1 Laˬsaˬbaˬ 9 - Akha

Baˬbuˇloˬ miˇ kʼahˬ-ahˇ neh gʼoꞈ le-euˬ tsawˇ haˬ deuˬ

¹ Iˇsaˬleˬlaˆ tsawˇ haˬ dawˬ tawˆ luꞈ, aˇ jeuˬ aˇ ca aˬ yawꞈ ca yawꞈ tsawˇ myahˇ yuˇ-awˇ, Iˇsaˬleˬlaˆ sahˬ paˬ deuˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh. Yuˇdaˆ miˇ kʼahˬ zaˬ deuˬ-aˬ, aˬ yawꞈ maꞈ-euˬ iˬ baˇ baˬ da neh Baˬbuˇloˬ miˇ kʼahˬ-ahˇ bi nyehꞈ gʼeh-euˬ meh.

² Yawˬ ha-euˬ nymˇ dahˬ myawˬ gahˬ jaˆ-eu yawˬ ha-euˬ meuˬ deuˬ laꞈ kʼoeˇ gʼoꞈ jawˇ laˇ beh beh-euˬ deuˬ laꞈ kʼoeˇ, Iˇsaˬleˬlaˆ tsawˇ haˬ miˇ kʼahˬ zaˬ deuˬ, piˇ ma deuˬ, Leˬbiˇ tsawˇ haˬ deuˬ hawˇ-eu, Uˬ duˬ tahˬ nymˇ nymˇ ma laꞈ kʼoeˇ gaˇ mˇ-eu tsawˇ haˬ deuˬ ahˇ-eu meh.

³ Yuˇdaˆ tsawˇ jeuˬ, Beˬyaˬmiˬ tsawˇ jeuˬ, Eˇpaˬleˬ tsawˇ jeuˬ, Maˬnaˇseˬ tsawˇ jeuˬ heu deuˬ-aˬ, Yeˬluˇsaˬlehˬ meuˬ-ahˇ jawˇ-iˇ-euˬ meh.

^4-6 Yeˬluˇsaˬlehˬ meuˬ-ahˇ jawˇ-eu Yuˇdaˆ tsawˇ jeuˬ laꞈ kʼoeˇ, aˇ jeuˬ aˇ ca koꞈ yaˇ gʼoeˬ tseˇ ca byah-eu meh. Yuˇdaˆ-euˬ aˬ li Paˬyehˆ-euˬ zaˬ deuˬ uˆ deuˬ kʼoeˇ taˆ aˬ yuiꞈ aˬ tsu geuꞈ-euˬ gʼaˬ-aˬ, Aˬmiˇhuˆ-euˬ aˬ li Uˇdehˇ meh. Uˇdehˇ-euˬ aˬ bawˇ-aˬ, Awˇmaˬliˇ meh. Aˬ yawꞈ-euˬ aˬ poeˬ aˬ bawˇ deuˬ laꞈ kʼoeˇ, Ymˇliˬ hawˇ-eu Baˬniˬ kʼawꞈ ahˇ-eu meh. Yuˇdaˆ-euˬ aˬ li Sheˬlahˬ-euˬ zaˬ deuˬ uˆ deuˬ kʼoeˇ taˆ aˬ yuiꞈ geuꞈ-euˬ gʼaˬ-aˬ, Aˬsaˬyaˆ meh. Aˬsaˬyaˆ-aˬ aˬ yawꞈ-euˬ aˇ ca deuˬ kʼoeˇ taˆ kʼawꞈ aˬ yuiꞈ geuꞈ luꞈ-eu meh. Yuˇdaˆ-euˬ aˬ li Zeˬlahˬ-euˬ zaˬ deuˬ uˆ deuˬ kʼoeˇ taˆ aˬ yuiꞈ geuꞈ-euˬ gʼaˬ-aˬ, Yoeˬlaˇ meh.

