1 Laˬsaˬbaˬ 17 - Akha

Daˬbiˇ-ahˇ Naˬdaˬ dawˬ tsaꞈ tsaꞈ nehˬ le-euˬ

¹ Nymˬ-mˇ poˆ jawˇ, sahˬ paˬ Daˬbiˇ-aˬ, aˬ yawꞈ-euˬ sahˬ paˬ hawˇ nymˇ laꞈ kʼoeˇ jawˇ luꞈ-eu meh. Tiˬ nah keuˆ laˇ ngeh, Miˬyehˇ gʼaˇ duˬ ngehˬ dah-eu Naˬdaˬ-ahˇ bi kuˇ laˬ-iˇ-awˇ, “Ngaˇ-aˬ, shuˬ liˇ daˇ kawˬ neh tsoˆ taˬ-euˬ muiˬ dui dui-eu nymˇ laꞈ kʼoeˇ jawˇ luꞈ ma. Ehˇ kʼawꞈ, Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ-aˬ, sehˬ gʼawˆ laꞈ kʼoeˇ jaˆ luꞈ-a siˬ” lehˇ ehˇ nehˬ-euˬ meh.

² “Nawˇ kʼaˇ noeˬ-euˬ loꞈ-ehˇ mˇ-awˬ. Aˬ jeˬ miˇ neh ehˇ naˇ, Sahˬpaˬ Miˬyehˇ nawˬ nehˬ-ehˇ jawˇ luꞈ meh” lehˇ Naˬdaˬ ehˇ kʼoꞈ nehˬ-euˬ meh.

³ Ehˇ kʼawꞈ, kʼoeˇ ngeh miˇ Naˬdaˬ-ahˇ Miˬyehˇ heu loꞈ-ehˇ ehˇ nehˬ-euˬ meh.

⁴ “Ngaˬ-euˬ zaˬ kʼaˆ Daˬbiˇ jawˇ gaˇ iˇ-awˇ, ngaˇ heu loꞈ-ehˇ ehˇ-eu meh lehˇ ehˇ nehˬ-iˇ-awˬ. ‘Ngaˇ jawˇ-eu gʼaˇ duˬ uˬ duˬ tahˬ nymˇ ya tsoˆ-eu gʼaˬ, nawˇ maˬ ngeuˇ-a.

⁵ Iˇsaˬleˬlaˆ tsawˇ jeuˬ-ahˇ, Iˇjiˇtuˆ miˇ kʼahˬ laꞈ kʼoeˇ neh ngaˇ ka kʼoꞈ doˆ nehˬ laꞈ ngeh nah neh iˬ nah keuˆ ni, uˬ duˬ tahˬ nymˇ laꞈ kʼoeˇ ngaˇ maˬ ya jawˇ haw-aˬ siˬ. Sehˬ gʼawˆ laꞈ kʼoeˇ tehꞈ-ehˇ jawˇ jawˇ-ehˇ cah luꞈ-eu ma.

⁶ Iˇsaˬleˬlaˆ tsawˇ jeuˬ nehˬ-ehˇ ngaˇ cah cah-ehˇ jawˇ-euˬ aˇ yamˬ kʼoeˇ myah ni gʼeh-eu laꞈ kʼoeˇ, aˬ jeˬ miˇ neh ngaˬ-euˬ gʼaˇ duˬ siˬ daˬ miˬ shuˬ daˇ kawˬ neh uˬ duˬ tahˬ nymˇ maˬ tsoˆ nehˬ laꞈ teˬ lehˇ, Iˇsaˬleˬlaˆ aˬ yuiꞈ aˬ tsu tiˬ gʼaˬ-ahˇ-iˬ ngaˇ maˬ ehˇ nehˬ haw-aˬ siˬ’ lehˇ ehˇ-eu meh lehˇ ehˇ nehˬ-awˬ.

⁷ “Kʼoeˇ miˇ neh, Baoˬ huiˬ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu meh lehˇ, ngaˬ-euˬ zaˬ kʼaˆ Daˬbiˇ-ahˇ ehˇ nehˬ-awˬ. ‘Deh ga-ahˇ yawˇ bo luꞈ-eu gʼaˬ pyeuꞈ-eu nawˬ-ahˇ ngaˇ kuˇ-awˇ, ngaˬ-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ jeuˬ kʼoeˇ taˆ bi uˆ lahˇ-euˬ ma.

