1 Sahˬpaˬ 1 - Akha

Sahˬ paˬ Daˬbiˇ tsawˇ mawˬ mawˬ laˇ-euˬ

¹ Nymˬ-mˇ poˆ jawˇ, sahˬ paˬ Daˬbiˇ tsawˇ mawˬ mawˬ dui dui laˇ-euˬ miˇ neh, aˬ yawꞈ-euˬ zaˬ kʼaˆ deuˬ aˬ yawꞈ-ahˇ aˇ bui sheu dm nehˬ kʼawꞈ, yaw gaˆ maˬ lmˇ leˇ-a.

² Kʼoeˇ ngeh, aˬ yawꞈ-euˬ gaˇ mˇ-eu yaw huiˬ yaw mahˇ deuˬ aˬ yawꞈ-ahˇ, “Sahˬ paˬ-oˇ, nawˬ-ahˇ bi bo saˆ-eu gʼaˇ duˬ, nga maꞈ-ahˇ zaˬ miˬ aˬ buˇ zaˬ guˬ tiˬ gʼaˬ bi poˆ-iˇ laꞈ-awˬ. Aˬ yawꞈ nawˬ-euˬ dawˬ peh yuꞈ-awˇ, nawˬ-ahˇ yaw gaˆ laˆ lmˇ nehˬ laꞈ tehꞈ-a” lehˇ ehˇ nehˬ-euˬ meh.

³ Kʼoeˇ naˇ, Iˇsaˬleˬlaˆ miˇ kʼahˬ doe ni aˬ yawꞈ maꞈ iˇ-awˇ, aˇ gʼehˇ muiˬ-eu zaˬ miˬ aˬ buˇ tiˬ gʼaˬ shaˇ poˆ-iˇ-euˬ meh. Shuˇneˬ meuˬ-ahˇ jawˇ-eu Aˬbiˇshehˇ lehˇ myahˇ-euˬ zaˬ miˬ aˬ buˇ tiˬ gʼaˬ aˬ yawꞈ maꞈ poˆ mawˇ-awˇ, sahˬ paˬ jawˇ gaˇ sheuˬ kʼoꞈ gʼeh-euˬ meh.

⁴ Aˇ gʼehˇ muiˬ dui dui-eu zaˬ miˬ aˬ buˇ kʼoeˇ gʼaˬ, sahˬ paˬ-ahˇ loꞈ-awˇ bo saˆ nehˬ-euˬ meh. Ehˇ kʼawꞈ, zaˬ miˬ aˬ buˇ kʼoeˇ gʼaˬ nehˬ-ehˇ sahˬ paˬ maˬ yuꞈ taꞈ-a.

Aˬdawˇniˇyaˆ sahˬ paˬ tsaˬ geuꞈ-euˬ

⁵ Haˬgiˇdaˇ o neh dehꞈ le-euˬ Daˬbiˇ-euˬ aˬ li Aˬdawˇniˇyaˆ-aˬ, aˬ yawˇ yawꞈ taˬ huiˬ taˬ mahˇ-eu laꞈ kʼoeˇ, “Ngaˇ sahˬ paˬ geuꞈ ma” lehˇ ehˇ-awˇ, aˬ yawꞈ zmˬ-eu gʼaˇ duˬ mahˬ laˆ lawˬ hawˇ-eu mahˬ maˬ ehˇ, aˬ yawꞈ-euˬ mehˬ shi cah-awˇ aˬ yawꞈ-ahˇ bi loꞈ piˇ-eu gʼaˇ duˬ yehˇ ngaˬ tseˇ gʼaˬ maˬ ehˇ, lehˬ hmˬ taˬ-euˬ meh.

⁶ “Nawˇ aˬ jeˬ miˇ neh teu loꞈ-ehˇ jahˇ te” lehˇ ehˇ-awˇ, aˬ yawꞈ-euˬ aˬ da aˬ yawꞈ-ahˇ tiˬ jawˇ-iˬ tiˬ jeˬ-iˬ maˬ laˆ tsoeˬ nehˬ haw-aˬ. Aˬ yawꞈ-aˬ, pyawˬ naˬ aˇ gʼehˇ muiˬ dui dui-awˇ, shiˇ dzeuˇ-euˬ Aˬbaˇsaˬloˬ jiˇ naˇ, sahˬ paˬ zaˬ yo deuˬ laꞈ kʼoeˇ aˬ cawˬ naˆ maˬ tseˇ yuiꞈ dzehˬ-eu gʼaˬ pyeuꞈ-eu meh.

