1 Sahˬpaˬ 14 - Akha

Yeˬyawˇbamˬ-euˬ aˬ li shiˇ-euˬ

¹ Aˇ yamˬ kʼoeˇ yamˬ laꞈ kʼoeˇ, sahˬ paˬ Yeˬyawˇbamˬ-euˬ aˬ li Aˬbiˇyaˬ pyaˬ laˇ-euˬ meh.

² Kʼoeˇ ngeh, Yeˬyawˇbamˬ aˬ yawꞈ-euˬ miˬ zaˬ-ahˇ heu loꞈ-ehˇ ehˇ nehˬ-euˬ meh. “Nawˬ-ahˇ aˬ cawˬ maˬ haw siˬ nya ni mehˬ tsoeˬ dm paˇ-awˇ, ngaˇ Iˇsaˬleˬlaˆ miˇ kʼahˬ-euˬ sahˬ paˬ pyeuꞈ laˇ tehꞈ-a lehˇ ehˇ-euˬ gʼaˬ pyeuꞈ-eu Miˬyehˇ gʼaˇ duˬ ngehˬ dah-eu Aˬhiˇyaˬ jawˇ-eu Shiˇloˬ meuˬ-ahˇ iˇ-awˬ.

³ Kaˬ muˇ tseˇ siˬ, kaˬ muˇ aˇ yaˆ yaˆ zaˬ ui cuiˆ hawˇ-eu, byaˬ byaˬ uiˇ kʼawꞈ tiˬ tsahˬ yuˇ gʼeh nehˬ-awˬ. Aˬ dui pehˬ-euˬ aˬ li pyaˬ-eu taˬ leˇ nya nga loˇ, maˬ taˬ leˇ nya nga loˇ lehˇ aˬ yawꞈ-ahˇ naˇ haˬ naˇ, aˬ yawꞈ ehˇ nehˬ laꞈ nya tehꞈ-a.”

⁴ Yeˬyawˇbamˬ-euˬ miˬ zaˬ-aˬ, Shiˇloˬ meuˬ-ahˇ jaˆ-eu Aˬhiˇyaˬ-euˬ nymˇ-ahˇ iˇ-euˬ meh. Aˬhiˇyaˬ tsawˇ mawˬ mawˬ dui dui laˇ-awˇ, myaˆ nuiˆ maˬ mawˇ nya-a.

⁵ “Yeˬyawˇbamˬ-euˬ miˬ zaˬ oe-awˇ, pyaˬ luꞈ-eu aˬ yawꞈ-euˬ aˬ li gaˇ kawˆ naˇ haˬ le tehꞈ-a” lehˇ, Sahˬpaˬ Miˬyehˇ aˬ yawꞈ-ahˇ ehˇ nehˬ taˬ-euˬ meh. Aˬ joˆ-ehˇ ya ehˇ kʼoꞈ nehˬ-eu gaˇ kawˆ kʼawꞈ, Aˬhiˇyaˬ-ahˇ Sahˬpaˬ Miˬyehˇ ehˇ gʼaˬ taˬ-euˬ meh. Yeˬyawˇbamˬ-euˬ miˬ zaˬ-aˬ, aˬ cawˬ neh maˬ bi haw siˬ-eu gʼaˇ duˬ, yawˬ gʼaˬ yawˬ geuꞈ-awˇ oe keuˆ-euˬ meh.

⁶ Ehˇ kʼawꞈ, aˬ yawꞈ laˇ gʼoˆ-ahˇ uˇ laˇ-eu nehˬ-ehˇ, Aˬhiˇyaˬ heu loꞈ-ehˇ ehˇ-eu meh. “Uˇ laˇ-awˬ. Nawˇ Yeˬyawˇbamˬ-euˬ miˬ zaˬ meh lehˇ ngaˇ siˬ nya ma. Aˬ jeˬ miˇ neh yawˬ gʼaˬ yawˬ geuꞈ-awˇ oe teˬ. Nawˬ-euˬ gʼaˇ duˬ noeˬ shaˬ paˬ-ehˇ gʼeh-eu gaˇ kawˆ ehˇ nehˬ paˬ-ehˇ jaˆ-eu ma.

