1 Sahˬpaˬ 10 - Akha

Sawˇlaˬmoˬ jawˇ gaˇ Sheˬba sahˬ paˬ ma laˇ-euˬ

¹ Sawˇlaˬmoˬ tsawˇ myahˇ doˆ-eu gaˇ kawˆ Sheˬba sahˬ paˬ ma ya gaˬ ngeh, naꞈ dui dui-eu dawˬ deuˬ naˇ haˬ-awˇ tsawˇ gahˇ teh haw-eu gʼaˇ duˬ, Yeˬluˇsaˬlehˬ meuˬ-ahˇ le-euˬ meh.

² Aˬ yawꞈ le ngeh, zaˬ kʼaˆ gʼawˬ mya ni sheuˬ gʼeh-awˇ, dzaˇ muiˇ dzaˇ sawˇ, tsiˇ yaw saw jeˬ, aˇ poeˬ kʼaˆ-eu kʼaˬ lo sehˇ deuˬ hawˇ-eu, shuiˇ gʼawˬ mya ni law taw neh tawˬ-awˇ le-euˬ meh. Sawˇlaˬmoˬ-ahˇ aˬ yawꞈ tahˬ puˬ ngeh, aˬ yawꞈ kʼaˇ noeˬ doˆ nya-eu jeˬ dawˬ tawˆ luꞈ naˇ haˬ-euˬ meh.

³ Kʼaˇ naˇ haˬ-euˬ yawˬ jeˬ na luꞈ-ahˇ Sawˇlaˬmoˬ ehˇ kʼoꞈ nehˬ-euˬ meh. Sawˇlaˬmoˬ maˬ ehˇ kʼoꞈ nehˬ nya-eu tiˬ jeˬ-iˬ maˬ jaˆ-a.

⁴ Sawˇlaˬmoˬ-euˬ zaˬ siˬ tsawˇ gahˇ-ahˇ Sheˬba sahˬ paˬ ma ya gaˬ-awˇ, Sawˇlaˬmoˬ neh tsoˆ taˬ-euˬ sahˬ paˬ-euˬ hawˇ nymˇ-ahˇ kʼawꞈ ya mawˇ-euˬ meh.

⁵ Sawˇlaˬmoˬ-euˬ hawˬ jeh kʼoeˇ taˆ laˆ saˆ taˬ-euˬ dzaˬ dzaˬ dawˇ dawˇ deuˬ-ahˇ maˬ ehˇ, aˬ yawꞈ-euˬ gaˇ mˇ-eu yaw huiˬ yaw mahˇ deuˬ jawˇ-eu nymˇ deuˬ-ahˇ maˬ ehˇ, sahˬ paˬ-euˬ hawˇ nymˇ-ahˇ gaˇ mˇ-eu deuˬ hawˇ-eu aˬ yawꞈ maꞈ dm luꞈ-eu dm gʼaˬ dm lmˇ deuˬ-ahˇ maˬ ehˇ, aˬ yawꞈ dzaˬ ngeh dawˇ ngeh hawˬ lahˬ dzaˇ lahˬ lahˬ-eu zaˬ kʼaˆ deuˬ-ahˇ maˬ ehˇ, Uˬ duˬ tahˬ nymˇ nymˇ ma laꞈ kʼoeˇ aˬ yawꞈ neh lawˇ-euˬ shehˇ-euˬ jeˬ-ahˇ maˬ ehˇ, Sheˬba sahˬ paˬ ma ya mawˇ ngeh, saꞈ maˬ gʼawˇ doˆ coeˇ-ehˇ tsoˆ leˇ gaˇ keuˆ ni zahˬ leˇ dui dui-euˬ meh.

⁶ Sahˬ paˬ Sawˇlaˬmoˬ-ahˇ aˬ yawꞈ ehˇ nehˬ-eu, “Ngaˬ-euˬ miˇ kʼahˬ-ahˇ jawˇ ngeh neh, nawˬ-euˬ gaˇ kawˆ hawˇ-eu nawˇ zaˬ siˬ tsawˇ gahˇ ahˇ-eu gaˇ kawˆ ya gaˬ-euˬ loꞈ-ehˇ, aˬ diˇ aˬ maˇ ngeuˇ law hawˇ nga.

