1 Laˬsaˬbaˬ 23 - Akha

¹ Daˬbiˇ tsawˇ mawˬ mawˬ dui dui laˇ ngeh, aˬ yawꞈ-euˬ aˬ li Sawˇlaˬmoˬ-ahˇ Iˇsaˬleˬlaˆ sahˬ paˬ ka nehˬ-euˬ meh.

Leˬbiˇ tsawˇ haˬ deuˬ-euˬ gaˇ

² Iˇsaˬleˬlaˆ tsawˇ jeuˬ-euˬ aˬ yuiꞈ aˬ tsu deuˬ, piˇ ma deuˬ hawˇ-eu, Leˬbiˇ tsawˇ haˬ deuˬ dawˬ tawˆ luꞈ-ahˇ, sahˬ paˬ Daˬbiˇ kuˇ uiˬ-euˬ meh.

³ Aˇ kʼoꞈ smˬ tseˇ laꞈ taˆ paw-euˬ Leˬbiˇ tsawˇ haˬ kʼaˬ dzeˇ zaˬ dawˬ tawˆ luꞈ-euˬ tsawˇ myahˇ aˬ yawꞈ yuˇ-euˬ meh. Dawˬ tawˆ luꞈ smˬ muiˇ yehꞈ heˇ gʼaˬ byah-eu meh.

⁴ Daˬbiˇ ehˇ-eu, “Tsawˇ haˬ heu deuˬ laꞈ kʼoeˇ, nyiˬ muiˇ oeˬ heˇ gʼaˬ-aˬ, Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma laꞈ kʼoeˇ gaˇ mˇ gaˇ haw-eu pyaˆ-eu deuˬ geuꞈ-awˇ, koꞈ heˇ gʼaˬ-aˬ, jaˇ laˇ yuˇ-eu paw hawˇ-eu yaˇ kʼaˬ daˇ-eu paw gaˇ mˇ-awˬ.

⁵ Oeˬ heˇ gʼaˬ-aˬ, gʼoˆ kʼehˬ-ahˇ loꞈ piˇ-eu gaˇ mˇ-awˇ, oeˬ heˇ gʼaˬ-aˬ, ngaˬ neh biꞈ-euˬ caˇ dawˬ caˇ gaˇ zmˬ-eu keu ka deuˬ yuˇ-awˇ, Sahˬpaˬ Miˬyehˇ-ahˇ caˇ-awˇ ja ceuˬ-eu deuˬ geuꞈ-awˬ.”

⁶ Daˬbiˇ-aˬ, Leˬbiˇ tsawˇ haˬ deuˬ-ahˇ, Geˬlaˬshoˬ aˇ jeuˬ, Kawˇhaˆ aˇ jeuˬ, Meˬlaˬliˇ aˇ jeuˬ lehˇ, smˬ muˇ biˇ paˆ nehˬ-euˬ meh.

⁷ Geˬlaˬshoˬ-aˬ, Laˬdaˬ hawˇ-eu Shiˇmiˇ lehˇ myahˇ-euˬ aˬ li nyiˬ li jawˇ-eu meh.

⁸ Laˬdaˬ-aˬ, Yeˬheˬlaˇ, Zeˬdamˬ, Yawˇlaˆ lehˇ myahˇ-euˬ aˬ li smˬ li jawˇ-eu meh.

⁹ Aˬ yawꞈ maꞈ-aˬ, Laˬdaˬ o neh jeuˬ le o le-euˬ aˇ jeuˬ aˇ ca deuˬ-euˬ aˬ da yaw dzahˇ deuˬ meh. (Shiˇmiˇ-aˬ, Sheˬloˇmoˇ, Haˬzeˬlaˇ, Haˬlaˬ lehˇ myahˇ-euˬ aˬ li smˬ li jawˇ-eu meh.)

¹⁰ Shiˇmiˇ-euˬ aˬ li deuˬ-aˬ, Jaˬhaˆ, Ziˇzaˬ, Yuˇshaˆ, Beˬliˇyaˆ aˬ ha mehˇ nmˇ meh. Aˬ ha oeˬ mehˇ nmˇ-aˬ, Shiˇmiˇ-euˬ zaˬ deuˬ meh.

