1 Laˬsaˬbaˬ 29 - Akha

Uˬ duˬ tahˬ nymˇ nymˇ ma tsoˆ-eu gʼaˇ duˬ pyuˇ shuiˇ myawˬ gahˬ damˬ-euˬ

¹ Tsawˇ haˬ aˇ maꞈ aˇ muˇ dawˬ tawˆ luꞈ-ahˇ, sahˬ paˬ Daˬbiˇ heu loꞈ-ehˇ ehˇ nehˬ-euˬ meh. “Ngaˬ li Sawˇlaˬmoˬ-aˬ, Miˬyehˇ neh tseˇ doˆ-euˬ gʼaˬ pyeuꞈ-eu meh. Ehˇ kʼawꞈ, aˬ yawꞈ zaˬ guˬ pyeuꞈ-awˇ, maˬ mˇ maˬ shaˇ haw-euˬ tsawˇ haˬ tiˬ gʼaˬ meh. Nymˬ-mˇ mˇ-eu lehˇ gʼeh-eu gaˇ heu hmˬ-aˬ, huiˬ dui dui-eu gaˇ meh. Aˬ jeˬ miˇ neh ehˇ naˇ, tsawˇ haˬ zaˬ jawˇ-eu gʼaˇ duˬ nymˇ nymˇ ma tsoˆ-eu maˬ ngeuˇ-a. Aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ gʼaˇ duˬ uˬ duˬ tahˬ nymˇ tsoˆ-eu jeˬ pyeuꞈ-eu meh.

² Ngaˇ leh jeh dui dui-awˇ, Uˬ duˬ tahˬ nymˇ nymˇ ma heu nymˇ tsoˆ-eu gʼaˇ duˬ, pyuˇ shuiˇ myawˬ gahˬ hawˇ-eu, mˇ myawˬ keu ka deuˬ lehˬ hmˬ taˬ-euˬ ma. Shuiˇ, pyuˇ, guiˬ shuiˇ, shmˇ, daˇ kawˬ daˇ laꞈ, aˇ poeˬ kʼaˆ-euˬ kʼaˬ lo sehˇ, aˇ caˇ caˇ kʼawꞈ sehˇ, aˇ boꞈ boꞈ-eu gʼaˇ duˬ haw muiˬ-eu kʼaˬ lo gʼawˬ mya jeˬ hawˇ-eu, muiˬ dui gʼahˇ dui dui-eu kʼaˬ lo gʼawˬ mya jeˬ poˆ uiˬ taˬ gʼaˬ-euˬ ma.

³ Ngaˬ neh biꞈ taˬ-euˬ heu deuˬ dawˬ tawˆ luꞈ uˬ taꞈ, Miˬyehˇ-euˬ Uˬ duˬ tahˬ nymˇ nymˇ ma-ahˇ ngaˇ gaˬ-eu miˇ neh, ngaˬ-euˬ shuiˇ hawˇ-eu pyuˇ deuˬ kʼawꞈ ngaˇ biꞈ-euˬ ma.

^4-5 Uˬ duˬ tahˬ nymˇ nymˇ ma-euˬ kaˇ pyawˇ laˆ muiˬ nehˬ-eu gʼaˇ duˬ, ba jiˬ deuˬ neh ya bi tehˆ-eu mˇ myawˬ keu ka deuˬ jahˇ gaˇ bi geuꞈ-eu lehˇ, maˇ jawˆ ni gʼeh-eu shuiˇ koꞈ muiˇ jawꞈ-i dzehˬ ni hawˇ-eu, maˇ jawˆ ni gʼeh-eu pyuˇ tiˬ seh ngaˬ muiˇ oeˬ heˇ jawꞈ-i ehˇ gʼaˬ ni ngaˇ biꞈ-euˬ ma. Nymˬ-mˇ, Sahˬpaˬ Miˬyehˇ gʼaˇ duˬ nui ma keuˆ-awˇ aˬ suˇ gʼaˬ damˬ nmˇ.”

⁶ Kʼoeˇ ngeh, aˇ jeuˬ aˇ ca deuˬ kʼoeˇ taˆ aˬ yuiꞈ geuꞈ-eu deuˬ maˬ ehˇ, Iˇsaˬleˬlaˆ tsawˇ jeuˬ deuˬ-euˬ yaw huiˬ yaw mahˇ deuˬ maˬ ehˇ, guiˇ maꞈ kʼoeˇ taˆ uˆ lahˇ-eu deuˬ maˬ ehˇ, sahˬ paˬ-euˬ pyuˇ shuiˇ myawˬ gahˬ-ahˇ haw-eu pyaˆ-eu tsawˇ haˬ deuˬ maˬ ehˇ, nui ma keuˆ-awˇ damˬ-euˬ meh.

