1 Laˬsaˬbaˬ 22 - Akha

¹ Kʼoeˇ naˇ, Daˬbiˇ ehˇ-eu, “Heu-aˬ, Miˬyehˇ pyeuꞈ-eu Sahˬpaˬ Miˬyehˇ-euˬ nymˇ jaˆ-eu jawˇ duˬ meh. Iˇsaˬleˬlaˆ tsawˇ jeuˬ miˬ dzaˬ dzah puiˆ-awˇ lawˇ-eu jeˬ ya lawˇ-eu lawˇ duˬ kʼawꞈ, heu gaˇ jaˆ-eu meh.”

Uˬ duˬ tahˬ nymˇ nymˇ ma tsoˆ-eu gʼaˇ duˬ lehˬ hmˬ-euˬ

² Iˇsaˬleˬlaˆ miˇ kʼahˬ laꞈ kʼoeˇ jawˇ-eu aˬ cawˬ tsawˇ jeuˬ dawˬ tawˆ luꞈ bi uiˬ laˇ-eu gʼaˇ duˬ sahˬ paˬ Daˬbiˇ dawˬ biꞈ-awˇ, gaˇ bi mˇ-euˬ meh. Tiˬ paˆ na deuˬ-ahˇ, Uˬ duˬ tahˬ nymˇ nymˇ ma tsoˆ gaˇ geuꞈ-eu kʼaˬ lo bi taꞈ-euˬ meh.

³ Teˇ byaꞈ laˇ gʼoˆ jahˇ gaˇ zmˬ-eu shmˇ sehˬ hawˇ-eu dzahˬ taꞈ deuˬ bi jahˇ-eu gʼaˇ duˬ, shmˇ gʼawˬ mya ni aˬ yawꞈ biꞈ-awˇ, maˬ saˆ jiˇ coeˇ gaˇ keuˆ ni myaˬ-eu guiˬ shuiˇ deuˬ kʼawꞈ, aˬ yawꞈ biꞈ-euˬ meh.

⁴ Myaˬ dui dui-eu siˬ daˬ miˬ shuˬ diˬ tm deuˬ aˬ yawꞈ jawˇ gaˇ yuˇ keuˆ leꞈ-eu gʼaˇ duˬ, Duˇlu hawˇ-eu Siˇdoˬ meuˬ-ahˇ jawˇ-eu tsawˇ haˬ deuˬ kʼawꞈ, aˬ yawꞈ nehˬ-ehˇ jawˇ luꞈ-eu meh.

⁵ Daˬbiˇ heu loꞈ-ehˇ noeˬ-eu meh. “Ngaˬ li Sawˇlaˬmoˬ tsoˆ-eu Uˬ duˬ tahˬ nymˇ nymˇ ma-aˬ, muiˬ dui dui-awˇ, miˇ tsaˬ kʼoeˇ taˆ tsawˇ myahˇ doˆ dui dui tehꞈ-a. Ehˇ kʼawꞈ, aˬ yawꞈ aˇ kʼoꞈ nahˬ-awˇ, maˬ mˇ maˬ shaˇ haw-euˬ miˇ neh, Uˬ duˬ tahˬ nymˇ nymˇ ma kʼoeˇ tsoˆ-eu gʼaˇ duˬ, ngaˇ ya lehˬ hmˬ taˬ nehˬ meh” lehˇ noeˬ-euˬ meh. Kʼoeˇ miˇ neh, Daˬbiˇ-aˬ, aˬ yawꞈ maˬ shiˇ mi naˆ-ehˇ, loˬ-eu mˇ myawˬ keu ka gʼawˬ mya ni lehˬ hmˬ dah taˬ nehˬ yaꞈ-euˬ meh.

⁶ Aˬ yawꞈ-euˬ aˬ li Sawˇlaˬmoˬ-ahˇ bi kuˇ laˬ-iˇ-awˇ, “Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ gʼaˇ duˬ uˬ duˬ tahˬ nymˇ tiˬ nymˇ tsoˆ-awˬ” lehˇ dawˬ biꞈ-euˬ meh.

⁷ Sawˇlaˬmoˬ-ahˇ Daˬbiˇ heu loꞈ-ehˇ ehˇ nehˬ-euˬ meh. “Aˬ li-oˇ, ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ taˬ huiˬ-eu laꞈ kʼoeˇ, uˬ duˬ tahˬ nymˇ tiˬ nymˇ tsoˆ mawꞈ-eu ma.