¹¹ Jaˬhaˆ gʼaˬ aˬ yuiꞈ yuiꞈ saˬ pyeuꞈ-awˇ, Ziˇzaˬ gʼaˬ aˬ gʼahˇ gʼaˬ pyeuꞈ-eu meh. Yuˇshaˆ hawˇ-eu Beˬliˇyaˆ aˬ nyaꞈ-aˬ, aˬ li maˬ jawˇ myaˬ-eu miˇ neh, aˇ jeuˬ aˇ ca tiˬ ca tehꞈ-ehˇ sawˇ-awˇ, gaˇ tiˬ jeˬ tehꞈ-ehˇ bi tawˬ-euˬ meh.

¹² Kawˇhaˆ-aˬ, Aˬmaˬlamˬ, Iˇzaˬhaˬ, Heˬbyoˬ, Awˇzeˬlaˇ lehˇ myahˇ-euˬ aˬ li oeˬ li jawˇ-eu meh.

¹³ Aˬ li aˬ yuiꞈ yuiꞈ saˬ gʼaˬ pyeuꞈ-eu Aˬmaˬlamˬ-aˬ, Aˬloˬ hawˇ-eu Moˇseˬ-euˬ aˬ da meh. (Aˬloˬ hawˇ-eu aˬ yawꞈ-euˬ zaˬ deuꞈ uˆ deuˬ-aˬ, mˬ maˬ maˬ byaˆ zaˇ ziˇ muiˬ-eu shawˇ-eu keu ka deuˬ-ahˇ haw-eu pyaˆ-eu gʼaˇ duˬ maˬ ehˇ, aˬ yawꞈ-euˬ tsawˇ myahˇ uˬ moˆ Iˇsaˬleˬlaˆ tsawˇ haˬ deuˬ-ahˇ dawˬ ngehˬ gʼeh nehˬ-eu gʼaˇ duˬ maˬ ehˇ, Sahˬpaˬ Miˬyehˇ-ahˇ uˬ duˬ tahˬ gaˇ yaw saw jeˬ doꞈ damˬ-eu gʼaˇ duˬ maˬ ehˇ, tseˇ doˆ taˬ-euˬ tsawˇ haˬ deuˬ pyeuꞈ-eu meh.

¹⁴ Ehˇ kʼawꞈ, Miˬyehˇ-euˬ tsawˇ haˬ pyeuꞈ-eu Moˇseˬ-euˬ aˬ li deuˬ-aˬ, Leˬbiˇ tsawˇ jeuˬ laꞈ kʼoeˇ ahˇ-eu meh.)

¹⁵ Moˇseˬ-aˬ, Geˬlaˬshoˬ hawˇ-eu Eˇliˇzaˬ lehˇ myahˇ-euˬ aˬ li nyiˬ li jawˇ-eu meh.

¹⁶ Geˬlaˬshmˬ-euˬ aˬ li deuˬ laꞈ kʼoeˇ aˬ yuiꞈ geuꞈ-euˬ gʼaˬ-aˬ, Sheˬbeuˬlaˇ meh.

¹⁷ Eˇliˇzaˬ-aˬ, Leˬhaˬbiˇ lehˇ myahˇ-euˬ aˬ li tiˬ li jawˇ-eu tehꞈ meh. Ehˇ kʼawꞈ, Leˬhaˬbiˇ-euˬ zaˬ deuˬ uˆ deuˬ myaˬ dui dui-eu meh.

¹⁸ Kawˇhaˆ-euˬ aˬ li aˬ gʼahˇ gʼaˬ pyeuꞈ-eu Iˇzaˬhaˬ-aˬ, Sheˬloˇmiˇ lehˇ myahˇ-euˬ aˬ li tiˬ li jawˇ-eu meh. Aˬ yawꞈ-aˬ, aˬ yawꞈ-euˬ aˇ jeuˬ aˇ ca kʼoeˇ taˆ aˬ yuiꞈ geuꞈ-euˬ meh.

