1 Sahˬpaˬ 12 - Akha

Laꞈ taˆ paw jawˇ-eu Iˇsaˬleˬlaˆ tsawˇ haˬ deuˬ Leˬhawˇbamˬ-ahˇ puiˬ-euˬ

¹ Leˬhawˇbamˬ-ahˇ sahˬ paˬ ka nehˬ-eu gʼaˇ duˬ, Iˇsaˬleˬlaˆ miˇ kʼahˬ laꞈ taˆ paw pyawˬ-ahˇ jawˇ-eu tsawˇ haˬ deuˬ uiˬ leˇ taˬ-euˬ Sheˬkmˬ meuˬ-ahˇ Leˬhawˇbamˬ le-euˬ meh.

² Sahˬ paˬ Sawˇlaˬmoˬ-euˬ laꞈ-ahˇ neh ya buˬ-iˇ ni Iˇjiˇtuˆ miˇ kʼahˬ-ahˇ cehˆ jawˇ-iˇ-euˬ Neˬbaˇ-euˬ aˬ li Yeˬyawˇbamˬ gʼaˬ, gaˇ kawˆ kʼoeˇ ya gaˬ-awˇ Iˇjiˇtuˆ miˇ kʼahˬ-ahˇ neh gʼoꞈ daˆ laˇ-euˬ meh.

³ Laꞈ taˆ paw jawˇ-eu Iˇsaˬleˬlaˆ tsawˇ jeuˬ deuˬ neh Yeˬyawˇbamˬ-ahˇ bi kuˇ kʼoꞈ laˬ-iˇ-awˇ, aˬ yawꞈ maꞈ dawˬ tawˆ luꞈ Leˬhawˇbamˬ jawˇ gaˇ iˇ-awˇ, heu loꞈ-ehˇ ehˇ nehˬ leˇ-euˬ meh.

⁴ “Nawˬ da Sawˇlaˬmoˬ-aˬ, nga maꞈ-ahˇ yaw kʼaˆ-ehˇ kʼehˇ dzaˬ-awˇ, maˬ gʼaˬ leˇ gaˇ keuˆ ni ciˬ baꞈ ciˬ pi nehˬ laꞈ-euˬ meh. Nga maꞈ-ahˇ nawˬ da neh ciˬ baꞈ ciˬ pi nehˬ laꞈ-euˬ kʼaˆ behˆ nawˇ laˆ pyaˇ nehˬ laꞈ-awˇ, ui cuiˆ yaw saˇ saˇ-ehˇ bi dehꞈ laꞈ naˇ, nawˇ uˆ lahˇ-eu uˬ moˆ nga maꞈ jawˇ ma.”

⁵ Aˬ yawꞈ maꞈ-ahˇ aˬ yawꞈ ehˇ nehˬ-eu, “Smˬ nah byah laˇ naˇ tiˬ poˆ paˇ oe lawˬ. Ngaˇ naw maꞈ-ahˇ ehˇ duˬ nehˬ ma.” Kʼoeˇ ngeh, aˬ yawꞈ maꞈ gʼoꞈ leˇ-euˬ meh.

⁶ Sahˬ paˬ Leˬhawˇbamˬ-aˬ, aˬ yawꞈ-euˬ aˬ da Sawˇlaˬmoˬ-ahˇ nui noeˬ nui duˇ biꞈ-euˬ tsawˇ mawˬ tsawˇ kʼaˆ deuˬ nehˬ-ehˇ ja uˇ haw-euˬ meh. “Tsawˇ haˬ kʼoeˇ deuˬ-ahˇ ngaˇ aˬ joˆ-ehˇ ehˇ kʼoꞈ nehˬ paˬ-ehˇ gʼeh-eu nga lehˇ naw maꞈ ehˇ haw sheˇ” lehˇ, tsawˇ mawˬ kʼoeˇ deuˬ-ahˇ aˬ yawꞈ naˇ haˬ-euˬ meh.