^7-8 Beˬyaˬmiˬ tsawˇ jeuˬ laꞈ kʼoeˇ, Yeˬluˇsaˬlehˬ meuˬ-ahˇ jawˇ-euˬ deuˬ-aˬ, Haˬseˬnahˬ-euˬ oeˬ lehˬ pyeuꞈ-awˇ, Hawˇdaˬbiˇ-euˬ oeˬ paˬ pyeuꞈ-eu, Meˬshuˇlamˬ-euˬ aˬ li Saˬluˬ, Yeˬloˇhamˬ-euˬ aˬ li Iˇbaˬniˇyaˬ, Miˇkaˬliˇ-euˬ oeˬ paˬ pyeuꞈ-eu Awˇzeˬ-euˬ aˬ li Eˇlahˬ, Iˇbaˬniˇyaˬ-euˬ oeˬ lehˬ pyeuꞈ-awˇ, Yoeˬlaˇ-euˬ oeˬ paˬ pyeuꞈ-eu Sheˬpaˬtiˇ-euˬ aˬ li Meˬshuˇlamˬ, heu deuˬ meh,

⁹ Tsawˇ jeuˬ heu jeuˬ-euˬ aˇ ca gʼoeˬ yaˇ ngaˬ tseˇ koꞈ ca kʼoeˇ gaˇ jawˇ-euˬ meh. Laꞈ taˆ paw ehˇ taˬ-euˬ deuˬ-aˬ, aˇ jeuˬ aˇ ca deuˬ kʼoeˇ taˆ aˬ yuiꞈ geuꞈ-euˬ deuˬ meh.

Yeˬluˇsaˬlehˬ meuˬ-ahˇ jawˇ-euˬ piˇ ma deuˬ

¹⁰ Yeˬluˇsaˬlehˬ meuˬ-ahˇ jawˇ-euˬ piˇ ma deuˬ-aˬ, heu deuˬ meh. Yeˬdaˬyaˇ, Yeˬhawˇyaˬliˆ, Yaˬciˬ,

¹¹ Uˬ duˬ tahˬ nymˇ nymˇ ma laꞈ kʼoeˇ aˬ yuiꞈ geuꞈ-awˇ haw-eu pyaˆ-eu gʼaˬ pyeuꞈ-eu Hiˇlaˬkiˇ-euˬ aˬ li Aˬzaˬyiˇ, (Aˬzaˬyiˇ-euˬ tsuiꞈ daˆ-aˬ, Aˬzaˬyiˇ, Hiˇlaˬkiˇ, Meˬshuˇlamˬ, Zaˬdoˆ, Meˬyaˬyoˇ, Aˬhiˇtuˆ lehˇ meh.)

¹² Maˬlaˬkiˇyaˬ-euˬ oeˬ lehˬ pyeuꞈ-awˇ, Paˬshuˇlaˆ-euˬ oeˬ paˬ pyeuꞈ-eu Yeˬloˇhamˬ-euˬ aˬ li Aˬdaˬyaˇ,

¹³ Aˬdeˬlaˇ-euˬ aˬ li Mawˇsehˇ, heu deuˬ meh. (Mawˇsehˇ-euˬ tsuiꞈ daˆ-aˬ, Mawˇsehˇ, Aˬdeˬlaˇ, Yaˬzeˬlahˬ, Meˬshuˇlamˬ, Meˬshiˇleˬmiˇ, Iˇmeˬlaˇ lehˇ meh.

Yeˬluˇsaˬlehˬ meuˬ-ahˇ jawˇ-euˬ Leˬbiˇ tsawˇ haˬ deuˬ

¹⁴ Yeˬluˇsaˬlehˬ meuˬ-ahˇ jawˇ-euˬ Leˬbiˇ tsawˇ haˬ deuˬ-aˬ, heu deuˬ meh. Haˬshuˇbaˆ-euˬ aˬ li Sheˬmaˇyaˬ, (Sheˬmaˇyaˬ-euˬ tsuiꞈ daˆ-aˬ, Sheˬmaˇyaˬ, Haˬshuˇbaˆ, Aˬzaˬliˇkmˬ, Haˬshaˬbiˇ, Meˬlaˬliˇ lehˇ meh.)

