1 Sahˬpaˬ 17 - Akha

Eˇliˇyaˆ-ahˇ awꞈ-aꞈdzaˇ sha nehˬ-euˬ

¹ Giˇlaˆ miˇ kʼahˬ Tiˇshaˬbeˬ meuˬ-ahˇ jawˇ-eu Eˇliˇyaˆ lehˇ myahˇ-euˬ Miˬyehˇ gʼaˇ duˬ ngehˬ dah-eu gʼaˬ neh, sahˬ paˬ Aˬhaˆ-ahˇ heu loꞈ-ehˇ ehˇ nehˬ-euˬ meh. “Ngaˇ dawˬ maˬ ngehˬ maˬ tmˇ kʼoeˇ keuˆ ni, smˇ kʼoꞈ byah ni ceuˬ maˬ ga le, uˬ yehˇ maˬ yehˇ le ni jaˆ tehꞈ-a lehˇ, ngaˇ uˬ duˬ tahˬ luꞈ-eu Iˇsaˬleˬlaˆ-euˬ Dehꞈ luꞈ-eu Miˬyehˇ pyeuꞈ-eu Sahˬpaˬ Miˬyehˇ-euˬ tsawˇ myahˇ uˬ moˆ, nawˬ-ahˇ ngaˇ ehˇ-eu ma.”

² Kʼoeˇ naˇ, Eˇliˇyaˆ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

³ “Jawˇ duˬ heu tsahˇ-ahˇ neh nahˇ ma doˆ kʼehˬ paw doˆ-iˇ-awˇ, Yawˇdaˬ lawˇ baˬ nahˇ ma doˆ kʼehˬ paw jaˆ-eu Sheˬyiˆ lawˇ gawˆ dawˬ peh jawˇ zaꞈ-iˇ-awˬ.

⁴ Lawˇ gawˆ kʼoeˇ gawˆ-euˬ iˇ cuꞈ-ahˇ nawˇ dawˇ-awˬ. Nawˇ dzaˬ-eu dzaˇ sha nehˬ le-eu gʼaˇ duˬ, awꞈ-aꞈ-ahˇ ngaˇ dawˬ biꞈ taˬ gʼaˬ-euˬ ma.

⁵ Sahˬpaˬ Miˬyehˇ-euˬ ehˇ dawˬ-ahˇ Eˇliˇyaˆ naˇ haˬ-eu laꞈ kʼoeˇ, Sheˬyiˆ lawˇ gawˆ-ahˇ iˇ-awˇ jawˇ-euˬ meh.

⁶ Lawˇ gawˆ kʼoeˇ gawˆ-euˬ iˇ cuꞈ aˬ yawꞈ dawˇ-awˇ, yawˬ shawˬ yawˬ miˇ na luꞈ awꞈ-aꞈ deuˬ oe-awˇ, aˬ yawꞈ dzaˬ-eu gʼaˇ duˬ kaˬ muˇ hawˇ-eu shaˬ jiˇ sha le-euˬ meh.

⁷ Aˇ yamˬ ui cuiˆ myahˇ laˇ ngeh jawˇ, uˬ yehˇ maˬ yehˇ le-eu baˬ da neh, lawˇ gawˆ kʼoeˇ gawˆ iˇ cuꞈ gui-iˇ-euˬ meh.

Eˇliˇyaˆ hawˇ-eu Zaˬleˇpaˇ meuˬ-ahˇ jawˇ-eu miˬ coeˬ miˬ ma

⁸ Kʼoeˇ naˇ, Eˇliˇyaˆ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh.

⁹ “Nymˬ-mˇ poˆ jawˇ, Siˇdoˬ meuˬ dawˬ peh jaˆ-eu Zaˬleˇpaˇ meuˬ-ahˇ iˇ-awˇ jawˇ-awˬ. Nawˬ-ahˇ bi dzaˬ bi dawˇ-eu gʼaˇ duˬ, kʼoeˇ gaˇ jawˇ-eu miˬ coeˬ miˬ ma tiˬ gʼaˬ-ahˇ ngaˇ dawˬ biꞈ taˬ gʼaˬ-euˬ ma.”

¹⁰ Kʼoeˇ naˇ, Zaˬleˇpaˇ meuˬ-ahˇ Eˇliˇyaˆ iˇ-awˇ, meuˬ lahˇ kʼehˬ-ahˇ aˬ yawꞈ iˇ keuˆ ngeh, miˬ coeˬ miˬ ma tiˬ gʼaˬ miˬ dzaˬ ya uiˬ luꞈ gaˇ ya mawˇ-euˬ meh. Kʼoeˇ ngeh, “Ngaˬ-ahˇ iˇ cuꞈ ui cuiˆ bi dawˇ laꞈ sheˇ” lehˇ, miˬ coeˬ miˬ ma kʼoeˇ gʼaˬ-ahˇ aˬ yawꞈ ehˇ nehˬ-euˬ meh.