⁷ Sahˬ paˬ Daˬbiˇ-euˬ dmˇ ma Zeˬluˇyaˆ-euˬ aˬ li Yoˇbaˬ hawˇ-eu piˇ ma Aˬbyaˬdaˬ aˬ nyaꞈ-ahˇ aˬ yawꞈ mehˬ bawˬ mˇ haw ngeh, aˬ yawꞈ nyaꞈ kʼawꞈ aˬ yawꞈ jawˇ paw pyawˬ ma lehˇ ehˇ nehˬ-euˬ meh.

⁸ Ehˇ kʼawꞈ, piˇ ma Zaˬdoˆ, Yeˬhawˇyaˬdaˬ-euˬ aˬ li Baˬnaˇyaˬ, Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Naˬdaˬ, Shiˇmiˇ, Yeˬiˇ aˬ ha maꞈ hawˇ-eu, Daˬbiˇ-ahˇ loꞈ piˇ-eu deuˬ-aˬ, Aˬdawˇniˇyaˆ jawˇ paw maˬ pyawˬ-a.

⁹ Tiˬ nah keuˆ laˇ ngeh, Eˬloˇgeˬ iˇ cuꞈ lawˇ gawˆ gaˇ dzeˇ jaˆ-eu Aˇlawˇ kʼaˬ lo lehˇ kuˇ-eu kʼaˬ lo kʼoeˇ siˬ dawˬ peh, mawˇ neˇ mawˇ gaw deuˬ, yawˇ deuˬ hawˇ-eu, tsuˇ dui dui-eu mawˇ neˇ mawˇ kʼaˇ deuˬ sehꞈ-awˇ, Aˬdawˇniˇyaˆ lawˇ-eu shehˇ-eu jeˬ mˇ-euˬ meh. Aˬ yawꞈ-euˬ mehˇ nmˇ deuˬ pyeuꞈ-eu sahˬ paˬ Daˬbiˇ-euˬ aˬ li deuˬ hawˇ-eu, Yuˇdaˆ miˇ kʼahˬ-ahˇ jawˇ-eu sahˬ paˬ-euˬ gaˇ mˇ-eu yaw huiˬ yaw mahˇ deuˬ-ahˇ aˬ yawꞈ kuˇ-euˬ meh.

¹⁰ Ehˇ kʼawꞈ, aˬ yawꞈ-euˬ mehˇ nmˇ Sawˇlaˬmoˬ-ahˇ maˬ ehˇ, Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Naˬdaˬ-ahˇ maˬ ehˇ, Baˬnaˇyaˬ-ahˇ maˬ ehˇ, sahˬ paˬ-ahˇ loꞈ piˇ-eu guiˇ maꞈ-ahˇ maˬ ehˇ, aˬ yawꞈ maˬ kuˇ-a.

Sawˇlaˬmoˬ-ahˇ sahˬ paˬ ka nehˬ-euˬ

¹¹ Kʼoeˇ naˇ, Sawˇlaˬmoˬ-euˬ aˬ ma Baˬsheˬba jawˇ gaˇ Naˬdaˬ iˇ-awˇ ehˇ nehˬ-eu, “Haˬgiˇdaˇ-euˬ aˬ li Aˬdawˇniˇyaˆ gʼaˬ, yawˬ haˇ yawˬ ha sahˬ paˬ tsaˬ geuꞈ gʼaˬ-awˇ, gaˇ kawˆ kʼoeˇ sahˬ paˬ Daˬbiˇ maˬ siˬ nya-aˬ siˬ lehˇ ja-eu nawˇ gaˬ maˬ loˇ.

