Aˬhaˆ kʼoeˇ loꞈ-ehˇ shiˇ-awˇ, aˬ yawꞈ-euˬ gʼawˇ mawˇ Saˬmaˬliˆ meuˬ-ahˇ baꞈ kʼoꞈ gʼeh-awˇ, kʼoeˇ gaˇ baꞈ pahˬ nehˬ-euˬ meh.

³⁸ Aˬ yawꞈ-euˬ laˆ lawˬ kʼoeˇ laˇ-ahˇ, Saˬmaˬliˆ meuˬ-ahˇ jaˆ-eu lah laꞈ kʼoeˇ tsiˬ shawˇ-euˬ meh. Sahˬpaˬ Miˬyehˇ neh ehˇ taˬ-eu loꞈ-ehˇ, aˬ yawꞈ-euˬ shiˬ-ahˇ aˬ kuiˬ myeuꞈ-awˇ, meh maˬ laˇ deuˬ kʼawꞈ kʼoeˇ gaˇ iˇ cuꞈ dzuiꞈ-euˬ meh.

³⁹ Aˬ yawꞈ jawˇ-eu nymˇ-ahˇ ya ma juiˇ taꞈ tsoꞈ taˬ-euˬ gaˇ kawˆ hawˇ-eu, aˬ yawꞈ neh tsoˆ-euˬ meuˬ deuˬ gaˇ kawˆ ahˇ leˇ-ehˇ, sahˬ paˬ Aˬhaˆ neh kʼaˇ mˇ kʼaˇ shaˇ yaꞈ-euˬ yawˬ jeˬ na luꞈ, Iˇsaˬleˬlaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

⁴⁰ Aˬ yawꞈ shiˇ ngeh, aˬ yawꞈ-euˬ aˬ li Aˬhaˬziˇ gʼaˬ, aˬ yawꞈ-euˬ dah zaˇ sahˬ paˬ geuꞈ-euˬ meh.

Yuˇdaˆ sahˬ paˬ Yeˬhawˇshaˬpaˇ

⁴¹ Sahˬ paˬ Aˬhaˆ Iˇsaˬleˬlaˆ miˇ kʼahˬ-ahˇ uˆ lahˇ-eu oeˬ kʼoꞈ tiˬ kʼoꞈ-ahˇ, Aˬsaˬ-euˬ aˬ li Yeˬhawˇshaˬpaˇ gʼaˬ Yuˇdaˆ sahˬ paˬ pyeuꞈ laˇ-euˬ meh.

⁴² Yeˬhawˇshaˬpaˇ Yuˇdaˆ sahˬ paˬ pyeuꞈ laˇ ngeh, smˬ tseˇ ngaˬ kʼoꞈ kʼawˆ-awˇ, Yeˬluˇsaˬlehˬ meuˬ-ahˇ jawˇ-awˇ nyiˬ tseˇ ngaˬ kʼoꞈ uˆ lahˇ-euˬ meh. Aˬ yawꞈ-euˬ aˬ ma-aˬ, Shiˇlaˬhiˇ-euˬ aˬ buˇ Aˬzuˇbaˬ meh.

⁴³ Aˬ yawꞈ-euˬ mehˬ hu sahˬ paˬ geuꞈ dzeuˇ yaꞈ-euˬ aˬ yawꞈ-euˬ aˬ da Aˬsaˬ loꞈ-ehˇ, Sahˬpaˬ Miˬyehˇ mehˬ shi yaw tsaˬ yaw dawˇ jeˬ tehꞈ-ehˇ aˬ yawꞈ mˇ-euˬ meh. Ehˇ kʼawꞈ, lawˇ ciꞈ zaˬ deuˬ-euˬ uˬ duˬ tahˬ-eu jawˇ duˬ kʼoeˇ deuˬ-ahˇ aˬ yawꞈ maˬ laˆ cawˆ-ehˇ, Yuˇdaˆ miˇ kʼahˬ zaˬ deuˬ kʼoeˇ gaˇ lawˇ-eu shehˇ-eu jeˬ mˇ-awˇ, yaw saw jeˬ doꞈ damˬ-euˬ meh.

⁴⁴ Yeˬhawˇshaˬpaˇ-aˬ, Iˇsaˬleˬlaˆ sahˬ paˬ nehˬ-ehˇ tsaˬ leˇ dzoeˇ leˇ-eu laꞈ kʼoeˇ dehꞈ-euˬ meh.

