1 Sahˬpaˬ 2 - Akha

Sawˇlaˬmoˬ-ahˇ Daˬbiˇ dawˬ mehˬ dawˬ tsoˆ tsoˆ nehˬ yaꞈ-euˬ

¹ Daˬbiˇ ziˇ jiˇ-eu dawˬ peh peh laˇ ngeh, aˬ yawꞈ-euˬ aˬ li Sawˇlaˬmoˬ-ahˇ kuˇ-awˇ, aˇ saˬ saˬ-eu dawˬ mehˬ dawˬ tsoˆ heu loꞈ-ehˇ mehˬ nehˬ tsoˆ nehˬ yaꞈ-euˬ meh.

² “Ngaˇ ziˇ dehꞈ jiˇ-eu aˇ yamˬ dawˬ peh peh laˇ-euˬ miˇ-a. Nawˇ yawˬ haˇ yawˬ ha nui jah ahˇ-eu laꞈ kʼoeˇ, nui ma ziꞈ dah ni taˬ-awˬ.

³ Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ neh kʼaˇ bi mˇ laꞈ-euˬ jeˬ-ahˇ nawˇ mˇ-awˬ. Nawˇ kʼaˇ iˇ kʼaˇ laˇ kʼaˇ mˇ kʼaˇ shaˇ-eu jeˬ laꞈ kʼoeˇ guiˬ lahˬ baw ni, Moˇseˬ-euˬ zahˇ dawˬ kʼoꞈ dawˬ laꞈ kʼoeˇ boꞈ ahˇ taˬ-euˬ aˬ yawꞈ-euˬ zahˇ dawˬ kʼoꞈ dawˬ deuˬ hawˇ-eu, aˬ yawꞈ neh bi mˇ bi shaˇ-euˬ jeˬ dawˬ tawˆ luꞈ-ahˇ naˇ haˬ geuꞈ-awˇ mˇ-awˬ.

⁴ Ngaˬ-euˬ zaˬ ngaˬ-euˬ uˆ deuˬ nui ma gʼawˇ mawˇ dawˬ tawˆ luꞈ aˬ yawꞈ-euˬ zahˇ dawˬ kʼoꞈ dawˬ-ahˇ saˇ jaˇ ziꞈ-awˇ, aˬ yawꞈ-euˬ ehˇ dawˬ-ahˇ yaw muiˬ paˬ-ehˇ kʼaˇ naˇ haˬ kʼoeˇ keuˆ ni, Iˇsaˬleˬlaˆ miˇ kʼahˬ-ahˇ ya uˆ lahˇ tehꞈ-a lehˇ, Sahˬpaˬ Miˬyehˇ neh saˇ jaˇ dzaˬ taˬ-euˬ jaˆ-eu meh. Aˬ yawꞈ-euˬ dawˬ-ahˇ nawˇ naˇ haˬ geuꞈ naˇ, aˬ yawꞈ-euˬ saˇ jaˇ dawˬ-ahˇ aˬ yawꞈ ziꞈ tehꞈ-a.

⁵ “Tiˬ jeˬ paˇ jaˆ-a siˬ. Iˇsaˬleˬlaˆ guiˇ maꞈ kʼoeˇ taˆ uˆ lahˇ-eu deuˬ pyeuꞈ-eu Neˬlaˇ-euˬ aˬ li Aˬbaˬnaˬ hawˇ-eu, Yeˬdeuˬ-euˬ aˬ li Aˬmaˬsaˬ-ahˇ sehꞈ-eu laꞈ kʼoeˇ, Yoˇbaˬ neh ngaˬ-ahˇ mˇ coeˬ nehˬ laꞈ-euˬ jeˬ-ahˇ nawˇ siˬ nya meh. Guiˇ deuˆ ngeh aˬ yawꞈ nyaꞈ neh aˬ cawˬ-ahˇ deuˆ sehꞈ-euˬ aˇ poeˬ, guiˇ maˬ deuˆ-ehˇ ciˬ cuˇ ni jawˇ luꞈ ngeh aˬ yawꞈ nyaꞈ-ahˇ Yoˇbaˬ laꞈ poˆ poˆ kʼoꞈ nehˬ-euˬ gaˇ kawˆ nawˇ siˬ nya meh. Iˬ baˇ maˬ ahˇ-eu tsawˇ haˬ-ahˇ aˬ yawꞈ sehꞈ-euˬ miˇ neh, aˬ yawꞈ-euˬ yaw lehˬ ngaˬ-euˬ kʼoeˇ taˆ keuˆ le-awˇ, ngaˇ ya daˬ luꞈ-eu ma.