¹² Ngaˇ nawˬ-ahˇ heu loꞈ-ehˇ ja noeˬ ja duˇ nehˬ nyaˇ. Nawˇ hawˇ-eu nawˬ li Sawˇlaˬmoˬ maˬ ya shiˇ ni dehꞈ mawꞈ te lehˇ ngeuˇ naˇ, heu loꞈ-ehˇ jahˇ-awˬ.

¹³ Sahˬ paˬ Daˬbiˇ jawˇ gaˇ yaw kawˇ-ehˇ le-awˇ, ‘Sahˬ paˬ-oˇ, nawˇ jiˇ naˇ ngaˬ li Sawˇlaˬmoˬ-ahˇ sahˬ paˬ bi geuꞈ ma lehˇ, nawˇ ngaˬ-ahˇ saˇ jaˇ dzaˬ taˬ-euˬ jaˆ-eu maˬ ngeuˇ te loˇ. Toˆ-ehˇ ngeuˇ-eu jeˬ maˇ-iˬ, aˬ jeˬ miˇ neh Aˬdawˇniˇyaˆ gʼaˬ sahˬ paˬ pyeuꞈ laˇ taˬ’ lehˇ ehˇ nehˬ leˇ-awˬ.”

¹⁴ Naˬdaˬ paˇ ehˇ-eu, “Nawˇ sahˬ paˬ Daˬbiˇ nehˬ-ehˇ dawˬ ngehˬ cawˬ luꞈ ngeh, ngaˇ uˇ laˇ-awˇ nawˬ-euˬ gʼaˇ duˬ caw ngehˬ caw tmˇ nehˬ ma.”

¹⁵ Kʼoeˇ naˇ, sahˬ paˬ yuꞈ-eu lawˆ-ahˇ Baˬsheˬba le uˇ-awˇ, sahˬ paˬ-ahˇ tahˬ puˬ leˇ-euˬ meh. Sahˬpaˬ mawˬ dui dui laˇ-awˇ, Shuˇneˬ meuˬ-ahˇ jawˇ-eu Aˬbiˇshehˇ lehˇ myahˇ-euˬ zaˬ miˬ aˬ buˇ kʼoeˇ gʼaˬ sahˬ paˬ-ahˇ bo saˆ luꞈ-eu meh.

¹⁶ Sahˬ paˬ-euˬ mehˬ shi Baˬsheˬba awˆ byaˆ-awˇ yaw zeu baw nehˬ ngeh, “Aˬ jeˬ loˬ-eu nya” lehˇ, aˬ yawꞈ-ahˇ sahˬ paˬ naˇ haˬ-euˬ meh.

¹⁷ Baˬsheˬba ehˇ-eu, “Sahˬ paˬ-oˇ, nawˇ jiˇ naˇ ngaˬ li Sawˇlaˬmoˬ-ahˇ sahˬ paˬ bi geuꞈ ma lehˇ nawˇ ngaˬ-ahˇ saˇ jaˇ dzaˬ taˬ-euˬ maˬ ngeuˇ te loˇ.

¹⁸ Ehˇ kʼawꞈ, Aˬdawˇniˇyaˆ gʼaˬ nymˬ-mˇ sahˬ paˬ pyeuꞈ laˇ gʼaˬ-euˬ meh. Gaˇ kawˆ kʼoeˇ nawˇ maˬ siˬ nya-a.

¹⁹ Mawˇ neˇ mawˇ gaw deuˬ, yawˇ deuˬ hawˇ-eu, tsuˇ dui dui-eu mawˇ neˇ mawˇ kʼaˇ deuˬ aˬ yawꞈ lawˇ-awˇ, nawˬ li deuˬ-ahˇ maˬ ehˇ, piˇ ma Aˬbyaˬdaˬ-ahˇ maˬ ehˇ, nawˬ-euˬ guiˇ maꞈ deuˬ kʼoeˇ taˆ uˆ lahˇ-eu gʼaˬ pyeuꞈ-eu Yoˇbaˬ-ahˇ maˬ ehˇ, aˬ yawꞈ kuˇ-euˬ meh. Ehˇ kʼawꞈ, nawˬ li Sawˇlaˬmoˬ gʼaˬ-ahˇ aˬ yawꞈ maˬ kuˇ-a.