⁴⁵ Yeˬhawˇshaˬpaˇ neh mˇ-euˬ huiˬ-eu gaˇ deuˬ maˬ ehˇ, guiˇ deuˆ-euˬ gaˇ kawˆ deuˬ maˬ ehˇ, aˬ yawꞈ neh kʼaˇ mˇ kʼaˇ shaˇ-euˬ yawˬ jeˬ na luꞈ, Yuˇdaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

⁴⁶ Aˬ yawꞈ-euˬ aˬ da Aˬsaˬ-euˬ ziˇ-ahˇ neh, lawˇ ciꞈ zaˬ deuˬ-euˬ lawˇ duˬ shehˇ duˬ-ahˇ jawˇ luꞈ-eu kʼaˬ dzeˇ zaˬ meh maˬ laˇ hawˇ-eu zaˬ miˬ zaˬ meh maˬ laˇ deuˬ dawˬ tawˆ luꞈ-ahˇ, aˬ yawꞈ-euˬ miˇ kʼahˬ laꞈ kʼoeˇ neh aˬ yawꞈ teh dzeh-euˬ meh.

⁴⁷ Eˬdoˬ miˇ kʼahˬ laꞈ kʼoeˇ sahˬ paˬ maˬ jawˇ-ehˇ, Yuˇdaˆ sahˬ paˬ neh tseˇ doˆ nehˬ-euˬ tsawˇ haˬ deuˬ uˆ lahˇ-euˬ meh.

⁴⁸ Sahˬpaˬ Yeˬhawˇshaˬpaˇ-aˬ, Awˇpiˇlaˆ miˇ kʼahˬ-ahˇ shuiˇ tawˬ laˬ-iˇ-eu gʼaˇ duˬ, iˬ ma laˆ shaˆ-ahˇ iˇ tsehˆ laˇ tsehˆ nya-eu saˇ baoˬ jahˇ-euˬ meh. Ehˇ kʼawꞈ, saˇ baoˬ kʼoeˇ deuˬ Eˬzoˇgeˇbaˬ meuˬ-ahˇ cawˆ-iˇ-awˇ, tiˬ jawˇ-iˬ maˬ paˇ cah ni byehˇ dzeh-euˬ meh.

⁴⁹ Iˇsaˬleˬlaˆ sahˬ paˬ Aˬhaˬziˇ kʼawꞈ, aˬ yawꞈ-euˬ tsawˇ haˬ deuˬ-ahˇ sahˬ paˬ Yeˬhawˇshaˬpaˇ-euˬ tsawˇ haˬ deuˬ nehˬ-ehˇ iˬ ma laˆ shaˆ-ahˇ saˇ baoˬ dziˬ-awˇ bi cah ma lehˇ ehˇ-eu meh. Ehˇ kʼawꞈ, aˬ yawꞈ-euˬ ehˇ dawˬ-ahˇ Yeˬhawˇshaˬpaˇ maˬ geuꞈ nehˬ-a.

⁵⁰ Yeˬhawˇshaˬpaˇ ziˇ jiˇ-awˇ, Daˬbiˇ-euˬ meuˬ-ahˇ jaˆ-eu sahˬ paˬ-euˬ lmˬ bymˇ-ahˇ baꞈ pahˬ nehˬ-euˬ meh. Aˬ yawꞈ-euˬ aˬ li Yeˬhawˇlamˬ gʼaˬ, aˬ yawꞈ-euˬ dah zaˇ sahˬ paˬ geuꞈ-euˬ meh.

Iˇsaˬleˬlaˆ sahˬ paˬ Aˬhaˬziˇ

⁵¹ Yuˇdaˆ miˇ kʼahˬ-ahˇ sahˬ paˬ Yeˬhawˇshaˬpaˇ uˆ lahˇ-eu shiꞈ kʼoꞈ tiˬ kʼoꞈ-ahˇ, Aˬhaˆ-euˬ aˬ li Aˬhaˬziˇ gʼaˬ Iˇsaˬleˬlaˆ sahˬ paˬ pyeuꞈ laˇ-awˇ, Saˬmaˬliˆ meuˬ-ahˇ jawˇ-awˇ nyiˬ kʼoꞈ uˆ lahˇ-euˬ meh.

⁵² Iˇsaˬleˬlaˆ miˇ kʼahˬ iˬ baˇ mˇ ni sheuˬ gʼeh-euˬ deuˬ pyeuꞈ-eu, aˬ yawꞈ-eu aˬ da Aˬhaˆ, aˬ yawꞈ-euˬ aˬ ma Yeˬsaˬbeˬlaˇ hawˇ-eu, sahˬ paˬ Yeˬyawˇbamˬ aˬ ha maꞈ loꞈ-ehˇ, Sahˬpaˬ Miˬyehˇ mehˬ shi aˬ yawꞈ iˬ baˇ mˇ-euˬ meh.

⁵³ Aˬ yawꞈ-euˬ mehˬ hu sahˬ paˬ geuꞈ dzeuˇ yaꞈ-euˬ aˬ yawꞈ-euˬ aˬ da loꞈ-ehˇ, Baˬlaˇ miˬ yehˇ-ahˇ aˬ yawꞈ uˬ duˬ tahˬ-eu laꞈ kʼoeˇ, Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ nui ma pehˇ-eu jeˬ aˬ yawꞈ mˇ-euˬ meh.