1 Sahˬpaˬ 11 - Akha

Sawˇlaˬmoˬ Miˬyehˇ-ahˇ byehˇ dzeh-euˬ

¹ Aˬ cawˬ tsawˇ jeuˬ zaˬ miˬ zaˬ gʼawˬ mya gʼaˬ-ahˇ Sawˇlaˬmoˬ mawꞈ leˇ-euˬ meh. Iˇjiˇtuˆ sahˬ paˬ zaˬ miˬ uˬ taꞈ, Heˬtaˆ tsawˇ jeuˬ zaˬ miˬ zaˬ deuˬ-ahˇ maˬ ehˇ, Mawˇbaˆ tsawˇ jeuˬ zaˬ miˬ zaˬ deuˬ-ahˇ maˬ ehˇ, Aˬmoˬ tsawˇ jeuˬ zaˬ miˬ zaˬ deuˬ-ahˇ maˬ ehˇ, Eˬdoˬ tsawˇ jeuˬ zaˬ miˬ zaˬ deuˬ-ahˇ maˬ ehˇ, Siˇdoˬ tsawˇ jeuˬ zaˬ miˬ zaˬ deuˬ-ahˇ maˬ ehˇ, aˬ yawꞈ sheuˬ-euˬ meh.

² Tsawˇ jeuˬ kʼoeˇ deuˬ-euˬ miˬ yehˇ deuˬ-ahˇ Iˇsaˬleˬlaˆ tsawˇ haˬ deuˬ uˬ duˬ tahˬ gaˇ guˆ-eu miˇ neh, tsawˇ jeuˬ kʼoeˇ deuˬ-ahˇ maˬ ya sheuˬ dahˬ dzaˬ-eu gʼaˇ duˬ Sahˬpaˬ Miˬyehˇ neh dawˬ biꞈ taˬ-euˬ jaˆ-eu kʼawꞈ, tsawˇ jeuˬ kʼoeˇ deuˬ-ahˇ aˬ yawꞈ sheuˬ-euˬ meh.

³ Sawˇlaˬmoˬ-aˬ, sahˬ paˬ zaˬ miˬ shiꞈ yaˇ gʼaˬ-ahˇ sheuˬ-euˬ uˬ taꞈ, ma nyiˇ smˬ yaˇ gʼaˬ jawˇ-eu meh. Aˬ yawꞈ Miˬyehˇ-ahˇ byehˇ dzeh ni, aˬ yawꞈ-euˬ miˬ zaˬ kʼoeˇ deuˬ jahˇ-euˬ meh.

⁴ Aˬ yawꞈ tsawˇ kʼaˆ kʼaˆ laˇ ngeh, aˬ yawꞈ maꞈ-euˬ miˬ yehˇ deuˬ-ahˇ uˬ duˬ tahˬ-eu gʼaˇ duˬ, aˬ yawꞈ maꞈ aˬ yawꞈ-ahˇ sheuˬ gʼeh-euˬ meh. Aˬ yawꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ aˬ yawꞈ-euˬ aˬ da Daˬbiˇ saˇ jaˇ ziꞈ-euˬ loꞈ-ehˇ, aˬ yawꞈ saˇ jaˇ maˬ ziꞈ-a.

⁵ Siˇdoˬ tsawˇ jeuˬ-euˬ Aˬsaˇtaˬteˬ miˬ yehˇ ma hawˇ-eu, Aˬmoˬ tsawˇ jeuˬ-euˬ miˬ yehˇ pyeuꞈ-eu nui daˆ daˆ laˇ paˬ-ehˇ gʼeh-eu Moˇlehˆ miˬ yehˇ-ahˇ, aˬ yawꞈ uˬ duˬ tahˬ-euˬ meh.

⁶ Aˬ yawꞈ-euˬ aˬ da Daˬbiˇ loꞈ-ehˇ, Sahˬpaˬ Miˬyehˇ-euˬ mehˬ nah aˬ yawꞈ maˬ caw teh ni mˇ lehˬ shaˇ lehˬ-euˬ meh.