²⁰ Sahˬ paˬ-oˇ, nawˇ jiˇ naˇ, nawˬ-euˬ dah zaˇ aˬ geu gʼaˬ-ahˇ sahˬ paˬ bi geuꞈ ma lehˇ nawˇ ehˇ laˇ gaˇ, Iˇsaˬleˬlaˆ tsawˇ haˬ dawˬ tawˆ luꞈ naˬ bawˇ ciˬ kʼmˇ taˬ-euˬ meh.

²¹ Nawˇ tiˬ jeˬ-iˬ maˬ ehˇ ni jawˇ naˇ, nawˇ ziˇ dehꞈ jiˇ-eu nehˬ-ehˇ, nawˬ li Sawˇlaˬmoˬ nga nyaꞈ ma zaˬ-ahˇ, aˬ yawꞈ maꞈ-ahˇ puiˬ-eu tsawˇ haˬ lehˇ sawˇ nehˬ laꞈ-eu yaw duˬ baw tehꞈ-a.”

²² Aˬ yawꞈ sahˬ paˬ-ahˇ dawˬ ngehˬ cawˬ luꞈ ngeh, sahˬ paˬ-euˬ hawˇ nymˇ-ahˇ Naˬdaˬ laˇ keuˆ-euˬ meh.

²³ Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Naˬdaˬ laˇ keuˆ-euˬ gaˇ kawˆ sahˬ paˬ-ahˇ tsaꞈ gaˬ gʼaˬ ngeh, Naˬdaˬ uˇ leˇ-awˇ, sahˬ paˬ-euˬ mehˬ shi awˆ byaˆ-awˇ yaw zeu baw nehˬ-euˬ meh.

²⁴ Naˬdaˬ ehˇ-eu, “Sahˬ paˬ-oˇ, nawˇ jiˇ naˇ nawˬ-euˬ dah zaˇ Aˬdawˇniˇyaˆ-ahˇ sahˬ paˬ bi geuꞈ ma lehˇ nawˇ ehˇ taˬ-euˬ jaˆ te loˇ.

²⁵ Iˬ nah aˬ yawꞈ iˇ-awˇ, mawˇ neˇ mawˇ gaw deuˬ, yawˇ deuˬ hawˇ-eu, tsuˇ dui dui-eu mawˇ neˇ mawˇ kʼaˇ deuˬ lawˇ-iˇ-euˬ meh. Nawˬ li dawˬ tawˆ luꞈ maˬ ehˇ, nawˬ-euˬ guiˇ maꞈ deuˬ kʼoeˇ taˆ uˆ lahˇ-eu Yoˇbaˬ-ahˇ maˬ ehˇ, piˇ ma Aˬbyaˬdaˬ-ahˇ maˬ ehˇ, aˬ yawꞈ kuˇ-awˇ, nymˬ-mˇ aˬ yawꞈ maꞈ aˬ yawꞈ nehˬ-ehˇ dzaˬ taꞈ dawˇ taꞈ-eu laꞈ kʼoeˇ, ‘Sahˬ paˬ Aˬdawˇniˇyaˆ ziˇ baw ziˇ za luꞈ-uˇ’ lehˇ guˇ luꞈ meh.

²⁶ Ehˇ kʼawꞈ, ngaˬ-ahˇ maˬ ehˇ, piˇ ma Zaˬdoˆ-ahˇ maˬ ehˇ, Baˬnaˇyaˬ-ahˇ maˬ ehˇ, Sawˇlaˬmoˬ-ahˇ maˬ ehˇ, aˬ yawꞈ maˬ kuˇ-a.

²⁷ Sahˬ paˬ-oˇ, kʼoeˇ loꞈ-ehˇ jahˇ luꞈ gaˇ nawˇ tiˬ jeˬ-iˬ maˬ ngehˬ maˬ tmˇ ni jawˇ-eu gʼeh te loˇ. Nawˇ jiˇ naˇ, nawˬ-eu dah zaˇ aˬ geu gʼaˬ-ahˇ sahˬ paˬ bi geuꞈ-eu gaˇ kawˆ, nawˬ-euˬ gaˇ mˇ-eu yaw huiˬ yaw mahˇ deuˬ-ahˇ maˬ ehˇ nehˬ ni byehˇ-eu gʼeh te loˇ.”