⁶ Aˬ yawꞈ-ahˇ aˬ joˆ-ehˇ ya jahˇ nehˬ-eu gaˇ kawˆ nawˇ siˬ nya meh. Aˬ yawꞈ mawˬ le-awˇ shiˇ ngeh keuˆ ni ziˇ maˬ ya bi dehꞈ jiˇ-a.

⁷ “Ehˇ kʼawꞈ, Giˇlaˆ miˇ kʼahˬ-ahˇ jawˇ-eu Baˬziˇlehˇ-euˬ aˬ li deuˬ-ahˇ gʼawˬ shaˬ gaˬ-awˇ haw piˇ nehˬ-awˬ. Aˬ jeˬ miˇ neh ehˇ naˇ, nawˬ-euˬ aˇ doˆ Aˬbaˇsaˬloˬ baˬ da neh ngaˇ cehˆ cehˆ-ehˇ shaˬ ngeh, aˬ yawꞈ maꞈ ngaˬ-ahˇ gʼawˬ shaˬ gaˬ nehˬ laꞈ-euˬ meh.

⁸ Beˬyaˬmiˬ miˇ kʼahˬ Baˬhuˇleˬ meuˬ-ahˇ jawˇ-eu Geˬlaˬ-euˬ aˬ li Shiˇmiˇ tiˬ gʼaˬ jawˇ-a siˬ. Maˬhaˬneˬ meuˬ-ahˇ ngaˇ iˇ ngeh nah , aˬ yawꞈ ngaˬ-ahˇ yaˬ kʼehˇ yaw kʼaˆ-ehˇ yaˬ nehˬ laꞈ-euˬ meh. Ehˇ kʼawꞈ, Yawˇdaˬ lawˇ baˬ-ahˇ aˬ yawꞈ-ahˇ ngaˇ paˇ ya tahˬ puˬ ngeh, aˬ yawꞈ-ahˇ ngaˇ maˬ sehꞈ lehˇ, Sahˬpaˬ Miˬyehˇ -euˬ tsawˇ myahˇ uˬ moˆ saˇ jaˇ dzaˬ-euˬ ma.

⁹ Aˬ yawꞈ-ahˇ nawˇ maˬ kʼehˬ nehˬ ni taˬ byehˇ. Aˬ joˆ-ehˇ ya jahˇ nehˬ-eu gaˇ kawˆ nawˇ siˬ nya meh. Aˬ yawꞈ shiˇ ni nawˇ ya jahˇ meh.”

Daˬbiˇ ziˇ jiˇ-euˬ

¹⁰ Kʼoeˇ naˇ, Daˬbiˇ ziˇ dehꞈ jiˇ-awˇ, Daˬbiˇ-euˬ meuˬ laꞈ kʼoeˇ baꞈ pahˬ nehˬ-euˬ meh.

¹¹ Aˬ yawꞈ-aˬ, oeˬ tseˇ kʼoꞈ keuˆ ni Iˇsaˬleˬlaˆ miˇ kʼahˬ-euˬ sahˬ paˬ geuꞈ-euˬ meh. Heˬbyoˬ meuˬ-ahˇ jawˇ-awˇ shiꞈ kʼoꞈ uˆ lahˇ-awˇ, Yeˬluˇsaˬlehˬ meuˬ-ahˇ jawˇ-awˇ smˬ tseˇ smˇ kʼoꞈ uˆ lahˇ-euˬ meh.