⁷ Yeˬluˇsaˬlehˬ meuˬ-euˬ nahˇ ma doˆ kʼehˬ paw jaˆ-euˬ gawˬ jawˬ kʼoeˇ taˆ, Mawˇbaˆ tsawˇ jeuˬ-euˬ miˬ yehˇ pyeuꞈ-eu nui daˆ daˆ laˇ paˬ-ehˇ, gʼeh-eu Sheˬmoˇshaˆ miˬ yehˇ-ahˇ uˬ duˬ tahˬ-eu jawˇ duˬ tiˬ tsahˇ hawˇ-eu, Aˬmoˬ tsawˇ jeuˬ-euˬ miˬ yehˇ pyeuꞈ-eu nui daˆ daˆ laˇ paˬ-ehˇ gʼeh-eu Moˇlehˆ miˬ yehˇ-ahˇ uˬ duˬ tahˬ-eu jawˇ duˬ tiˬ tsahˇ aˬ yawꞈ tsoˆ-euˬ meh.

⁸ Aˬ cawˬ tsawˇ jeuˬ pyeuꞈ-eu aˬ yawꞈ-euˬ miˬ zaˬ deuˬ, yawˬ ha-euˬ miˬ yehˇ deuˬ-ahˇ yaw saw jeˬ doꞈ damˬ-awˇ lawˇ-eu shehˇ-eu jeˬ mˇ nya ni, uˬ duˬ tahˬ-eu jawˇ duˬ gʼawˬ mya tsahˇ aˬ yawꞈ tsoˆ-euˬ meh.

^9-10 Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ Sawˇlaˬmoˬ jawˇ gaˇ nyiˬ poˆ oe-awˇ, aˬ cawˬ tsawˇ jeuˬ-euˬ miˬ yehˇ deuˬ-ahˇ uˬ duˬ maˬ ya tahˬ-eu gʼaˇ duˬ dawˬ biꞈ-euˬ kʼawꞈ, Sahˬpaˬ Miˬyehˇ-euˬ ehˇ dawˬ-ahˇ Sawˇlaˬmoˬ maˬ naˇ haˬ geuꞈ-eu miˇ neh, aˬ yawꞈ-ahˇ Sahˬpaˬ Miˬyehˇ nui ma pehˇ-eu meh.

¹¹ Kʼoeˇ miˇ neh, Sawˇlaˬmoˬ-ahˇ Sahˬpaˬ Miˬyehˇ ehˇ nehˬ-eu, “Nawˬ neh ngaˬ-ahˇ dzaˬ taˬ-euˬ dawˬ ma saˇ jaˇ-ahˇ, nui ma laꞈ kʼoeˇ keuˆ ni nawˇ puiˬ-awˇ, ngaˬ-euˬ ehˇ dawˬ-ahˇ nawˇ maˬ naˇ haˬ geuꞈ-euˬ miˇ neh, miˇ kʼahˬ heu kʼahˬ-ahˇ nawˬ-euˬ aˬ laꞈ laꞈ kʼoeˇ neh ngaˇ yuˇ doˆ-awˇ, nawˬ-euˬ gaˇ mˇ-eu yaw huiˬ yaw mahˇ tiˬ gʼaˬ-ahˇ ngaˇ biꞈ ma lehˇ ehˇ tsehˆ-eu ma.

¹² Ehˇ kʼawꞈ, nawˬ da Daˬbiˇ-euˬ myaˆ pyawˬ naˇ mehˇ baˬ da neh, nawˇ yaw dehꞈ kʼaˇ dehꞈ kʼoeˇ keuˆ ni kʼoeˇ loꞈ-ehˇ maˬ bi pyeuꞈ laˇ-ehˇ, nawˬ li dzoeˬ dzaˬ oꞈ ngeh yamˬ-ahˇ bi pyeuꞈ laˇ ma.

¹³ Miˇ kʼahˬ kʼahˬ lah ni aˬ yawꞈ-euˬ aˬ laꞈ laꞈ kʼoeˇ neh ngaˇ maˬ yuˇ doˆ. Nawˬ da Daˬbiˇ-euˬ myaˆ pyawˬ naˇ mehˇ baˬ da neh maˬ ehˇ, ngaˬ neh tseˇ doˆ-euˬ meuˬ pyeuꞈ-eu Yeˬluˇsaˬlehˬ meuˬ baˬ da neh maˬ ehˇ, aˬ yawꞈ-euˬ aˬ laꞈ laꞈ kʼoeˇ tsawˇ jeuˬ tiˬ jeuˬ bi jawˇ yaꞈ ma.”