²⁸ Kʼoeˇ naˇ, “Baˬsheˬba-ahˇ paˇ bi uˇ laˇ sheˇ” lehˇ sahˬ paˬ Daˬbiˇ ehˇ ngeh, Baˬsheˬba uˇ laˇ-awˇ aˬ yawꞈ-euˬ mehˬ shi yawꞈ luꞈ-eu meh.

²⁹ Sahˬpaˬ ehˇ-eu, “Shaˬ zahˬ dawˬ tawˆ luꞈ laꞈ kʼoeˇ ngaˬ-ahˇ ka kʼoꞈ nehˬ laꞈ-euˬ gʼaˬ pyeuꞈ-eu dehꞈ luꞈ-eu Sahˬpaˬ Miˬyehˇ-euˬ mehˬ shi, ngaˇ nawˬ-ahˇ heu loꞈ-ehˇ saˇ jaˇ dzaˬ-eu ma.

³⁰ Ngaˇ jiˇ naˇ, nawˬ li Sawˇlaˬmoˬ-ahˇ ngaˬ-euˬ dah zaˇ sahˬ paˬ bi geuꞈ-eu gʼaˇ duˬ, ngaˬ neh nawˬ-ahˇ saˇ jaˇ dzaˬ taˬ-euˬ dawˬ-ahˇ ngaˇ ziꞈ ma lehˇ, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ mehˬ shi, iˬ nah ngaˇ kamˬ-eu ma.”

³¹ Kʼoeˇ ngeh, Baˬsheˬba miˇ tsa awˆ byaˆ-awˇ, “Ngaˬ-euˬ sahˬ paˬ Daˬbiˇ ziˇ baw ziˇ za luꞈ-uˇ” lehˇ ehˇ-eu meh.

³² Kʼoeˇ naˇ, piˇ ma Zaˬdoˆ , Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Naˬdaˬ hawˇ-eu, Yeˬhawˇyaˬdaˬ-euˬ aˬ li Baˬnaˇyaˬ aˬ ha smˇ gʼaˬ-ahˇ sahˬ paˬ neh bi kuˇ laˬ-iˇ-awˇ, aˬ yawꞈ maꞈ laˇ keuˆ-euˬ meh.

³³ Aˬ yawꞈ maꞈ-ahˇ sahˬ paˬ ehˇ nehˬ-eu, “Ngaˬ-euˬ saˇ naˇ gaˇ mˇ-eu yaw huiˬ yaw mahˇ deuˬ-ahˇ naw maꞈ sheuˬ-awˇ, ngaˬ li Sawˇlaˬmoˬ-ahˇ ngaˬ-euˬ mahˬ shaˆ lawˬ bi dziˬ-awˇ, Giˇhoˬ iˇ cuꞈ lawˇ gawˆ-ahˇ sheuˬ gʼeh-awˬ.

³⁴ Kʼoeˇ gaˇ iˇ keuˆ ngeh, piˇ ma Zaˬdoˆ hawˇ-eu Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Naˬdaˬ aˬ nyaꞈ neh aˬ yawꞈ-ahˇ tsiˇ bi shehˆ daˆ-awˇ, Iˇsaˬleˬlaˆ miˇ kʼahˬ-euˬ sahˬ paˬ bi ka nehˬ-awˬ. Kʼoeˇ naˇ, daˇ heh baw-awˇ, ‘Sahˬ paˬ Sawˇlaˬmoˬ ziˇ baw ziˇ za luꞈ-uˇ’ lehˇ guˇ-awˬ.