⁸ Ehˇ kʼawꞈ, ngaˇ-aˬ, tsawˇ haˬ gʼawˬ mya ni sehꞈ dzeuˇ yaꞈ-awˇ, guiˇ gʼawˬ mya poˆ deuˆ-euˬ tsawˇ haˬ meh lehˇ Sahˬpaˬ Miˬyehˇ ehˇ-eu meh. Ngaˇ kʼoeˇ loꞈ-ehˇ shiˬ gʼawˬ mya ni laˆ yoeˇ-euˬ miˇ neh, aˬ yawꞈ ngaˬ-ahˇ uˬ duˬ tahˬ nymˇ maˬ bi tsoˆ laꞈ-aˬ.

⁹ Ehˇ kʼawꞈ, aˬ yawꞈ ngaˬ-ahˇ heu loꞈ-ehˇ saˇ jaˇ dzaˬ-euˬ meh. ‘Sahˬ paˬ geuꞈ-awˇ saˇ lehˆ ni miˇ kʼahˬ-ahˇ ya uˆ lahˇ-eu nawˬ-euˬ aˬ li tiˬ li jawˇ le tehꞈ-a. Aˬ jeˬ miˇ neh ehˇ naˇ, muiˇ-eu deuˬ nehˬ-ehˇ aˬ yawꞈ guiˇ maˬ ya deuˆ-ehˇ, miˇ kʼahˬ saˇ lehˆ ni aˬ yawꞈ ya uˆ lahˇ-eu gʼaˇ duˬ ngaˇ jahˇ ma. Aˬ yawꞈ-ahˇ Sawˇlaˬmoˬ lehˇ ya myahˇ tehꞈ-a. Aˬ jeˬ miˇ neh ehˇ naˇ, aˬ yawꞈ uˆ lahˇ-eu aˇ yamˬ laꞈ kʼoeˇ, Iˇsaˬleˬlaˆ miˇ kʼahˬ laꞈ kʼoeˇ guˆ-eu gaˆ-eu jeˬ maˬ jaˆ-ehˇ, nui saˇ oꞈ-awˇ, coꞈ ngehˇ ni jaˆ ni ngaˇ jahˇ ma.

¹⁰ Ngaˬ-euˬ gʼaˇ duˬ uˬ duˬ tahˬ nymˇ tiˬ nymˇ aˬ yawꞈ tsoˆ tehꞈ-a. Aˬ yawꞈ-aˬ, ngaˬ-euˬ aˬ li-ahˇ duˇ-awˇ, ngaˇ-aˬ, aˬ yawꞈ-euˬ aˬ da loꞈ-ehˇ duˇ tehꞈ-a. Aˬ yawꞈ-euˬ dzoeˬ dzaˬ Iˇsaˬleˬlaˆ miˇ kʼahˬ kʼoeˇ taˆ aˬ myah luꞈ ziꞈ tehꞈ-a’ lehˇ ehˇ-eu meh.”

¹¹ Daˬbiˇ paˇ ehˇ-eu, “Aˬ li-oˇ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ nehˬ-ehˇ jawˇ-awˇ, aˬ yawꞈ gʼaˇ duˬ uˬ duˬ tahˬ nymˇ tiˬ nymˇ tsoˆ doˆ nya ni nawˬ-ahˇ caw ba ma lehˇ, aˬ yawꞈ neh saˇ jaˇ dzaˬ taˬ-euˬ dawˬ-ahˇ ziꞈ luꞈ-uˇ.

¹² Aˬ yawꞈ-euˬ zahˇ dawˬ kʼoꞈ dawˬ-ahˇ tsaˬ ni Iˇsaˬleˬlaˆ miˇ kʼahˬ-ahˇ nawˇ uˆ lahˇ nya-eu gʼaˇ duˬ, nawˬ-euˬ Miˬyehˇ pyeuꞈ-eu Sahˬpaˬ Miˬyehˇ nawˬ-ahˇ, noeˬ siˬ noeˬ mawˇ nya-eu tsawˇ gahˇ hawˇ-eu, zaˬ siˬ tsawˇ gahˇ biꞈ luꞈ-uˇ.