⁷ Yeˬyawˇbamˬ-ahˇ heu loꞈ-ehˇ ehˇ nehˬ leˇ-awˬ. Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ aˬ yawꞈ-ahˇ heu loꞈ-ehˇ ehˇ-eu meh. ‘Tsawˇ haˬ heu myaˆ ni gʼeh-eu laꞈ kʼoeˇ nawˬ-ahˇ ngaˇ tseˇ doˆ-awˇ, ngaˬ-euˬ tsawˇ jeuˬ Iˇsaˬleˬlaˆ tsawˇ haˬ deuˬ kʼoeˇ taˆ uˆ lahˇ-eu gʼaˬ bi geuꞈ-euˬ ma.

⁸ Daˬbiˇ-euˬ zaˬ deuˬ uˆ deuˬ-euˬ laꞈ-ahˇ neh miˇ kʼahˬ heu kʼahˬ ngaˇ yuˇ doˆ-awˇ, nawˬ-ahˇ biꞈ-euˬ ma. Ehˇ kʼawꞈ, ngaˬ-ahˇ saˇ jaˇ ziꞈ dui dui-awˇ, ngaˬ-euˬ ehˇ dawˬ naˇ haˬ-eu laꞈ kʼoeˇ, ngaˬ neh kʼaˇ bi mˇ-euˬ jeˬ tehꞈ-ehˇ mˇ-eu ngaˬ-euˬ zaˬ kʼaˆ Daˬbiˇ-ahˇ nawˇ maˬ duˇ law hawˇ ngaˬ.

⁹ Nawˬ-euˬ mehˬ hu sahˬ paˬ geuꞈ dzeuˇ yaꞈ-euˬ deuˬ neh mˇ-euˬ iˬ baˇ naˆ maˬ tseˇ, huiˬ dui dui-eu iˬ baˇ nawˇ mˇ-euˬ meh. Nawˇ ngaˬ-ahˇ byehˇ dzeh-awˇ, miˬ yehˇ nui deuˬ hawˇ-eu tahˬ pahˬ aˬ ma mawˇ kawˇ deuˬ tehˆ-awˇ uˬ duˬ tahˬ-eu laꞈ kʼoeˇ, ngaˇ nui ma pehˇ ni mˇ-euˬ meh.

¹⁰ Kʼoeˇ baˬ da neh, nawˬ-euˬ nymˇ jiˇ kʼoeˇ taˆ luˬ-iˇ seˇ-iˇ-eu jeˬ ngaˇ bi keuˆ le-awˇ, nawˬ-euˬ zaˬ deuˬ uˆ deuˬ laꞈ kʼoeˇ, kʼaˬ dzeˇ zaˬ kʼaˇ ngeuˇ-eu dawˬ tawˆ luꞈ, yaw huiˬ yaw nyiˇ maˬ tseˇ ni ngaˇ sehꞈ jiˇ ma. Nawˬ-euˬ nymˇ jiˇ-ahˇ ngaˇ byehˇ tsehˆ tsehˆ-awˇ, mawˇ neˇ keˬ puiˆ byoˆ-eu loꞈ-ehˇ ya byoˆ-iˇ tehꞈ-a.

¹¹ Nawˬ-euˬ nymˇ kʼahˬ zaˬ deuˬ laꞈ kʼoeˇ, meuˬ-ahˇ shiˇ dzeh taˬ-euˬ deuˬ-ahˇ aˬ kuiˬ dzaˬ-awˇ, bawˇ tsahˬ-ahˇ kʼaˇ shiˇ-euˬ deuˬ-ahˇ jeˬ shiˇ kʼaˬ dzeˇ dzaˬ tehꞈ-a. Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu ma’ lehˇ ehˇ-eu meh lehˇ ehˇ nehˬ-awˬ.”

¹² Kʼoeˇ naˇ, Yeˬyawˇbamˬ-euˬ miˬ zaˬ-ahˇ Aˬhiˇyaˬ paˇ ehˇ nehˬ-eu, “Nymˬ-mˇ nawˇ gʼoꞈ leˇ-awˬ. Nawˇ meuˬ-ahˇ gʼoꞈ uˇ leˇ-eu nehˬ-ehˇ nawˬ li shiˇ tehꞈ-a.