¹⁹ Kawˇhaˆ-euˬ aˬ li smˇ gʼaˬ tiˬ gʼaˬ pyeuꞈ-eu Heˬbyoˬ-aˬ, Yeˬliˇyaˆ, Aˬmaˬliˇ, Yeˬhaˬzeˬlaˇ, Yeˬkaˬmeˬ lehˇ myahˇ-euˬ aˬ li oeˬ li jawˇ-eu meh.

²⁰ Kawˇhaˆ-euˬ aˬ li oeˬ gʼaˬ tiˬ gʼaˬ pyeuꞈ-eu Awˇzeˬlaˇ-aˬ, Miˇkaˬ hawˇ-eu Iˇshaˬyaˆ lehˇ myahˇ-euˬ aˬ li nyiˬ li jawˇ-eu meh.

²¹ Meˬlaˬliˇ-aˬ, Maˬhaˬliˬ hawˇ-eu Muˇshiˬ lehˇ myahˇ-euˬ aˬ li nyiˬ li jawˇ-eu meh. Maˬhaˬliˬ-aˬ, Eˇlaˬzaˬ hawˇ-eu Giˇshaˆ lehˇ myahˇ-euˬ aˬ li nyiˬ li jawˇ-eu meh.

²² Ehˇ kʼawꞈ, Eˇlaˬzaˬ gʼaˬ-aˬ, ziˇ jiˇ ngeh keuˆ ni aˬ li tiˬ li-iˬ maˬ jawˇ le-ehˇ, aˬ buˇ tehꞈ-ehˇ jawˇ-euˬ meh. Aˬ yawꞈ-euˬ aˬ buˇ deuˬ-aˬ, aˬ yawꞈ maꞈ-euˬ aˬ zawˇ Giˇshaˆ-euˬ aˬ li deuˬ-ahˇ dahˬ dzaˬ-iˇ-euˬ meh.

²³ Meˬlaˬliˇ-euˬ aˬ li aˬ gʼahˇ gʼaˬ pyeuꞈ-eu Muˇshiˬ-aˬ, Maˬhaˬliˬ, Eˬdeuˬ, Yeˬlaˬmoˇ lehˇ myahˇ-euˬ aˬ li smˬ li jawˇ-eu meh.

²⁴ Heu-aˬ, aˇ jeuˬ aˇ ca aˬ yawꞈ ca yawꞈ baw baw-ehˇ, aˬ yawꞈ gʼaˬ yawꞈ-euˬ tsawˇ myahˇ yuˇ taˬ-euˬ Leˬbiˇ-euˬ zaˬ deuˬ uˆ deuˬ meh. Aˇ kʼoꞈ nyiˬ tseˇ laꞈ taˆ paw-euˬ aˬ yawꞈ-euˬ zaˬ deuˬ uˆ deuˬ aˬ yawꞈ gʼaˬ yawꞈ, Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma laꞈ kʼoeˇ ya mˇ-eu gaˇ jaˆ-eu meh.

²⁵ Daˬbiˇ ehˇ-eu, “Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, aˬ yawꞈ-euˬ tsawˇ jeuˬ kʼoeˇ taˆ nui saˇ oꞈ-eu jeˬ bi keuˆ le-awˇ, aˬ yawꞈ-euˬ gʼawˇ mawˇ Yeˬluˇsaˬlehˬ meuˬ laꞈ kʼoeˇ mˬ maˬ maˬ byaˆ zaˇ ziˇ jawˇ tehꞈ-a.

²⁶ Kʼoeˇ miˇ neh, Sahˬpaˬ Miˬyehˇ-euˬ Sehˬ gʼawˆ hawˇ-eu uˬ duˬ tahˬ gaˇ zmˬ-eu keu ka deuˬ-ahˇ, Leˬbiˇ tsawˇ haˬ deuˬ baꞈ poˆ baꞈ paˇ mˇ-eu maˬ paˇ loˬ meh.”

²⁷ Daˬbiˇ neh mehˬ saˬ tsoˆ saˬ saˬ yaꞈ-euˬ dawˬ-ahˇ gʼoe-awˇ, aˇ kʼoꞈ nyiˬ tseˇ kʼaˇ byah laˇ-euˬ Leˬbiˇ tsawˇ haˬ dawˬ tawˆ luꞈ, gaˇ mˇ-eu gʼaˇ duˬ tsawˇ myahˇ ya dawˆ-eu meh.