Sawˇlaˬmoˬ-ahˇ muiˇ-eu tsawˇ haˬ deuˬ

¹⁴ Sahˬpaˬ Miˬyehˇ-aˬ, Eˬdoˬ miˇ kʼahˬ sahˬ paˬ-euˬ aˇ jeuˬ pyeuꞈ-eu Haˬdaˇ-ahˇ, Sawˇlaˬmoˬ-ahˇ bi puiˬ-euˬ meh.

¹⁵ Aˇ hu, Eˬdoˬ meuˬ-ahˇ Daˬbiˇ deuˆ gʼaˬ ngeh, aˬ yawꞈ-euˬ guiˇ maꞈ kʼoeˇ taˆ uˆ lahˇ-eu gʼaˬ pyeuꞈ-eu Yoˇbaˬ-aˬ, shiˇ-euˬ tsawˇ haˬ deuˬ-ahˇ duˬ pahˬ leˇ-eu lehˇ le-awˇ, Eˬdoˬ meuˬ-ahˇ kʼaˇ jawˇ-eu kʼaˬ dzeˇ zaˬ dawˬ tawˆ luꞈ-ahˇ sehꞈ-euˬ meh.

¹⁶ Yoˇbaˬ hawˇ-eu Iˇsaˬleˬlaˆ tsawˇ haˬ dawˬ tawˆ luꞈ, Eˬdoˬ meuˬ-ahˇ jawˇ-eu kʼaˬ dzeˇ zaˬ dawˬ tawˆ luꞈ-ahˇ maˬ sehꞈ jiˇ kʼoeˇ maˬ juˬ ni, ba la koꞈ siˬ byah ni kʼoeˇ gaˇ jawˇ-euˬ meh.

¹⁷ Ehˇ kʼawꞈ, aˬ li li zaˬ tiˬ gʼaˬ pyeuꞈ-eu Haˬdaˇ-aˬ, aˬ yawꞈ aˬ da-euˬ gaˇ mˇ-eu yaw huiˬ yaw mahˇ tiˬ paˆ na deuˬ nehˬ-ehˇ, Iˇjiˇtuˆ miˇ kʼahˬ-ahˇ cehˆ-euˬ meh.

¹⁸ Aˬ yawꞈ maꞈ Miˇdiˬyaˬ miˇ kʼahˬ-ahˇ neh doˆ-iˇ-awˇ, Paˬlaˬ miˇ kʼahˬ-ahˇ iˇ-euˬ meh. Kʼoeˇ gaˇ, tsawˇ haˬ tiˬ paˆ na deuˬ aˬ yawꞈ maꞈ jawˇ gaˇ cehˆ gm le-euˬ meh. Kʼoeˇ naˇ, Iˇjiˇtuˆ miˇ kʼahˬ-ahˇ aˬ yawꞈ maꞈ iˇ keuˆ-awˇ, Iˇjiˇtuˆ sahˬ paˬ jawˇ gaˇ le-euˬ meh. Sahˬ paˬ kʼoeˇ gʼaˬ Haˬdaˇ-ahˇ miˇ tsaˬ hawˇ-eu nymˇ tiˬ nymˇ biꞈ nehˬ-awˇ, dzaˬ dzaˬ dawˇ dawˇ caw ba nehˬ-euˬ meh.

¹⁹ Sahˬ paˬ kʼoeˇ gʼaˬ Haˬdaˇ-ahˇ gʼoeˇ dui dui-awˇ, aˬ yawꞈ-euˬ miˬ zaˬ sahˬ paˬ ma Taˬpaˬneˬ-euˬ aˬ nyiˇ pyeuꞈ-eu aˬ yawꞈ-euˬ ciˇ ma-ahˇ, Haˬdaˇ-ahˇ bi mˇ dzaˬ-iˇ-euˬ meh.

²⁰ Sahˬ paˬ ma Taˬpaˬneˬ-euˬ aˬ nyiˇ kʼoeˇ gʼaˬ, aˬ yawꞈ gʼaˇ duˬ Geˬnuˇbaˆ lehˇ myahˇ-euˬ aˬ li tiˬ li ciˬ-awˇ, aˬ li kʼoeˇ li-ahˇ sahˬ paˬ miˬ zaˬ kʼoeˇ gʼaˬ neh cu huiˬ-awˇ, sahˬ paˬ-euˬ zaˬ yo deuˬ nehˬ-ehˇ sahˬ paˬ-euˬ hawˇ nymˇ laꞈ kʼoeˇ bi jawˇ-euˬ meh.