¹² Sawˇlaˬmoˬ gʼaˬ aˬ yawꞈ aˬ da-euˬ dah zaˇ sahˬ paˬ geuꞈ-awˇ, ziꞈ dah ni uˆ lahˇ-euˬ meh.

Aˬdawˇniˇyaˆ shiˇ-euˬ

¹³ Kʼoeˇ naˇ, Haˬgiˇdaˇ-euˬ aˬ li Aˬdawˇniˇyaˆ-aˬ, Sawˇlaˬmoˬ-euˬ aˬ ma Baˬsheˬba jawˇ gaˇ le-euˬ meh. “Yaw muiˬ jeˬ gaˇ kawˆ-ahˇ neh laˇ-euˬ ma loˇ” lehˇ Baˬsheˬba naˇ haˬ ngeh, “Ngeuˇ ma” lehˇ aˬ yawꞈ ehˇ kʼoꞈ nehˬ-euˬ meh.

¹⁴ Kʼoeˇ naˇ, “Ngaˇ nawˬ-ahˇ tiˬ jeˬ naˇ haˬ mawꞈ nya” lehˇ aˬ yawꞈ ehˇ ngeh, “Aˬ jeˬ naˇ haˬ mawꞈ-eu nya” lehˇ Baˬsheˬba ehˇ kʼoꞈ nehˬ-euˬ meh.

¹⁵ Aˬ yawꞈ ehˇ-eu, “Ngaˇ sahˬ paˬ geuꞈ-eu tsaˬ meh lehˇ nawˇ siˬ nya meh. Iˇsaˬleˬlaˆ miˇ kʼahˬ laꞈ kʼoeˇ kʼaˇ jawˇ-eu tsawˇ haˬ yawˬ gʼaˬ na luꞈ, kʼoeˇ loꞈ-ehˇ noeˬ-eu meh. Ehˇ kʼawꞈ, kʼaˇ noeˬ-euˬ loꞈ-ehˇ maˬ pyeuꞈ laˇ-ehˇ, ngaˬ-euˬ aˬ nyiˇ gʼaˬ sahˬ paˬ pyeuꞈ laˇ-euˬ meh. Aˬ jeˬ miˇ neh ehˇ naˇ, aˬ yawꞈ sahˬ paˬ pyeuꞈ laˇ ni Sahˬpaˬ Miˬyehˇ nui ma tsaˬ-eu meh.

¹⁶ Nymˬ-mˇ ngaˇ heu loꞈ-ehˇ tiˬ jeˬ shaˇ mawꞈ nya. Ngaˬ neh shaˇ-euˬ loꞈ-ehˇ maˬ byehˇ ni gʼawˬ shaˬ gaˬ nehˬ laꞈ-awˬ.”

¹⁷ Baˬsheˬba ehˇ-eu, “Nawˇ aˬ jeˬ shaˇ mawꞈ-euˬ nya.” Aˬ yawꞈ ehˇ-eu, “Shuˇneˬ meuˬ-ahˇ jawˇ-eu Aˬbiˇshehˇ lehˇ kuˇ-eu zaˬ miˬ aˬ buˇ kʼoeˇ gʼaˬ-ahˇ bi sheuˬ nehˬ laꞈ lehˇ, sahˬ paˬ Sawˇlaˬmoˬ-ahˇ tiˬ poˆ ehˇ nehˬ leˇ nehˬ laꞈ sheˇ. Nawˬ-euˬ ehˇ dawˬ-ahˇ aˬ yawꞈ maˬ leuˇ coeˇ-aˇ lehˇ ngaˇ siˬ nya ma.”

¹⁸ Baˬsheˬba ehˇ-eu, “Muiˬ tehꞈ-a. Nawˬ neh ehˇ-euˬ loꞈ-ehˇ sahˬ paˬ-ahˇ ngaˇ shaˇ leˇ haw ma.”