¹³ Iˇsaˬleˬlaˆ tsawˇ haˬ dawˬ tawˆ luꞈ aˬ yawꞈ gʼaˇ duˬ tsawˇ ngoeˇ ngoeˇ-awˇ, aˬ yawꞈ-ahˇ baꞈ pahˬ tehꞈ-a. Yeˬyawˇbamˬ-euˬ nymˇ jiˇ laꞈ kʼoeˇ, aˬ yawꞈ tiˬ gʼaˬ-ahˇ tehꞈ-ehˇ yaw muiˬ paˬ-ehˇ ya baꞈ pahˬ nehˬ tehꞈ-a. Aˬ jeˬ miˇ neh ehˇ naˇ, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ nui ma tsaˬ-eu aˬ yawꞈ tiˬ gʼaˬ jawˇ-eu tehꞈ meh.

¹⁴ Yeˬyawˇbamˬ-euˬ nymˇ jiˇ Iˇsaˬleˬlaˆ miˇ kʼahˬ-ahˇ dzoeˬ dzaˬ oꞈ-eu aˇ saˬ saˬ ni, Iˇsaˬleˬlaˆ miˇ kʼahˬ-ahˇ bi uˆ lahˇ-eu gʼaˇ duˬ, sahˬ paˬ yawˬ gʼaˬ yawˬ-ahˇ Sahˬpaˬ Miˬyehˇ tseˇ paˇ tehꞈ-a.

¹⁵ Iˇsaˬleˬlaˆ tsawˇ jeuˬ-ahˇ Sahˬpaˬ Miˬyehˇ kʼehˬ nehˬ-awˇ, iˇ cuꞈ iˇ kʼawˇ neh bi sheu nyeh-euˬ aˇ toꞈ aˇ kahˬ loꞈ-ehˇ bi sheu nyeh tehꞈ-a. Aˬ yawꞈ maꞈ-euˬ aˬ poeˬ aˬ bawˇ deuˬ-ahˇ aˬ yawꞈ neh biꞈ nehˬ-euˬ muiˬ-eu miˇ tsaˬ heu tsahˇ-ahˇ neh, Iˇsaˬleˬlaˆ tsawˇ haˬ deuˬ-ahˇ aˬ yawꞈ puˇ ngawˬ ngawˬ lehˆ doˆ-awˇ, Uˇpaˬlaˇ lawˇ baˬ nui baˬ paw bi cehˆ byaˆ jiˇ tehꞈ-a. Aˬ jeˬ miˇ neh ehˇ naˇ, Aˬsheˇlaˬ miˬ yehˇ ma-euˬ tahˬ pahˬ aˬ ma mawˇ kawˇ aˬ yawꞈ maꞈ tehˆ-awˇ, aˬ yawꞈ nui ma pehˇ ni mˇ-euˬ meh.

¹⁶ Yeˬyawˇbamˬ mehˬ huˬ huˬ-eu mehˬ nah caw teh-awˇ, Iˇsaˬleˬlaˆ tsawˇ haˬ deuˬ iˬ baˇ mˇ-euˬ miˇ neh, Iˇsaˬleˬlaˆ tsawˇ jeuˬ-ahˇ Sahˬpaˬ Miˬyehˇ byehˇ dzeh tehꞈ-a.”

¹⁷ Yeˬyawˇbamˬ-euˬ miˬ zaˬ-aˬ, Teuˇzaˬ meuˬ-ahˇ gʼoꞈ leˇ-euˬ meh. Aˬ yawꞈ-euˬ nymˇ-ahˇ gʼoꞈ uˇ leˇ-eu nehˬ-ehˇ, aˬ yawꞈ-euˬ aˬ li shiˇ tsehˆ-euˬ meh.

¹⁸ Sahˬpaˬ Miˬyehˇ-euˬ zaˬ kʼaˆ pyeuꞈ-eu Miˬyehˇ gʼaˇ duˬ ngehˬ dah-eu Aˬhiˇyaˬ-ahˇ gʼoe-awˇ, Sahˬpaˬ Miˬyehˇ neh ehˇ taˬ-euˬ loꞈ-ehˇ, Iˇsaˬleˬlaˆ tsawˇ haˬ deuˬ aˬ yawꞈ gʼaˇ duˬ tsawˇ ngoeˇ ngoeˇ-awˇ, aˬ yawꞈ-ahˇ baꞈ pahˬ nehˬ-euˬ meh.

