1 Sahˬpaˬ 21 - Akha

Naˬboˆ-euˬ aˬ gaꞈ yaˇ kmˇ

¹ Yeˬsaˬleˬlaˇ meuˬ-ahˇ jaˆ-eu sahˬ paˬ Aˬhaˆ-euˬ nymˇ dawˬ peh, Naˬboˆ lehˇ myahˇ-euˬ tsawˇ haˬ tiˬ gʼaˬ-euˬ aˬ gaꞈ yaˇ kmˇ tiˬ kmˇ jaˆ-eu meh.

² Tiˬ nah keuˆ laˇ ngeh, Naˬboˆ-ahˇ Aˬhaˆ heu loꞈ-ehˇ ehˇ nehˬ-euˬ meh. “Nawˬ-euˬ aˬ gaꞈ yaˇ kmˇ ngaˬ-ahˇ biꞈ laꞈ-awˬ. Ngaˬ-euˬ nymˇ dawˬ peh jaˆ-eu miˇ neh, sahˬ lahˬ gʼawˬ daˇ ka dzaˬ-eu gʼaˇ duˬ geuꞈ mawꞈ nya. Yaˇ kmˇ heu kmˇ aˇ poeˬ, heu naˆ maˬ tseˇ muiˬ-eu aˬ gaꞈ yaˇ kmˇ tiˬ kmˇ ngaˇ nawˬ-ahˇ biꞈ ma. Aˇ poeˬ geuꞈ mawꞈ nya lehˇ ngeuˇ naˇ kʼawꞈ, oꞈ-eu geuˇ-eu loꞈ-ehˇ biꞈ ma.”

³ Naˬboˆ ehˇ-eu, “Aˬ gaꞈ yaˇ kmˇ heu kmˇ-aˬ, ngaˬ-euˬ aˬ poeˬ aˬ bawˇ deuˬ-euˬ jeˬ biˇ pyeuꞈ-eu miˇ neh, nawˬ-ahˇ biꞈ-eu gʼaˇ duˬ Sahˬpaˬ Miˬyehˇ nui ma maˬ tsaˬ-a.”

⁴ Aˬhaˆ-aˬ, iˇ kahˇ-ahˇ gʼoꞈ leˇ-awˇ, Naˬboˆ neh aˬ yawꞈ-ahˇ ehˇ nehˬ-euˬ dawˬ-ahˇ nui ma pehˇ-eu laꞈ kʼoeˇ, nui ma tiˬ pawꞈ-iˬ maˬ saˇ ni, yuꞈ zaˇ kʼoeˇ taˆ myaˆ pyawˬ kaˇ pyawˇ paw ciˬ pyawˇ-awˇ yuꞈ-eu laꞈ kʼoeˇ, maˬ dzaˬ maˬ dawˇ ni jawˇ-euˬ meh.

⁵ Aˬ yawꞈ-euˬ miˬ zaˬ Yeˬsaˬbeˬlaˇ aˬ yawꞈ jawˇ gaˇ iˇ-awˇ, “Aˬ jeˬ miˇ neh nawˇ nui ma cawˆ-awˇ maˬ dzaˬ maˬ dawˇ ni jawˇ te” lehˇ naˇ haˬ-euˬ meh.

⁶ Aˬ yawꞈ ehˇ-eu, “Naˬboˆ neh ngaˬ-ahˇ ehˇ nehˬ laꞈ-euˬ dawˬ baˬ da neh, ngaˇ heu loꞈ-ehˇ jawˇ luꞈ-eu ma. Aˬ yawꞈ-euˬ aˬ gaꞈ yaˇ kmˇ ngaˇ zeuˇ mawꞈ nya lehˇ aˬ yawꞈ-ahˇ ngaˇ ehˇ nehˬ-euˬ ma. Maˬ ngeuˇ naˇ kʼawꞈ, aˬ yawꞈ nui kʼahˇ shiˇ naˇ, aˬ gaꞈ yaˇ kmˇ yawˬ kmˇ yawˬ biꞈ tsoeˬ nehˬ ma lehˇ ehˇ nehˬ-euˬ ma. Ehˇ kʼawꞈ, aˬ gaꞈ yaˇ kmˇ kʼoeˇ kmˇ ngaˬ-ahˇ maˬ biꞈ nya lehˇ aˬ yawˬ ehˇ-eu meh.”

