1 Laˬsaˬbaˬ 5 - Akha

Luˇbeˬ-euˬ zaˬ deuˬ uˆ deuˬ

¹ Heu-aˬ, Yaˬkoˆ-euˬ aˬ li aˬ yuiꞈ yuiꞈ saˬ gʼaˬ pyeuꞈ-eu Luˇbeˬ-euˬ zaˬ deuˬ uˆ deuˬ meh. (Luˇbeˬ-aˬ, aˬ yawꞈ aˬ da-euˬ ma nyiˇ tiˬ gʼaˬ nehˬ-ehˇ joe-euˬ miˇ neh, aˬ li aˬ yuiꞈ yuiꞈ saˬ gʼaˬ-euˬ aˇ yaˬ maˬ za-ehˇ, aˇ yaˬ kʼoeˇ Yoˇsehˆ-ahˇ biꞈ-euˬ meh.

² Ehˇ kʼawꞈ, Yuˇdaˆ tsawˇ jeuˬ-aˬ, aˬ cawˬ naˆ maˬ tseˇ gʼaˬ kʼaˆ dzehˬ-eu tsawˇ jeuˬ pyeuꞈ laˇ-awˇ, Iˇsaˬleˬlaˆ tsawˇ jeuˬ dawˬ tawˆ luꞈ kʼoeˇ taˆ uˆ lahˇ-euˬ meh.)

³ Yaˬkoˆ-euˬ aˬ li aˬ yuiꞈ yuiꞈ saˬ gʼaˬ pyeuꞈ-eu Luˇbeˬ-aˬ, Haˬnoˆ, Paˬloˇ, Heˬzaˬloˬ, Kaˬmiˬ lehˇ myahˇ-euˬ aˬ li oeˬ li jawˇ-euˬ meh.

^4-6 Yawˇlaˆ-ahˇ neh aˇ dahˬ beh-awˇ gui ka leꞈ-euˬ tsuiꞈ-aˬ, heu loꞈ-ehˇ meh. Sheˬmaˇyaˬ, Gawˇgaˆ, Shiˇmiˇ, Miˇkaˬ, Leˬyaˆ, Baˬlaˇ, Beˬlahˬ lehˇ meh. Luˇbeˬ tsawˇ jeuˬ kʼoeˇ taˆ aˬ yuiꞈ tiˬ gʼaˬ pyeuꞈ-eu Beˬlahˬ-ahˇ Aˬshuˇliˆ sahˬ paˬ Tiˇgaˬlaˇpaˬleˬsaˬ neh nyehꞈ-awˇ, bi sheuˬ byoˆ gʼeh-euˬ meh.

⁷ Luˇbeˬ tsawˇ jeuˬ laꞈ kʼoeˇ, aˇ jeuˬ aˬ yawꞈ jeuˬ yawꞈ kʼoeˇ taˆ aˬ yuiꞈ geuꞈ-euˬ deuˬ-euˬ tsawˇ myahˇ yuˇ taˬ-euˬ heu loꞈ-ehˇ jaˆ-eu meh. Yeˬyeˬlaˇ, Zaˬkaˬliˇ,

⁸ Beˬlaˬ, Beˬlaˬ-euˬ aˬ bawˇ-aˬ, Yawˇlaˆ-euˬ aˬ li Sheˬmaˬ pyeuꞈ-awˇ, Beˬlaˬ-euˬ aˬ da-aˬ, Sheˬmaˬ-euˬ aˬ li Aˬzaˬzaˇ pyeuꞈ-eu meh. Aˇ jeuˬ heu jeuˬ-aˬ, Aˬyawˬ meuˬ hawˇ-eu kʼoeˇ-euˬ laꞈ taˆ paw pyawˬ jeˬ-ehˇ, Neˬboˬ hawˇ-eu Baˬlaˇmyoˬ meuˬ-ahˇ keuˆ ni jaˆ-eu gahˬ kaˬ laꞈ kʼoeˇ jawˇ-euˬ meh.