Yeˬyawˇbamˬ ziˇ jiˇ-euˬ

¹⁹ Sahˬ paˬ Yeˬyawˇbamˬ neh guiˇ deuˆ-euˬ gaˇ kawˆ deuˬ maˬ ehˇ, miˇ kʼahˬ-ahˇ uˆ lahˇ-euˬ gaˇ kawˆ deuˬ maˬ ehˇ, aˬ yawꞈ neh kʼaˇ mˇ kʼaˇ shaˇ yaꞈ-euˬ yawˬ jeˬ na luꞈ, Iˇsaˬleˬlaˆ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

²⁰ Yeˬyawˇbamˬ-aˬ, nyiˬ tseˇ nyiꞈ kʼoꞈ byah ni sahˬ paˬ geuꞈ-awˇ miˇ kʼahˬ-ahˇ uˆ lahˇ-euˬ meh. Aˬ yawꞈ ziˇ jiˇ-awˇ, aˬ yawꞈ-ahˇ baꞈ pahˬ gʼaˬ ngeh, aˬ yawꞈ-euˬ aˬ li Naˬdehˇ gʼaˬ, aˬ yawꞈ-euˬ dah zaˇ sahˬ paˬ geuꞈ-euˬ meh.

Yuˇdaˆ sahˬ paˬ Leˬhawˇbamˬ

²¹ Kʼoeˇ ngeh, Sawˇlaˬmoˬ-euˬ aˬ li Leˬhawˇbamˬ gʼaˬ Yuˇdaˆ miˇ kʼahˬ-ahˇ uˆ lahˇ luꞈ-eu meh. Leˬhawˇbamˬ sahˬ paˬ pyeuꞈ laˇ ngeh, oeˬ tseˇ tiꞈ kʼoꞈ kʼawˆ-awˇ, Yeˬluˇsaˬlehˬ meuˬ-ahˇ jawˇ-awˇ tseˇ shiꞈ kʼoꞈ byah ni uˆ lahˇ-euˬ meh. Yeˬluˇsaˬlehˬ meuˬ-aˬ, Iˇsaˬleˬlaˆ miˇ kʼahˬ kʼahˬ lah ni kʼoeˇ taˆ Sahˬpaˬ Miˬyehˇ-euˬ tsawˇ myahˇ bi jaˆ-eu gʼaˇ duˬ, Sahˬpaˬ Miˬyehˇ neh tseˇ doˆ taˬ-euˬ meuˬ pyeuꞈ-eu meh. Aˬ yawꞈ-euˬ aˬ ma-aˬ, Aˬmoˬ tsawˇ jeuˬ Naˬmaˬ meh.

²² Yuˇdaˆ miˇ kʼahˬ zaˬ deuˬ Sahˬpaˬ Miˬyehˇ-ahˇ mˇ lehˬ-awˇ, aˬ yawꞈ maꞈ-euˬ aˬ poeˬ aˬ bawˇ deuˬ naˆ maˬ tseˇ aˬ yawꞈ nui ma pehˇ-eu jeˬ aˬ yawꞈ maꞈ mˇ-euˬ meh.

²³ Gawˬ jawˬ gawˬ duˇ doe ni hawˇ-eu naˇ shmˇ shmˇ-eu aˇ bawˇ dawˬ pehˬ doe ni, maˬ ngeuˇ-eu miˬ yehˇ deuˬ-ahˇ uˬ duˬ tahˬ-eu jawˇ duˬ tsoˆ-awˇ, Aˬsheˇlaˬ miˬ yehˇ ma-ahˇ uˬ duˬ tahˬ-eu gʼaˇ duˬ, tahˬ pahˬ aˬ ma mawˇ kawˇ deuˬ hawˇ-eu kʼaˬ lo kʼawˇ zeuˇ deuˬ ka tuˇ-euˬ meh.