⁷ Aˬ yawꞈ maꞈ ehˇ-eu, “Tsawˇ haˬ kʼoeˇ deuˬ-ahˇ nawˇ yaw muiˬ paˬ-ehˇ haw nehˬ pyaˆ nehˬ mawꞈ te lehˇ ngeuˇ naˇ, aˬ yawꞈ maꞈ shaˇ laˇ-euˬ jeˬ-ahˇ yaw muiˬ paˬ-ehˇ shaˇ noeˬ nehˬ-eu tsaˬ tehꞈ-a. Kʼoeˇ loꞈ-ehˇ shaˇ noeˬ nehˬ naˇ, aˬ myah luꞈ aˬ yawꞈ maꞈ nawˬ-ahˇ saˇ jaˇ ziꞈ tehꞈ-a.”

⁸ Ehˇ kʼawꞈ, tsawˇ mawˬ tsawˇ kʼaˆ kʼoeˇ deuˬ-euˬ dawˬ-ahˇ aˬ yawˬ maˬ naˇ haˬ ni, aˬ yawꞈ-ahˇ nui noeˬ nui duˇ biꞈ luꞈ-eu deuˬ pyeuꞈ-eu aˬ yawꞈ nehˬ-ehˇ tiˬ kawˆ loꞈ-ehˇ huiˬ laˇ-euˬ zaˬ guˬ deuˬ jawˇ gaˇ aˬ yawꞈ iˇ-euˬ meh.

⁹ Zaˬ guˬ kʼoeˇ deuˬ-ahˇ aˬ yawꞈ ehˇ nehˬ-eu, “Naw maꞈ ngaˬ-ahˇ nui noeˬ nui duˇ aˬ joˆ-ehˇ biꞈ mawꞈ te. Aˬ yawꞈ maꞈ-euˬ kʼaˆ behˆ ui cuiˆ laˆ pyaˇ nehˬ laꞈ lehˇ ehˇ-eu tsawˇ haˬ kʼoeˇ deuˬ-ahˇ ngaˇ aˬ joˆ-ehˇ ehˇ kʼoꞈ nehˬ-eu tsaˬ nmˇ.”

¹⁰ Aˬ yawꞈ maꞈ ehˇ-eu, “Tsawˇ haˬ kʼoeˇ deuˬ-ahˇ heu loꞈ-ehˇ ehˇ kʼoꞈ nehˬ-awˬ. Ngaˬ-euˬ caˇ caˬ-aˬ, ngaˬ da-euˬ joꞈ naˆ maˬ tseˇ huiˬ dzehˬ ma lehˇ ehˇ nehˬ-awˬ.

¹¹ Kah dui dui-eu kʼaˆ behˆ, ngaˬ da neh naw maꞈ-ahˇ ciˬ baꞈ ciˬ pi nehˬ-euˬ meh. Ngaˇ-aˬ, kʼoeˇ naˆ maˬ tseˇ kah-eu kʼaˆ behˆ naw maꞈ kʼoeˇ taˆ ciˬ pi nehˬ ma. Ngaˬ da-aˬ, naw maꞈ-ahˇ aˇ caˆ neh tehꞈ-ehˇ juiꞈ-euˬ meh. Ehˇ kʼawꞈ ngaˇ-aˬ, boeˬ kaˬ laˬ ma neh naw maꞈ-ahˇ nyehꞈ kawꞈ ma lehˇ ehˇ nehˬ-awˬ.”

¹² Smˬ nah byah laˇ ngeh, sahˬ paˬ Leˬhawˇbamˬ neh ehˇ nehˬ taˬ-euˬ loꞈ-ehˇ, Yeˬyawˇbamˬ hawˇ-eu tsawˇ haˬ kʼoeˇ deuˬ dawˬ tawˆ luꞈ, aˬ yawꞈ jawˇ gaˇ oe-euˬ meh.