⁹ Giˇlaˆ miˇ kʼahˬ laꞈ kʼoeˇ aˬ yawꞈ maꞈ jeˬ zaˬ myaˬ dui dui-eu miˇ neh, nahˇ ma doˆ kʼehˬ paw Uˇpaˬlaˇ lawˇ baˬ-ahˇ jaˆ tawꞈ taˬ-euˬ kʼaˇ shuiꞈ deh ga ga ma-ahˇ keuˆ ni, aˬ yawꞈ maꞈ-euˬ miˇ tsaˬ geuꞈ-euˬ meh.

¹⁰ Sahˬ paˬ Sawˇluˆ uˆ lahˇ-eu aˇ yamˬ laꞈ kʼoeˇ, Luˇbeˬ tsawˇ jeuˬ neh Haˬgaˬliˇ tsawˇ jeuˬ-ahˇ guiˇ deuˆ-eu laꞈ kʼoeˇ sehꞈ-awˇ, Giˇlaˆ miˇ kʼahˬ nahˇ ma doˆ kʼehˬ paw pyawˬ-ahˇ jaˆ-eu aˬ yawꞈ maꞈ-euˬ miˇ kʼahˬ yuˇ geuꞈ-euˬ meh.

Gaˆ-euˬ zaˬ deuˬ uˆ deuˬ

¹¹ Gaˆ-euˬ tsawˇ jeuˬ-aˬ, Luˇbeˬ tsawˇ jeuˬ jawˇ-eu laꞈ taˆ paw pyawˬ-ahˇ jaˆ-eu Baˬshaˬ miˇ kʼahˬ-ahˇ jawˇ-awˇ, nahˇ ma doˆ kʼehˬ paw Saˬleˇkaˬ meuˬ-ahˇ keuˆ ni jawˇ keuˆ-euˬ meh.

¹² Yawˇlaˆ-aˬ, aˬ cawˬ naˆ maˬ tseˇ huiˬ dzehˬ-eu aˇ jeuˬ-euˬ aˬ da yaw dzahˇ pyeuꞈ-awˇ, Shaˬpamˬ-aˬ, kʼoeˇ-euˬ laꞈ oˆ teˬ ni gʼeh-eu aˇ jeuˬ-euˬ aˬ da yaw dzahˇ pyeuꞈ-eu meh. Yaˬnehˇ hawˇ-eu Shaˬpaˇ-aˬ, Baˬshaˬ miˇ kʼahˬ laꞈ kʼoeˇ jawˇ-eu aˇ jeuˬ nui deuˬ-euˬ aˬ da yaw dzahˇ pyeuꞈ-eu meh.

¹³ Dzeˇ-eu Gaˆ tsawˇ jeuˬ-aˬ, aˇ jeuˬ heu shiꞈ jeuˬ meh. Miˇkaˬlaˇ aˇ jeuˬ, Meˬshuˇlamˬ aˇ jeuˬ, Sheˬba aˇ jeuˬ, Yawˇleh aˇ jeuˬ, Yaˬcaˬ aˇ jeuˬ, Ziˇyaˬ aˇ jeuˬ, Eˬbaˬ aˇ jeuˬ, heu deuˬ meh.

¹⁴ Aˬ yawꞈ maꞈ-aˬ, Huˇliˆ-euˬ aˬ li Aˬbiˇheˬlaˇ-euˬ zaˬ deuˬ uˆ deuˬ meh. Aˬbiˇheˬlaˇ-euˬ tsuiꞈ daˆ-aˬ, heu loꞈ-ehˇ meh. Aˬbiˇheˬlaˇ, Huˇliˆ, Yaˬyawˬ, Giˇlaˆ, Miˇkeˬlaˇ, Yeˬshiˇshaiˇ, Jah doˬ, Buˇzaˆ lehˇ meh.

¹⁵ Guˇniˬ-euˬ aˬ li Aˬbaˬdeˬlaˇ-euˬ zaˬ Aˬhiˇ-aˬ, aˇ jeuˬ heu deuˬ kʼoeˇ taˆ aˬ yuiꞈ geuꞈ-euˬ gʼaˬ meh.