²¹ Daˬbiˇ ziˇ dehꞈ jiˇ-awˇ, Daˬbiˇ-euˬ guiˇ maꞈ deuˬ kʼoeˇ taˆ uˆ lahˇ-eu Yoˇbaˬ gʼaˬ kʼawꞈ shiˇ dzeuˇ-euˬ gaˇ kawˆ-ahˇ, Iˇjiˇtuˆ miˇ kʼahˬ laꞈ kʼoeˇ jawˇ luꞈ-eu Haˬdaˇ ya gaˬ ngeh, aˬ yawꞈ-euˬ miˇ kʼahˬ-ahˇ ya gʼoꞈ leˇ ni sahˬ paˬ jawˇ gaˇ shaˇ leˇ-euˬ meh.

²² “Nawˇ aˬ jeˬ miˇ neh gʼoꞈ leˇ mawꞈ-eu nya. Ngaˬ neh nawˬ-ahˇ tiˬ jeˬ paˬ maˬ mˇ byah nehˬ-euˬ jaˆ ta loˇ. Kʼoeˇ miˇ neh nawˇ gʼoꞈ leˇ mawꞈ te loˇ” lehˇ, aˬ yawꞈ-ahˇ sahˬ paˬ ehˇ-eu meh. Ehˇ kʼawꞈ, Haˬdaˇ gʼaˬ aˬ yawꞈ-ahˇ bi gʼoꞈ leˇ laꞈ lehˇ paˇ ehˇ-awˇ, aˬ yawꞈ-euˬ miˇ kʼahˬ-ahˇ gʼoꞈ leˇ-euˬ meh. Eˬdoˬ miˇ kʼahˬ-euˬ sahˬ paˬ pyeuꞈ-eu Haˬdaˇ-aˬ, Iˇsaˬleˬlaˆ miˇ kʼahˬ-ahˇ muiˇ-eu haiˬ-eu tsawˇ haˬ tiˬ gʼaˬ pyeuꞈ-eu meh.

²³ Miˬyehˇ-aˬ, Eˇleˬdaˬ-euˬ aˬ li Leˬzoˇ-ahˇ kʼawꞈ, Sawˇlaˬmoˬ-ahˇ bi puiˬ-euˬ meh. Leˬzoˇ-aˬ, aˬ yawꞈ-euˬ sahˬ paˬ pyeuꞈ-eu Zoˇbaˬ sahˬ paˬ Haˬdaˬdeˬzaˬ jawˇ gaˇ neh cehˆ doˆ-euˬ meh.

²⁴ Aˬ yawꞈ-aˬ, haiˬ-eu tsawˇ haˬ aˇ maꞈ tiˬ maꞈ-euˬ aˬ yuiꞈ pyeuꞈ laˇ-euˬ meh. (Haˬdaˬdeˬzaˬ-ahˇ Daˬbiˇ guiˇ deuˆ gʼaˬ-awˇ aˬ yawꞈ-ahˇ nui ma taꞈ-eu Suˇliˆ tsawˇ haˬ deuˬ-ahˇ sehꞈ jiˇ nehˬ gʼaˬ miˇ tsa, Leˬzoˇ kʼoeˇ loꞈ-ehˇ pyeuꞈ laˇ-euˬ meh.) Leˬzoˇ hawˇ-eu aˬ yawꞈ-euˬ tsawˇ haˬ deuˬ Daˬmaˬsehˇ meuˬ-ahˇ jawˇ leˇ-awˇ, aˬ yawꞈ-euˬ tsawˇ haˬ deuˬ neh aˬ yawꞈ-ahˇ Suˇliˆ sahˬ paˬ ka nehˬ-euˬ meh.

²⁵ Aˬ yawꞈ-aˬ, Sawˇlaˬmoˬ yaw dehꞈ dehꞈ luꞈ-eu aˇ yamˬ laꞈ kʼoeˇ, Iˇsaˬleˬlaˆ miˇ kʼahˬ-ahˇ muiˇ-eu tsawˇ haˬ tiˬ gʼaˬ pyeuꞈ-eu meh.