⁷ Ehˇ kʼawꞈ, ngaˬ-euˬ gʼawˇ mawˇ nawˬ-ahˇ maˬ ya mawˇ duˬ kʼoeˇ keuˆ ni, ngaˇ maˬ jah-aˬ siˬ. Ehˇ law hawˇ kʼawꞈ, nawˬ-euˬ zaˬ siˬ tsawˇ gahˇ gaˇ kawˆ ngaˬ neh ya gaˬ taˬ-euˬ-aˬ, tiˬ paˆ kʼawꞈ maˬ paˆ leˇ law hawˇ ngaˬ siˬ. Nawˬ-euˬ zaˬ siˬ tsawˇ gahˇ hawˇ-eu nawˬ-euˬ pyuˇ shuiˇ myawˬ gahˬ-aˬ, ngaˬ neh ya gaˬ gʼaˬ taˬ-euˬ naˆ maˬ tseˇ huiˬ dui myaˬ dui dui law hawˇ nga.

⁸ Nawˬ-euˬ miˬ zaˬ deuˬ aˇ naˆ ni guiˬ lahˬ huiˬ-eu nga. Aˬ myah luꞈ nawˬ-euˬ dawˬ peh ya jawˇ-awˇ, zaˬ siˬ tsawˇ gahˇ ahˇ-eu nawˬ-euˬ dawˬ deuˬ-ahˇ ya gaˬ-eu nawˬ-euˬ zaˬ kʼaˆ deuˬ aˇ naˆ ni guiˬ lahˬ huiˬ-eu nga.

⁹ Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ ja ceuˬ-awˬ. Iˇsaˬleˬlaˆ miˇ kʼahˬ kʼoeˇ taˆ nawˬ-ahˇ sahˬ paˬ bi geuꞈ-eu laꞈ kʼoeˇ, aˬ yawꞈ nawˬ-ahˇ aˇ naˆ ni nui kʼahˇ shiˇ-eu gaˇ kawˆ bi siˬ bi mawˇ-euˬ meh. Iˇsaˬleˬlaˆ tsawˇ jeuˬ-ahˇ aˬ yawꞈ gaˬ-eu jeˬ mˬ maˬ maˬ byaˆ zaˇ ziˇ ziꞈ-eu miˇ neh, yaw tsaˬ yaw dawˇ laꞈ kʼoeˇ zahˇ dawˬ kʼoꞈ dawˬ-ahˇ tsaˬ ni aˬ yawꞈ maꞈ kʼoeˇ taˆ bi uˆ lahˇ-eu gʼaˇ duˬ, aˬ yawꞈ nawˬ-ahˇ sahˬ paˬ bi pyeuꞈ laˇ-euˬ nga.”

¹⁰ Aˬ yawꞈ neh yuˇ laꞈ-euˬ laꞈ sawˬ deuˬ pyeuꞈ-eu shuiˇ nyiˬ heˇ oeˬ yaˇ jawꞈ-i dzehˬ ni maˬ ehˇ, myaˬ dui dui-eu dzaˇ muiˇ dzaˇ sawˇ deuˬ hawˇ-eu tsiˇ yaw saw jeˬ maˬ ehˇ, aˇ poeˬ kʼaˆ-eu kʼaˬ lo sehˇ deuˬ maˬ ehˇ, sahˬ paˬ Sawˇlaˬmoˬ-ahˇ aˬ yawꞈ biꞈ-euˬ meh. Aˬ yawꞈ neh biꞈ-euˬ dzaˇ muiˇ dzaˇ sawˇ hawˇ-eu tsiˇ yaw saw kʼoeˇ deuˬ myaˆ ni myaˬ-eu laꞈ sawˬ deuˬ, sahˬ paˬ Sawˇlaˬmoˬ tiˬ jawˇ-iˬ maˬ za haw-aˬ.

¹¹ (Awˇpiˇlaˆ miˇ kʼahˬ-ahˇ neh shuiˇ tawˬ kʼoꞈ laꞈ-euˬ Hiˇlamˬ-euˬ saˇ baoˬ aˇ maꞈ kʼoeˇ maꞈ-aˬ, Aˬlaˬgmˬ lehˇ kuˇ-eu miˬ shuˬ daˇ kawˬ tiˬ jeˬ hawˇ-eu, aˇ poeˬ kʼaˆ-eu kʼaˬ lo sehˇ deuˬ gʼawˬ mya ni tawˬ kʼoꞈ laꞈ-euˬ meh.