²⁴ Doeˇ dui dui-eu tiˬ jeˬ-aˬ, lawˇ ciꞈ zaˬ deuˬ uˬ duˬ tahˬ-eu jawˇ duˬ-ahˇ, zaˬ miˬ zaˬ meh maˬ laˇ hawˇ-eu kʼaˬ dzeˇ zaˬ meh maˬ laˇ deuˬ kʼawꞈ jawˇ-eu kʼoeˇ hmˬ meh. Iˇsaˬleˬlaˆ tsawˇ haˬ deuˬ miˇ kʼahˬ kʼoeˇ kʼahˬ laꞈ kʼoeˇ jawˇ uˇ leˇ ngeh, Sahˬpaˬ Miˬyehˇ neh teh doˆ nehˬ-euˬ, yaw beh kʼoeˇ gaˇ jawˇ-euˬ tsawˇ jeuˬ deuˬ kʼaˇ mˇ-euˬ shaꞈ dawˇ dui dui paˬ-ehˇ gʼeh-eu jeˬ dawˬ tawˆ luꞈ-ahˇ, Yuˇdaˆ miˇ kʼahˬ zaˬ deuˬ mˇ-euˬ meh.

²⁵ Sahˬ paˬ Leˬhawˇbamˬ uˆ lahˇ-euˬ ngaˬ kʼoꞈ tiˬ kʼoꞈ-ahˇ, Iˇjiˇtuˆ sahˬ paˬ Shiˇshehˆ Yeˬluˇsaˬlehˬ meuˬ-ahˇ guiˇ deuˆ le-euˬ meh.

²⁶ Uˬ duˬ tahˬ nymˇ nymˇ ma hawˇ-eu sahˬ paˬ-euˬ hawˇ nymˇ laꞈ kʼoeˇ kʼaˇ jaˆ-eu myawˬ gahˬ dawˬ tawˆ luꞈ, aˬ yawꞈ yuˇ geuꞈ gʼeh-euˬ meh. Shuiˇ neh jahˇ taˬ-euˬ sahˬ paˬ Sawˇlaˬmoˬ-euˬ dehˬ daˬ duˬ kʼoeˇ deuˬ kʼawꞈ, yuˇ geuꞈ gʼeh-euˬ meh.

²⁷ Dehˬ daˬ duˬ kʼoeˇ deuˬ-euˬ dah zaˇ, sahˬ paˬ Leˬhawˇbamˬ neh guiˬ shuiˇ dehˬ daˬ duˬ deuˬ paˇ jahˇ-awˇ, sahˬ paˬ-euˬ hawˇ nymˇ gʼoˆ kʼehˬ-ahˇ loꞈ-eu yaw huiˬ yaw mahˇ deuˬ-ahˇ a nehˬ-awˇ bi haw piˇ-euˬ meh.

²⁸ Aˬ yawꞈ poˆ yawꞈ Uˬ duˬ tahˬ nymˇ nymˇ ma-ahˇ sahˬ paˬ kʼaˇ le ngeh, aˬ yawꞈ-ahˇ loꞈ piˇ-eu yehˇ deuˬ dehˬ daˬ duˬ kʼoeˇ deuˬ yuˇ laˬ le-awˇ, gʼoꞈ le ngeh kʼawꞈ, sahˬ paˬ-euˬ hawˇ nymˇ-ahˇ loꞈ piˇ-eu deuˬ jawˇ-eu lawˆ-ahˇ paˇ a kʼoꞈ nehˬ le-eu meh.

²⁹ Sahˬ paˬ Leˬhawˇbamˬ neh kʼaˇ mˇ-euˬ jeˬ dawˬ tawˆ luꞈ, Yuˇdaˆ sahˬ paˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

³⁰ Aˇ yamˬ kʼoeˇ yamˬ laꞈ kʼoeˇ, Leˬhawˇbamˬ hawˇ-eu Yeˬyawˇbamˬ aˬ nyaꞈ maˬ tsehˆ leˇ ni guiˇ deuˆ-euˬ meh.

³¹ Leˬhawˇbamˬ ziˇ jiˇ-awˇ, Daˬbiˇ-euˬ meuˬ-ahˇ jaˆ-eu sahˬ paˬ deuˬ-euˬ lmˬ bymˇ-ahˇ, aˬ yawꞈ-ahˇ baꞈ pahˬ-euˬ meh. Aˬ yawꞈ-euˬ aˬ ma-aˬ, Aˬmoˬ tsawˇ jeuˬ Naˬmaˬ meh. Aˬ yawꞈ shiˇ dzeuˇ ngeh, aˬ yawꞈ-euˬ aˬ li Aˬbiˇyaˬ gʼaˬ aˬ yawꞈ-euˬ dah zaˇ sahˬ paˬ geuꞈ-euˬ meh.