⁷ Uˬ duˬ tahˬ nymˇ nymˇ ma tsoˆ gaˇ bi zmˬ-eu gʼaˇ duˬ, shuiˇ tiˬ seh nyiˬ heˇ jawꞈ-i dzehˬ ni maˬ ehˇ, pyuˇ nyiˬ seh oeˬ heˇ jawꞈ-i dzehˬ ni maˬ ehˇ, guiˬ shuiˇ smˬ seh shiꞈ muiˇ nyiˬ heˇ jawꞈ-i ehˇ gʼaˬ ni maˬ ehˇ, shmˇ nyiˬ lam oeˬ muiˇ jawꞈ-i dzehˬ ni maˬ ehˇ, aˬ yawꞈ maꞈ damˬ-euˬ meh.

⁸ Aˇ poeˬ kʼaˆ-eu kʼaˬ lo sehˇ kʼaˇ jaˆ-eu tsawˇ haˬ deuˬ kʼawꞈ, Uˬ duˬ tahˬ nymˇ nymˇ ma-ahˇ jaˆ-eu pyuˇ shuiˇ myawˬ gahˬ bi geuꞈ-eu lehˇ damˬ-euˬ meh. Uˬ duˬ tahˬ nymˇ nymˇ ma laꞈ kʼoeˇ jaˆ-eu pyuˇ shuiˇ myawˬ gahˬ deuˬ jeˬ hmˬ-eu gʼaˬ-aˬ, Leˬbiˇ tsawˇ jeuˬ pyeuꞈ-eu Geˬlaˬshoˬ aˇ jeuˬ Yeˬheˬlaˇ meh.

⁹ Iˇsaˬleˬlaˆ tsawˇ haˬ deuˬ nui ma keuˆ-eu laꞈ kʼoeˇ Sahˬpaˬ Miˬyehˇ-ahˇ damˬ nehˬ-awˇ, pyuˇ shuiˇ myawˬ gahˬ gʼawˬ mya ni uiˬ laˇ taˬ-euˬ gaˇ ya mawˇ ngeh, aˬ yawꞈ maꞈ laˬ kʼaˬ cehˇ-eu meh. Sahˬ paˬ Daˬbiˇ kʼawꞈ laˬ kʼaˬ cehˇ dui dui-eu meh.

Daˬbiˇ Miˬyehˇ-ahˇ ja ceuˬ-euˬ

¹⁰ Sahˬ paˬ Daˬbiˇ-aˬ, kʼoeˇ gaˇ jawˇ-eu tsawˇ haˬ aˇ maꞈ deuˬ mehˬ shi Sahˬpaˬ Miˬyehˇ-ahˇ ja ceuˬ-euˬ meh. “Nga maꞈ-euˬ aˬ poeˬ Yaˬkoˆ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, mˬ maˬ maˬ byaˆ zaˇ ziˇ nawˬ-ahˇ ja ceuˬ luꞈ-uˇ.

¹¹ Baoˬ maˬ ehˇ, yaw shehꞈ kʼahˬ sehˇ maˬ ehˇ, huiˬ dui mahˇ dui dui-eu jeˬ maˬ ehˇ, gʼaˬ leˇ-eu jeˬ maˬ ehˇ, zahˬ dui dui leˇ paˬ-ehˇ gʼeh-eu jeˬ maˬ ehˇ, dawˬ tawˆ luꞈ nawˬ-euˬ laꞈ kʼoeˇ byah luꞈ meh. Mˬ hawˇ-eu miˇ kʼoeˇ taˆ kʼaˇ jaˆ-eu yawˬ jeˬ na luꞈ nawˬ-euˬ pyeuꞈ-awˇ, dawˬ tawˆ kʼoeˇ taˆ uˆ lahˇ-eu huiˬ dzehˬ-eu sahˬ paˬ nawˇ meh.

¹² Pyuˇ shuiˇ myawˬ gahˬ hawˇ-eu smˇ muiˬ smˇ baw baw-eu jeˬ dawˬ tawˆ luꞈ, nawˇ jawˇ gaˇ neh doˆ le-euˬ tehꞈ meh. Nawˬ-euˬ gʼaˬ hawˇ-eu nawˬ-euˬ baoˬ-ahˇ gʼoe-awˇ, yawˬ jeˬ na luꞈ-ahˇ nawˇ uˆ lahˇ-eu meh.