¹³ Tsawˇ mawˬ tsawˇ kʼaˆ deuˬ neh biꞈ-euˬ nui noeˬ nui duˇ-ahˇ sahˬ paˬ maˬ naˇ haˬ ni, tsawˇ haˬ kʼoeˇ deuˬ-ahˇ dawˬ kʼaˆ ngehˬ nehˬ-euˬ meh.

¹⁴ Zaˬ guˬ deuˬ neh biꞈ-euˬ nui noeˬ nui duˇ-ahˇ aˬ yawꞈ naˇ haˬ geuꞈ-awˇ, tsawˇ haˬ kʼoeˇ deuˬ-ahˇ heu loꞈ-ehˇ ehˇ nehˬ-euˬ meh. “Kah dui dui-eu kʼaˆ behˆ, ngaˬ da neh naw maꞈ-ahˇ ciˬ baꞈ ciˬ pi nehˬ-euˬ-meh. Ngaˇ-aˬ, kʼoeˇ naˆ maˬ tseˇ kah-eu kʼaˆ behˆ naw maꞈ kʼoeˇ taˆ ciˬ pi nehˬ ma. Ngaˬ da-aˬ, naw maꞈ-ahˇ aˇ caˆ neh tehꞈ-ehˇ juiꞈ-euˬ meh. Ehˇkʼawꞈ ngaˇ-aˬ, boeˬ kaˬ laˬ ma neh naw maꞈ-ahˇ nyehꞈ kawꞈ ma.”

¹⁵ Sahˬ paˬ Leˬhawˇbamˬ-aˬ, tsawˇ haˬ kʼoeˇ deuˬ gʼaˇ duˬ yaw muiˬ paˬ-ehˇ maˬ shaˇ noeˬ nehˬ-a. Aˬ jeˬ miˇ neh ehˇ naˇ, Shiˇloˬ meuˬ-ahˇ jawˇ-eu Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Aˬhiˇyaˬ-ahˇ gʼoe-awˇ, Sahˬpaˬ Miˬyehˇ pyeuꞈ-eu Miˬyehˇ neh Neˬbaˇ-euˬ aˬ li Yeˬyawˇbamˬ-ahˇ ehˇ nehˬ taˬ-euˬ dawˬ byah laˇ ni, Sahˬpaˬ Miˬyehˇ nui ma tsaˬ-euˬ meh.

¹⁶ Aˬ yawꞈ maꞈ neh shaˇ-euˬ dawˬ-ahˇ sahˬ paˬ Leˬhawˇbamˬ maˬ naˇ haˬ nehˬ gaˇ tsawˇ haˬ kʼoeˇ deuˬ ya mawˇ ngeh, aˬ yawꞈ maꞈ heu loꞈ-ehˇ guˇ-eu meh. “Daˬbiˇ-euˬ nymˇ jiˇ kʼoeˇ taˆ yaw cawˆ jeˬ keuˆ le luꞈ-uˇ. Daˬbiˇ neh aˬ dui-ahˇ biꞈ taˬ-euˬ aˬ jeˬ jaˆ ta. Yeˬshehˇ-euˬ aˬ li Daˬbiˇ-ahˇ aˬ dui aˬ jeˬ taꞈ ta. Iˇsaˬleˬlaˆ tsawˇ haˬ deuˬ-oˇ, yawˬ ha-euˬ iˇ kahˇ-ahˇ yawˬ ha gʼoꞈ leˇ jiˇ-awˬ. Leˬhawˇbamˬ-oˇ, nawˬ-euˬ nymˇ jiˇ-ahˇ nawˇ haw piˇ-awˬ de.” Kʼoeˇ loꞈ-ehˇ guˇ gʼaˬngeh, Iˇsaˬleˬlaˆ tsawˇ haˬ kʼoeˇ deuˬ yawˬ ha-euˬ nymˇ jiˇ kʼaˇ jaˆ gaˇ gʼoꞈ leˇ jiˇ-euˬ meh.