²⁸ Leˬbiˇ tsawˇ haˬ deuˬ ya mˇ-eu gaˇ-aˬ, Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma laꞈ kʼoeˇ uˬ duˬ tahˬ ngeh, Aˬloˬ-euˬ zaˬ deuˬ uˆ deuˬ pyeuꞈ-eu piˇ ma deuˬ-ahˇ caw jaw-eu gaˇ maˬ ehˇ, Uˬ duˬ tahˬ nymˇ nymˇ ma-euˬ poˆ ka hawˇ-eu aˇ lawˆ deuˬ-ahˇ bo saˆ haw piˇ-eu gaˇ maˬ ehˇ, kʼaˇ muiˬ kʼaˇ shawˇ-eu mˇ myawˬ keu ka deuˬ-ahˇ maˬ ya bi jawꞈ-iˇ ni jeˬ hmˬ laˆ saˆ-eu gaˇ maˬ ehˇ,

²⁹ Miˬyehˇ-ahˇ damˬ-eu kaˬ muˇ jahˇ-eu gaˇ maˬ ehˇ, lawˇ-eu gʼaˇ duˬ loˬ-eu cehˇ meu, dehˬ tseˬ maˬ ahˇ-eu kaˬ muˇ, laˆ jaꞈ taˬ-euˬ kaˬ muˇ aˇ yaˆ hawˇ-eu saˬ loˬ tsiˇ keuˬ taˬ-euˬ cehˇ meu, heu deuˬ-ahˇ laˆ saˆ-eu gaˇ maˬ ehˇ, Uˬ duˬ tahˬ nymˇ nymˇ ma laꞈ kʼoeˇ lawˇ-eu shehˇ-eu jeˬ-ahˇ pehˬ haw saˆ haw-eu gaˇ maˬ ehˇ,

³⁰ yawˬ shawˬ yawˬ miˇ na luꞈ Sahˬpaˬ Miˬyehˇ-ahˇ ja ceuˬ-awˇ, ciˬ huiˬ ci mahˇ-eu gaˇ maˬ ehˇ,

³¹ jawˇ nah ngeh nah maˬ ehˇ, laˆ loˆ lah-eu bawˬ-iˬ gʼeh ngeh hawˇ-eu bawˬ-iˬ nui deuˬ gʼeh ngeh maˬ ehˇ, miˬ dzaˬ-ahˇ dzah puiˆ-awˇ lawˇ-eu jeˬ Sahˬpaˬ Miˬyehˇ-ahˇ kʼaˇ lawˇ nehˬ ngeh, aˬ yawꞈ-ahˇ ja ceuˬ-awˇ ciˬ huiˬ ciˬ mahˇ nehˬ-eu gaˇ-aˬ, aˬ yawꞈ maꞈ ya mˇ-eu gaˇ deuˬ pyeuꞈ-eu meh. Sahˬpaˬ Miˬyehˇ-ahˇ aˇ yamˬ maˬ tseˇ ni aˬ myah luꞈ uˬ duˬ tahˬ-eu gʼaˇ duˬ, Leˬbiˇ tsawˇ haˬ deuˬ-ahˇ gaˇ biꞈ taˬ-euˬ meh.

³² Sahˬpaˬ Miˬyehˇ jawˇ-eu Sehˬ gʼawˆ hawˇ-eu Uˬ duˬ tahˬ nymˇ nymˇ ma-ahˇ bo saˆ haw piˇ-eu gaˇ maˬ ehˇ, Uˬ duˬ tahˬ nymˇ nymˇ ma laꞈ kʼoeˇ uˬ duˬ tahˬ ngeh, Aˬloˬ-euˬ zaˬ deuˬ uˆ deuˬ pyeuꞈ-eu aˬ yawꞈ maꞈ-euˬ aˬ yuiꞈ aˬ nyiˇ piˇ ma kʼoeˇ deuˬ-ahˇ caw ba nehˬ-eu gaˇ maˬ ehˇ, Leˬbiˇ tsawˇ haˬ deuˬ ya mˇ-eu gaˇ pyeuꞈ-eu meh.