1 Laˬsaˬbaˬ 18 - Akha

Daˬbiˇ guiˇ deuˆ gʼaˬ-euˬ

¹ Aˇ yamˬ ui cuiˆ myahˇ laˇ ngeh jawˇ, Piˇliˇtiˆ tsawˇ haˬ deuˬ-ahˇ Daˬbiˇ guiˇ paˇ deuˆ-awˇ, deuˆ gʼaˬ-euˬ meh. Gaˬdaˇ meuˬ hawˇ-eu, meuˬ kʼoeˇ meuˬ-euˬ jawˬ jawˬ-ehˇ jaˆ-eu pu deuˬ-ahˇ, aˬ yawꞈ maꞈ-euˬ aˬ laꞈ laꞈ kʼoeˇ neh Daˬbiˇ paˇ deuˆ za kʼoꞈ geuꞈ-euˬ meh.

² Mawˇbaˆ tsawˇ haˬ deuˬ-ahˇ kʼawꞈ aˬ yawꞈ guiˇ deuˆ gʼaˬ-awˇ, aˬ yawꞈ maꞈ aˬ yawꞈ uˆ lahˇ-eu uˬ moˆ jawˇ-awˇ, aˬ yawꞈ-ahˇ kawˬ doˆ nehˬ-euˬ meh.

³ Kʼoeˇ naˇ, Suˇliˆ miˇ kʼahˬ laꞈ kʼoeˇ ahˇ-eu Zoˇbaˬ miˇ kʼahˬ-ahˇ uˆ lahˇ-eu sahˬ paˬ Haˬdaˬdeˬzaˬ-ahˇ, Haˬmaˆ miˇ kʼahˬ dawˬ peh Daˬbiˇ guiˇ deuˆ-euˬ meh. Aˬ jeˬ miˇ neh ehˇ naˇ, Uˇpaˬlaˇ lawˇ baˬ laꞈ taˆ paw dzaˬ-ahˇ jaˆ-eu miˇ kʼahˬ-ahˇ uˆ lahˇ-eu lehˇ, Haˬdaˬdeˬzaˬ leh jeh luꞈ-eu meh.

⁴ Aˬ yawꞈ-euˬ mahˬ laˆ lawˬ tiˬ heˇ laˇ, mahˬ dziˬ-eu yehˇ shiꞈ heˇ gʼaˬ hawˇ-eu, kuiˇ zoˬ cah-eu yehˇ nyiˬ muiˇ gʼaˬ-ahˇ Daˬbiˇ nyehꞈ mi-euˬ meh. Mahˬ laˆ lawˬ tiˬ yaˇ laˇ gʼeu loꞈ-eu mahˬ deuˬ tehꞈ-ehˇ aˬ yawꞈ yuˇ geuꞈ-awˇ, dzeˇ-eu deuˬ-ahˇ kuiˇ guˬ yuˇ-euˬ meh.

⁵ Sahˬ paˬ Haˬdaˬdeˬzaˬ-ahˇ bi caw ba le-eu lehˇ, Daˬmaˬsehˇ meuˬ-ahˇ jawˇ-eu Suˇliˆ tsawˇ haˬ deuˬ neh pyehˬ gʼeh leꞈ-euˬ guiˇ maꞈ deuˬ-ahˇ Daˬbiˇ deuˆ ceh ceh-awˇ, nyiˬ muiˇ nyiˬ heˇ gʼaˬ deuˆ sehꞈ nehˬ-euˬ meh.

⁶ Aˬ yawꞈ maꞈ-euˬ miˇ kʼahˬ laꞈ kʼoeˇ Daˬbiˇ taˆ tsoˆ-awˇ, aˬ yawꞈ-euˬ yehˇ bi jawˇ-euˬ meh. Daˬbiˇ uˆ lahˇ-eu uˬ moˆ aˬ yawꞈ maꞈ ya jawˇ-awˇ, Daˬbiˇ-ahˇ kawˬ ya doˆ-eu meh. Sahˬpaˬ Miˬyehˇ neh Daˬbiˇ-ahˇ yawˬ gaˇ na luꞈ guiˇ bi deuˆ gʼaˬ-euˬ meh.

⁷ Haˬdaˬdeˬzaˬ-euˬ gaˇ mˇ-eu yaw huiˬ yaw mahˇ deuˬ zmˬ-eu, shuiˇ neh jahˇ taˬ-euˬ dehˬ daˬ duˬ Daˬbiˇ deuˆ za-awˇ, Yeˬluˇsaˬlehˬ meuˬ-ahˇ yuˇ kʼoꞈ gʼeh-euˬ meh.

⁸ Kʼoeˇ uˬ taꞈ, Haˬdaˬdeˬzaˬ uˆ lahˇ-eu meuˬ deuˬ pyeuꞈ-eu Tiˇbaˬhaˇ meuˬ hawˇ-eu Kuˬniˬ meuˬ-ahˇ jaˆ-eu guiˬ shuiˇ gʼawˬ mya ni, aˬ yawꞈ yuˇ geuꞈ gʼeh-euˬ meh. Aˇ nah, guiˬ shuiˇ kʼoeˇ deuˬ-ahˇ Sawˇlaˬmoˬ yuˇ-awˇ, guiˬ shuiˇ lah jahˇ gaˇ maˬ ehˇ, guiˬ shuiˇ kʼawˇ zeuˇ jahˇ gaˇ maˬ ehˇ, Uˬ duˬ tahˬ nymˇ nymˇ ma laꞈ kʼoeˇ geuꞈ-eu guiˬ shuiˇ keu ka deuˬ jahˇ gaˇ maˬ ehˇ, zmˬ-euˬ meh.

