1 Sahˬpaˬ 15 - Akha

Yuˇdaˆ sahˬ paˬ Aˬbiˇyaˬ

¹ Sahˬ paˬ Yeˬyawˇbamˬ Iˇsaˬleˬlaˆ miˇ kʼahˬ-ahˇ uˆ lahˇ-euˬ tseˇ smˇ kʼoꞈ tiˬ kʼoꞈ-ahˇ, Aˬbiˇyaˬ Yuˇdaˆ miˇ kʼahˬ-euˬ sahˬ paˬ pyeuꞈ laˇ-euˬ meh.

² Yeˬluˇsaˬlehˬ meuˬ-ahˇ aˬ yawꞈ jawˇ-awˇ, smˇ kʼoꞈ byah ni uˆ lahˇ-euˬ meh. Aˬ yawꞈ-euˬ aˬ ma-aˬ, Aˬbaˇsaˬloˬ-euˬ aˬ buˇ Mawˇkah pyeuꞈ-eu meh.

³ Aˬ yawꞈ-euˬ aˬ da neh mˇ-euˬ iˬ baˇ deuˬ aˬ yawꞈ mˇ poˆ poˆ-awˇ, aˬ yawꞈ-euˬ aˬ bawˇ Daˬbiˇ aˬ yawꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ saˇ jaˇ ziꞈ-euˬ loꞈ-ehˇ, aˬ yawꞈ tiˬ byah tiˬ loꞈ saˇ jaˇ maˬ ziꞈ-a.

⁴ Ehˇ kʼawꞈ, aˬ yawꞈ-euˬ dah zaˇ Yeˬluˇsaˬlehˬ meuˬ-ahˇ jawˇ-awˇ bi uˆ lahˇ-eu gʼaˇ duˬ maˬ ehˇ, Yeˬluˇsaˬlehˬ meuˬ-ahˇ bi haw piˇ-eu gʼaˇ duˬ maˬ ehˇ, aˬ yawꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh Daˬbiˇ-euˬ myaˆ pyawˬ-ahˇ haw-awˇ, Aˬbiˇyaˬ-ahˇ aˬ li tiˬ li biꞈ-euˬ meh.

⁵ Heˬtaˆ tsawˇ jeuˬ Uˇliˇyaˆ-ahˇ taꞈ leˇ-eu gaˇ kawˆ kʼoeˇ hmˬ maˬ ngeuˇ naˇ, Sahˬpaˬ Miˬyehˇ-euˬ ehˇ dawˬ-ahˇ Daˬbiˇ maˬ naˇ haˬ-euˬ maˬ jaˆ ni, aˬ yawꞈ nui ma tsaˬ-eu jeˬ-ahˇ Daˬbiˇ mˇ-euˬ miˇ neh, Leˬhawˇbamˬ-ahˇ Sahˬpaˬ Miˬyehˇ kʼoeˇ loꞈ-ehˇ jahˇ nehˬ-euˬ meh.

⁶ Aˬbiˇyaˬ uˆ lahˇ-eu aˇ nah aˇ yamˬ laꞈ kʼoeˇ, Aˬbiˇyaˬ hawˇ-eu Yeˬyawˇbamˬ aˬ nyaꞈ maˬ tsehˆ leˇ ni guiˇ deuˆ-euˬ meh.

⁷ Aˬbiˇyaˬ neh kʼaˇ mˇ kʼaˇ shaˇ-euˬ jeˬ dawˬ tawˆ luꞈ, Yuˇdaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

⁸ Aˬbiˇyaˬ ziˇ jiˇ-awˇ, Daˬbiˇ-euˬ meuˬ laꞈ kʼoeˇ aˬ yawꞈ-ahˇ baꞈ pahˬ nehˬ-euˬ meh. Kʼoeˇ naˇ, aˬ yawꞈ-euˬ aˬ li Aˬsaˬ gʼaˬ, aˬ yawꞈ-euˬ dah zaˇ sahˬ paˬ geuꞈ-euˬ meh.