¹² Daˇ kawˬ kʼoeˇ deuˬ-ahˇ sahˬ paˬ Sawˇlaˬmoˬ yuˇ-awˇ, Uˬ duˬ tahˬ nymˇ nymˇ ma hawˇ-eu sahˬ paˬ-euˬ hawˇ nymˇ-ahˇ zeuˇ toˆ geuꞈ-awˇ, caˇ dawˬ caˇ-eu tsawˇ haˬ deuˬ bi zmˬ-eu gʼaˇ duˬ deuˇ-mˬ jahˇ gaˇ kʼawꞈ geuꞈ-euˬ meh. Daˇ kawˬ kʼoeˇ-aˬ, Iˇsaˬleˬlaˆ miˇ kʼahˬ laꞈ kʼoeˇ kʼaˇ hehˇ ahˇ laꞈ-euˬ Aˬlaˬgmˬ daˇ kawˬ dawˬ tawˆ luꞈ kʼoeˇ taˆ, aˬ cawˬ naˆ maˬ tseˇ muiˬ dzehˬ-eu deuˬ pyeuꞈ-eu meh. Kʼoeˇ loꞈ-ehˇ muiˬ-eu daˇ kawˬ tiˬ jawˇ-iˬ maˬ ya mawˇ haw-aˬ.)

¹³ Sahˬ paˬ Sawˇlaˬmoˬ-aˬ, Sheˬba sahˬ paˬ ma-ahˇ biꞈ paˬ-ehˇ gʼeh-eu laꞈ sawˬ deuˬ biꞈ-euˬ uˬ taꞈ, aˬ yawꞈ kʼaˇ shaˇ-eu yawˬ jeˬ na luꞈ biꞈ nehˬ-euˬ meh. Kʼoeˇ naˇ, Sheˬba sahˬ paˬ ma hawˇ-eu aˬ yawꞈ-euˬ zaˬ kʼaˆ deuˬ Sheˬba miˇ kʼahˬ-ahˇ gʼoꞈ-iˇ-euˬ meh.

Sahˬ paˬ Sawˇlaˬmoˬ-euˬ pyuˇ shuiˇ myawˬ gahˬ deuˬ

¹⁴ Aˬ yawꞈ kʼoꞈ yawꞈ sahˬ paˬ Sawˇlaˬmoˬ za-euˬ shuiˇ-aˬ, tiˬ muiˇ smˬ heˇ yehꞈ yaˇ jawꞈ-i ehˇ gʼaˬ ni byah-eu meh.

¹⁵ Baw gaꞈ deuˬ neh kawˬ doˆ-euˬ maˬ ahˇ leˇ-ehˇ, jeˬ gaꞈ kʼaˇ gaꞈ jeuˬ-euˬ deuˬ maˬ ehˇ, Aˬleˬbyaˇ sahˬ paˬ deuˬ neh kawˬ doˆ nehˬ-euˬ deuˬ maˬ ehˇ, Iˇsaˬleˬlaˆ miˇ kʼahˬ laꞈ kʼoeˇ biˇ taˬ-euˬ miˇ kʼahˬ kʼahˬ zaˬ deuˬ kʼoeˇ taˆ uˆ lahˇ-eu sahˬ paˬ sahˬ ma deuˬ neh kawˬ doˆ nehˬ-euˬ deuˬ maˬ ehˇ, tiˬ pawꞈ-iˬ maˬ sawˇ ahˇ ni, kʼoeˇ myaˆ ni gʼeh-eu shuiˇ aˬ yawꞈ za taˬ-euˬ meh.

¹⁶ Sawˇlaˬmoˬ-aˬ, dehˬ daˬ duˬ yaw huiˬ nyiˬ yaˇ hmˬ jahˇ-awˇ, aˬ yawꞈ hmˬ yawꞈ-ahˇ shuiˇ oeˬ jawꞈ-i yaw-euˬ meh.

¹⁷ Dehˬ daˬ duˬ yaw nyiˇ smˬ yaˇ hmˬ aˬ yawꞈ paˇ jahˇ-awˇ, aˬ yawꞈ hmˬ yawꞈ-ahˇ shuiˇ tiˬ jawꞈ-i dzehˬ ni yaw-euˬ meh. Dehˬ daˬ duˬ kʼoeˇ deuˬ-ahˇ, Leˬbaˬnoˬ sahˬ kʼaˆ lehˇ kuˇ-eu Hawˇ nymˇ laꞈ kʼoeˇ aˬ yawꞈ bi jaˆ-euˬ meh.