⁷ Yeˬsaˬbeˬlaˇ ehˇ-eu, “Nawˇ Iˇsaˬleˬlaˆ miˇ kʼahˬ-ahˇ uˆ lahˇ luꞈ-eu sahˬ paˬ maˬ ngeuˇ te loˇ. Yuꞈ zaˇ-ahˇ yuꞈ luꞈ-eu tuˇ laˇ-awˇ, nui ma saˇ lehˆ ni taˬ-awˇ dzaˬ-awˬ dawˇ-awˬ. Naˬboˆ-euˬ aˬ gaꞈ yaˇ kmˇ nawˇ za ni ngaˇ jahˇ nehˬ ma.”

⁸ Kʼoeˇ naˇ, Yeˬsaˬbeˬlaˇ sahˬ boꞈ heu myaˆ taꞈ boꞈ-awˇ, Aˬhaˆ-euˬ laꞈ ma dehˬ-awˇ, Aˬhaˆ-euˬ jmˬ diˬ-awˇ, Yeˬzaˬleˬlaˇ meuˬ laꞈ kʼoeˇ jawˇ-eu yaw huiˬ yaw mahˇ deuˬ hawˇ-eu aˬ yuiꞈ aˬ tsu deuˬ-ahˇ bi biꞈ ha-iˇ-euˬ meh.

⁹ Sahˬ boꞈ kʼoeˇ deuˬ laꞈ kʼoeˇ heu loꞈ-ehˇ boꞈ taˬ-euˬ meh. “Maˬ dzaˬ maˬ dawˇ ni nah lah ya lah-eu aˇ nah tiˬ nah tseˇ doˆ-awˇ, tsawˇ haˬ dawˬ tawˆ luꞈ kuˇ uiˬ-awˬ. Kʼoeˇ naˇ, Naˬboˆ-ahˇ taˬ huiˬ taˬ mahˇ nehˬ-awˬ.

¹⁰ Tsawˇ haˬ yaw haiˬ tiˬ gʼaˬ nyiˬ gʼaˬ-ahˇ kʼehˇ-awˇ, Miˬyehˇ hawˇ-eu sahˬ paˬ aˬ nyaꞈ-ahˇ Naˬboˆ neh yaˬ kʼehˇ yaˬ-euˬ meh lehˇ jaˬ myawꞈ bi myawꞈ-awˬ. Kʼoeˇ naˇ, aˬ yawꞈ-ahˇ meuˬ laꞈ nyiˇ sheuˬ doˆ gʼeh-awˇ, kʼaˬ lo biˬ sehꞈ-awˬ.”

¹¹ Yeˬzaˬleˬlaˇ meuˬ ahˇ jawˇ-eu yaw huiˬ yaw mahˇ deuˬ hawˇ-eu aˬ yuiꞈ aˬ tsu deuˬ-aˬ, Yeˬsaˬbeˬlaˇ neh dawˬ biꞈ taˬ-euˬ loꞈ-ehˇ mˇ-euˬ meh.

¹² Maˬ dzaˬ maˬ dawˇ ni nah lah ya lah-eu aˇ nah tiˬ nah aˬ yawꞈ maꞈ tseˇ doˆ-awˇ tsawˇ haˬ dawˬ tawˆ luꞈ kuˇ uiˬ-awˇ, Naˬboˆ-ahˇ taˬ huiˬ taˬ mahˇ nehˬ-euˬ meh.

¹³ “Miˬyehˇ hawˇ-eu sahˬ paˬ-ahˇ Naˬboˆ neh yaˬ kʼehˇ yaˬ-euˬ meh” lehˇ, tsawˇ haˬ heu myaˆ ni gʼeh-eu mehˬ shi haiˬ-eu tsawˇ haˬ kʼoeˇ nyiˬ gʼaˬ saˇ kiˇ kamˬ-euˬ meh. Kʼoeˇ ngeh, Naˬboˆ-ahˇ meuˬ laꞈ nyiˇ sheuˬ doˆ gʼeh-awˇ, kʼaˬ lo neh biꞈ sehꞈ-euˬ meh.

¹⁴ Kʼoeˇ naˇ, Naˬboˆ-ahˇ kʼaˬ lo neh biꞈ sehꞈ gʼaˬ-euˬ gaˇ kawˆ Yeˬsaˬbeˬlaˇ-ahˇ ehˇ gaˬ leˇ-euˬ meh.