Yuˇdaˆ sahˬ paˬ Aˬsaˬ

⁹ Iˇsaˬleˬlaˆ sahˬ paˬ Yeˬyawˇbamˬ uˆ lahˇ-eu nyiˬ tseˇ kʼoꞈ tiˬ kʼoꞈ-ahˇ, Aˬsaˬ Yuˇdaˆ miˇ kʼahˬ-euˬ sahˬ paˬ pyeuꞈ laˇ-euˬ meh.

¹⁰ Oeˬ tseˇ tiꞈ kʼoꞈ byah ni Yeˬluˇsaˬlehˬ meuˬ-ahˇ aˬ yawꞈ jawˇ-awˇ uˆ lahˇ-euˬ meh. Aˬ yawꞈ-euˬ aˬ piˬ-aˬ, Aˬbaˇsaˬloˬ-euˬ aˬ buˇ Mawˇkah pyeuꞈ-eu meh.

¹¹ Aˬsaˬ-aˬ, aˬ yawꞈ-euˬ aˬ poeˬ Daˬbiˇ loꞈ-ehˇ, Sahˬpaˬ Miˬyehˇ nui kʼahˇ shiˇ-eu jeˬ mˇ-euˬ meh.

¹² Lawˇ ciꞈ zaˬ deuˬ uˬ duˬ tahˬ-eu jawˇ duˬ-ahˇ kʼaˇ jawˇ-eu zaˬ miˬ zaˬ meh maˬ laˇ hawˇ-eu kʼaˬ dzeˇ zaˬ meh maˬ laˇ dawˬ tawˆ luꞈ-ahˇ, miˇ kʼahˬ kʼoeˇ kʼahˬ laꞈ kʼoeˇ neh aˬ yawꞈ teh dzeh-awˇ, aˬ piˬ aˬ bawˇ deuˬ neh jahˇ taˬ yaꞈ-euˬ tahˬ pahˬ aˬ ma mawˇ kawˇ dawˬ tawˆ luꞈ-ahˇ, aˬ yawꞈ laˆ piˬ laˆ byoˆ-euˬ meh.

¹³ Aˬ yawꞈ-euˬ aˬ piˬ Mawˇkah gʼaˬ-ahˇ kʼawꞈ, sahˬ paˬ-euˬ aˬ ma geuꞈ-eu aˇ yaˬ yuˇ dzeh nehˬ-euˬ meh. Aˬ jeˬ miˇ neh ehˇ naˇ, aˬ yawꞈ-euˬ aˬ piˬ-aˬ, Aˬsheˇlaˬ miˬ yehˇ ma gʼaˇ duˬ tahˬ pahˬ aˬ ma mawˇ kawˇ tehˆ-euˬ meh. Tahˬ pahˬ aˬ ma mawˇ kawˇ kʼoeˇ hmˬ-ahˇ Aˬsaˬ neh deuˆ tsehˆ-awˇ, Giˇdaˬloˬ lawˇ gawˆ dawˬ peh miˬ dzaˬ dzah puiˆ dzeh-euˬ meh.

¹⁴ Lawˇ ciꞈ zaˬ deuˬ uˬ duˬ tahˬ-euˬ jawˇ duˬ dawˬ tawˆ luꞈ-ahˇ Aˬsaˬ maˬ laˆ cawˆ jiˇ-euˬ kʼawꞈ, aˬ yawꞈ-euˬ tiˬ ziˇ Sahˬpaˬ Miˬyehˇ-ahˇ saˇ jaˇ ziꞈ-awˇ dehꞈ-euˬ meh.

¹⁵ Aˬ yawꞈ-euˬ aˬ da neh Miˬyehˇ-ahˇ damˬ nehˬ-euˬ mˇ myawˬ dawˬ tawˆ luꞈ maˬ ehˇ, aˬ yawꞈ neh damˬ nehˬ-euˬ shuiˇ hawˇ-eu pyuˇ neh jahˇ taˬ-euˬ mˇ myawˬ deuˬ maˬ ehˇ, Uˬ duˬ tahˬ nymˇ nymˇ ma laꞈ kʼoeˇ aˬ yawꞈ bi jaˆ-euˬ meh.