³⁵ Kʼoeˇ naˇ, aˬ yawꞈ gʼoꞈ laˇ-awˇ, ngaˬ-euˬ dzoeˬ dzaˬ nuiˇ mahˬ-ahˇ nuiˇ laˇ ngeh, naw maꞈ kʼawꞈ aˬ yawꞈ mehˬ nah caw teh kʼoꞈ laꞈ-awˬ. Aˬ yawꞈ-aˬ, ngaˬ-euˬ dah zaˇ sahˬ paˬ geuꞈ-awˇ uˆ lahˇ tehꞈ-a. Aˬ jeˬ miˇ neh ehˇ naˇ, Iˇsaˬleˬlaˆ miˇ kʼahˬ hawˇ-eu Yuˇdaˆ miˇ kʼahˬ-ahˇ bi uˆ lahˇ-eu gʼaˇ duˬ, aˬ yawꞈ-ahˇ ngaˇ tseˇ doˆ-euˬ ma.”

³⁶ Yeˬhawˇyaˬdaˬ-euˬ aˬ li Baˬnaˇyaˬ ehˇ-eu, “Sahˬ paˬ neh kʼaˇ ehˇ-euˬ loꞈ-ehˇ pyeuꞈ laˇ luꞈ-uˇ. Kʼoeˇ loꞈ-ehˇ bi pyeuꞈ laˇ ni, nawˬ-euˬ Miˬyehˇ pyeuꞈ-eu Sahˬpa miˬyehˇ mˇ luꞈ-uˇ.

³⁷ Sahˬ paˬ-oˇ, nawˬ nehˬ-ehˇ Sahˬpaˬ Miˬyehˇ jawˇ-eu loꞈ-ehˇ, Sawˇlaˬmoˬ nehˬ-ehˇ kʼawꞈ aˬ yawꞈ jawˇ-awˇ, nawˇ uˆ lahˇ ngeh naˆ ma tseˇ Sawˇlaˬmoˬ uˆ lahˇ ngeh baw dzehˬ za dzehˬ le luꞈ-uˇ.”

³⁸ Kʼoeˇ naˇ, piˇ ma Zaˬdoˆ, Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Naˬdaˬ, Yeˬhawˇyaˬdaˬ-euˬ aˬ li Baˬnaˇyaˬ hawˇ-eu, sahˬ paˬ-ahˇ loꞈ piˇ-eu guiˇ maꞈ deuˬ gʼeh-awˇ, Sawˇlaˬmoˬ-ahˇ sahˬ paˬ Daˬbiˇ-euˬ mahˬ shaˆ lawˬ bi dziˬ-awˇ, Giˇhoˬ lawˇ gawˆ-ahˇ sheuˬ gʼeh-euˬ meh.

³⁹ Piˇ ma Zaˬdoˆ-aˬ, Sahˬpaˬ Miˬyehˇ jawˇ-eu sehˬ gʼawˆ-ahˇ jaˆ-eu saˬ loˬ tsiˇ maˇ tsaꞈ yuˇ leꞈ-awˇ, Sawˇlaˬmoˬ-ahˇ tsiˇ shehˆ daˆ nehˬ-euˬ meh. Aˬ yawꞈ maꞈ daˇ heh baw-awˇ, tsawˇ haˬ dawˬ tawˆ luꞈ “Sahˬ paˬ Sawˇlaˬmoˬ ziˇ baw ziˇ za luꞈ-uˇ” lehˇ guˇ-eu meh.

⁴⁰ Aˬ yawꞈ maꞈ bawˬ law baw baw-ehˇ miˇ tsaˬ tahˬ kʼawˇ luˆ laˇ tsaˇ-i guˇ-awˇ, aˬ yawꞈ mehˬ nah caw teh kʼoꞈ laꞈ-euˬ meh.

⁴¹ Aˬdawˇniˇyaˆ hawˇ-eu aˬ yawꞈ neh kuˇ taˬ-euˬ tsawˇ haˬ deuˬ dzaˬ gʼaˬ dawˇ gʼaˬ ngeh, teˇ saˇ kʼoeˇ ya gaˬ-euˬ meh. Daˇ heh baw-eu teˇ saˇ-ahˇ Yoˇbaˬ ya gaˬ ngeh, “Aˬ jeˬ miˇ neh meuˬ laꞈ kʼoeˇ teu naˆ naˆ-ehˇ lawꞈ gʼa-eu maˬ siˬ miˇ-a” lehˇ ehˇ-eu meh.