¹⁵ Gaˇ kawˆ kʼoeˇ Yeˬsaˬbeˬlaˇ ya gaˬ-euˬ nehˬ-ehˇ, Aˬhaˆ-ahˇ heu loꞈ-ehˇ ehˇ nehˬ-euˬ meh. “Naˬboˆ shiˇ-euˬ meh. Aˬ yawꞈ nawˬ-ahˇ maˬ ahˬ lehˇ ehˇ-eu aˬ gaꞈ yaˇ kmˇ kʼoeˇ kmˇ nawˇ tsaˬ geuꞈ-iˇ-awˬ.”

¹⁶ Kʼoeˇ ngeh, aˬ gaꞈ yaˇ kmˇ kʼoeˇ kmˇ tsaˬ geuꞈ-iˇ-eu gʼaˇ duˬ, Aˬhaˆ tiˬ poˆ tehꞈ-ehˇ doˆ-iˇ-euˬ meh.

¹⁷ Kʼoeˇ naˇ, Tiˇshaˬbeˬ meuˬ-ahˇ jawˇ-eu Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Eˇliˇyaˆ-ahˇ, Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

¹⁸ “Saˬmaˬliˆ meuˬ-ahˇ jawˇ-eu sahˬ paˬ Aˬhaˆ jawˇ gaˇ nawˇ iˇ-awˬ. Naˬboˆ-euˬ aˬ gaꞈ yaˇ kmˇ-ahˇ tsaˬ geuꞈ-eu lehˇ, yaˇ kmˇ kʼoeˇ kmˇ laꞈ kʼoeˇ aˬ yawꞈ jawˇ luꞈ gaˇ nawˇ ya mawˇ tehꞈ-a.

¹⁹ Sahˬpaˬ Miˬyehˇ pyeuꞈ-eu ngaˇ aˬ yawꞈ-ahˇ heu loꞈ-ehˇ ehˇ-eu meh lehˇ ehˇ nehˬ-awˬ. ‘Yaw sahˇ gʼaˬ-ahˇ sehꞈ-euˬ uˬ taꞈ, aˬ gaꞈ yaˇ kmˇ kʼawꞈ nawˇ paˇ tsaˬ geuꞈ-eu lehˇ gʼeh te loˇ’ lehˇ ngaˇ ehˇ-eu meh lehˇ ehˇ nehˬ-awˬ. ‘Naˬboˆ-euˬ shiˬ-ahˇ aˬ kuiˬ myeuꞈ-euˬ tsahˇ-ahˇ, nawˬ-euˬ shiˬ-ahˇ kʼawꞈ aˬ kuiˬ myeuꞈ tehꞈ-a’ lehˇ ngaˇ ehˇ-eu meh lehˇ ehˇ nehˬ-awˬ.”

²⁰ Eˇliˇyaˆ-ahˇ Aˬhaˆ mawˇ ngeh, “Ngaˬ-ahˇ muiˇ-eu gʼaˬ-oˇ, nawˇ ngaˬ-ahˇ poˆ mawˇ le-euˬ nga laˬ” lehˇ ehˇ nehˬ-euˬ meh. Eˇliˇyaˆ ehˇ-eu, “Ngeuˇ ma. Ngaˇ nawˬ-ahˇ poˆ mawˇ le-euˬ ma. Sahˬpaˬ Miˬyehˇ mehˬ shi yaw lehˬ jeˬ mˇ-eu gʼaˇ duˬ nawˇ maˇ maˇ ni noeˬ tsehˆ taˬ-euˬ meh.

²¹ Kʼoeˇ miˇ neh, Sahˬpaˬ Miˬyehˇ nawˬ-ahˇ heu loꞈ-ehˇ ehˇ-eu meh. ‘Nawˬ-euˬ kʼoeˇ taˆ guˆ-eu gaˆ-eu jeˬ ngaˇ bi keuˆ le ma. Nawˬ-ahˇ ngaˇ laˆ luˬ laˆ seˇ-awˇ, nawˬ-euˬ nymˇ jiˇ laꞈ kʼoeˇ kʼaˇ jawˇ-eu kʼaˬ dzeˇ zaˬ dawˬ tawˆ luꞈ, yaw huiˬ yaw nyiˇ maˬ tseˇ ni, aˇ jeuˬ aˇ ca meh-iˇ ngeh keuˆ ni ngaˇ kʼehˬ nehˬ ma.