¹³ Iˇsaˬleˬlaˆ tsawˇ jeuˬ gʼaˇ duˬ, Sahˬpaˬ Miˬyehˇ neh Moˇseˬ-ahˇ biꞈ taˬ-euˬ zahˇ dawˬ kʼoꞈ dawˬ deuˬ-ahˇ nawˇ naˇ haˬ geuꞈ naˇ, nawˇ huiˬ laˇ mahˇ laˇ tehꞈ-a. Nui ma ziꞈ dah ni taˬ-awˇ, yawˬ haˇ yawˬ ha nui jah ahˇ-eu laꞈ kʼoeˇ, tiˬ jeˬ-ahˇ-iˬ maˬ guˆ ni dehꞈ-awˬ.

¹⁴ Uˬ duˬ tahˬ nymˇ nymˇ ma tsoˆ-eu gʼaˇ duˬ, shuiˇ nyiˬ lam oeˬ seh jawꞈ-i hawˇ-eu, pyuˇ nyiˬ tseˇ oeˬ lam jawꞈ-i ngaˇ poˆ uiˬ taˬ-euˬ ma. Kʼoeˇ uˬ taꞈ, guiˬ shuiˇ hawˇ-eu shmˇ maˬ ehˇ jiˇ coeˇ ni jaˆ-eu ma. Daˇ kawˬ hawˇ-eu kʼaˬ lo deuˬ kʼawꞈ, ngaˇ lehˬ hmˬ taˬ-euˬ ma. Ehˇ kʼawꞈ, nawˇ paˇ ya poˆ lahˬ-a siˬ.

^15-16 Nawˇ gaˇ mˇ-eu tsawˇ haˬ gʼawˬ mya ni jawˇ meh. Kʼaˬ lo tsaˬ byaˆ taꞈ-eu tsawˇ haˬ deuˬ maˬ ehˇ, tsaˬ byaˆ gawˬ-eu tsawˇ haˬ deuˬ maˬ ehˇ, laꞈ myawˬ laꞈ sawˆ mˇ-eu deuˬ maˬ ehˇ, shuiˇ, pyuˇ, guiˬ shuiˇ hawˇ-eu shmˇ tehˆ nya lawˬ nya-eu tsawˇ haˬ deuˬ maˬ ehˇ, gʼawˬ mya ni jawˇ meh.”

¹⁷ Iˇsaˬleˬlaˆ tsawˇ haˬ aˬ yuiꞈ aˬ tsu dawˬ tawˆ luꞈ, Sawˇlaˬmoˬ-ahˇ bi caw ba le-eu gʼaˇ duˬ Daˬbiˇ dawˬ biꞈ-euˬ meh.

¹⁸ Aˬ yawꞈ ehˇ-eu, “Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ nehˬ-ehˇ jawˇ-awˇ, naw maꞈ-euˬ miˇ kʼahˬ oeˬ paw oeˬ coeˇ luꞈ, kʼahˬ lahˇ duˬ maˬ jaˆ ni saˇ lehˆ ni aˬ yawꞈ bi jaˆ-euˬ meh. Miˇ kʼahˬ heu kʼahˬ-ahˇ jawˇ-euˬ tsawˇ jeuˬ dawˬ tawˆ luꞈ kʼoeˇ taˆ, aˬ yawꞈ neh ngaˬ-ahˇ bi gʼaˬ leˇ nehˬ laꞈ-awˇ, Sahˬpaˬ Miˬyehˇ-euˬ uˬ moˆ hawˇ-eu naw maꞈ uˆ lahˇ-eu uˬ moˆ aˬ yawꞈ maꞈ jawˇ luꞈ meh.

¹⁹ Naw maꞈ-euˬ nui ma saꞈ laˇ dawˬ tawˆ luꞈ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ gaˇ mˇ-awˬ. Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ hawˇ-eu, aˬ yawꞈ-ahˇ uˬ duˬ tahˬ gaˇ geuꞈ-eu muiˬ-eu shawˇ-eu mˇ myawˬ keu ka dawˬ tawˆ luꞈ bi jaˆ-eu gʼaˇ duˬ, Uˬ duˬ tahˬ nymˇ nymˇ ma tsoˆ-eu dawꞈ leˇ-awˬ.”