1 Laˬsaˬbaˬ 24 - Akha

Piˇ ma deuˬ ya mˇ-eu gaˇ

¹ Aˬloˬ-euˬ zaˬ deuˬ heu loꞈ-ehˇ aˇ jeuˬ paˆ-iˇ-euˬ meh. Aˬloˬ-aˬ, Naˬdehˇ, Aˬbiˇhuˬ, Eˇlaˬzaˬ, Iˇdaˬmaˬ lehˇ kuˇ-euˬ aˬ li oeˬ li jawˇ-eu meh.

² Naˬdehˇ hawˇ-eu Aˬbiˇhuˬ aˬ nyaꞈ nmˇ zaˬ tiˬ gʼaˬ-iˬ maˬ jawˇ le-ehˇ, aˬ da gʼaˬ-euˬ jeˬ hu shiˇ-euˬ miˇ neh, Eˇlaˬzaˬ hawˇ-eu Iˇdaˬmaˬ aˬ nyaꞈ nmˇ piˇ ma pyeuꞈ laˇ-euˬ meh.

³ Daˬbiˇ-aˬ, Aˬloˬ-euˬ zaˬ deuˬ uˆ deuˬ-ahˇ aˇ muˇ biˇ paˆ nehˬ-awˇ, yawˬ ha-euˬ gaˇ yawˬ ha bi baw-euˬ meh. Aˬ yawꞈ kʼoeˇ loꞈ-ehˇ aˇ muˇ biˇ paˆ nehˬ ngeh, Eˇlaˬzaˬ aˇ jeuˬ pyeuꞈ-eu Zaˬdoˆ hawˇ-eu Iˇdaˬmaˬ aˇ jeuˬ pyeuꞈ-eu Aˬhiˇmaˬlehˇ aˬ nyaꞈ aˬ yawꞈ-ahˇ caw ba-euˬ meh.

⁴ Eˇlaˬzaˬ-euˬ zaˬ deuˬ uˆ deuˬ-ahˇ aˇ muˇ tseˇ koꞈ muˇ biˇ-awˇ, Iˇdaˬmaˬ-euˬ zaˬ deuˬ uˆ deuˬ-ahˇ yehꞈ muˇ biˇ-euˬ meh. Eˇlaˬzaˬ-euˬ zaˬ deuˬ uˆ deuˬ laꞈ kʼoeˇ, aˇ jeuˬ aˇ ca aˬ yawꞈ ca yawꞈ kʼoeˇ taˆ aˬ yuiꞈ geuꞈ luꞈ-eu tsawˇ haˬ aˇ gʼaˬ myaˬ dzehˬ-eu miˇ neh, kʼoeˇ loꞈ-ehˇ aˇ muˇ biˇ myaˬ dzehˬ-euˬ meh.

⁵ Eˇlaˬzaˬ-euˬ zaˬ deuˬ uˆ deuˬ hawˇ-eu Iˇdaˬmaˬ-euˬ zaˬ deuˬ uˆ deuˬ nyiˬ jeuˬ luꞈ laꞈ kʼoeˇ, Uˬ duˬ tahˬ nymˇ nymˇ ma laꞈ kʼoeˇ gaˇ mˇ-eu yaw huiˬ yaw mahˇ deuˬ hawˇ-eu, guiˬ lahˬ saꞈ laˇ paw aˬ yuiꞈ geuꞈ-eu deuˬ jawˇ luꞈ-eu miˇ neh, aˬ yawꞈ maꞈ-ahˇ gaˇ biˇ paˆ nehˬ ngeh, shehˆ tsaˬ tsaˬ-awˇ biˇ nehˬ-euˬ meh.