¹⁸ Sahˬ paˬ nuiˇ-eu dzoeˬ dzaˬ nuiˇ mahˬ mahˬ ma tiˬ mahˬ ya ma juiˇ neh aˬ yawꞈ jahˇ-awˇ, nuiˇ mahˬ kʼoeˇ mahˬ-ahˇ maˇ jawˆ ni gʼeh-eu shuiˇ yaw-euˬ meh.

¹⁹ Nuiˇ mahˬ kʼoeˇ mahˬ dawˬ dzm dawˬ tehꞈ koꞈ tehꞈ baw-awˇ, nuiˇ mahˬ-euˬ naˇ kʼah paw mawˇ neˇ mawˇ zaˬ-euˬ uˬ duˬ tiˬ siˬ jahˇ tsoꞈ taˬ-euˬ meh. Nuiˇ mahˬ-euˬ kʼoeˇ paˆ ma paˆ-ehˇ aˬ laꞈ baꞈ daˆ duˬ jaˆ-awˇ, aˬ laꞈ baꞈ daˆ duˬ-euˬ gaˇ dzeˇ paw aˇ laˬ jaˬ shiˇ mawˇ kawˇ tiˬ paw tiˬ kawˇ bi yawꞈ taˬ-euˬ meh.

²⁰ Dawˬ dzm dawˬ tehꞈ aˬ yawꞈ tehꞈ yawꞈ-euˬ kʼoeˇ paˆ ma paˆ-ehˇ, aˇ laˬ jaˬ shiˇ mawˇ kawˇ tiˬ paw tiˬ kawˇ yawꞈ luꞈ-awˇ, aˇ laˬ jaˬ shiˇ mawˇ kawˇ kʼoeˇ dawˬ tawˆ luꞈ tseˇ nyiꞈ kawˇ byah-eu meh. Nuiˇ mahˬ kʼoeˇ mahˬ-ahˇ duˇ-eu nuiˇ mahˬ miˇ kʼahˬ tiˬ kʼahˬ-ahˇ-iˬ maˬ jahˇ haw-aˬ.

²¹ Sawˇlaˬmoˬ-euˬ iˇ cuꞈ dawˇ-eu naˬ bo dawˬ tawˆ luꞈ shuiˇ neh tehꞈ-ehˇ jahˇ taˬ-awˇ, Leˬbaˬnoˬ sahˬ kʼaˆ lehˇ kuˇ-eu Hawˇ nymˇ-ahˇ kʼaˇ jaˆ-eu mˇ myawˬ dawˬ tawˆ luꞈ, maˇ jawˆ ni gʼeh-eu shuiˇ neh tehꞈ-ehˇ jahˇ taˬ-euˬ meh. Sawˇlaˬmoˬ-euˬ aˇ nah aˇ yamˬ laꞈ kʼoeˇ, pyuˇ aˇ poeˬ maˬ baw-eu miˇ neh, pyuˇ neh jahˇ taˬ-euˬ mˇ myawˬ keu ka tiˬ jeˬ-iˬ maˬ jaˆ-a.

²² Hiˇlamˬ-euˬ saˇ baoˬ aˇ maꞈ nehˬ-ehˇ iˇ luꞈ laˇ luꞈ-eu, iˬ ma laˆ shaˆ-ahˇ cah-eu saˇ baoˬ aˇ maꞈ tiˬ maꞈ aˬ yawꞈ jaˆ-eu meh. Aˬ yawꞈ-euˬ saˇ baoˬ kʼoeˇ maꞈ-aˬ, smˇ kʼoꞈ tiˬ poˆ gʼoꞈ doˆ laˇ-awˇ, shuiˇ deuˬ, pyuˇ deuˬ, ya ma juiˇ deuˬ hawˇ-eu, aˇ myoꞈ deuˬ tawˬ kʼoꞈ laꞈ-eu meh.

²³ Sahˬ paˬ Sawˇlaˬmoˬ-aˬ, sahˬ paˬ dawˬ tawˆ luꞈ naˆ maˬ tseˇ smˇ muiˬ muiˬ dui dui-awˇ, zaˬ siˬ tsawˇ gahˇ ahˇ dzehˬ-eu meh.