¹⁶ Gaˆ tsawˇ jeuˬ-aˬ, Baˬshaˬ miˇ kʼahˬ hawˇ-eu Giˇlaˆ miˇ kʼahˬ-ahˇ jaˆ-eu meuˬ deuˬ-ahˇ jawˇ-awˇ, Shaˬloˬ meuˬ-euˬ jeˬ zaˬ gaˆ kʼahˬ doe ni jawˇ byah jiˇ-euˬ meh.

¹⁷ (Sahˬ paˬ Yoˇdaˬ gʼaˬ Yuˇdaˆ miˇ kʼahˬ-ahˇ uˆ lahˇ luꞈ-awˇ, sahˬ paˬ Yeˬyawˇbamˬ nyi gʼaˬ tiˬ gʼaˬ Iˇsaˬleˬlaˆ miˇ kʼahˬ-ahˇ uˆ lahˇ luꞈ-eu aˇ yamˬ laꞈ kʼoeˇ, gaˇ kawˆ heu jaˇ laˇ yuˇ uiˬ taˬ-euˬ meh.

Nahˇ ma doˆ kʼehˬ paw jawˇ-euˬ tsawˇ jeuˬ deuˬ-euˬ Guiˇ maꞈ deuˬ

¹⁸ Luˇbeˬ tsawˇ jeuˬ, Gaˆ tsawˇ jeuˬ hawˇ-eu , nahˇ ma doˆ kʼehˬ paw dzeˇ baˬ-ahˇ jawˇ-eu Maˬnaˇseˬ tsawˇ jeuˬ heu deuˬ laꞈ kʼoeˇ, dehˬ daˬ duˬ, mi cehˇ, kaˆ, heu deuˬ zmˬ-eu paw yaw muiˬ paˬ-ehˇ dzaw nya taˬ-euˬ yehˇ oeˬ muiˇ oeˬ heˇ shiꞈ yaˇ koꞈ tseˇ gʼaˬ jawˇ-eu meh.

¹⁹ Haˬgaˬliˇ tsawˇ jeuˬ pyeuꞈ-eu Yeˬtuˬlaˇ aˇ jeuˬ, Naˬpiˇshaˬ aˇ jeuˬ, Nawˇdaˆ aˇ jeuˬ heu deuˬ-ahˇ, aˬ yawꞈ maꞈ guiˇ deuˆ-iˇ-euˬ meh.

²⁰ Aˬ yawꞈ maꞈ Miˬyehˇ-ahˇ jah-eu laꞈ kʼoeˇ “Caw ba nehˬ laꞈ-awˬ” lehˇ guiˬ lahˬ shaˇ-euˬ loꞈ-ehˇ, aˬ yawꞈ maꞈ-euˬ shaˇ dawˬ-ahˇ Miˬyehˇ naˇ haˬ nehˬ-awˇ, Haˬgaˬliˇ tsawˇ jeuˬ hawˇ-eu aˬ yawꞈ maꞈ nehˬ-ehˇ kʼaˇ gm leˇ-euˬ deuˬ kʼoeˇ taˆ guiˇ bi deuˆ gʼaˬ-euˬ meh.

²¹ Muiˇ-eu deuˬ-euˬ laꞈ-ahˇ neh, law taw ngaˬ muiˇ mawˇ, yawˇ nyiˬ seh ngaˬ muiˇ mawˇ, mahˬ tahˬ laˆ nyiˬ heˇ mawˇ aˬ yawꞈ maꞈ deuˆ za-euˬ uˬ taꞈ, tsawˇ haˬ tiˬ seh gʼaˬ nyehꞈ mi-euˬ meh.

²² Muiˇ-eu deuˬ gʼawˬ mya ni aˬ yawꞈ maꞈ sehꞈ-euˬ meh. Aˬ jeˬ miˇ neh ehˇ naˇ, aˬ yawꞈ maꞈ kʼoeˇ loꞈ-ehˇ guiˇ deuˆ-euˬ gaˇ Miˬyehˇ nui ma tsaˬ-eu meh. Kʼoeˇ naˇ, aˬ cawˬ neh Iˇsaˬleˬlaˆ tsawˇ jeuˬ-ahˇ nyehꞈ byoˆ gʼeh-euˬ aˇ yamˬ maˬ keuˆ laˇ kʼoeˇ keuˆ ni, miˇ kʼahˬ kʼoeˇ kʼahˬ-ahˇ aˬ yawꞈ maꞈ jawˇ-euˬ meh.