¹⁵ Baˬkaˆbaˬkaˬ, Heˬleˬshaˆ, Gaˬlaˬlaˆ, Aˬsaˆ-euˬ oeˬ lehˬ pyeuꞈ-awˇ, Ziˇkaˬliˇ-euˬ oeˬ paˬ pyeuꞈ-eu Miˇgaˬ-euˬ aˬ li Maˬtaˬniˇ,

¹⁶ Yeˬduˇdoˬ-euˬ oeˬ lehˬ pyeuꞈ-awˇ, Gaˬlaˬlaˆ-euˬ oeˬ paˬ pyeuꞈ-eu, Sheˬmaˇyaˬ-euˬ aˬ li Awˇbaˬdiˇ, Neˬtawˇpaˬ meuˬ-ahˇ taꞈ-eu pu deuˬ-ahˇ jawˇ-eu Eˇlaˬkaˬnaˬ-euˬ aˬ li Aˬsaˬ, heu deuˬ meh.

Yeˬluˇsaˬlehˬ meuˬ-ahˇ jawˇ-eu, Uˬ duˬ tahˬ nymˇ nymˇ ma-ahˇ loꞈ piˇ-euˬ tsawˇ haˬ deuˬ

¹⁷ Yeˬluˇsaˬlehˬ meuˬ-ahˇ jawˇ-eu, Uˬ duˬ tahˬ nymˇ nymˇ ma-ahˇ loꞈ piˇ-euˬ tsawˇ haˬ deuˬ-aˬ, Shaˬlmˬ, Aˬkuˇ, Taˬlaˬmoˬ, Aˬhiˇmaˬ, heu deuˬ meh. Shaˬlmˬ-aˬ, aˬ yawꞈ maꞈ kʼoeˇ taˆ aˬ yuiꞈ geuꞈ-euˬ meh.

¹⁸ Aˇ nah aˇ yamˬ kʼoeˇ yamˬ laꞈ kʼoeˇ, nahˇ ma doˆ kʼehˬ paw jaˆ-eu sahˬ paˬ-euˬ lahˇ kʼehˬ-ahˇ aˬ yawꞈ maꞈ-euˬ aˇ jeuˬ aˇ ca deuˬ loꞈ luꞈ-eu meh. Yaw beh-aˬ, Leˬbiˇ tsawˇ haˬ-euˬ sehˬ gʼawˆ-ahˇ le-eu lahˇ kʼehˬ-ahˇ aˬ yawꞈ maꞈ loꞈ-euˬ meh.

¹⁹ Eˇbyaˬsaˆ-euˬ oeˬ paˬ pyeuꞈ-eu Kawˇleˬ-euˬ aˬ li Shaˬlmˬ-aˬ, aˬ yawꞈ-euˬ aˬ poeˬ aˬ bawˇ deuˬ Sehˬ gʼawˆ-ahˇ haw ngeh pyaˆ ngeh loꞈ-ehˇ, aˬ yawꞈ-euˬ aˇ jeuˬ aˇ ca deuˬ nehˬ-ehˇ tiˬ kawˆ loꞈ-ehˇ, Sahˬpaˬ Miˬyehˇ jawˇ-eu Sehˬ gʼawˆ-ahˇ le uˇ-eu gʼoˆ kʼehˬ-ahˇ loꞈ-euˬ meh.

²⁰ Eˇlaˬzaˬ-euˬ aˬ li Piˇnaˬhaˇ gʼaˬ-aˬ, aˬ yawꞈ maꞈ-euˬ kʼoeˇ taˆ haw-eu pyaˆ-eu gʼaˬ tiˬ poˆ geuꞈ-awˇ, Sahˬpaˬ Miˬyehˇ aˬ yawꞈ nehˬ-ehˇ jawˇ-euˬ meh.