⁶ Eˇlaˬzaˬ-euˬ zaˬ deuˬ uˆ deuˬ hawˇ-eu Iˇdaˬmaˬ-euˬ zaˬ deuˬ uˆ deuˬ, tiˬ gʼaˬ tiˬ poˆ shehˆ tsaˬ tsaˬ-awˇ, Leˬbiˇ tsawˇ haˬ jaˇ laˇ yuˇ-eu gʼaˬ pyeuꞈ-eu Neˬdaˬneˬlaˇ-euˬ aˬ li Sheˬmaˇyaˬ gʼaˬ-aˬ, aˬ yawꞈ maꞈ-euˬ tsawˇ myahˇ yuˇ-euˬ meh. Sahˬ paˬ maˬ ehˇ, aˬ yawꞈ-euˬ gaˇ mˇ-euˬ yaw huiˬ yaw mahˇ deuˬ maˬ ehˇ, piˇ ma Zaˬdoˆ maˬ ehˇ, Aˬbyaˬdaˬ-euˬ aˬ li Aˬhiˇmaˬlehˇ maˬ ehˇ, piˇ ma deuˬ-euˬ aˇ jeuˬ aˇ ca kʼoeˇ taˆ aˬ yuiꞈ geuꞈ-eu deuˬ hawˇ-eu Leˬbiˇ tsawˇ jeuˬ-euˬ aˇ jeuˬ aˇ ca deuˬ maˬ ehˇ, dawˬ tawˆ luꞈ jawˇ-eu mehˬ shi kʼoeˇ loꞈ-ehˇ mˇ-euˬ meh.

⁷ Gaˇ za beh beh-euˬ gʼaˬ Yeˬhawˇyaˬliˆ, nyiˬ gʼaˬ tiˬ gʼaˬ Yeˬdehˇyaˬ,

⁸ smˇ gʼaˬ tiˬ gʼaˬ Haˬlmˬ, oeˬ gʼaˬ tiˬ gʼaˬ Soeˇlmˬ,

⁹ ngaˬ gʼaˬ tiˬ gʼaˬ Maˬlaˬkiˇyaˬ, koꞈ gʼaˬ tiˬ gʼaˬ Miˇyaˬmeˬ,

¹⁰ shiꞈ gʼaˬ tiˬ gʼaˬ Haˬkawˇzaˬ, yehꞈ gʼaˬ tiˬ gʼaˬ Aˬbiˇyaˬ,

¹¹ gʼoeˬ gʼaˬ tiˬ gʼaˬ Yeˬshah, tseˇ gʼaˬ tiˬ gʼaˬ Sheˬkaˬniˇ,

¹² tseˇ tiꞈ gʼaˬ tiˬ gʼaˬ Eˇlaˬshiˆ, tseˇ nyiꞈ gʼaˬ tiˬ gʼaˬ Yaˬkmˬ,

¹³ tseˇ smˇ gʼaˬ tiˬ gʼaˬ Huˇpahˬ, tseˇ oeˬ gʼaˬ tiˬ gʼaˬ Yeˬshiˇbaˆ,

¹⁴ tseˇ ngaˬ gʼaˬ tiˬ gʼaˬ Biˇlaˬgahˬ, tseˇ koꞈ gʼaˬ tiˬ gʼaˬ Iˇmeˬlaˇ,

¹⁵ tseˇ shiꞈ gʼaˬ tiˬ gʼaˬ Heˬziˬlaˇ, tseˇ yehꞈ gʼaˬ tiˬ gʼaˬ Haˬpiˇzeh,

¹⁶ tseˇ gʼoeˬ gʼaˬ tiˬ gʼaˬ Peˬdaˬhiˇ, nyiˬ tseˇ gʼaˬ tiˬ gʼaˬ Yeˬheˬzaˬgeˬlaˇ,

¹⁷ nyiˬ tseˇ tiꞈ gʼaˬ tiˬ gʼaˬ Yaˬciˬ, nyiˬ tseˇ nyiꞈ gʼaˬ tiˬ gʼaˬ Gaˬmuˇlaˆ,

¹⁸ nyiˬ tseˇ smˇ gʼaˬ tiˬ gʼaˬ Daˬlaˇyaˬ, nyiˬ tseˇ oeˬ gʼaˬ tiˬ gʼaˬ Mawˇziˇ meh.

¹⁹ Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ dawˬ-ahˇ naˇ haˬ geuꞈ-eu laꞈ kʼoeˇ, aˬ yawꞈ maꞈ-euˬ aˬ poeˬ Aˬloˬ neh beh taˬ yaꞈ-euˬ gaˇ pyeuꞈ-eu Uˬ duˬ tahˬ nymˇ nymˇ ma laꞈ kʼoeˇ jaˆ-eu gaˇ deuˬ-ahˇ, yawˬ ha-ahˇ kʼaˇ doˇ-eu loꞈ-ehˇ mˇ-eu gʼaˇ duˬ, tsawˇ haˬ heu deuˬ-euˬ tsawˇ myahˇ yuˇ taˬ-euˬ meh.