¹⁷ Leˬhawˇbamˬ-aˬ, Yuˇdaˆ miˇ kʼahˬ laꞈ kʼoeˇ jawˇ-eu tsawˇ haˬ deuˬ-ahˇ tehꞈ-ehˇ sahˬ paˬ geuꞈ-awˇ uˆ lahˇ-euˬ meh.

¹⁸ Sahˬ paˬ Leˬhawˇbamˬ-aˬ, myawˬ kʼaˆ bi mˇ-euˬ deuˬ-ahˇ haw-eu pyaˆ-eu gʼaˬ pyeuꞈ-eu Aˬdawˇniˇlamˬ-ahˇ, Iˇsaˬleˬlaˆ tsawˇ haˬ kʼoeˇ deuˬ jawˇ gaˇ bi le-euˬ meh. Ehˇ kʼawꞈ, aˬ yawꞈ maꞈ neh aˬ yawꞈ-ahˇ kʼaˬ lo biꞈ sehꞈ-euˬ meh. Kʼoeˇ loꞈ-ehˇ pyeuꞈ laˇ ngeh, sahˬ paˬ Leˬhawˇbamˬ-aˬ, aˬ yawꞈ-euˬ mahˬ laˆ lawˬ kʼoeˇ taˆ yaw kawˇ-ehˇ dziˬ leˇ-awˇ, Yeˬluˇsaˬlehˬ meuˬ-ahˇ cehˆ gʼoꞈ-euˬ meh.

¹⁹ Aˇ yamˬ kʼoeˇ yamˬ-ahˇ neh naˇ, laꞈ taˆ paw jawˇ-eu Iˇsaˬleˬlaˆ miˇ kʼahˬ-ahˇ jawˇ-eu tsawˇ haˬ deuˬ, Daˬbiˇ-euˬ nymˇ jiˇ-ahˇ iˬ nah keuˆ ni puiˬ-eu meh.

²⁰ Yeˬyawˇbamˬ gʼaˬ Iˇjiˇtuˆ miˇ kʼahˬ-ahˇ neh gʼoꞈ keuˆ laˇ-euˬ gaˇ kawˆ, Iˇsaˬleˬlaˆ miˇ kʼahˬ-ahˇ jawˇ-eu tsawˇ haˬ deuˬ ya gaˬ ngeh, tsawˇ haˬ aˇ maꞈ aˇ muˇ uiˬ leˇ taˬ-euˬ gaˇ aˬ yawꞈ-ahˇ kuˇ keuˆ laꞈ-awˇ, Iˇsaˬleˬlaˆ miˇ kʼahˬ-euˬ sahˬ paˬ ka nehˬ-euˬ meh. Yuˇdaˆ tsawˇ jeuˬ tiˬ jeuˬ tehꞈ-ehˇ, Daˬbiˇ-euˬ zaˬ deuˬ uˆ deuˬ-ahˇ saˇ jaˇ ziꞈ-euˬ meh.

Sheˬmaˇyaˬ Miˬyehˇ gʼaˇ duˬ ngehˬ dah-euˬ

²¹ Leˬhawˇbamˬ Yeˬluˇsaˬlehˬ meuˬ-ahˇ gʼoꞈ keuˆ-iˇ ngeh, Yuˇdaˆ tsawˇ jeuˬ hawˇ-eu Beˬyaˬmiˬ tsawˇ jeuˬ laꞈ kʼoeˇ nya dui dui-eu yehˇ tiˬ seh yehꞈ muiˇ gʼaˬ kuˇ uiˬ-euˬ meh. Laꞈ taˆ paw jawˇ-eu Iˇsaˬleˬlaˆ tsawˇ jeuˬ deuˬ-ahˇ deuˆ gʼaˬ-awˇ uˆ lahˇ ma lehˇ aˬ yawꞈ noeˬ-euˬ meh.

²² Ehˇ kʼawꞈ, Miˬyehˇ gʼaˇ duˬ ngehˬ dah-eu Sheˬmaˇyaˬ-ahˇ Miˬyehˇ heu loꞈ-ehˇ ehˇ nehˬ-euˬ meh.

