1 Sahˬpaˬ 19 - Akha

Eˇliˇyaˆ Siˇnaˆ gawˬ jawˬ-ahˇ cehˆ-euˬ

¹ Eˇliˇyaˆ neh kʼaˇ mˇ-euˬ jeˬ dawˬ tawˆ luꞈ hawˇ-eu, Baˬlaˇ miˬ yehˇ gʼaˇ duˬ ngehˬ dah-eu deuˬ-ahˇ aˬ yawꞈ aˬ joˆ-ehˇ sehꞈ-euˬ gaˇ kawˆ, sahˬ paˬ Aˬhaˆ neh aˬ yawꞈ-euˬ miˬ zaˬ-ahˇ dzawˇ nehˬ-euˬ meh.

² Kʼoeˇ naˇ, Eˇliˇyaˆ jawˇ gaˇ Yeˬsaˬbeˬlaˇ tsawˇ haˬ pyehˬ gʼeh-awˇ, “Baˬlaˇ miˬ yehˇ gʼaˇ duˬ ngehˬ dah-eu tsawˇ haˬ kʼoeˇ deuˬ-ahˇ nawˬ neh jahˇ nehˬ-euˬ loꞈ-ehˇ, ni shawˬ nah nawˬ-ahˇ ngaˇ maˬ jahˇ kʼ oꞈ nehˬ nya naˇ, miˬ yehˇ kʼoeˇ deuˬ ngaˬ-ahˇ sehꞈ luꞈ-uˇ” lehˇ bi ehˇ gaˬ-iˇ-euˬ meh.

³ Eˇliˇyaˆ guˆ-eu laꞈ kʼoeˇ, aˬ yawꞈ-euˬ gʼawˇ mawˇ ya buˬ-iˇ ni cehˆ-euˬ meh. Aˬ yawꞈ-euˬ zaˬ kʼaˆ sheuˬ-awˇ, Yuˇdaˆ miˇ kʼahˬ Beˬlaˇsheˬba meuˬ-ahˇ cehˆ-awˇ, aˬ yawꞈ-euˬ zaˬ kʼaˆ kʼoeˇ gʼaˬ bi jawˇ yaꞈ-euˬ meh.

⁴ Kʼoeˇ naˇ, nah ga-ehˇ bawˇ tsahˬ bawˇ dahˇ paw aˬ yawꞈ le gʼeh leꞈ-euˬ meh. Aˇ bawˇ naˇ shmˇ dawˬ pehˬ-ahˇ aˬ yawꞈ gʼaˬ naˬ naˬ-awˇ nuiˇ-eu laꞈ kʼoeˇ, yaw dehꞈ dehꞈ-awˇ maˬ paˇ jawˇ mawꞈ-eu miˇ neh, “Sahˬpaˬ Miˬyehˇ-oˇ, gʼaˬ dzaˬ gʼaˬ dawˇ miˇ-a. Ngaˬ-euˬ saꞈ laˇ yuˇ kʼoꞈ nehˬ laꞈ-awˬ. Ngaˇ yaw dehꞈ maˬ paˇ dehꞈ mawꞈ miˇ-a” lehˇ guiˬ lahˬ shaˇ-euˬ meh.

⁵ Aˇ bawˇ kʼoeˇ bawˇ dawˬ pehˬ-ahˇ aˬ yawꞈ joe yuꞈ-awˇ, yuꞈ kʼaˆ-euˬ meh. Ja pyuˬ ni mˬ taˆ gʼaˬ kʼehˇ tiˬ gʼaˬ aˬ yawꞈ-ahˇ toeˬ ciˆ le-awˇ, “Tuˇ-awˇ dzaˬ-awˬ” lehˇ ehˇ-eu meh.