Leˬbiˇ tsawˇ jeuˬ nui deuˬ

²⁰ Heu deuˬ-aˬ, Leˬbiˇ-ahˇ neh jeuˬ le o le-euˬ aˇ jeuˬ aˇ ca nui deuˬ kʼoeˇ taˆ aˬ yuiꞈ geuꞈ luꞈ-eu deuˬ meh. Aˬmaˬlamˬ o neh jeuˬ le o le-euˬ Sheˬbeuˬlaˇ-euˬ aˇ jeuˬ aˇ caˬ pyeuꞈ-eu Yeˬdehˇyaˬ.

²¹ Leˬhaˬbiˇ aˇ jeuˬ Iˇshaˬyaˆ.

²² Iˇzaˬhaˬ o neh jeuˬ le o le-euˬ Sheˬloˇmiˇ aˇ jeuˬ Jaˬhaˆ.

²³ Heˬbyoˬ-euˬ aˬ li deuˬ pyeuꞈ-eu Yeˬliˇyaˆ, Aˬmaˬliˇ, Yeˬhaˬzeˬlaˇ, Yeˬkaˬmeˬ.

²⁴ Awˇzeˬlaˇ o neh jeuˬ le o le-euˬ Miˇkaˬ aˇ jeuˬ Shaˬmeuˬ.

²⁵ Awˇzeˬlaˇ o neh jeuˬ le o le-euˬ Miˇkaˬ-euˬ aˬ nyiˇ Iˇshaˬyaˇ-euˬ aˇ jeuˬ Zaˬkaˬliˇ.

²⁶ Meˬlaˬliˇ-euˬ zaˬ deuˬ uˆ deuˬ pyeuꞈ-eu Maˬhaˬliˬ, Muˇshiˬ, Yaˬziˇ.

²⁷ Yaˬziˇ-aˬ, Shoˇhamˬ, Zaˬkuˬlaˇ, Iˇbyiˇ lehˇ myahˇ-euˬ aˬ li smˬ li jawˇ-eu meh.

^28-29 Maˬhaˬliˬ-aˬ, Eˇlaˬzaˬ hawˇ-eu Giˇshaˆ lehˇ myahˇ-euˬ aˬ li nyiˬ li jawˇ-eu meh. Eˇlaˬzaˬ gʼaˬ aˬ li maˬ jawˇ-a. Giˇshaˆ gʼaˬ-aˬ, Yeˬlaˬmeˬlaˇ lehˇ myahˇ-euˬ aˬ li tiˬ li jawˇ-eu meh.

³⁰ Muˇshiˬ-aˬ, Maˬhaˬliˬ, Eˬdeuˬ, Yeˬlaˬmoˇ lehˇ myahˇ-euˬ aˬ li smˬ li jawˇ-eu meh. Heu-aˬ, Leˬbiˇ tsawˇ jeuˬ laꞈ kʼoeˇ ahˇ-eu aˇ jeuˬ aˇ ca deuˬ pyeuꞈ-eu meh.

³¹ Aˬ yawꞈ maꞈ-euˬ aˇ jeuˬ Aˬloˬ-euˬ zaˬ deuˬ uˆ deuˬ pyeuꞈ-eu piˇ ma deuˬ-ahˇ gaˇ biˇ nehˬ ngeh, shehˆ tsaˬ tsaˬ-awˇ biˇ nehˬ-euˬ loꞈ-ehˇ, aˬ yawꞈ maꞈ kʼawꞈ, aˇ jeuˬ aˬ yawꞈ jeuˬ yawꞈ kʼoeˇ taˆ aˬ yuiꞈ geuꞈ-eu gʼaˬ hawˇ-eu aˬ yawꞈ-euˬ mehˇ nmˇ aˬ nyiˇ tiˬ gʼaˬ-ahˇ, shehˆ tsaˬ bi tsaˬ-eu laꞈ kʼoeˇ gaˇ biˇ nehˬ-euˬ meh. Sahˬ paˬ Daˬbiˇ, Zaˬdoˆ, Aˬhiˇmaˬlehˇ hawˇ-eu piˇ ma aˇ jeuˬ deuˬ kʼoeˇ taˆ aˬ yuiꞈ aˬ tsu geuꞈ luꞈ-eu deuˬ mehˬ shi, kʼoeˇ loꞈ-ehˇ gaˇ biˇ nehˬ-euˬ meh.