Nahˇ ma doˆ kʼehˬ paw baˬ-ahˇ jawˇ-eu Maˬnaˇseˬ tsawˇ jeuˬ

²³ Nahˇ ma doˆ kʼehˬ paw baˬ-ahˇ jawˇ-eu Maˬnaˇseˬ tsawˇ jeuˬ-aˬ, Baˬshaˬ miˇ kʼahˬ-ahˇ jawˇ-awˇ, laꞈ taˆ paw Baˬlaˇheˬlaˬmoˬ meuˬ, Seˬnyaˬ meuˬ hawˇ-eu Heˬlaˬmoˬ gawˬ jawˬ-ahˇ keuˆ ni jawˇ keuˆ-euˬ meh. Aˬ yawꞈ maꞈ tsawˇ haˬ myaˬ dui behˇ dui dui laˇ luꞈ-eu meh.

²⁴ Aˬ yawꞈ maꞈ-euˬ tsawˇ jeuˬ laꞈ kʼoeˇ, aˇ jeuˬ deuˬ-euˬ kʼoeˇ taˆ aˬ yuiꞈ geuꞈ-euˬ deuˬ-aˬ, Eˇpeuˬ, Iˇshiˇ, Eˇliˇlaˆ, Aˬzaˬleˬlaˇ, Yeˬlaˬmiˇ, Hawˇdaˬyaˇ, Yaˬdeˬlaˇ aˬ ha maꞈ meh. Aˬ yawꞈ maꞈ dawˬ tawˆ luꞈ, nya dui dui-eu yehˇ deuˬ pyeuꞈ-awˇ, yawˬ ha-euˬ aˇ jeuˬ deuˬ kʼoeˇ taˆ uˆ lahˇ-eu tsawˇ myahˇ doˆ-euˬ tsawˇ haˬ deuˬ meh.

Nahˇ ma doˆ kʼehˬ paw jawˇ-eu tsawˇ jeuˬ deuˬ aˬ cawˬ neh bi nyehꞈ gʼeh-euˬ

²⁵ Ehˇ kʼawꞈ, tsawˇ haˬ kʼoeˇ deuˬ-aˬ, aˬ yawꞈ maꞈ-euˬ aˬ poeˬ aˬ bawˇ deuˬ-euˬ Miˬyehˇ-ahˇ saˇ jaˇ maˬ ziꞈ ni byehˇ dzeh-awˇ, Miˬyehˇ neh teh doˆ-euˬ tsawˇ jeuˬ kʼoeˇ deuˬ-euˬ miˬ yehˇ deuˬ-ahˇ uˬ duˬ tahˬ-euˬ meh.

²⁶ Kʼoeˇ miˇ neh, Miˬyehˇ-aˬ, (Tiˇgaˬlaˇpaˬleˬsaˬ lehˇ kʼawꞈ kuˇ-eu) Aˬshuˇliˆ sahˬ paˬ Puˇlaˆ-ahˇ kʼehˇ leꞈ-awˇ aˬ yawꞈ maꞈ-euˬ miˇ kʼahˬ-ahˇ guiˇ bi deuˆ le-euˬ meh. Luˇbeˬ tsawˇ jeuˬ, Gaˆ tsawˇ jeuˬ, nahˇ ma doˆ kʼehˬ paw baˬ-ahˇ jawˇ-eu Maˬnaˇseˬ tsawˇ jeuˬ heu deuˬ-ahˇ aˬ yawꞈ nyehꞈ gʼeh-awˇ, Haˬlahˬ meuˬ, Haˬbawˬ meuˬ, Haˬyaˇ meuˬ hawˇ-eu, Goˬzaˬ lawˇ baˬ dawˬ peh bi jawˇ-awˇ, iˬ nah keuˆ ni aˬ yawꞈ maꞈ kʼoeˇ gaˇ jawˇ luꞈ-eu meh.