¹⁹ Kʼoeˇ naˇ, Aˬdawˇniˇyaˆ-euˬ dah zaˇ sahˬ paˬ-ahˇ dawˬ ngehˬ cawˬ leˇ-eu lehˇ, Baˬsheˬba le-euˬ meh. Sahˬpaˬ tsawˬ tuˇ laˇ-awˇ, aˬ yawꞈ-euˬ aˬ ma-ahˇ ha-awˇ, aˬ yawꞈ aˬ ma-euˬ mehˬ shi awˆ byaˆ-eu laꞈ kʼoeˇ yaw zeu baw nehˬ-euˬ meh. Kʼoeˇ naˇ, dzoeˬ dzaˬ nuiˇ mahˬ-ahˇ aˬ yawꞈ paˇ nuiˇ-awˇ, nuiˇ mahˬ yawˬ hmˬ yawˬ paˇ bi baꞈ laꞈ-awˇ, aˬ yawꞈ aˬ ma-ahˇ aˬ yawꞈ-euˬ aˇ maˇ paw bi nuiˇ-euˬ meh.

²⁰ Aˬ ma gʼaˬ ehˇ-eu, “Teu naˆ naˆ-ehˇ ehˇ nyaꞈ maˬ nyeuˆ-eu tiˬ jeˬ, ngaˇ nawˬ-ahˇ shaˇ mawꞈ nya. Maˬ mˇ ni taˬ byehˇ nehˬ laꞈ.” Sahˬ paˬ ehˇ-eu, “Aˬ ma-oˇ, nawˇ aˬ jeˬ shaˇ mawꞈ-eu nya. Nawˇ kʼaˇ shaˇ-eu jeˬ ngaˇ maˬ byehˇ ni mˇ nehˬ ma.”

²¹ Aˬ ma gʼaˬ ehˇ-eu, “Nawˬ-euˬ aˇ doˆ Aˬdawˇniˇyaˆ-ahˇ, Aˬbiˇshehˇ-ahˇ bi sheuˬ-awˬ.”

²² Sahˬ paˬ Sawˇlaˬmoˬ ehˇ-eu, “Shuˇneˬ meuˬ-ahˇ jawˇ-eu Aˬbiˇshehˇ-ahˇ Aˬdawˇniˇyaˆ bi sheuˬ-awˬ lehˇ, aˬ jeˬ baˬ da neh nawˇ ngaˬ-ahˇ shaˇ te. Ngaˬ-euˬ miˇ kʼahˬ kʼawꞈ aˬ yawꞈ-ahˇ biꞈ-awˬ lehˇ shaˇ-awˬ tawˇ. Dawˬ tawˆ luꞈ ya ehˇ jiˇ naˇ, aˬ yawꞈ ngaˬ-euˬ aˇ doˆ pyeuꞈ-awˇ, piˇ ma Aˬbyaˬdaˬ hawˇ-eu Zeˬluˇyaˆ-euˬ aˬ li Yoˇbaˬ aˬ ha nyaꞈ kʼawꞈ, aˬ yawꞈ jawˇ paw pyawˬ-eu meh.”

²³ Kʼoeˇ naˇ, Sahˬpaˬ Miˬyehˇ-euˬ tsawˇ myahˇ uˬ moˆ Sawˇlaˬmoˬ saˇ jaˇ dzaˬ-awˇ ehˇ-eu, “Heu loꞈ-ehˇ shaˇ-eu baˬ da neh Aˬdawˇniˇyaˆ maˬ shiˇ-ehˇ ya bi dehꞈ lawˬ naˇ, Miˬyehˇ ngaˬ-ahˇ sehꞈ luꞈ-uˇ.

²⁴ Sahˬpaˬ Miˬyehˇ ngaˬ-ahˇ ngaˬ da Daˬbiˇ-euˬ nuiˇ mahˬ kʼoeˇ taˆ ziꞈ dah ni bi nuiˇ laꞈ-euˬ meh. Aˬ yawꞈ neh dzaˬ taˬ-euˬ saˇ jaˇ-ahˇ aˬ yawꞈ ziꞈ luꞈ-eu laꞈ kʼoeˇ, ngaˇ hawˇ-eu ngaˬ-euˬ zaˬ ngaˬ-euˬ uˆ deuˬ-ahˇ, miˇ kʼahˬ heu kʼahˬ a nehˬ laꞈ gʼaˬ-euˬ meh. Iˬ nah Aˬdawˇniˇyaˆ ya shiˇ meh lehˇ, dehꞈ luꞈ-eu Sahˬpaˬ Miˬyehˇ mehˬ shi ngaˇ ehˇ tsehˆ-eu ma.”