¹⁶ Yuˇdaˆ sahˬ paˬ Aˬsaˬ hawˇ-eu Iˇsaˬleˬlaˆ sahˬ paˬ Bawˬshaˬ aˬ nyaꞈ-aˬ, aˬ yawꞈ nyaꞈ sahˬ paˬ geuꞈ-awˇ kʼaˇ uˆ lahˇ kʼoeˇ keuˆ ni, tiˬ gʼaˬ tiˇ gʼaˬ maˬ tsehˆ leˇ ni guiˇ deuˆ-euˬ meh.

¹⁷ Bawˬshaˬ-aˬ, Yuˇdaˆ miˇ kʼahˬ-ahˇ guiˇ deuˆ-iˇ-awˇ, Yuˇdaˆ miˇ kʼahˬ hawˇ-eu aˬ cawˬ-euˬ miˇ kʼahˬ deuˬ yaw kaˬ yaˇ gaˇ gaˇ tawꞈ-eu gaˇ ma-ahˇ laˆ tsoeˬ-eu lehˇ, Laˬmahˇ meuˬ-ahˇ taˆ ziꞈ dah ni tsoˆ-euˬ meh.

¹⁸ Kʼoeˇ ngeh jawˇ, Uˬ duˬ tahˬ nymˇ nymˇ ma hawˇ-eu sahˬ paˬ-euˬ hawˇ nymˇ laꞈ kʼoeˇ kʼaˇ dzeˇ-eu pyuˇ hawˇ-eu shuiˇ deuˬ-ahˇ sahˬ paˬ Aˬsaˬ yuˇ-awˇ, aˬ yawꞈ-euˬ gaˇ mˇ-eu yaw huiˬ yaw mahˇ deuˬ-ahˇ biꞈ-awˇ, Heˬzoˬ-euˬ aˬ li Taˬbiˇmoˇ-euˬ aˬ li pyeuꞈ-eu Daˬmaˬsehˇ meuˬ-ahˇ jawˇ-eu Suˇliˆ sahˬ paˬ Beˬhaˬdaˇ jawˇ gaˇ bi yuˇ gʼeh-awˇ, heu loꞈ-ehˇ dawˬ tsaꞈ bi tsaꞈ leˇ-euˬ meh.

¹⁹ “Aˇ nyaꞈ-euˬ aˬ da tiˬ gʼaˬ tiˇ gʼaˬ nui ma taꞈ-euˬ loꞈ-ehˇ, aˇ nyaꞈ kʼawꞈ nui ma taꞈ kaˇ-euˇ. Pyuˇ hawˇ-eu shuiˇ heu deuˬ-aˬ, nawˬ-euˬ gʼaˇ duˬ laꞈ sawˬ ma. Bawˬshaˬ-euˬ guiˇ maꞈ deuˬ ngaˬ-euˬ miˇ kʼahˬ laꞈ kʼoeˇ neh ya doˆ-iˇ ni, Bawˬshaˬ-ahˇ nawˇ nui ma maˬ taꞈ ni byehˇ-awˬ.”

²⁰ Aˬsaˬ neh ehˇ-euˬ dawˬ-ahˇ sahˬ paˬ Beˬhaˬdaˇ nui ma tsaˬ-awˇ, aˬ yawꞈ-euˬ guiˇ guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ deuˬ hawˇ-eu, aˬ yawꞈ-euˬ guiˇ maꞈ deuˬ pyehˬ gʼeh-awˇ, Iˇsaˬleˬlaˆ miˇ kʼahˬ-ahˇ jaˆ-eu meuˬ deuˬ-ahˇ guiˇ bi deuˆ-iˇ-euˬ meh. Aˬ yawꞈ maꞈ-aˬ, Iˇyoˬ meuˬ, Daˬ meuˬ, Aˬbeˬlaˆbehˬmawˇkah meuˬ, Gaˬliˬlehˇ lah gahˬ kaˬ hawˇ-eu, Naˬtaˬliˇ miˇ kʼahˬ kʼahˬ lah ni-ahˇ deuˆ gʼaˬ-euˬ meh.

²¹ Gaˇ kawˆ kʼoeˇ Bawˬshaˬ ya gaˬ ngeh, Laˬmahˇ meuˬ gawˬ ziꞈ luꞈ-eu byehˇ dzeh yaꞈ-awˇ, Teuˇzaˬ meuˬ-ahˇ le-euˬ meh.