⁴² Aˬ yawꞈ kʼoeˇ loꞈ-ehˇ ehˇ gʼaˬ-euˬ maˬ dah ni, piˇ ma Aˬbyaˬdaˬ-euˬ aˬ li Yawˇnaˆshaˬ oe keuˆ-euˬ meh. Kʼoeˇ ngeh, “Heu gaˇ laˇ sheˇ, Nawˇ-aˬ tsawˇ haˬ yaw muiˬ tiˬ gʼaˬ pyeuꞈ-eu miˇ neh, laˬ kʼaˬ ya cehˇ-eu gaˇ kawˆ tsaꞈ gaˬ le-euˬ duˇ” lehˇ, Yawˇnaˆshaˬ-ahˇ Aˬdawˇniˇyaˆ ehˇ nehˬ-euˬ meh.

⁴³ Yawˇnaˆshaˬ ehˇ-eu, “Laˬ kʼaˬ cehˇ paˬ-ehˇ gʼeh-eu dawˬ tsaꞈ gaˬ le-euˬ maˬ ngeuˇ. Aˬ dui-euˬ sahˬ paˬ Daˬbiˇ neh Sawˇlaˬmoˬ-ahˇ sahˬ paˬ ka nehˬ gʼaˬ-euˬ meh.

⁴⁴ Piˇ ma Zaˬdoˆ, Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Naˬdaˬ, Yeˬhawˇyaˬdaˬ-euˬ aˬ li Baˬnaˇyaˬ hawˇ-eu, sahˬ paˬ-ahˇ loꞈ piˇ-eu guiˇ maꞈ deuˬ-ahˇ aˬ yawꞈ pyehˬ gʼeh-awˇ, Sawˇlaˬmoˬ-ahˇ bi sheuˬ gʼeh-euˬ meh. Aˬ yawꞈ maꞈ neh Sawˇlaˬmoˬ-ahˇ sahˬ paˬ-euˬ mahˬ shaˆ lawˬ bi dziˬ-euˬ meh.

⁴⁵ Piˇ ma Zaˬdoˆ hawˇ-eu, Miˬyehˇ gʼaˇ duˬ ngehˬ dah-eu Naˬdaˬ aˬ nyaꞈ neh, Giˇhoˬ iˇ cuꞈ lawˇ gawˆ dawˬ peh aˬ yawꞈ-ahˇ tsiˇ shehˆ daˆ nehˬ-awˇ, sahˬ paˬ ka nehˬ-euˬ meh. Kʼoeˇ naˇ, aˬ yawꞈ maꞈ laˬ kʼaˬ cehˇ-eu laꞈ kʼoeˇ guˇ guˇ-ehˇ meuˬ-ahˇ gʼoꞈ uˇ laˇ-awˇ, meuˬ-ahˇ jawˇ-eu tsawˇ haˬ deuˬ luiˬ gʼa luꞈ meh. Naw maꞈ ya gaˬ-eu teˇ saˇ kʼoeˇ-aˬ, tsawˇ haˬ kʼoeˇ deuˬ luiˬ gʼa luꞈ-eu teˇ saˇ meh.

⁴⁶ Nymˬ-mˇ poˆ jawˇ, Sawˇlaˬmoˬ sahˬ paˬ pyeuꞈ laˇ gʼaˬ-euˬ meh.

⁴⁷ Kʼoeˇ tehꞈ-ehˇ maˬ ngeuˇ-a siˬ. Saˇ naˇ-ahˇ gaˇ mˇ-eu yaw huiˬ yaw mahˇ deuˬ sahˬ paˬ Daˬbiˇ-ahˇ yaw zeu baw nehˬ leˇ-awˇ, ‘Nawˇ naˆ maˬ tseˇ Sawˇlaˬmoˬ tsawˇ myahˇ doˆ ni nawˬ-euˬ Miˬyehˇ jahˇ luꞈ-uˇ. Nawˇ uˆ lahˇ ngeh naˆ maˬ tseˇ, Sawˇlaˬmoˬ uˆ lahˇ ngeh baw dzehˬ za dzehˬ le luꞈ-uˇ’ lehˇ ehˇ nehˬ-euˬ meh. Kʼoeˇ ngeh, sahˬ paˬ Daˬbiˇ aˬ yawꞈ-euˬ yuꞈ zaˇ kʼoeˇ taˆ pawˬ tsuiꞈ pawˬ dmˬ dmˬ-awˇ guiˬ lahˬ shaˇ-eu meh.