²⁵ Kʼoeˇ naˇ, Yeˬhawˇyaˬdaˬ-euˬ aˬ li Baˬnaˇyaˬ-ahˇ sahˬ paˬ kuˇ-awˇ dawˬ biꞈ ngeh, Baˬnaˇyaˬ gʼaˬ iˇ-awˇ, Aˬdawˇniˇyaˆ-ahˇ sehꞈ-euˬ meh.

Aˬbyaˬdaˬ-ahˇ teh dzeh-awˇ Yoˇbaˬ-ahˇ sehꞈ-euˬ

²⁶ Kʼoeˇ naˇ, piˇ ma Aˬbyaˬdaˬ-ahˇ sahˬ paˬ Sawˇlaˬmoˬ ehˇ nehˬ-eu, “Nawˬ-euˬ nymˇ jiˇ jaˆ-eu Aˬnaˬtawˇ meuˬ-ahˇ gʼoꞈ-iˇ-awˬ. Aˬ diˇ aˬ maˇ kʼaˇ ngeuˇ-eu loꞈ-ehˇ jahˇ law nmˇ-aˬ, nawˇ ya shiˇ tehꞈ-a. Ehˇ kʼawꞈ, nawˬ-ahˇ ngaˇ maˬ sehꞈ mawꞈ nya. Aˬ jeˬ miˇ neh ehˇ naˇ, ngaˬ da Daˬbiˇ nehˬ-ehˇ nawˇ jawˇ ngeh, Dawˬ ma saˇ jaˇ Bahˬ keuˆ-ahˇ haw-eu pyaˆ-eu gʼaˬ geuꞈ-awˇ, shaˬ-eu zahˬ-eu aˇ yamˬ laꞈ kʼoeˇ, ngaˬ da-ahˇ nawˇ maˬ gʼawˬ-iˇ ni jawˇ-euˬ meh.”

²⁷ Kʼoeˇ naˇ, Aˬbyaˬdaˬ-ahˇ Sahˬpaˬ Miˬyehˇ-euˬ gaˇ mˇ-euˬ piˇ ma maˬ bi geuꞈ ni, Sawˇlaˬmoˬ neh teh dzeh-awˇ piˇ ma Eˇliˆ hawˇ-eu aˬ yawꞈ-euˬ zaˬ deuˬ uˆ deuˬ gaˇ kawˆ, Shiˇloˬ meuˬ-ahˇ Sahˬpaˬ Miˬyehˇ neh ehˇ taˬ-euˬ dawˬ bi byah laˇ-euˬ meh.

²⁸ Yoˇbaˬ-aˬ, Aˬbaˇsaˬloˬ jawˇ paw maˬ pyawˬ-euˬ kʼawꞈ, Aˬdawˇniˇyaˆ jawˇ paw pyawˬ-euˬ miˇ neh, kʼaˇ pyeuꞈ laˇ-euˬ gaˇ kawˆ deuˬ-ahˇ aˬ yawꞈ ya gaˬ ngeh, Sahˬpaˬ Miˬyehˇ jawˇ-eu Sehˬ gʼawˆ-ahˇ cehˆ leˇ-awˇ, lawˇ duˬ-euˬ laꞈ coeˇ-ahˇ tsoꞈ-eu uˬ coeˇ -ahˇ tuˆ tehˬ-awˇ jawˇ-euˬ meh.

