1 Laˬsaˬbaˬ 20 - Akha

Laˬbah meuˬ-ahˇ Daˬbiˇ guiˇ deuˆ gʼaˬ-euˬ

¹ Jawˇ la doˆ le-awˇ, sahˬ paˬ deuˬ guiˇ deuˆ-eu aˇ yamˬ paˇ keuˆ laˇ ngeh, Yoˇbaˬ gʼaˬ guiˇ maꞈ sheuˬ-awˇ, Aˬmoˬ miˇ kʼahˬ-ahˇ guiˇ deuˆ-iˇ-euˬ meh. Ehˇ kʼawꞈ, sahˬ paˬ Daˬbiˇ gʼaˬ-aˬ, Yeˬluˇsaˬlehˬ meuˬ-ahˇ jawˇ yaꞈ-euˬ meh. Aˬ yawꞈ maꞈ Laˬbah meuˬ-ahˇ loꞈ jawˬ-awˇ deuˆ-awˇ, laˆ cawˆ nehˬ-euˬ meh.

² Aˬmoˬ tsawˇ jeuˬ-euˬ Miˇlaˬkoˬ miˬ yehˇ tahˬ pahˬ aˬ ma mawˇ kawˇ-aˬ, nyiˬ tseˇ jawꞈ-i dzehˬ-eu shuiˇ uˬ kʼoˆ tiˬ siˬ kʼoˆ luꞈ-eu meh. Shuiˇ uˬ kʼoˆ kʼoeˇ siˬ-ahˇ kʼaˬ lo sehˇ tiˬ siˬ ahˇ-eu meh. Kʼaˬ lo sehˇ kʼoeˇ siˬ Daˬbiˇ yuˇ-awˇ, aˬ yawꞈ-euˬ uˬ kʼoˆ-ahˇ dawˆ tsoꞈ-euˬ meh.

³ Meuˬ kʼoeˇ meuˬ-ahˇ jaˆ-eu pyuˇ shuiˇ myawˬ gahˬ gʼawˬ mya ni aˬ yawꞈ yuˇ geuꞈ-euˬ meh. Meuˬ kʼoeˇ meuˬ-ahˇ jawˇ-eu tsawˇ haˬ deuˬ-ahˇ kʼawꞈ aˬ yawꞈ nyehꞈ-awˇ, yehˬ ma, tsehˬ ma, deuˆ haˬ heu deuˬ bi baꞈ-awˇ, gaˇ bi mˇ-euˬ meh. Aˬmoˬ tsawˇ jeuˬ-euˬ meuˬ nui deuˬ-ahˇ jawˇ-eu tsawˇ haˬ deuˬ-ahˇ kʼawꞈ, aˬ yawꞈ kʼoeˇ loꞈ-ehˇ gaˇ bi mˇ-euˬ meh. Kʼoeˇ naˇ, aˬ yawꞈ hawˇ-eu aˬ yawꞈ-euˬ tsawˇ haˬ deuˬ Yeˬluˇsaˬlehˬ meuˬ-ahˇ gʼoꞈ leˇ-euˬ meh.

Huiˬ dui goˇ dui dui-eu Piˇliˇtiˆ tsawˇ haˬ deuˬ-ahˇ guiˇ deuˆ-euˬ

⁴ Aˇ nah, Geˬzeuˬ meuˬ-ahˇ Piˇliˇtiˆ tsawˇ haˬ deuˬ nehˬ-ehˇ guiˇ tiˬ poˆ paˇ deuˆ-euˬ meh. Kʼoeˇ ngeh poˆ-aˬ, Huˇshahˬ meuˬ-ahˇ jawˇ-eu Siˇbeˬkehˇ neh, Siˇpaiˇ lehˇ kuˇ-euˬ huiˬ dui goˇ dui dui-eu Piˇliˇtiˆ tsawˇ haˬ tiˬ gʼaˬ deuˆ sehꞈ-awˇ, Piˇliˇtiˆ tsawˇ haˬ deuˬ smˬ-iˇ-euˬ poˆ meh.

⁵ Piˇliˇtiˆ tsawˇ haˬ deuˬ nehˬ-ehˇ guiˇ tiˬ poˆ paˇ deuˆ-awˇ, Yaˬiˇlaˆ-euˬ aˬ li Eˇlaˬhaˬnaˬ neh, gahˬ yoeˬ saˬ nmˇ bahˬ yoˆ hui ni ahˇ-eu gahˬ baꞈ luꞈ-eu Gawˇliˇyaˆ-euˬ aˬ nyiˇ Lahˬmiˇ-ahˇ sehꞈ-euˬ meh.

⁶ Piˇliˇtiˆ tsawˇ haˬ deuˬ nehˬ-ehˇ Gaˬdaˇ meuˬ-ahˇ guiˇ tiˬ poˆ paˇ deuˆ-awˇ, kʼoeˇ ngeh poˆ-aˬ, aˬ laꞈ nyiˬ laꞈ luꞈ laꞈ noeˇ koꞈ noeˇ tsoꞈ-awˇ, aˬ kuiˇ nyiˬ kuiˇ luꞈ kuiˇ noeˇ koꞈ noeˇ tsoꞈ-eu huiˬ dui goˇ dui dui-eu tsawˇ haˬ tiˬ gʼaˬ ahˇ-eu meh. Aˬ yawꞈ-aˬ, aˇ hu dehꞈ-euˬ tsawˇ haˬ tsawˇ ma deuˬ-euˬ aˇ jeuˬ meh.

⁷ Iˇsaˬleˬlaˆ tsawˇ haˬ deuˬ-ahˇ aˬ yawꞈ yehˬ bawˬ sehˇ lu-ehˇ ehˇ-awˇ lmˬ lmˬ-ehˇ jawˇ ngeh, Daˬbiˇ-euˬ aˇ doˆ Shaˬmahˇ-euˬ aˬ li Yawˇnaˆshaˬ neh bi sehꞈ-euˬ meh.

⁸ Daˬbiˇ hawˇ-eu aˬ yawꞈ-euˬ tsawˇ haˬ deuˬ neh bi sehꞈ-euˬ tsawˇ haˬ kʼoeˇ smˇ gʼaˬ-aˬ, aˇ hu Gaˬdaˇ meuˬ-ahˇ jawˇ-euˬ tsawˇ haˬ tsawˇ ma deuˬ-euˬ zaˬ deuˬ uˆ deuˬ meh.