¹¹ Miˬ coeˬ miˬ ma kʼoeˇ gʼaˬ iˇ cuꞈ kʼawꞈ laˬ-iˇ-eu lehˇ iˇ ngeh, “Kaˬ muˇ gʼeh ui cuiˆ yuˇ laꞈ-awˇ bi dzaˬ laꞈ-awˬ” lehˇ aˬ yawꞈ ehˇ nehˬ-euˬ meh.

¹² Miˬ coeˬ miˬ ma kʼoeˇ gʼaˬ ehˇ-eu, “Nawˬ-euˬ Miˬyehˇ pyeuꞈ-eu dehꞈ luꞈ-eu Sahˬpaˬ Miˬyehˇ mehˬ shi, ngaˇ nawˬ-ahˇ dawˇ coe ni ehˇ nehˬ nyaˇ. Ngaˇ kaˬ muˇ maˬ jaˆ. Kʼmˬ maˬ-ahˇ ahˇ-eu cehˇ meu laꞈ kʼawˆ tiˬ kʼawˆ hawˇ-eu, ciˬ cuˇ-ahˇ dahˬ-eu saˬ loˬ tsiˇ ui cuiˆ jaˆ-eu tehꞈ ma. Kʼaˇ jaˆ-eu kʼoeˇ ngaˬ li nga nyaꞈ ma zaˬ kaˬ muˇ jahˇ dzaˬ-eu lehˇ, ngaˇ heu gaˇ miˬ dzaˬ ya le-euˬ ma. Kʼoeˇ gaˇ jaˆ-eu kʼoeˇ-aˬ, ngaˬ li nga nyaꞈ ma zaˬ gʼaˇ duˬ, aˇ saˬ saˬ-eu dzaˬ byawˇ ma. Kʼoeˇ dzaˬ jiˇ shaw naˇ ya shiˇ meh.”

¹³ Kʼoeˇ ngeh, miˬ coeˬ miˬ ma kʼoeˇ gʼaˬ-ahˇ Eˇliˇyaˆ ehˇ nehˬ-eu, “Taˬ noeˬ shaˬ. Gʼoꞈ leˇ-awˇ kaˬ muˇ jahˇ leˇ-awˬ. Nawˇ kʼaˇ jaˆ-eu jeˬ laꞈ kʼoeˇ kaˬ muˇ yaw zaˬ zaˬ-ehˇ tiˬ siˬ jahˇ-awˇ, ngaˇ jawˇ gaˇ jeˬ huˬ yuˇ laꞈ-awˬ. Kʼoeˇ naˇ, kʼaˇ dzeˇ-eu deuˬ naw nyaꞈ ma zaˬ jahˇ dzaˬ-awˬ.

¹⁴ Aˬ jeˬ miˇ neh ehˇ naˇ, ‘Sahˬpaˬ Miˬyehˇ pyeuꞈ-eu ngaˇ uˬ yehˇ maˬ bi yehˇ le kʼoeˇ keuˆ ni, kʼmˬ maˬ-ahˇ ahˇ-eu cehˇ meu tiˬ jawˇ-iˬ jiˇ le-eu maˬ baw-ehˇ, ciˬ cuˇ-ahˇ dahˬ-eu tsiˇ tiˬ jawˇ-iˬ dzaˬ jiˇ-euˬ maˬ baw-aˇ’ lehˇ, Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ ehˇ taˬ-euˬ meh.”

¹⁵ Miˬ coeˬ miˬ ma kʼoeˇ gʼaˬ gʼoꞈ leˇ-awˇ, Eˇliˇyaˆ neh ehˇ nehˬ-euˬ loꞈ-ehˇ jahˇ-eu laꞈ kʼoeˇ, aˬ yawꞈ maꞈ gʼawˬ mya nah dzaˬ dehˆ dawˇ dehˆ-awˇ jawˇ-euˬ meh.

¹⁶ Eˇliˇyaˆ-ahˇ gʼoe-awˇ Sahˬpaˬ Miˬyehˇ neh saˇ jaˇ biꞈ taˬ-euˬ loꞈ-ehˇ, kʼmˬ maˬ-ahˇ ahˇ-eu cehˇ meu jiˇ-euˬ maˬ baw-ehˇ, ciˬ cuˇ-ahˇ dahˬ-eu tsiˇ dzaˬ jiˇ-euˬ maˬ baw-a.