²⁹ Sahˬpaˬ Miˬyehˇ jawˇ-eu Sehˬ gʼawˆ-ahˇ Yoˇbaˬ cehˆ leˇ taˬ-awˇ, lawˇ duˬ-ahˇ jawˇ luꞈ-eu gaˇ kawˆ sahˬ paˬ Sawˇlaˬmoˬ ya gaˬ ngeh, tsawˇ haˬ pyehˬ gʼeh-awˇ, aˬ jeˬ baˬ da neh lawˇ duˬ-ahˇ ya cehˆ jawˇ leˇ-euˬ gaˇ kawˆ bi naˇ haˬ leˇ-euˬ meh. Yoˇbaˬ gʼaˬ gʼeh, sahˬ paˬ Sawˇlaˬmoˬ-ahˇ guˆ-eu miˇ neh cehˆ jawˇ leˇ-euˬ gaˇ kawˆ paˇ ehˇ kʼoꞈ nehˬ-euˬ meh. Kʼoeˇ ngeh, sahˬ paˬ Sawˇlaˬmoˬ neh Baˬnaˇyaˬ-ahˇ pyehˬ gʼeh-awˇ, Yoˇbaˬ-ahˇ bi sehꞈ leˇ-euˬ meh.

³⁰ Sahˬpaˬ Miˬyehˇ jawˇ-eu Sehˬ gʼawˆ-ahˇ Baˬnaˇyaˬ le-awˇ, “Sahˬ paˬ nawˬ-ahˇ laꞈ nyiˇ doˆ le-awˬ lehˇ dawˬ biꞈ luꞈ meh” lehˇ, Yoˇbaˬ-ahˇ ehˇ nehˬ ngeh, “Ngaˇ laꞈ nyiˇ maˬ doˆ le ni heu gaˇ shiˇ ma” lehˇ Yoˇbaˬ ehˇ-eu meh. Kʼoeˇ ngeh, Baˬnaˇyaˬ gʼoꞈ-iˇ-awˇ, Yoˇbaˬ kʼoeˇ loꞈ-ehˇ ehˇ-eu gaˇ kawˆ, sahˬ paˬ-ahˇ tsaꞈ gaˬ-iˇ-euˬ meh.

³¹ Sawˇlaˬmoˬ ehˇ-eu, “Yoˇbaˬ neh kʼaˇ ehˇ-euˬ loꞈ-ehˇ jahˇ-awˇ, aˬ yawꞈ-ahˇ sehꞈ-awˇ baꞈ pahˬ nehˬ-awˬ. Kʼoeˇ loꞈ-ehˇ jahˇ naˇ, ngaˬ-euˬ kʼoeˇ taˆ maˬ ehˇ, Daˬbiˇ-euˬ zaˬ deuˬ uˆ deuˬ kʼoeˇ taˆ maˬ ehˇ, iˬ baˇ maˬ ahˇ-eu tsawˇ haˬ deuˬ-ahˇ Yoˇbaˬ neh sehꞈ-euˬ iˬ baˇ kʼoeˇ maˬ keuˆ le ni, ya buˬ ya law-iˇ tehꞈ-a.

³² Ngaˬ da Daˬbiˇ maˬ bi siˬ ni, tsawˇ haˬ kʼoeˇ deuˬ-ahˇ Yoˇbaˬ neh sehꞈ-euˬ iˬ baˇ kʼoeˇ baˬ da neh, aˬ yawꞈ-ahˇ Sahˬpaˬ Miˬyehˇ kʼehˬ nehˬ kʼaˆ nehˬ tehꞈ-a. Aˬ yawꞈ naˆ maˬ tseˇ muiˬ dzehˬ-eu iˬ baˇ maˬ ahˇ-eu tsawˇ haˬ nyiˬ gʼaˬ pyeuꞈ-eu, Neˬlaˇ-euˬ aˬ li Aˬbaˬnaˬ hawˇ-eu, Yeˬdeuˬ-euˬ aˬ li Aˬmaˬsaˬ-ahˇ, Yoˇbaˬ sehꞈ-euˬ meh. Aˬbaˬnaˬ gʼaˬ Iˇsaˬleˬlaˆ guiˇ maꞈ deuˬ kʼoeˇ taˆ uˆ lahˇ-eu gʼaˬ pyeuꞈ-awˇ, Aˬmaˬsaˬ gʼaˬ Yuˇdaˆ guiˇ maꞈ deuˬ kʼoeˇ taˆ uˆ lahˇ-euˬ gʼaˬ pyeuꞈ-eu meh.