²² Kʼoeˇ naˇ, Yuˇdaˆ miˇ kʼahˬ doe ni Aˬsaˬ neh tsawˇ haˬ pyehˬ gʼeh-awˇ, “Tsawˇ haˬ yawˬ gʼaˬ na luꞈ laˇ-awˇ, Laˬmahˇ meuˬ gawˬ ziꞈ-eu gʼaˇ duˬ Bawˬshaˬ neh zmˬ-euˬ kʼaˬ lo hawˇ-eu daˇ kawˬ deuˬ baꞈ doˆ laˇ-awˬ” lehˇ bi tsaꞈ gaˬ doe-euˬ meh. Kʼaˬ lo hawˇ-eu daˇ kawˬ kʼoeˇ deuˬ-ahˇ Aˬsaˬ yuˇ-awˇ, Miˇzaˬpaˬ meuˬ hawˇ-eu Beˬyaˬmiˬ miˇ kʼahˬ-ahˇ jaˆ-eu Geˬbaˬ meuˬ tsoˆ muiˬ gaˇ zmˬ-euˬ meh.

²³ Sahˬ paˬ Aˬsaˬ neh nui ma kʼaˬ duˬ ni taˬ-awˇ mˇ-euˬ gaˇ deuˬ hawˇ-eu aˬ yawꞈ neh tsoˆ muiˬ-euˬ meuˬ deuˬ maˬ ehˇ, aˬ yawꞈ neh kʼaˇ mˇ kʼaˇ shaˇ-euˬ yawˬ je na luꞈ maˬ ehˇ, Yuˇdaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh. Ehˇ kʼawꞈ, aˬ yawꞈ tsawˇ mawˬ mawˬ laˇ ngeh, aˬ yawꞈ-euˬ aˬ kuiˇ maˇ naˇ naˇ laˇ-awˇ, kuiˇ shiˇ shiˇ-euˬ meh.

²⁴ Aˬsaˬ ziˇ jiˇ-awˇ, Daˬbiˇ-euˬ meuˬ-ahˇ jaˆ-eu sahˬ paˬ-euˬ lmˬ bymˇ-ahˇ baꞈ pahˬ-euˬ meh. Aˬ yawꞈ-euˬ dah zaˇ, aˬ yawꞈ-euˬ aˬ li Yeˬhawˇshaˬpaˇ sahˬ paˬ geuꞈ-euˬ meh.

Iˇsaˬleˬlaˆ sahˬ paˬ Naˬdehˇ

²⁵ Yuˇdaˆ sahˬ paˬ Aˬsaˬ uˆ lahˇ-eu nyiˬ kʼoꞈ tiˬ kʼoꞈ-ahˇ, sahˬ paˬ Yeˬyawˇbamˬ-euˬ aˬ li Naˬdehˇ gʼaˬ Iˇsaˬleˬlaˆ sahˬ paˬ pyeuꞈ laˇ-awˇ, nyiˬ kʼoꞈ uˆ lahˇ-euˬ meh.

²⁶ Aˬ yawꞈ-euˬ mehˬ hu sahˬ paˬ geuꞈ dzeuˇ yaꞈ-euˬ aˬ yawꞈ-euˬ aˬ da loꞈ-ehˇ, Sahˬpaˬ Miˬyehˇ-ahˇ aˬ yawꞈ mˇ lehˬ-awˇ, Iˇsaˬleˬlaˆ miˇ kʼahˬ iˬ baˇ mˇ ni aˬ yawꞈ sheuˬ gʼeh-euˬ meh.

²⁷ Iˇsaˬleˬlaˆ tsawˇ jeuˬ Aˬhiˇyaˬ-euˬ aˬ li Bawˬshaˬ gʼaˬ ciˬ cuˇ ni Naˬdehˇ-ahˇ puiˬ-awˇ, Naˬdehˇ hawˇ-eu aˬ yawꞈ-euˬ guiˇ maꞈ deuˬ Piˇliˇtiˆ miˇ kʼahˬ Giˇbeˬdoˬ meuˬ-ahˇ guiˇ deuˆ-awˇ loꞈ jawˬ luꞈ ngeh, Naˬdehˇ-ahˇ aˬ yawꞈ sehꞈ-euˬ meh.