¹³ Nga maꞈ-eu Miˬyehˇ-oˇ, guiˬ lahˬ huiˬ dui dui miˇ-a. Yaw shehꞈ kʼahˬ sehˇ huiˬ dui dui-eu nawˬ-euˬ tsawˇ myahˇ-ahˇ nga maꞈ ja ceuˬ-eu ma.

¹⁴ “Ehˇ kʼawꞈ, ngaˇ hawˇ-eu ngaˬ-euˬ tsawˇ haˬ deuˬ nawˬ-ahˇ biꞈ nehˬ-eu tiˬ jeˬ-iˬ maˬ jaˆ. Aˬ jeˬ miˇ neh ehˇ naˇ, yawˬ jeˬ na luꞈ nawˬ neh biꞈ laꞈ-euˬ tehꞈ-ehˇ pyeuꞈ-awˇ, nawˬ neh biꞈ laꞈ-euˬ jeˬ nawˬ-ahˇ paˇ biꞈ kʼoꞈ nehˬ-eu tehꞈ ma.

¹⁵ Sahˬpaˬ Miˬyehˇ-oˇ, nga maꞈ yaw dehꞈ dehꞈ-eu jeˬ-aˬ, aˇ hu nga maꞈ-euˬ aˬ poeˬ aˬ bawˇ deuˬ dehꞈ dzeuˇ yaꞈ-euˬ loꞈ-ehˇ, boeˇ miˬ siˬ kʼaˬ loꞈ-ehˇ jawˇ duˬ maˬ dah leˇ nya ni doe doe-ehˇ cah-awˇ ya dehꞈ gaˇ duˇ-eu nawˇ siˬ luꞈ meh. Nga maꞈ-euˬ aˇ nah aˇ yamˬ-aˬ, byoˆ-iˇ luꞈ-eu naˇ shmˇ-ahˇ duˇ-awˇ, shiˇ-eu jeˬ-ahˇ nga maꞈ maˬ tsehˆ dzeuˇ nya-a.

¹⁶ Nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, muiˬ-eu shawˇ-eu nawˬ-euˬ tsawˇ myahˇ-ahˇ taˬ huiˬ taˬ mahˇ-eu laꞈ kʼoeˇ, uˬ duˬ tahˬ nymˇ tiˬ nymˇ tsoˆ-eu gʼaˇ duˬ, nga maꞈ pyuˇ shuiˇ myawˬ gahˬ yuˇ uiˬ laꞈ taˬ-euˬ ma. Ehˇ kʼawꞈ, heu deuˬ dawˬ tawˆ luꞈ nawˇ jawˇ gaˇ neh oe-euˬ jeˬ tehꞈ-ehˇ pyeuꞈ-awˇ dawˬ tawˆ luꞈ nawˬ-euˬ tehꞈ meh.

¹⁷ Tsawˇ haˬ yawˬ gʼaˬ na luꞈ-euˬ nui ma-ahˇ nawˇ lawˬ haw-awˇ, nui ma tiˬ siˬ tehꞈ-ehˇ taˬ luꞈ-eu miˇ neh, nawˇ laˬ kʼaˬ cehˇ meh lehˇ ngaˇ siˬ nya ma. Nui ma dawˇ coe ni jaˆ-awˇ, nui ma keuˆ dui dui-eu laꞈ kʼoeˇ, heu deuˬ dawˬ tawˆ luꞈ nawˬ-ahˇ ngaˇ damˬ nehˬ-eu ma. Heu gaˇ uiˬ laˇ taˬ-euˬ nawˬ-euˬ tsawˇ haˬ deuˬ kʼawꞈ, laˬ kʼaˬ cehˇ-eu laꞈ kʼoeˇ nawˬ-ahˇ damˬ-eu jeˬ yuˇ laꞈ-euˬ gaˇ ngaˇ ya mawˇ-euˬ ma.

¹⁸ Nga maꞈ-euˬ aˬ poeˬ Aˬbyaˬhaˬ, Iˇtsaˆ, Yaˬkoˆ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, nawˬ-euˬ tsawˇ haˬ heu deuˬ-euˬ nui ma laꞈ kʼoeˇ, heu loꞈ-ehˇ nawˬ-ahˇ uˬ duˬ tahˬ mawꞈ-euˬ jeˬ aˬ myah luꞈ gʼaˬ kʼaˆ-awˇ, aˬ myah luꞈ nawˬ-ahˇ saˇ jaˇ ziꞈ ni caw ba nehˬ-awˬ.