Sawˇlaˬmoˬ-ahˇ Yeˬyawˇbamˬ puiˬ-euˬ

²⁶ Sawˇlaˬmoˬ-euˬ gaˇ mˇ-eu yaw huiˬ yaw mahˇ tiˬ gʼaˬ pyeuꞈ-eu Yeˬyawˇbamˬ kʼawꞈ, Sawˇlaˬmoˬ-ahˇ puiˬ-euˬ meh. Yeˬyawˇbamˬ-aˬ, Eˇpaˬleˬ miˇ kʼahˬ Zeˬleˬdaˬ meuˬ-ahˇ jawˇ-eu Neˬbaˇ-euˬ aˬ li meh. Aˬ yawꞈ-euˬ aˬ ma-aˬ, Zeˬluˇyaˆ lehˇ myahˇ-euˬ miˬ coeˬ miˬ ma tiˬ gʼaˬ meh.

²⁷ Aˬ yawꞈ sahˬ paˬ Sawˇlaˬmoˬ-ahˇ puiˬ-euˬ gaˇ kawˆ-aˬ, heu loꞈ-ehˇ meh. Sawˇlaˬmoˬ-aˬ, Yeˬluˇsaˬlehˬ meuˬ-euˬ nahˇ ma doˆ kʼehˬ paw coeˇ-ahˇ miˇ tsaˬ sha dzm luꞈ-awˇ, meuˬ meuˬ lahˇ laˆ muiˬ luꞈ-eu meh.

²⁸ Yeˬyawˇbamˬ-aˬ, gaˇ mˇ nya dui dui-eu zaˬ guˬ tiˬ gʼaˬ pyeuꞈ-awˇ, aˬ yawꞈ gaˇ mˇ-eu leh jeh dui dui luꞈ gaˇ Sawˇlaˬmoˬ ya mawˇ ngeh, Maˬnaˇseˬ tsawˇ jeuˬ hawˇ-eu Eˇpaˬleˬ tsawˇ jeuˬ-euˬ miˇ kʼahˬ laꞈ kʼoeˇ, myawˬ kʼaˆ mˇ-eu gaˇ dawˬ tawˆ luꞈ kʼoeˇ taˆ, aˬ yuiꞈ geuꞈ-awˇ haw-eu pyaˆ-eu gʼaˬ bi geuꞈ-euˬ meh.

²⁹ Tiˬ nah keuˆ laˇ ngeh, Yeˬluˇsaˬlehˬ meuˬ-ahˇ neh Yeˬyawˇbamˬ doˆ le ngeh, Shiˇloˬ meuˬ-ahˇ neh laˇ luꞈ-eu Miˬyehˇ gʼaˇ duˬ ngehˬ dah-eu Aˬhiˇyaˬ-ahˇ, gaˇ pehˇ tahˬ puˬ-euˬ meh.

³⁰ Aˬhiˇyaˬ gʼaˬ aˬ yawꞈ dm luꞈ-eu shuiꞈ teˇ poˬ ni gʼeh-eu pehˇ kʼahˬ pehˇ mahˇ lehˆ-awˇ, tseˇ nyiꞈ paˆ gʼeu paˆ-euˬ meh.

³¹ Kʼoeˇ naˇ, Yeˬyawˇbamˬ-ahˇ aˬ yawꞈ ehˇ nehˬ-eu, “Ngaˬ neh gʼeu paˆ-euˬ pehˇ kʼahˬ paˇ cehˬ heu tseˇ cehˬ nawˇ yuˇ-awˬ. Aˬ jeˬ miˇ neh ehˇ naˇ, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ heu loꞈ-ehˇ ehˇ-eu meh. ‘Sawˇlaˬmoˬ-euˬ aˬ laꞈ laꞈ kʼoeˇ neh miˇ kʼahˬ heu kʼahˬ ngaˇ yuˇ doˆ-awˇ, nawˬ-ahˇ tsawˇ jeuˬ tseˇ jeuˬ biꞈ-eu lehˇ gʼeh-eu ma.

³² Daˬbiˇ-euˬ myaˆ pyawˬ naˇ mehˇ baˬ da neh maˬ ehˇ, Iˇsaˬleˬlaˆ miˇ kʼahˬ kʼahˬ lah ni laꞈ kʼoeˇ ngaˬ neh tseˇ doˆ-euˬ meuˬ pyeuꞈ-eu Yeˬluˇsaˬlehˬ meuˬ baˬ da neh maˬ ehˇ, Sawˇlaˬmoˬ-ahˇ tsawˇ jeuˬ tiˬ jeuˬ biꞈ ma.