²¹ Meˬsheˬlaˬmiˇ-euˬ aˬ li Zaˬkaˬliˇ gʼaˬ kʼawꞈ, Sahˬpaˬ Miˬyehˇ jawˇ-eu Sehˬ gʼawˆ gʼoˆ kʼehˬ-ahˇ loꞈ-euˬ meh.

²² Gʼoˆ kʼehˬ hawˇ-eu lahˇ kʼehˬ dawˬ tawˆ luꞈ-ahˇ bi loꞈ-eu gʼaˇ duˬ tseˇ doˆ-euˬ tsawˇ haˬ dawˬ tawˆ luꞈ, nyiˬ yaˇ tseˇ nyiꞈ gʼaˬ byah-eu meh. Aˬ yawꞈ maꞈ-euˬ tsawˇ myahˇ hawˇ-eu, aˬ yawꞈ maꞈ jawˇ-eu pu tsawˇ myahˇ yuˇ taˬ-euˬ meh. Sahˬ paˬ Daˬbiˇ hawˇ-eu Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Saˬmeuˬlaˆ aˬ nyaꞈ neh, aˬ yawꞈ maꞈ-euˬ aˬ poeˬ aˬ bawˇ deuˬ-ahˇ gaˇ kʼoeˇ biꞈ-euˬ meh.

²³ Aˬ yawꞈ maꞈ hawˇ-eu aˬ yawꞈ maꞈ-euˬ zaˬ deuˬ uˆ deuˬ, Uˬ duˬ tahˬ nymˇ nymˇ ma-ahˇ uˇ leˇ-eu lahˇ kʼehˬ-ahˇ loꞈ-eu gaˇ mˇ daˆ leꞈ-euˬ meh.

²⁴ Laꞈ taˆ pyawˬ, laꞈ oˆ pyawˬ, nahˇ ma doˆ kʼehˬ paw pyawˬ, nahˇ ma ga kʼehˬ paw pyawˬ, heu oeˬ pyawˬ luꞈ, tiˬ pyawˬ-ahˇ lahˇ kʼehˬ tiˬ kʼehˬ dahˇ-awˇ, lahˇ kʼehˬ aˬ yawꞈ kʼehˬ yawꞈ-ahˇ loꞈ luꞈ gaˇ haw-eu pyaˆ-eu aˬ yuiꞈ geuꞈ-euˬ tiˬ gʼaˬ jawˇ-eu meh.

²⁵ Aˬ yuiꞈ geuꞈ-awˇ loꞈ gaˇ caw ba-eu deuˬ-aˬ, shiꞈ nah tiˬ poˆ tsawˇ haˬ dzeˇ paˇ paˇ paˇ-ehˇ ya loꞈ-eu, pu-ahˇ jawˇ-eu aˬ yawꞈ maꞈ-euˬ aˬ yuiꞈ aˬ nyiˇ deuˬ meh.

²⁶ Lahˇ kʼehˬ kʼoeˇ oeˬ kʼehˬ-ahˇ loꞈ-eu gaˇ-ahˇ taꞈ leˇ-awˇ, dawˬ tawˆ luꞈ kʼoeˇ taˆ huiˬ dzehˬ-eu oeˬ gʼaˬ-aˬ, Leˬbiˇ tsawˇ haˬ pyeuꞈ-awˇ, Uˬ duˬ tahˬ nymˇ nymˇ ma laꞈ kʼoeˇ jaˆ-eu aˇ lawˆ deuˬ hawˇ-eu, pyuˇ shuiˇ myawˬ gahˬ deuˬ-ahˇ kʼawꞈ ya haw piˇ-eu meh.

²⁷ Aˬ yawꞈ maꞈ-aˬ, Uˬ duˬ tahˬ nymˇ nymˇ ma dawˬ peh jawˇ-eu meh. Aˬ jeˬ miˇ neh ehˇ naˇ, Uˬ duˬ tahˬ nymˇ nymˇ ma-ahˇ loꞈ piˇ-eu gaˇ maˬ ehˇ, aˬ yawꞈ shawˬ yawꞈ lahˇ kʼehˬ pah-eu gaˇ maˬ ehˇ, aˬ yawꞈ maꞈ ya mˇ-eu meh.