¹⁹ Nawˬ neh kʼaˇ mehˬ kʼaˇ tsoˆ nehˬ-euˬ yawˬ jeˬ na luꞈ-ahˇ naˇ haˬ geuꞈ mawꞈ-eu nui ma tiˬ byah ni ahˇ-awˇ, ngaˬ neh lehˬ hmˬ dah taˬ-euˬ Uˬ duˬ tahˬ nymˇ nymˇ ma heu nymˇ tsoˆ doˆ nya ni, ngaˬ li Sawˇlaˬmoˬ-ahˇ nawˇ ngehˬ gʼeh dah teˬ nehˬ-awˬ.”

²⁰ Kʼoeˇ naˇ, “Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ ja ceuˬ-awˬ” lehˇ, tsawˇ haˬ aˇ maꞈ-ahˇ Daˬbiˇ ehˇ nehˬ-euˬ meh. Tsawˇ haˬ aˇ maꞈ dawˬ tawˆ luꞈ, aˬ yawꞈ maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ ja ceuˬ-euˬ meh. Kʼoeˇ naˇ, aˬ yawꞈ maꞈ awˆ byaˆ-awˇ, Sahˬpaˬ Miˬyehˇ hawˇ-eu aˬ yawꞈ-euˬ sahˬ paˬ-ahˇ yaw zeu baw nehˬ-euˬ meh.

²¹ Yawˬ nah yawˬ Sahˬpaˬ Miˬyehˇ-ahˇ lawˇ nehˬ-eu gʼaˇ duˬ aˬ yawꞈ maꞈ jeˬ zaˬ sehꞈ-awˇ, Sahˬpaˬ Miˬyehˇ-ahˇ damˬ nehˬ gʼaˬ-awˇ, tsawˇ haˬ aˇ maꞈ-ahˇ bi dzaˬ-euˬ meh. Kʼoeˇ uˬ taꞈ, mawˇ neˇ mawˇ gaw tiˬ heˇ mawˇ, yawˇ aˬ buˬ tiˬ heˇ mawˇ hawˇ-eu, yawˇ zaˬ tiˬ heˇ mawˇ sehꞈ-awˇ, lawˇ duˬ kʼoeˇ taˆ mawˇ lah-ehˇ miˬ dzaˬ dzah puiˆ-awˇ lawˇ-eu jeˬ lawˇ-euˬ meh. Aˬ yawꞈ maꞈ aˬ gaꞈ dzaˇ uiˇ kʼawꞈ yuˇ laꞈ-awˇ lawˇ nehˬ-euˬ meh.

²² Kʼoeˇ ngeh nah, Sahˬpaˬ Miˬyehˇ mehˬ shi aˬ yawꞈ maꞈ dzaˬ-awˇ dawˇ-awˇ, byawˬ gʼa dui dui-euˬ meh. Sawˇlaˬmoˬ-ahˇ, aˬ yawꞈ maꞈ nyiˬ poˆ tiˬ poˆ sahˬ paˬ paˇ ka nehˬ-euˬ meh. Sahˬpaˬ Miˬyehˇ-euˬ tsawˇ myahˇ uˬ moˆ aˬ yawꞈ maꞈ-ahˇ bi uˆ lahˇ-eu gʼaˇ duˬ, aˬ yawꞈ-ahˇ tsiˇ shehˆ daˆ nehˬ-awˇ, Zaˬdoˆ gʼaˬ-ahˇ kʼawꞈ, piˇ ma bi geuꞈ-eu gʼaˇ duˬ tsiˇ shehˆ daˆ nehˬ-euˬ meh.

²³ Kʼoeˇ naˇ, Sahˬpaˬ Miˬyehˇ neh laˆ saˆ taˬ-euˬ nuiˇ mahˬ pyeuꞈ-eu aˬ yawꞈ aˬ daˬ Daˬbiˇ-euˬ dzoeˬ dzaˬ nuiˇ mahˬ-ahˇ Sawˇlaˬmoˬ nuiˇ-awˇ, sahˬ paˬ keuˆ leˇ-euˬ meh. Aˬ yawꞈ-aˬ, baoˬ huiˬ-eu sahˬ paˬ tiˬ gʼaˬ pyeuꞈ-awˇ, Iˇsaˬleˬlaˆ tsawˇ jeuˬ jeuˬ lah ni aˬ yawꞈ-euˬ dawˬ-ahˇ naˇ haˬ geuꞈ-euˬ meh.