³³ Sawˇlaˬmoˬ ngaˬ-ahˇ byehˇ dzeh-awˇ, aˬ cawˬ tsawˇ jeuˬ-euˬ miˬ yehˇ pyeuꞈ-eu Siˇdoˬ tsawˇ jeuˬ-euˬ Aˬsaˇtaˬteˬ miˬ yehˇ ma-ahˇ maˬ ehˇ, Mawˇbaˆ tsawˇ jeuˬ-euˬ Sheˬmoˇshaˆ miˬ yehˇ-ahˇ maˬ ehˇ, Aˬmoˬ tsawˇ jeuˬ-euˬ Moˇlehˆ miˬ yehˇ-ahˇ maˬ ehˇ, aˬ yawꞈ uˬ duˬ tahˬ-euˬ miˇ neh, ngaˇ heu loꞈ-ehˇ jahˇ-eu gʼaˇ duˬ lehˬ hmˬ taˬ-euˬ ma. Sawˇlaˬmoˬ-aˬ, ngaˬ-euˬ ehˇ dawˬ-ahˇ maˬ naˇ haˬ geuꞈ ni yaw lehˬ jeˬ mˇ-awˇ aˬ yawꞈ-euˬ aˬ da Daˬbiˇ loꞈ-ehˇ ngaˬ-euˬ zahˇ dawˬ kʼoꞈ dawˬ-ahˇ maˬ caw teh-ehˇ, ngaˬ neh mehˬ nehˬ tsoˆ nehˬ-euˬ dawˬ-ahˇ kʼawꞈ maˬ naˇ haˬ geuꞈ-aˬ.

³⁴ Ehˇ kʼawꞈ, miˇ kʼahˬ kʼahˬ lah ni Sawˇlaˬmoˬ-euˬ laꞈ-ahˇ neh ngaˇ maˬ yuˇ doˆ-ehˇ, aˬ yawꞈ yaw dehꞈ kʼaˇ dehꞈ kʼoeˇ keuˆ ni, aˬ yawꞈ-ahˇ ngaˇ baoˬ biꞈ nehˬ ma. Ngaˬ neh tseˇ doˆ-euˬ gʼaˬ pyeuꞈ-eu, ngaˬ-euˬ zahˇ dawˬ kʼoꞈ dawˬ mehˬ nah caw teh-awˇ, ngaˬ neh mehˬ nehˬ tsoˆ nehˬ-euˬ dawˬ deuˬ-ahˇ naˇ haˬ geuꞈ-euˬ ngaˬ-euˬ zaˬ kʼaˆ Daˬbiˇ baˬ da neh, aˬ yawꞈ-ahˇ ngaˇ kʼoeˇ loꞈ-ehˇ gʼawˬ shaˬ gaˬ nehˬ-eu ma.

³⁵ Ehˇ kʼawꞈ, Sawˇlaˬmoˬ-euˬ aˬ li-euˬ aˬ laꞈ laꞈ kʼoeˇ neh, miˇ kʼahˬ heu kʼahˬ ngaˇ yuˇ kʼoꞈ-awˇ, tsawˇ jeuˬ tseˇ jeuˬ nawˬ-ahˇ biꞈ ma.

³⁶ Ngaˬ-ahˇ uˬ duˬ bi tahˬ-eu gʼaˇ duˬ ngaˬ neh tseˇ doˆ-euˬ meuˬ pyeuꞈ-eu Yeˬluˇsaˬlehˬ meuˬ laꞈ kʼoeˇ, ngaˬ-euˬ zaˬ kʼaˆ Daˬbiˇ-euˬ zaˬ deuˬ uˆ deuˬ aˬ myah luꞈ maˬ tsehˆ leˇ ni ya uˆ lahˇ-eu gʼaˇ duˬ, Sawˇlaˬmoˬ-euˬ aˬ li-ahˇ tsawˇ jeuˬ tiˬ jeuˬ ngaˇ biꞈ ma.