²⁸ Yuˇdaˆ sahˬ paˬ Aˬsaˬ uˆ lahˇ-eu smˇ kʼoꞈ tiˬ kʼoꞈ-ahˇ, kʼoeˇ loꞈ-ehˇ pyeuꞈ laˇ-euˬ meh. Kʼoeˇ naˇ, Naˬdehˇ-euˬ dah zaˇ, Bawˬshaˬ gʼaˬ Iˇsaˬleˬlaˆ miˇ kʼahˬ-euˬ sahˬ paˬ geuꞈ-euˬ meh.

²⁹ Aˬ yawꞈ sahˬ paˬ pyeuꞈ laˇ-euˬ nehˬ-ehˇ tiˬ poˆ tehꞈ-ehˇ, Yeˬyawˇbamˬ-euˬ miˬ sawˇ zaˬ dawˬ tawˆ luꞈ-ahˇ sehꞈ-euˬ meh. Shiˇloˬ meuˬ-ahˇ jawˇ-eu Miˬyehˇ gʼaˇ duˬ ngehˬ dah-eu gʼaˬ pyeuꞈ-eu aˬ yawꞈ-euˬ zaˬ kʼaˆ Aˬhiˇyaˬ-ahˇ Sahˬpaˬ Miˬyehˇ gʼoe-awˇ ehˇ taˬ-euˬ loꞈ-ehˇ, Yeˬyawˇbamˬ-euˬ miˬ sawˇ zaˬ dawˬ tawˆ luꞈ, tiˬ gʼaˬ-iˬ maˬ dzeuˇ-iˇ ni bi sehꞈ jiˇ-euˬ meh.

³⁰ Yeˬyawˇbamˬ-euˬ mawˇ do iˬ baˇ mˇ-euˬ uˬ taꞈ, Iˇsaˬleˬlaˆ miˇ kʼahˬ iˬ baˇ mˇ ni jahˇ-eu laꞈ kʼoeˇ, Sahˬpaˬ Miˬyehˇ nui ma pehˇ ni aˬ yawꞈ mˇ-euˬ miˇ neh, kʼoeˇ loꞈ-ehˇ pyeuꞈ laˇ-euˬ meh.

³¹ Naˬdehˇ neh kʼaˇ mˇ kʼaˇ shaˇ-euˬ jeˬ dawˬ tawˆ luꞈ, Iˇsaˬleˬlaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

³² Yuˇdaˆ sahˬ paˬ Aˬsaˬ hawˇ-eu Iˇsaˬleˬlaˆ sahˬ paˬ Bawˬshaˬ aˬ nyaꞈ-aˬ, aˬ yawꞈ nyaꞈ sahˬ paˬ geuꞈ-awˇ kʼaˇ uˆ lahˇ kʼoeˇ keuˆ ni, tiˬ gʼaˬ tiˇ gʼaˬ maˬ tsehˆ leˇ ni guiˇ deuˆ-euˬ meh.

Iˇsaˬleˬlaˆ sahˬ paˬ Bawˬshaˬ

³³ Yuˇdaˆ sahˬ paˬ Aˬsaˬ uˆ lahˇ-eu smˇ kʼoꞈ tiˬ kʼoꞈ-ahˇ, Aˬhiˇyaˬ-euˬ aˬ li Bawˬshaˬ gʼaˬ Iˇsaˬleˬlaˆ miˇ kʼahˬ kʼahˬ lah ni kʼoeˇ taˆ uˆ lahˇ-eu sahˬ paˬ pyeuꞈ laˇ-awˇ, Teuˇzaˬ meuˬ-ahˇ aˬ yawꞈ jawˇ-awˇ, nyiˬ tseˇ oeˬ kʼoꞈ byah ni uˆ lahˇ-euˬ meh.

³⁴ Aˬ yawꞈ-euˬ mehˬ hu sahˬ paˬ geuꞈ-awˇ uˆ lahˇ-euˬ sahˬ paˬ Yeˬyawˇbamˬ loꞈ-ehˇ, Sahˬpaˬ Miˬyehˇ-ahˇ aˬ yawꞈ mˇ lehˬ-awˇ, Iˇsaˬleˬlaˆ miˇ kʼahˬ iˬ baˇ mˇ ni aˬ yawꞈ sheuˬ gʼeh-euˬ meh.