⁴⁸ ‘Iˬ nah ngaˬ-euˬ dah zaˇ ngaˬ-euˬ aˬ li tiˬ gʼaˬ-ahˇ sahˬ paˬ bi pyeuꞈ laˇ-awˇ, kʼoeˇ loꞈ-ehˇ pyeuꞈ laˇ gaˇ ya mawˇ ngeh keuˆ ni ngaˬ-ahˇ bi dehꞈ keuˆ laꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ, aˬ dui ja ceuˬ kaˇ-euˇ’ lehˇ aˬ yawꞈ ehˇ-eu meh.”

⁴⁹ Kʼoeˇ ngeh, Aˬdawˇniˇyaˆ neh kuˇ taˬ-euˬ daˬ yah deuˬ guˆ laˇ-awˇ, tiˬ gʼaˬ tiˬ paw tsawˬ tuˇ-awˇ cehˆ jiˇ-euˬ meh.

⁵⁰ Aˬdawˇniˇyaˆ gʼaˬ Sawˇlaˬmoˬ-ahˇ guˆ dui dui-awˇ, Sahˬpaˬ Miˬyehˇ jawˇ-eu Sehˬ gʼawˆ-ahˇ le-awˇ, lawˇ duˬ-euˬ laꞈ coeˇ-ahˇ tsoꞈ-eu uˬ coeˇ-ahˇ tuˆ tehˬ leˇ-euˬ meh.

⁵¹ Aˬdawˇniˇyaˆ gʼaˬ sahˬ paˬ Sawˇlaˬmoˬ-ahˇ guˆ-awˇ, lawˇ duˬ-euˬ uˬ coeˇ-ahˇ nyehꞈ tehˬ taˬ-euˬ laꞈ kʼoeˇ, “Ngaˬ-ahˇ maˬ sehꞈ lehˇ sahˬ paˬ Sawˇlaˬmoˬ neh saˇ jaˇ jeˬ huˬ bi dzaˬ mawꞈ nya” lehˇ ehˇ luꞈ-eu gaˇ kawˆ, sahˬ paˬ Sawˇlaˬmoˬ-ahˇ aˬ cawˬ tsaꞈ gaˬ nehˬ-euˬ meh.

⁵² Kʼoeˇ ngeh, “Aˬ yawꞈ saˇ jaˇ ziꞈ naˇ, aˬ yawꞈ-euˬ uˬ duˬ tsehˇ kahˇ tiˬ kahˇ tehꞈ-ehˇ kʼawꞈ maˬ bi ga-iˇ. Ehˇ kʼawꞈ, saˇ jaˇ maˬ ziꞈ naˇ ya shiˇ tehꞈ-a” lehˇ, sahˬ paˬ Sawˇlaˬmoˬ ehˇ-eu meh.

⁵³ Kʼoeˇ naˇ, sahˬ paˬ Sawˇlaˬmoˬ tsawˇ haˬ pyehˬ gʼeh-awˇ, lawˇ duˬ-ahˇ jawˇ luꞈ-eu Aˬdawˇniˇyaˆ-ahˇ bi sheuˬ ka laˬ leˇ-euˬ meh. Aˬdawˇniˇyaˆ sahˬ paˬ jawˇ gaˇ le-awˇ, miˇ tsa awˆ byaˆ-awˇ yaw zeu baw nehˬ-euˬ meh. Kʼoeˇ ngeh, “Nawˬ-euˬ nymˇ-ahˇ gʼoꞈ-iˇ-awˬ” lehˇ, aˬ yawꞈ-ahˇ sahˬ paˬ ehˇ nehˬ-euˬ meh.