⁶ Aˬ yawꞈ jawˬ jawˬ-ehˇ haw ngeh, aˬ yawꞈ-euˬ uˬ duˬ dawˬ peh, kaˬ muˇ tiˬ siˬ hawˇ-eu iˇ cuꞈ iˇ puˬ tiˬ siˬ jaˆ gaˇ ya mawˇ-euˬ meh. Dzaˬ gʼaˬ dawˇ gʼaˬ-awˇ, aˬ yawꞈ tiˬ poˆ paˇ yuꞈ-euˬ meh.

⁷ Sahˬpaˬ Miˬyehˇ-euˬ mˬ taˆ gʼaˬ kʼehˇ tiˬ poˆ paˇ oe-awˇ, aˬ yawꞈ-ahˇ tiˬ poˆ paˇ laˆ noeˬ-awˇ, “Nawˇ ya iˇ-eu gaˇ ma yaw kaˬ miˇ neh, tuˇ-awˇ dzaˬ-awˬ” lehˇ ehˇ-eu meh.

⁸ Kʼoeˇ ngeh, Eˇliˇyaˆ tuˇ-awˇ dzaˬ-euˬ dawˇ-euˬ meh. Muiˬ-eu shawˇ-eu Siˇnaˆ gawˬ jawˬ-ahˇ, oeˬ tseˇ nah keuˆ ni aˬ yawꞈ cah keuˆ gʼeh nya ni, dzaˇ kʼoeˇ aˬ yawꞈ-ahˇ gʼaˬ bi ahˇ laˇ-euˬ meh.

⁹ Kʼoeˇ gaˇ uˬ ciꞈ tiˬ miˇ yaꞈ bya-eu gʼaˇ duˬ, lo kʼahˬ tiˬ kʼahˬ laꞈ kʼoeˇ aˬ yawꞈ uˇ leˇ-euˬ meh. Ja pyuˬ ni, Sahˬpaˬ Miˬyehˇ aˬ yawꞈ-ahˇ dawˬ ngehˬ cawˬ le-awˇ, “Eˇliˇyaˆ-oˇ, nawˇ heu gaˇ aˬ jeˬ jahˇ luꞈ te” lehˇ ehˇ-eu meh.

¹⁰ “Baoˬ huiˬ-eu Miˬyehˇ pyeuꞈ-eu Sahˬpaˬ Miˬyehˇ-oˇ, nawˬ-euˬ gaˇ tehꞈ-ehˇ ngaˇ aˬ myah luꞈ mˇ luꞈ-eu ma. Ehˇ kʼawꞈ, Iˇsaˬleˬlaˆ tsawˇ haˬ deuˬ nawˬ-ahˇ saˇ jaˇ puiˬ-awˇ, nawˬ-euˬ lawˇ duˬ deuˬ laˆ cawˆ jiˇ-awˇ, nawˬ-euˬ gʼaˇ duˬ ngehˬ dah-eu deuˬ dawˬ tawˆ luꞈ-ahˇ sehꞈ-euˬ meh. Ngaˇ tiˬ gʼaˬ tehꞈ-ehˇ dzeˇ-awˇ, ngaˬ-ahˇ kʼawꞈ aˬ yawꞈ maꞈ sehꞈ-eu lehˇ leh jeh luꞈ meh.”

¹¹ Sahˬpaˬ Miˬyehˇ ehˇ-eu,“Gawˬ jawˬ uˬ du daˆ doˆ leˇ-awˇ, ngaˬ-euˬ mehˬ shi yawꞈ-awˬ.” Kʼoeˇ naˇ, Sahˬpaˬ Miˬyehˇ iˇ tsehˆ gʼeh ngeh jawˇ, guˆ laˇ paˬ-ehˇ gʼeh-eu jaˬ lehˇ tiˬ bahˬ baw laˇ-awˇ, gawˬ jawˬ lo guˇ deuˬ baw paˆ baw shaˆ dzeh-euˬ meh. Ehˇ kʼawꞈ, jaˬ lehˇ laꞈ kʼoeˇ Sahˬpaˬ Miˬyehˇ maˬ ahˇ-a. Jaˬ lehˇ baw-eu naˬ leˇ-awˇ, miˇ luˆ paˇ luˆ laˇ-euˬ meh. Ehˇ kʼawꞈ, miˇ luˆ luˆ-eu laꞈ kʼoeˇ Sahˬpaˬ Miˬyehˇ maˬ ahˇ-a.