Leˬbiˇ tsawˇ haˬ nui deuˬ

²⁸ Leˬbiˇ tsawˇ haˬ nui deuˬ-aˬ, uˬ duˬ tahˬ ngeh zmˬ-eu mˇ myawˬ keu ka deuˬ-ahˇ ya haw piˇ-eu meh. Mˇ myawˬ keu ka kʼoeˇ deuˬ-ahˇ zmˬ-eu lehˇ kʼaˇ yuˇ doˆ gʼeh ngeh maˬ ehˇ, kʼaˇ yuˇ kʼoꞈ taˬ leˇ ngeh maˬ ehˇ, aˬ yawꞈ maꞈ yaw muiˬ paˬ-ehˇ ya pyehˆ tseˇ haw-eu meh.

²⁹ Aˬ yawꞈ maꞈ tiˬ paˆ na deuˬ-aˬ, muiˬ-eu shawˇ-eu mˇ myawˬ keu ka deuˬ, cehˇ meu deuˬ, aˬ gaꞈ dzaˇ uiˇ deuˬ, saˬ loˬ tsiˇ deuˬ, tsiˇ yaw saw deuˬ hawˇ-eu, yaw saw gʼawˬ mya jeˬ-ahˇ ya jeˬ hmˬ-eu meh.

³⁰ Ehˇ kʼawꞈ, yaw saw gʼawˬ mya jeˬ laˆ keuˬ-eu gaˇ-ahˇ, piˇ ma deuˬ ya mˇ-eu meh.

³¹ Leˬbiˇ tsawˇ jeuˬ laꞈ kʼoeˇ, Kawˇlaˆ aˇ jeuˬ pyeuꞈ-eu Shaˬlmˬ-euˬ aˬ li aˬ yuiꞈ yuiꞈ saˬ Maˬtiˇdiˇ-aˬ, Miˬyehˇ-ahˇ lawˇ nehˬ gaˇ geuꞈ-eu kaˬ muˇ aˇ yaˆ puiˆ-eu gaˇ mˇ-eu meh.

³² Kawˇhaˆ aˇ jeuˬ deuˬ-aˬ, jawˇ nah aˬ yawꞈ nah yawꞈ Uˬ duˬ tahˬ nymˇ nymˇ ma laꞈ kʼoeˇ loˬ-eu, muiˬ-eu shawˇ-eu kaˬ muˇ jahˇ-eu gaˇ ya mˇ-eu meh.

³³ Leˬbiˇ tsawˇ jeuˬ laꞈ kʼoeˇ, aˇ jeuˬ tiˬ paˆ na deuˬ-aˬ, Uˬ duˬ tahˬ nymˇ nymˇ ma laꞈ kʼoeˇ caˇ dawˬ caˇ-eu gaˇ ya mˇ-eu meh. Aˇ jeuˬ heu deuˬ-euˬ aˬ yuiꞈ aˬ tsu deuˬ-aˬ, nui jeˬ gaˇ tiˬ jeˬ-iˬ maˬ mˇ ni, Uˬ duˬ tahˬ nymˇ nymˇ ma laꞈ kʼoeˇ jaˆ-eu aˇ lawˆ deuˬ laꞈ kʼoeˇ jawˇ-euˬ meh. Aˬ jeˬ miˇ neh ehˇ naˇ, uˬ ciꞈ nah gʼahˇ maˬ tseˇ paˆ ni aˬ yawꞈ maꞈ-ahˇ doˇ-eu gaˇ jaˆ-eu meh.

³⁴ Laꞈ taˆ paw ehˇ taˬ-euˬ tsawˇ haˬ deuˬ-aˬ, yawˬ ha-euˬ tsuiꞈ yawˬ ha, Leˬbiˇ tsawˇ haˬ aˇ jeuˬ aˇ ca deuˬ kʼoeˇ taˆ aˬ yuiꞈ geuꞈ-euˬ tsawˇ haˬ deuˬ meh. Aˬ yawꞈ maꞈ-aˬ, Yeˬluˇsaˬlehˬ meuˬ-ahˇ jawˇ-euˬ aˬ yuiꞈ aˬ tsu deuˬ meh.