²⁴ Miˇ tsaˬ kʼoeˇ taˆ kʼaˇ jawˇ-eu tsawˇ haˬ dawˬ tawˆ luꞈ aˬ yawꞈ jawˇ gaˇ laˇ-awˇ, Miˬyehˇ neh aˬ yawꞈ-ahˇ biꞈ taˬ-euˬ yaw muiˬ yaw doeˇ tseˇ paˆ nya-eu zaˬ siˬ tsawˇ gahˇ-ahˇ naˇ haˬ geuꞈ laˇ mawꞈ-eu meh.

²⁵ Aˬ yawꞈ jawˇ gaˇ kʼaˇ laˇ-eu tsawˇ haˬ yawˬ gʼaˬ na luꞈ, shuiˇ hawˇ-eu pyuˇ neh jahˇ taˬ-euˬ myawˬ guˇ deuˬ, pehˇ kʼahˬ pehˇ mahˇ deuˬ, guiˇ deuˆ-eu keu ka deuˬ, tsiˇ yaw saw jeˬ, dzaˇ muiˇ dzaˇ sawˇ deuˬ, mahˬ hawˇ-eu mahˬ shaˆ lawˬ deuˬ yuˇ-awˇ, laꞈ sawˬ biꞈ laˇ-euˬ meh. Yawˬ kʼoꞈ na luꞈ, aˬ yawꞈ maꞈ kʼoeˇ loꞈ-ehˇ aˬ yawꞈ jawˇ gaˇ laꞈ sawˬ yuˇ laꞈ nehˬ-euˬ meh.

²⁶ Sawˇlaˬmoˬ-aˬ, mahˬ laˆ lawˬ tiˬ heˇ oeˬ yaˇ laˇ hawˇ-eu, dziˬ mahˬ tiˬ muiˇ nyiˬ heˇ mawˇ poˆ uiˬ taˬ-euˬ meh. Yeˬluˇsaˬlehˬ meuˬ laꞈ kʼoeˇ tiˬ deuˬ bi jawˇ-awˇ, meuˬ gʼawˬ mya meuˬ-ahˇ tiˬ deuˬ bi jawˇ-euˬ meh.

²⁷ Aˬ yawꞈ uˆ lahˇ-eu aˇ nah aˇ yamˬ laꞈ kʼoeˇ, pyuˇ kʼaˬ lo loꞈ-ehˇ byehˬ-awˇ, aˇ poeˬ kʼaˆ-eu shuˬ liˇ daˇ kawˬ kʼawꞈ, siˬ guˬ daˇ kawˬ loꞈ-ehˇ jaˆ myaˬ dui dui-euˬ meh.

²⁸ Muˬsaˬliˬ miˇ kʼahˬ hawˇ-eu Siˬliˇshaˆ miˇ kʼahˬ-ahˇ neh kʼaˇ ahˬ doˆ-euˬ mahˬ dawˬ tawˆ luꞈ-ahˇ, sahˬ paˬ Sawˇlaˬmoˬ neh pyehˬ taˬ-euˬ tsawˇ haˬ deuˬ neh zeuˇ jiˇ-euˬ meh.

²⁹ Iˇjiˇtuˆ miˇ kʼahˬ-ahˇ neh kʼaˇ ahˬ doˆ-euˬ mahˬ laˆ lawˬ deuˬ-ahˇ kʼawꞈ, aˬ yawꞈ maꞈ neh zeuˇ jiˇ-euˬ meh. Heˬtaˆ sahˬ paˬ hawˇ-eu Suˇliˆ sahˬ paˬ deuˬ-ahˇ, mahˬ hawˇ-eu mahˬ laˆ lawˬ deuˬ aˬ yawꞈ maꞈ ahˬ ahˇ nehˬ-euˬ meh. Mahˬ laˆ lawˬ tiˬ laˇ-euˬ pyuˇ maˇ byaˆ koꞈ yaˇ byaˆ-ehˇ neh ahˬ nehˬ-awˇ, mahˬ tiˬ mawˇ-euˬ pyuˇ maˇ byaˆ tiˬ yaˇ ngaˬ tseˇ byaˆ-ehˇ neh ahˬ nehˬ-euˬ meh.