¹² Miˇ luˆ luˆ gʼaˬ ngeh jawˇ, miˬ dzaˬ doꞈ laˇ-euˬ meh. Ehˇ kʼawꞈ, miˬ dzaˬ laꞈ kʼoeˇ kʼawꞈ, Sahˬpaˬ Miˬyehˇ maˬ ahˇ-a. Miˬ dzaˬ doꞈ gʼaˬ ngeh jawˇ, nahˬ yu ni gʼeh-eu dawˬ gaˬ le-euˬ meh.

¹³ Teˇ saˇ kʼoeˇ-ahˇ Eˇliˇyaˆ ya gaˬ ngeh, pehˇ kʼahˬ pehˇ mahˇ neh aˬ yawꞈ-euˬ myaˆ pyawˬ-ahˇ dehˬ kaˬ-awˇ, lo kʼahˬ-euˬ gʼoˆ kʼehˬ-ahˇ iˇ doˆ-awˇ yawꞈ-iˇ-euˬ meh. Kʼoeˇ ngeh, “Eˇliˇyaˆ-oˇ, nawˇ heu gaˇ aˬ jeˬ jahˇ luꞈ te” lehˇ naˇ haˬ-eu dawˬ gaˬ le-euˬ meh.

¹⁴ Eˇliˇyaˆ ehˇ-eu, “Baoˬ huiˬ-eu Miˬyehˇ pyeuꞈ-eu Sahˬpaˬ Miˬyehˇ-oˇ, nawˬ-euˬ gaˇ-ahˇ tehꞈ-ehˇ ngaˇ aˬ myah luꞈ mˇ-euˬ ma. Ehˇ kʼawꞈ, Iˇsaˬleˬlaˆ tsawˇ haˬ deuˬ nawˬ-ahˇ saˇ jaˇ puiˬ-awˇ, nawˬ-euˬ lawˇ duˬ deuˬ laˆ cawˆ jiˇ-awˇ, nawˬ-euˬ gʼaˇ duˬ ngehˬ dah-eu deuˬ dawˬ tawˆ luꞈ-ahˇ sehꞈ jiˇ-euˬ meh. Ngaˇ tiˬ gʼaˬ tehꞈ-ehˇ dzeˇ laˇ taˬ-awˇ, ngaˬ-ahˇ kʼawꞈ aˬ yawꞈ maꞈ sehꞈ-eu lehˇ leh jeh luꞈ meh.”

¹⁵ Sahˬpaˬ Miˬyehˇ ehˇ-eu, “Daˬmaˬsehˇ meuˬ dawˬ peh jaˆ-eu bawˇ tsahˬ bawˇ dahˇ-ahˇ gʼoꞈ leˇ-awˇ, meuˬ-ahˇ gʼoꞈ uˇ leˇ-awˇ, Haˬzaˬlehˇ-ahˇ tsiˇ lehꞈ nehˬ-awˇ, Suˇliˆ miˇ kʼahˬ-euˬ sahˬ paˬ ka nehˬ-awˬ.

¹⁶ Nmˇshiˇ-euˬ aˬ li Yeˬhuˇ-ahˇ tsiˇ lehꞈ nehˬ-awˇ, Iˇsaˬleˬlaˆ miˇ kʼahˬ-euˬ sahˬ paˬ ka nehˬ-awˬ. Nawˬ-euˬ dah zaˇ Miˬyehˇ gʼaˇ duˬ ngehˬ dah-eu gʼaˬ bi geuꞈ daˆ leꞈ-eu gʼaˇ duˬ, Aˬbeˬlaˆmeˬhawˇlahˬ meuˬ-ahˇ jawˇ-eu Shaˬpaˇ-euˬ aˬ li Eˇliˇshehˇ-ahˇ tsiˇ lehꞈ nehˬ-awˬ.