²³ “Sawˇlaˬmoˬ-euˬ aˬ li Leˬhawˇbamˬ hawˇ-eu, Yuˇdaˆ tsawˇ jeuˬ hawˇ-eu Beˬyaˬmiˬ tsawˇ jeuˬ dawˬ tawˆ luꞈ-ahˇ, heu loꞈ-ehˇ ehˇ nehˬ-awˬ.

²⁴ ‘Naw maꞈ-euˬ aˬ yuiꞈ aˬ nyiˇ pyeuꞈ-eu Iˇsaˬleˬlaˆ tsawˇ haˬ deuˬ-ahˇ guiˇ taˬ deuˆ leˇ. Naw maꞈ dawˬ tawˆ luꞈ yawˬ ha-euˬ nymˇ-ahˇ gʼoꞈ-iˇ-awˬ. Kʼaˇ pyeuꞈ laˇ-euˬ gaˇ kawˆ dawˬ tawˆ luꞈ ngaˇ nui ma tsaˬ-eu miˇ neh bi pyeuꞈ laˇ-euˬ ma lehˇ Sahˬpaˬ Miˬyehˇ ehˇ-eu meh’ lehˇ ehˇ nehˬ-awˬ.” Aˬ yawꞈ maꞈ dawˬ tawˆ luꞈ, Sahˬpaˬ Miˬyehˇ-euˬ dawˬ-ahˇ naˇ haˬ-awˇ gʼoꞈ-iˇ-euˬ meh.

Yeˬyawˇbamˬ Sahˬpaˬ Miˬyehˇ-ahˇ byehˇ dzeh-euˬ

²⁵ Iˇsaˬleˬlaˆ miˇ kʼahˬ-euˬ sahˬ paˬ Yeˬyawˇbamˬ-aˬ, Eˇpaˬleˬ miˇ kʼahˬ gawˬ jawˬ gawˬ duˇ-ahˇ jaˆ-eu Sheˬkmˬ meuˬ-ahˇ yaw muiˬ paˬ-ehˇ paˇ laˆ ziꞈ-awˇ, kʼoeˇ gaˇ tiˬ kʼehˬ jawˇ-euˬ meh. Kʼoeˇ naˇ, aˬ yawꞈ doˆ-iˇ-awˇ, Peˬnoeˬlaˇ meuˬ paˇ laˆ ziꞈ-iˇ-euˬ meh.

²⁶ Yeˬyawˇbamˬ-aˬ, aˬ yawꞈ-euˬ nui ma laꞈ kʼoeˇ, aˬ yawˇ yawꞈ heu loꞈ-ehˇ ehˇ-eu meh. “Nymˬ-mˇ poˆ jawˇ-aˬ, miˇ kʼahˬ heu kʼahˬ Daˬbiˇ-euˬ nymˇ jiˇ-euˬ laꞈ-ahˇ ahˇ leˇ-eu lehˇ gʼeh-eu ngaˇ.

²⁷ Yeˬluˇsaˬlehˬ meuˬ-ahˇ jaˆ-eu Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma laꞈ kʼoeˇ tsawˇ haˬ heu deuˬ lawˇ-eu shehˇ-eu jeˬ mˇ-iˇ naˇ, Yuˇdaˆ sahˬ paˬ Leˬhawˇbamˬ-ahˇ aˬ yawꞈ maꞈ nui ma paˇ taꞈ leˇ-awˇ, Leˬhawˇbamˬ jawˇ gaˇ aˬ yawꞈ maꞈ gʼoꞈ-iˇ tehꞈ-a.”