²⁴ Yaw huiˬ yaw mahˇ deuˬ dawˬ tawˆ luꞈ maˬ ehˇ, yehˇ deuˬ dawˬ tawˆ luꞈ maˬ ehˇ, Daˬbiˇ-euˬ aˬ li nui deuˬ dawˬ tawˆ luꞈ maˬ ehˇ, sahˬ paˬ Sawˇlaˬmoˬ-ahˇ saˇ jaˇ ziꞈ ma lehˇ kamˬ-euˬ meh..

²⁵ Iˇsaˬleˬlaˆ tsawˇ jeuˬ jeuˬ lah ni Sawˇlaˬmoˬ-euˬ mehˬ shi yawꞈ-awˇ zahˬ leˇ tsoˆ leˇ jiˇ ni Sahˬpaˬ Miˬyehˇ jahˇ-awˇ, Iˇsaˬleˬlaˆ miˇ kʼahˬ-ahˇ kʼaˇ uˆ lahˇ dzeuˇ yaꞈ-euˬ sahˬ paˬ dawˬ tawˆ luꞈ naˆ maˬ tseˇ, Sawˇlaˬmoˬ-euˬ yaw shehꞈ kʼahˬ sehˇ huiˬ dzehˬ ni aˬ yawꞈ jahˇ-euˬ meh.

Daˬbiˇ ziˇ jiˇ-euˬ

²⁶ Yeˬshehˇ-euˬ aˬ li Daˬbiˇ-aˬ, Iˇsaˬleˬlaˆ miˇ kʼahˬ tiˬ kʼahˬ kʼahˬ lah ni kʼoeˇ taˆ sahˬ paˬ geuꞈ-awˇ uˆ lahˇ-euˬ meh.

²⁷ Oeˬ tseˇ kʼoꞈ byah ni Iˇsaˬleˬlaˆ miˇ kʼahˬ-ahˇ aˬ yawꞈ uˆ lahˇ-euˬ meh. Heˬbyoˬ meuˬ-ahˇ jawˇ-awˇ shiꞈ kʼoꞈ uˆ lahˇ gʼaˬ miˇ tsa, Yeˬluˇsaˬlehˬ meuˬ-ahˇ jawˇ-awˇ smˬ tseˇ smˇ kʼoꞈ uˆ lahˇ-euˬ meh.

²⁸ Aˬ yawꞈ-aˬ, smˇ muiˬ muiˬ dui dui-eu sahˬ paˬ tiˬ gʼaˬ pyeuꞈ-awˇ, aˬ cawˬ yaw zeu baw-eu laꞈ kʼoeˇ, tsawˇ mawˬ dehꞈ mawꞈ leꞈ-awˇ ziˇ dehꞈ jiˇ-euˬ meh. Aˬ yawꞈ-euˬ aˬ li Sawˇlaˬmoˬ gʼaˬ, aˬ yawꞈ-euˬ dah zaˇ sahˬ paˬ geuꞈ-euˬ meh.

²⁹ Sahˬ paˬ Daˬbiˇ yaw dehꞈ dehꞈ yaꞈ-euˬ gaˇ kawˆ, aˇ dahˬ beh gaˇ neh aˇ saˬ saˬ gaˇ keuˆ ni, Miˬyehˇ gʼaˇ duˬ ngehˬ dah-eu deuˬ pyeuꞈ-eu Saˬmeuˬlaˆ, Naˬdaˬ, Gaˆ aˬ ha smˇ gʼaˬ-euˬ sahˬ boꞈ deuˬ laꞈ kʼoeˇ boꞈ ahˇ taˬ-euˬ meh.

³⁰ Boꞈ taˬ-euˬ gaˇ kawˆ heu deuˬ-aˬ, aˬ yawꞈ neh miˇ kʼahˬ-ahˇ aˬ joˆ-ehˇ uˆ lahˇ-euˬ gaˇ kawˆ, aˬ yawꞈ aˇ naˆ ni baoˬ huiˬ-euˬ gaˇ kawˆ hawˇ-eu, aˬ yawꞈ kʼoeˇ taˆ maˬ ehˇ, Iˇsaˬleˬlaˆ miˇ kʼahˬ kʼoeˇ taˆ maˬ ehˇ, Iˇsaˬleˬlaˆ miˇ kʼahˬ-euˬ jawˬ jawˬ-ehˇ jaˆ-eu miˇ kʼahˬ deuˬ kʼoeˇ taˆ maˬ ehˇ, kʼaˇ keuˆ le-euˬ gaˇ kawˆ yawˬ jeˬ na luꞈ boꞈ taˬ-euˬ meh.