¹⁷ Haˬzaˬlehˇ sehꞈ laˇ gaˇ kʼaˇ cehˆ buˬ-euˬ tsawˇ haˬ deuˬ, Yeˬhuˇ neh bi sehꞈ tehꞈ-a. Yeˬhuˇ neh maˬ bi sehꞈ-ehˇ kʼaˇ cehˆ dzeuˇ-euˬ tsawˇ haˬ deuˬ, Eˇliˇshehˇ neh bi sehꞈ tehꞈ-a.

¹⁸ Ehˇ kʼawꞈ, ngaˬ-ahˇ saˇ jaˇ ziꞈ-awˇ, Baˬlaˇ miˬ yehˇ mehˬ shi maˬ awˆ byaˆ-ehˇ, Baˬlaˇ miˬ yehˇ-euˬ tahˬ pahˬ aˬ ma mawˇ kawˇ-ahˇ mehˬ cuˇ maˬ cuˇ-euˬ tsawˇ haˬ shiꞈ heˇ gʼaˬ-ahˇ, Iˇsaˬleˬlaˆ miˇ kʼahˬ laꞈ kʼoeˇ ngaˇ bi dehꞈ yaꞈ ma.”

Eˇliˇshehˇ-ahˇ kuˇ-euˬ

¹⁹ Jawˇ duˬ kʼoeˇ tsahˇ-ahˇ neh Eˇliˇyaˆ iˇ gʼeh ngeh, Eˇliˇshehˇ mawˇ neˇ tiˬ gu teh-awˇ deh yaˇ tsehˬ luꞈ gaˇ ya mawˇ-euˬ meh. Eˇliˇshehˇ-euˬ mehˬ hu mawˇ neˇ tseˇ tiꞈ gu tsehˬ luꞈ-awˇ, aˬ yawꞈ gʼaˬ, aˬ cawˬ jeˬ nah nah saˬ tsehˬ luꞈ-eu meh. Eˇliˇyaˆ-aˬ, aˬ yawꞈ-euˬ pehˇ kʼahˬ pehˇ mahˇ lehˆ-awˇ, Eˇliˇshehˇ-ahˇ sheu dm nehˬ-euˬ meh.

²⁰ Kʼoeˇ ngeh, Eˇliˇshehˇ mawˇ neˇ-ahˇ byehˇ dzeh yaꞈ-awˇ, Eˇliˇyaˆ-euˬ mehˬ nah cehˆ gʼeh-awˇ, “Nawˬ-euˬ mehˬ nah ngaˇ maˬ caw teh le mi naˆ-ehˇ, ngaˬ ma ngaˬ da jawˇ gaˇ gʼoꞈ-iˇ-awˇ, mehˬ cuˇ bi cuˇ-iˇ nehˬ laꞈ” lehˇ ehˇ-eu meh. Eˇliˇyaˆ gʼeh, “Muiˬ tehꞈ-a. Gʼoꞈ-iˇ nya tehꞈ-a. Nawˬ-ahˇ ngaˇ maˬ laˆ tsoeˬ” lehˇ ehˇ-eu meh.

²¹ Kʼoeˇ naˇ, Eˇliˇshehˇ gʼaˬ aˬ yawꞈ-euˬ mawˇ neˇ kʼoeˇ gu jawˇ gaˇ iˇ-awˇ, mawˇ neˇ sehꞈ-awˇ, nyoˬ tsehˬ laꞈ gʼahˬ miˬ dzaˬ geuꞈ-awˇ, shaˬ jiˇ jahˇ-euˬ meh. Shaˬ jiˇ kʼoeˇ tsawˇ haˬ kʼoeˇ deuˬ-ahˇ aˬ yawꞈ bi dzaˬ-euˬ meh. Kʼoeˇ naˇ, Eˇliˇyaˆ-euˬ mehˬ nah aˬ yawꞈ caw teh gʼeh-awˇ, Eˇliˇyaˆ-ahˇ caw ba nehˬ-euˬ meh.