Sahˬ paˬ Sawˇluˆ-ahˇ taꞈ-eu tsuiꞈ

³⁵ Yeˬyeˬlaˇ-aˬ, Giˇbyoˬ meuˬ teˬ-awˇ jawˇ-euˬ meh. Aˬ yawꞈ-euˬ miˬ zaˬ-aˬ, Mawˇkah lehˇ myahˇ-euˬ meh.

³⁶ Aˬ yawꞈ-euˬ aˬ li deuˬ-aˬ, aˬ yuiꞈ yuiꞈ saˬ gʼaˬ pyeuꞈ-eu Aˬbaˬdoˬ, Zuˇlaˆ, Giˇshaˆ, Baˬlaˇ, Neˬlaˇ, Naˬdehˇ,

³⁷ Geˬdawˬ, Aˬhiˇoˬ, Zaˬkaˬliˇ,

³⁸ Siˇmyaˆ-euˬ aˬ da Miˇkaˬloˆ aˬ ha mehˇ nmˇ meh. Aˬ yawꞈ maꞈ-euˬ zaˬ deuˬ uˆ deuˬ-aˬ, Yeˬluˇsaˬlehˬ meuˬ-ahˇ aˬ yawꞈ maꞈ-euˬ aˇ jeuˬ aˇ ca deuˬ dawˬ peh jawˇ-euˬ meh.

³⁹ Neˬlaˇ-aˬ, Giˇshaˆ-euˬ aˬ da pyeuꞈ-awˇ, Giˇshaˆ-aˬ, sahˬ paˬ Sawˇluˆ-euˬ aˬ da pyeuꞈ-eu meh. Sawˇluˆ-aˬ, Yawˇnaˆshaˬ, Maˬlaˬkiˇshuˬ, Aˬbiˇnaˬdehˇ, Eˇshaˬbaˬ lehˇ myahˇ-euˬ aˬ li oeˬ li jawˇ-eu meh.

⁴⁰ Yawˇnaˆshaˬ-aˬ, Meˬliˇbaˬlaˇ-euˬ aˬ da pyeuꞈ-awˇ, Meˬliˇbaˬlaˇ-aˬ, Miˇkaˬ-euˬ aˬ da pyeuꞈ-eu meh.

⁴¹ Miˇkaˬ-aˬ, Piˇdoˬ, Meˬlehˆ, Taˬliˆ, Aˬkaˆ lehˇ myahˇ-euˬ aˬ li oeˬ li jawˇ-eu meh.

⁴² Aˬkaˆ-euˬ aˬ li Jaˬlah, Jaˬlah-euˬ aˬ li deuˬ-aˬ, Aˬlaˬmehˇ, Aˬzaˇmaˬbehˇ, Zmˇliˬ aˬ ha mehˇ nmˇ meh. Zmˇliˬ-euˬ aˬ li Mawˇzaˬ,

⁴³ Mawˇzaˬ-euˬ aˬ li Biˇnaˬ, Biˇnaˬ-euˬ aˬ li Leˬpaˬyaˆ, Leˬpaˬyaˆ-euˬ aˬ li Eˇlaˬsahˬ, Eˇlaˬsahˬ-euˬ aˬ li Aˬzeˬlaˇ meh.

⁴⁴ Aˬzeˬlaˇ-aˬ, aˬ li koꞈ li jawˇ-eu meh. Aˬ li kʼoeˇ koꞈ li-aˬ, Aˬzaˬliˇkmˬ, Bawˇsheˬluˇ, Iˇshaˬmeˬlaˇ, Shaˬliˇyaˆ, Awˇbaˬdiˇ, Haˬnaˬ aˬ ha mehˇ nmˇ meh.