²² Nawˬ-euˬ nymˇ jiˇ-aˬ, Neˬbaˇ-euˬ aˬ li sahˬ paˬ Yeˬyawˇbamˬ-euˬ nymˇ jiˇ loꞈ-ehˇ maˬ ehˇ, Aˬhiˇyaˬ-euˬ aˬ li sahˬ paˬ Bawˬshaˬ-euˬ nymˇ jiˇ loꞈ-ehˇ maˬ ehˇ, ya pyeuꞈ-iˇ gaˇ keuˆ tehꞈ-a. Aˬ jeˬ miˇ neh ehˇ naˇ, Iˇsaˬleˬlaˆ miˇ kʼahˬ iˬ baˇ mˇ ni nawˬ neh sheuˬ gʼeh nehˬ-euˬ laꞈ kʼoeˇ, ngaˇ nui ma maˬ saˇ-eu jeˬ-ahˇ nawˇ mˇ-euˬ meh.

²³ Yeˬsaˬbeˬlaˇ-euˬ gʼawˇ mawˇ-ahˇ kʼawꞈ, Yeˬzaˬleˬlaˇ meuˬ laꞈ kʼoeˇ aˬ kuiˬ neh bi dzaˬ tehꞈ-a lehˇ Sahˬpaˬ Miˬyehˇ ehˇ-eu meh.

²⁴ Nawˬ-euˬ aˬ yuiꞈ aˬ nyiˇ meuˬ laꞈ kʼoeˇ kʼaˇ shiˇ-euˬ deuˬ-ahˇ aˬ kuiˬ dzaˬ-awˇ, bawˇ tsahˬ-ahˇ kʼaˇ shiˇ-euˬ deuˬ-ahˇ jeˬ shiˇ kʼaˬ dzeˇ dzaˬ tehꞈ-a.”

²⁵ (Aˬ yawꞈ-euˬ miˬ zaˬ Yeˬsaˬbeˬlaˇ kʼehˇ-eu baˬ da neh , Sahˬpaˬ Miˬyehˇ mehˬ shi maˇ maˇ ni iˬ baˇ mˇ ma lehˇ noeˬ tsehˆ-euˬ, Aˬhaˆ loꞈ-ehˇ gʼeh-eu tsawˇ haˬ tiˬ gʼaˬ-iˬ maˬ jawˇ-a.

²⁶ Iˇsaˬleˬlaˆ tsawˇ haˬ deuˬ miˇ kʼahˬ kʼoeˇ kʼahˬ laꞈ kʼoeˇ jawˇ uˇ leˇ ngeh, Sahˬpaˬ Miˬyehˇ neh bi teh doˆ-euˬ Aˬmoˬ tsawˇ haˬ deuˬ uˬ duˬ tahˬ-eu tahˬ pahˬ aˬ ma mawˇ kawˇ deuˬ-ahˇ, aˬ yawꞈ uˬ duˬ tahˬ-eu laꞈ kʼoeˇ, shaꞈ dawˇ dui dui paˬ-ehˇ gʼeh-eu iˬ baˇ aˬ yawꞈ mˇ-euˬ meh.)

²⁷ Eˇliˇyaˆ dawˬ ngehˬ gʼaˬ ngeh, Aˬhaˆ gʼaˬ yawˬ ha-euˬ mehˬ tsoeˬ gʼeu pyaˬ gʼeu shaˇ-awˇ, guˬ daˇ pehˇ zeuˇ mehˬ tsoeˬ dm-euˬ meh. Aˬ yawꞈ maˬ dzaˬ maˬ dawˇ ni, guˬ daˇ pehˇ zeuˇ dm-awˇ yuꞈ-eu laꞈ kʼoeˇ, noeˬ shaˬ dui dui-awˇ myaꞈ dehˬ ni pyeuꞈ-iˇ-euˬ meh.

²⁸ Kʼoeˇ naˇ, Miˬyehˇ gʼaˇ duˬ ngehˬ dah-eu Eˇliˇyaˆ-ahˇ, Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

²⁹ “Ngaˬ-euˬ mehˬ shi Aˬhaˆ nui ma nahˬ yu ni taˬ-awˇ jawˇ luꞈ-eu nawˇ ya mawˇ gʼaˬ maˬ loˇ. Aˬ yawꞈ kʼoeˇ loꞈ-ehˇ jawˇ-eu miˇ neh, aˬ yawꞈ yaw dehꞈ dehꞈ luꞈ-eu aˇ yamˬ laꞈ kʼoeˇ, guˆ-eu gaˆ-eu jeˬ ngaˇ maˬ paˇ bi keuˆ le ma. Aˬ yawꞈ-euˬ aˬ li-euˬ ziˇ-ahˇ, Aˬhaˆ-euˬ nymˇ jiˇ kʼoeˇ taˆ guˆ-eu gaˆ-eu jeˬ ngaˇ bi keuˆ le ma.”