³³ Aˬ yawꞈ nyaꞈ-ahˇ sehꞈ-euˬ iˬ baˇ-aˬ, Yoˇbaˬ hawˇ-eu aˬ yawꞈ-euˬ zaˬ deuˬ uˆ deuˬ kʼoeˇ taˆ aˬ myah luꞈ jaˆ tehꞈ-a. Ehˇ kʼawꞈ, Daˬbiˇ-euˬ nuiˇ mahˬ-ahˇ nuiˇ luꞈ-eu Daˬbiˇ-euˬ zaˬ deuˬ uˆ deuˬ-ahˇ, aˬ myah luꞈ Sahˬpaˬ Miˬyehˇ nui saˇ bi oꞈ tehꞈ-a.”

³⁴ Kʼoeˇ naˇ, Sahˬpaˬ Miˬyehˇ jawˇ-eu Sehˬ gʼawˆ-ahˇ Baˬnaˇyaˬ le-awˇ, Yoˇbaˬ-ahˇ sehꞈ-awˇ, bawˇ tsahˬ-ahˇ jaˆ-eu aˬ yawꞈ-euˬ nymˇ-ahˇ aˬ cawˬ neh aˬ yawꞈ-ahˇ baꞈ pahˬ nehˬ-euˬ meh.

³⁵ Kʼoeˇ naˇ, sahˬ paˬ Sawˇlaˬmoˬ neh Baˬnaˇyaˬ-ahˇ Yoˇbaˬ-euˬ dah zaˇ guiˇ maꞈ kʼoeˇ taˆ uˆ lahˇ-eu gʼaˬ bi geuꞈ-awˇ, Zaˬdoˆ-ahˇ Aˬbyaˬdaˬ-euˬ dah zaˇ piˇ ma bi geuꞈ-euˬ meh.

Shiˇmiˇ shiˇ-euˬ

³⁶ Kʼoeˇ naˇ, sahˬ paˬ neh tsawˇ haˬ pyehˬ gʼeh-awˇ, Shiˇmiˇ-ahˇ bi kuˇ laˬ-iˇ-awˇ, heu loꞈ-ehˇ ehˇ nehˬ-euˬ meh. “Yeˬluˇsaˬlehˬ meuˬ laꞈ kʼoeˇ nawˇ nymˇ tiˬ nymˇ tsoˆ-awˇ, meuˬ laꞈ nyiˇ maˬ doˆ-iˇ ni jawˇ-awˬ.

³⁷ Nawˇ meuˬ laꞈ nyiˇ doˆ-iˇ-awˇ, Giˇdaˬloˬ lawˇ gawˆ iˇ tsehˆ naˇ, aˬ diˇ aˬ maˇ ya shiˇ meh lehˇ noeˬ taˬ-awˬ. Shiˇ-euˬ iˬ baˇ kʼoeˇ kʼawꞈ nawˬ-euˬ kʼoeˇ taˆ jaˆ tehꞈ-a.”

³⁸ Shiˇmiˇ gʼeh. “Sahˬ paˬ-oˇ, nawˬ neh ehˇ-euˬ dawˬ-ahˇ ngaˇ geuꞈ ma” lehˇ ehˇ-awˇ, Yeˬluˇsaˬlehˬ meuˬ laꞈ kʼoeˇ gʼawˬ myahˇ ni jawˇ-euˬ meh.

³⁹ Ehˇ kʼawꞈ, smˇ kʼoꞈ jawˇ keuˆ laꞈ ngeh jawˇ, Shiˇmiˇ-euˬ zaˬ kʼaˆ nyiˬ gʼaˬ, Mawˇkah-euˬ aˬ li pyeuꞈ-eu Gaˬdaˇ sahˬ paˬ Aˬkiˇ jawˇ gaˇ cehˆ leˇ-euˬ meh. Aˬ yawꞈ-euˬ zaˬ kʼaˆ kʼoeˇ nyiˬ gʼaˬ kʼoeˇ gaˇ cehˆ jawˇ leˇ-euˬ gaˇ kawˆ, Shiˇmiˇ-ahˇ aˬ cawˬ ehˇ gaˬ nehˬ le-euˬ meh.