⁹ Haˬdaˬdeˬzaˬ-euˬ guiˇ maꞈ dawˬ tawˆ luꞈ-ahˇ Daˬbiˇ deuˆ gʼaˬ-euˬ gaˇ kawˆ Haˬmaˆ meuˬ-ahˇ jawˇ-eu sahˬ paˬ Tawˇiˬ ya gaˬ-euˬ meh.

¹⁰ Tawˇiˬ nehˬ-ehˇ tiˬ kʼehˬ maˬ taˬ ni guiˇ deuˆ luꞈ-eu Haˬdaˬdeˬzaˬ-ahˇ sahˬ paˬ Daˬbiˇ neh deuˆ gʼaˬ-euˬ miˇ neh, Tawˇiˬ -euˬ aˬ li Yoˇlamˬ-ahˇ sahˬ paˬ Daˬbiˇ jawˇ gaˇ pyehˬ gʼeh-awˇ, Haˬdaˬdeˬzaˬ-ahˇ deuˆ gʼaˬ-euˬ baˬ da neh, laˬ kʼaˬ cehˇ-awˇ guiˬ lahˬ huiˬ-eu dawˬ bi tsaꞈ gaˬ leˇ-euˬ meh. Shuiˇ, pyuˇ, guiˬ shuiˇ, heu deuˬ neh jahˇ taˬ-euˬ laꞈ sawˬ deuˬ, Daˬbiˇ jawˇ gaˇ Yoˇlamˬ yuˇ gʼeh nehˬ-euˬ meh.

¹¹ Laꞈ sawˬ kʼoeˇ deuˬ-ahˇ sahˬ paˬ Daˬbiˇ yuˇ-awˇ, aˬ yawꞈ neh deuˆ gʼaˬ-euˬ Eˬdoˬ miˇ kʼahˬ, Mawˇbaˆ miˇ kʼahˬ, Aˬmoˬ miˇ kʼahˬ, Piˇliˇtiˆ miˇ kʼahˬ, Aˬmaˬlehˇ miˇ kʼahˬ, heu deuˬ-ahˇ za-euˬ pyuˇ hawˇ-eu shuiˇ deuˬ nehˬ-ehˇ tiˬ kawˆ loꞈ-ehˇ, uˬ duˬ tahˬ gaˇ zmˬ-eu gʼaˇ duˬ damˬ-euˬ meh.

¹² Zeˬluˇyaˆ-euˬ aˬ li Aˬbiˇshaiˇ-aˬ, Saˬdeuꞈ deh kʼawꞈ-ahˇ Eˬdoˬ tsawˇ haˬ deuˬ-ahˇ guiˇ deuˆ gʼaˬ-awˇ, tiˬ muiˇ yehꞈ heˇ gʼaˬ deuˆ sehꞈ nehˬ-euˬ meh.

¹³ Eˬdoˬ miˇ kʼahˬ laꞈ kʼoeˇ aˬ yawꞈ taˆ tsoˆ byah-awˇ, kʼoeˇ gaˇ jawˇ-eu tsawˇ haˬ deuˬ sahˬ paˬ Daˬbiˇ uˆ lahˇ-eu uˬ moˆ jawˇ-euˬ meh. Sahˬpaˬ Miˬyehˇ neh Daˬbiˇ-ahˇ yawˬ gaˇ na luꞈ guiˇ bi deuˆ gʼaˬ-euˬ meh.

¹⁴ Iˇsaˬlaˬleˇ miˇ kʼahˬ kʼahˬ lah ni Daˬbiˇ uˆ lahˇ-awˇ, aˬ yawꞈ-euˬ tsawˇ haˬ deuˬ kʼoeˇ taˆ aˬ myah luꞈ yaw tsaˬ yaw dawˇ dawˇ-ehˇ haw-awˇ pyaˆ awˇ uˆ lahˇ-euˬ meh.

¹⁵ Aˬbiˇshaiˇ-euˬ aˬ nyiˇ Yoˇbaˬ-aˬ, Daˬbiˇ-euˬ guiˇ maꞈ kʼoeˇ taˆ uˆ lahˇ-eu gʼaˬ geuꞈ-euˬ meh. Aˬhiˇluˆ-euˬ aˬ li Yeˬhawˇshaˬpaˇ gʼaˬ-aˬ, jaˇ laˇ yuˇ-eu paw aˬ yuiꞈ geuꞈ-euˬ meh.

¹⁶ Aˬhiˇtuˆ-euˬ aˬ li Zaˬdoˆ hawˇ-eu Aˬbyaˬdaˬ-euˬ aˬ li Aˬhiˇmaˬlehˇ aˬ nyaꞈ-aˬ, piˇ ma geuꞈ-euˬ meh. Seˬlehˇyaˬ-aˬ, saˇ naˇ gaˇ tuˆ tehˬ-eu gʼaˬ geuꞈ-euˬ meh.

¹⁷ Yeˬhawˇyaˬdaˬ-euˬ aˬ li Baˬnaˇyaˬ gʼaˬ-aˬ, Daˬbiˇ-ahˇ loꞈ piˇ-eu guiˇ maꞈ kʼoeˇ taˆ aˬ yuiꞈ geuꞈ-awˇ, sahˬ paˬ Daˬbiˇ-euˬ aˬ li deuˬ-aˬ, aˬ yawꞈ-euˬ gaˇ mˇ-eu yaw huiˬ yaw mahˇ deuˬ geuꞈ-euˬ meh.