²⁸ Aˬ yawꞈ kʼoeˇ loꞈ-ehˇ noeˬ mawˇ-awˇ, shuiˇ mawˇ neˇ mawˇ kawˇ nyiˬ kawˇ kʼaˇ-awˇ, aˬ yawꞈ-euˬ tsawˇ haˬ deuˬ-ahˇ ehˇ nehˬ-eu, “Naw maꞈ Yeˬluˇsaˬlehˬ meuˬ-ahˇ iˇ iˇ-ehˇ uˬ duˬ tahˬ-eu myahˇ laˇ-euˬ meh. Iˇsaˬleˬlaˆ tsawˇ haˬ deuˬ-oˇ, heu deuˬ-aˬ, naw maꞈ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ laꞈ-euˬ naw maꞈ-euˬ miˬ yehˇ deuˬ meh.”

²⁹ Mawˇ neˇ mawˇ kawˇ kʼoeˇ deuˬ Beˬdeˬlaˇ meuˬ-ahˇ tiˬ kawˇ bi jaˆ-awˇ, yawˬ kawˇ yawˬ-aˬ, Daˬ meuˬ-ahˇ bi jaˆ-euˬ meh.

³⁰ Kʼoeˇ naˇ, Iˇsaˬleˬlaˆ tsawˇ haˬ deuˬ Beˬdeˬlaˇ meuˬ hawˇ-eu Daˬ meuˬ-ahˇ uˬ duˬ tahˬ leˇ-eu laꞈ kʼoeˇ, iˬ baˇ mˇ-euˬ meh.

³¹ Yeˬyawˇbamˬ-aˬ, gawˬ duˇ uˬ du doe ni uˬ duˬ tahˬ-eu jawˇ duˬ tsoˆ taˬ-awˇ, Leˬbiˇ tsawˇ jeuˬ maˬ ngeuˇ-eu aˇ jeuˬ aˇ ca deuˬ laꞈ kʼoeˇ, piˇ ma bi geuꞈ-eu gʼaˇ duˬ tsawˇ haˬ tseˇ doˆ-euˬ meh.

Beˬdeˬlaˇ meuˬ-ahˇ jaˆ-eu lawˇ duˬ coˬ pyaˆ-euˬ

³² Yuˇdaˆ miˇ kʼahˬ laꞈ kʼoeˇ uˬ duˬ tahˬ-eu zahˇ sahˇ kʼoꞈ-ahˇ taꞈ-eu bawˬ-iˬ gʼeh-eu aˇ nah pyeuꞈ-eu, ba la yehꞈ siˬ tiˬ siˬ tseˇ ngaˬ nah tiˬ nah-ahˇ, Yeˬyawˇbamˬ gʼaˬ kʼawꞈ uˬ duˬ tahˬ-eu zahˇ sahˇ kʼoꞈ-ahˇ taꞈ-eu bawˬ-iˬ gʼeh-eu aˇ nah lehˇ sawˇ taˬ-euˬ meh. Beˬdeˬlaˇ meuˬ-ahˇ jaˆ-eu lawˇ duˬ kʼoeˇ taˆ, shuiˇ mawˇ neˇ mawˇ kawˇ kʼoeˇ deuˬ-ahˇ aˬ yawꞈ lawˇ nehˬ-awˇ, Beˬdeˬlaˇ meuˬ-ahˇ jaˆ-eu uˬ duˬ tahˬ-eu jawˇ duˬ kʼoeˇ deuˬ-ahˇ gaˇ bi mˇ-eu gʼaˇ duˬ, piˇ ma deuˬ kʼawꞈ aˬ yawꞈ bi jawˇ taˬ-euˬ meh.

³³ Aˬ yawꞈ neh tseˇ doˆ taˬ-euˬ aˇ nah pyeuꞈ-eu ba la yehꞈ siˬ tiˬ siˬ tseˇ ngaˬ nah tiˬ nah-ahˇ, Beˬdeˬlaˇ meuˬ-ahˇ aˬ yawꞈ le-awˇ, Iˇsaˬleˬlaˆ tsawˇ jeuˬ gʼaˇ duˬ aˬ yawꞈ neh beh-euˬ zahˇ sahˇ kʼoꞈ bawˬ-iˬ gʼeh-eu laꞈ kʼoeˇ lawˇ-eu shehˇ-eu jeˬ mˇ leˇ-euˬ meh.