³⁷ Yeˬyawˇbamˬ-oˇ, ngaˇ nawˬ-ahˇ Iˇsaˬleˬlaˆ miˇ kʼahˬ-euˬ sahˬ paˬ bi pyeuꞈ laˇ ma. Nawˇ kʼaˇ uˆ lahˇ mawꞈ-eu miˇ kʼahˬ-ahˇ uˆ lahˇ nya tehꞈ-a.

³⁸ Ngaˬ-euˬ zaˬ kʼaˆ Daˬbiˇ loꞈ-ehˇ, ngaˬ-euˬ ehˇ dawˬ tiˬ dawˬ-iˬ maˬ bi dzeˇ ni nawˇ naˇ haˬ geuꞈ-awˇ, ngaˬ-euˬ zahˇ dawˬ kʼoꞈ dawˬ deuˬ-ahˇ caw teh-eu laꞈ kʼoeˇ, ngaˬ neh ehˇ-euˬ jeˬ mˇ-awˇ, ngaˇ nui ma tsaˬ-eu loꞈ-ehˇ dehꞈ naˇ, nawˬ nehˬ-ehˇ ngaˇ aˬ myah luꞈ jawˇ ma. Nawˬ-ahˇ Iˇsaˬleˬlaˆ miˇ kʼahˬ-euˬ sahˬ paˬ bi pyeuꞈ laˇ-awˇ, Daˬbiˇ-ahˇ ngaˬ neh jahˇ nehˬ-euˬ loꞈ-ehˇ, nawˬ-euˬ miˇ kʼahˬ laꞈ kʼoeˇ nawˬ-euˬ zaˬ nawˬ-euˬ uˆ deuˬ dzoeˬ dzaˬ oꞈ ni ngaˇ jahˇ nehˬ ma.

³⁹ Sawˇlaˬmoˬ neh mˇ-euˬ iˬ baˇ baˬ da neh, Daˬbiˇ-euˬ zaˬ deuˬ uˆ deuˬ-ahˇ ngaˇ kʼehˬ nehˬ kʼaˆ nehˬ ma. Ehˇ kʼawꞈ, mˬ maˬ maˬ byaˆ zaˇ ziˇ jiˇ ni kʼehˬ nehˬ ma lehˇ ngaˇ ehˇ mawꞈ-eu maˬ ngeuˇ’ lehˇ, Sahˬpaˬ Miˬyehˇ nawˬ-ahˇ ehˇ-eu meh.”

⁴⁰ Kʼoeˇ naˇ, Yeˬyawˇbamˬ-ahˇ sehꞈ-eu lehˇ Sawˇlaˬmoˬ leh jeh-euˬ meh. Ehˇ kʼawꞈ, Iˇjiˇtuˆ sahˬ paˬ Siˇshehˆ jawˇ gaˇ Yeˬyawˇbamˬ cehˆ-iˇ-awˇ, Sawˇlaˬmoˬ ziˇ jiˇ ngeh keuˆ ni kʼoeˇ gaˇ jawˇ-euˬ meh.

Sawˇlaˬmoˬ ziˇ jiˇ-euˬ

⁴¹ Sawˇlaˬmoˬ neh kʼaˇ mˇ kʼaˇ shaˇ lahˬ-euˬ gaˇ yawˬ jeˬ na luꞈ hawˇ-eu, yaw muiˬ yaw doeˇ tseˇ paˆ nya-eu aˬ yawꞈ-euˬ zaˬ siˬ tsawˇ gahˇ gaˇ kawˆ dawˬ tawˆ luꞈ, Sawˇlaˬmoˬ-euˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ ahˇ-eu meh.

⁴² Aˬ yawꞈ Yeˬluˇsaˬlehˬ meuˬ-ahˇ jawˇ-awˇ, Iˇsaˬleˬlaˆ miˇ kʼahˬ kʼahˬ lah ni kʼoeˇ taˆ, oeˬ tseˇ kʼoꞈ uˆ lahˇ-euˬ meh.

⁴³ Aˬ yawꞈ ziˇ dehꞈ jiˇ-awˇ, Daˬbiˇ-euˬ meuˬ laꞈ kʼoeˇ aˬ yawꞈ-ahˇ baꞈ pahˬ nehˬ-euˬ meh. Kʼoeˇ naˇ, aˬ yawꞈ-euˬ dah zaˇ aˬ yawꞈ-euˬ aˬ li Leˬhawˇbamˬ gʼaˬ sahˬ paˬ geuꞈ-euˬ meh.