⁴⁰ Kʼoeˇ ngeh, aˬ yawꞈ-euˬ mahˬ tah laˆ dziˬ gʼa laˆ dawˆ-awˇ, aˬ yawꞈ-euˬ zaˬ kʼaˆ kʼoeˇ nyiˬ gʼaˬ-ahˇ poˆ kʼoꞈ leˇ-eu lehˇ, Gaˬdaˇ sahˬ paˬ Aˬkiˇ jawˇ gaˇ le-euˬ meh. Zaˬ kʼaˆ kʼoeˇ nyiˬ gʼaˬ-ahˇ aˬ yawꞈ poˆ mawˇ-awˇ, iˇ kahˇ-ahˇ sheuˬ kʼoꞈ leꞈ-euˬ meh.

⁴¹ Shiˇmiˇ Gaˬdaˇ meuˬ-ahˇ le-awˇ, zaˬ kʼaˆ kʼoeˇ nyiˬ gʼaˬ-ahˇ sheuˬ kʼoꞈ laˬ leˇ-euˬ gaˇ kawˆ Sawˇlaˬmoˬ ya gaˬ-euˬ meh.

⁴² Kʼoeˇ ngeh, Shiˇmiˇ-ahˇ bi kuˇ laˬ-iˇ-awˇ, heu loꞈ-ehˇ ehˇ nehˬ-euˬ meh. “Yeˬluˇsaˬlehˬ meuˬ-euˬ laꞈ nyiˇ maˬ doˆ-iˇ lehˇ, Sahˬpaˬ Miˬyehˇ-euˬ tsawˇ myahˇ uˬ moˆ, nawˬ-ahˇ ngaˇ saˇ jaˇ bi dzaˬ-euˬ ma. Meuˬ-euˬ laꞈ nyiˇ doˆ-iˇ naˇ ya shiˇ tehꞈ-a lehˇ kʼawꞈ, ngaˇ nawˬ-ahˇ ehˇ taˬ-euˬ ma. Ngaˇ kʼoeˇ loꞈ-ehˇ ehˇ ngeh, nawˇ kʼawꞈ nui ma tsaˬ-awˇ naˇ haˬ geuꞈ ma lehˇ ehˇ-euˬ maˬ ngeuˇ loˇ.

⁴³ Toˆ-ehˇ ngeuˇ naˇ, aˬ jeˬ miˇ neh nawˬ neh dzaˬ taˬ-euˬ saˇ jaˇ-ahˇ nawˇ puiˬ-awˇ, ngaˬ-euˬ ehˇ dawˬ-ahˇ maˬ naˇ haˬ te.

⁴⁴ Ngaˬ da-ahˇ nawˬ neh kʼaˇ mˇ lehˬ taˬ-euˬ jeˬ dawˬ tawˆ luꞈ, nawˇ yaw muiˬ paˬ-ehˇ siˬ nya meh.

⁴⁵ Kʼoeˇ baˬ da neh, Sahˬpaˬ Miˬyehˇ nawˬ-ahˇ kʼehˬ tehꞈ-a. Ehˇ kʼawꞈ, aˬ yawꞈ ngaˬ-ahˇ guiˬ lahˬ biꞈ laꞈ-awˇ, Daˬbiˇ-euˬ miˇ kʼahˬ aˬ myah luꞈ ziꞈ tehꞈ-a.”

⁴⁶ Kʼoeˇ naˇ, Baˬnaˇyaˬ-ahˇ sahˬ paˬ dawˬ biꞈ ngeh, Baˬnaˇyaˬ doˆ-iˇ-awˇ, Shiˇmiˇ-ahˇ sehꞈ-euˬ meh. Nymˬ-mˇ poˆ jawˇ, miˇ kʼahˬ kʼahˬ lah ni, Sawˇlaˬmo-euˬ aˬ laꞈ laꞈ kʼoeˇ ziꞈ dah ni jaˆ laˇ-euˬ meh.