¹⁷ Aˇ yamˬ ui cuiˆ myahˇ laˇ ngeh jawˇ, miˬ coeˬ miˬ ma-euˬ aˬ li kʼoeˇ li pyaˬ laˇ-euˬ meh. Aˬ yawꞈ tiˬ jawˇ saˇ-iˬ tiˬ jawˇ naˇ kʼaˆ laˇ-awˇ, shiˇ-euˬ meh.

¹⁸ Miˬ coeˬ miˬ ma kʼoeˇ gʼaˬ Eˇliˇyaˆ-ahˇ ehˇ-eu, “Miˬyehˇ-euˬ tsawˇ haˬ-oˇ, aˬ jeˬ miˇ neh nawˇ ngaˬ-ahˇ heu loꞈ-ehˇ jahˇ nehˬ laꞈ te. Ngaˬ-euˬ iˬ baˇ Miˬyehˇ-ahˇ nawˇ ehˇ noeˬ nehˬ-awˇ, ngaˬ li bi shiˇ-eu lehˇ heu gaˇ laˇ teˬ loˇ.”

¹⁹ Eˇliˇyaˆ ehˇ-eu,“Nawˬ li-ahˇ ngaˇ jawˇ gaˇ ciˬ laꞈ sheˇ” lehˇ ehˇ nehˬ-euˬ meh. Miˬ coeˬ miˬ ma-euˬ aˬ laꞈ-ahˇ ciˬ luꞈ-eu aˬ li kʼoeˇ li-ahˇ aˬ yawꞈ ciˬ-awˇ, aˬ yawꞈ jawˇ-eu nymˇ laꞈ taˆ tiˆ-ahˇ ciˬ daˆ leꞈ-awˇ, yuꞈ zaˇ-ahˇ ciˬ yuꞈ-euˬ meh.

²⁰ Kʼoeˇ naˇ, yaw kʼaˆ-ehˇ guˇ-awˇ, heu loꞈ-ehˇ guiˬ lahˬ shaˇ-euˬ meh. “Ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, aˬ jeˬ miˇ neh miˬ coeˬ miˬ ma heu gʼaˬ kʼoeˇ taˆ heu loꞈ-ehˇ gʼeh-eu shaˬ zahˬ bi keuˆ le te. Aˬ yawꞈ ngaˬ-ahˇ yaw muiˬ paˬ-ehˇ ha-awˇ bo saˆ nehˬ laꞈ-euˬ meh. Ehˇ kʼawꞈ, nymˬ-mˇ poˆ jawˇ aˬ yawꞈ-euˬ aˬ li-ahˇ nawˇ bi shiˇ-euˬ nga.”

²¹ Kʼoeˇ naˇ, aˬ li kʼoeˇ gʼaˬ kʼoeˇ taˆ Eˇliˇyaˆ smˬ poˆ keuˆ ni ga byaˆ-awˇ, “Ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, aˬ li heu li-ahˇ paˇ bi gʼoꞈ dehꞈ laˇ-awˬ” lehˇ guiˬ lahˬ shaˇ-euˬ meh.

²² Eˇliˇyaˆ-euˬ shaˇ dawˬ-ahˇ Sahˬpaˬ Miˬyehˇ naˇ haˬ nehˬ-awˇ, aˬ li kʼoeˇ li saꞈ paˇ gʼawˇ poˆ laˇ-awˇ, paˇ gʼoꞈ dehꞈ laˇ-euˬ meh.

²³ Aˬ li kʼoeˇ li-ahˇ, nymˇ laꞈ oˆ tiˆ-ahˇ aˬ yawꞈ aˬ ma jawˇ gaˇ Eˇliˇyaˆ ciˬ ka gʼeh-awˇ, “Haw sheˇ, nawˬ li gʼoꞈ dehꞈ laˇ gʼaˬ-euˬ meh” lehˇ ehˇ nehˬ-euˬ meh.

²⁴ Miˬ coeˬ miˬ ma kʼoeˇ gʼaˬ ehˇ-eu, “Nymˬ-mˇ poˆ jawˇ, nawˇ Miˬyehˇ-euˬ tsawˇ haˬ pyeuꞈ-eu gaˇ kawˆ hawˇ-eu, nawˬ-ahˇ gʼoe-awˇ Sahˬpaˬ Miˬyehˇ aˬ diˇ aˬ maˇ dawˬ ngehˬ luꞈ-eu gaˇ kawˆ, ngaˇ yaw muiˬ paˬ-ehˇ siˬ duˬ-eu ma.”