⁸ Nawˇ kʼaˇ iˇ kʼaˇ laˇ gaˇ nawˬ nehˬ-ehˇ ngaˇ jawˇ-awˇ, nawˇ iˇ-eu mehˬ hu, nawˬ-ahˇ muiˇ-eu tsawˇ haˬ dawˬ tawˆ luꞈ-ahˇ ngaˇ deuˆ gʼaˬ nehˬ-euˬ ma. Miˇ tsaˬ kʼoeˇ taˆ huiˬ dui dui-eu sahˬ paˬ sahˬ ma deuˬ loꞈ-ehˇ, nawˬ-ahˇ ngaˇ tsawˇ myahˇ bi doˆ ma.

^9-10 Ngaˬ-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ haˬ deuˬ aˬ cawˬ kʼehˬ-eu kʼaˆ-eu uˬ moˆ maˬ paˇ ya jawˇ ni, aˬ yawꞈ maꞈ gʼaˇ duˬ ngaˬ neh jawˇ duˬ tiˬ tsahˇ tseˇ doˆ nehˬ-awˇ bi jawˇ-euˬ ma. Miˇ kʼahˬ heu kʼahˬ-ahˇ aˬ yawꞈ maꞈ jawˇ keuˆ laˇ-euˬ tiˬ nah neh, haiˬ-eu tsawˇ haˬ deuˬ neh kʼehˬ nehˬ kʼaˆ nehˬ-euˬ jeˬ-ahˇ aˬ yawꞈ maꞈ ya daˬ-euˬ meh. Ehˇ kʼawꞈ, aˬ kaˇ naˇ, kʼoeˇ loꞈ-ehˇ maˬ paˇ bi gʼeh ma. Nawˬ-ahˇ muiˇ-eu deuˬ nawˬ-ahˇ maˬ ya laˆ coeˬ laˆ ciˆ ni maˬ ehˇ, nawˬ-euˬ zaˬ nawˬ-euˬ uˆ deuˬ jeuˬ le o le ni maˬ ehˇ, nawˬ nehˬ-ehˇ ngaˇ saˇ jaˇ dzaˬ-eu ma.

¹¹ Nawˇ ziˇ dehꞈ jiˇ-awˇ, nawˬ-euˬ aˬ poeˬ aˬ bawˇ deuˬ nehˬ-ehˇ gʼaˬ naˬ ya naˬ ngeh, nawˬ-euˬ aˬ li tiˬ li-ahˇ ngaˇ sahˬ paˬ ka nehˬ-awˇ, aˬ yawꞈ-euˬ miˇ kʼahˬ baoˬ bi huiˬ laˇ ma.

¹² Aˬ yawꞈ-aˬ, ngaˬ-euˬ gʼaˇ duˬ uˬ duˬ tahˬ nymˇ ya tsoˆ-eu gʼaˬ pyeuꞈ laˇ-awˇ, aˬ yawꞈ-euˬ dzoeˬ dzaˬ ziꞈ ni ngaˇ jahˇ nehˬ ma.

¹³ Ngaˇ-aˬ, aˬ yawꞈ-euˬ aˬ da loꞈ-ehˇ pyeuꞈ-awˇ, aˬ yawꞈ-aˬ, ngaˬ-euˬ aˬ li-ahˇ duˇ tehꞈ-a. Nawˇ sahˬ paˬ bi pyeuꞈ laˇ-eu gʼaˇ duˬ, ngaˬ neh yuˇ dzeh-euˬ gʼaˬ pyeuꞈ-eu Sawˇluˆ-ahˇ caw ba luꞈ-eu ngaˬ-euˬ aˬ laꞈ ngaˇ cawˬ kʼoꞈ-euˬ loꞈ-ehˇ, aˬ yawꞈ-ahˇ caw ba-eu ngaˬ-euˬ aˬ laꞈ ngaˇ maˬ cawˬ kʼoꞈ.

¹⁴ Ngaˬ-euˬ tsawˇ jeuˬ hawˇ-eu ngaˬ-euˬ miˇ kʼahˬ kʼoeˇ taˆ, aˬ yawꞈ-ahˇ ngaˇ aˬ myah luꞈ bi uˆ lahˇ ma. Aˬ yawꞈ-euˬ dzoeˬ dzaˬ mˬ maˬ maˬ byaˆ zaˇ ziˇ ziꞈ tehꞈ-a’ lehˇ ngaˇ ehˇ-eu meh lehˇ ehˇ nehˬ-awˬ.”

¹⁵ Miˬyehˇ neh kʼaˇ pah mehˬ-euˬ jeˬ, Daˬbiˇ-ahˇ Naˬdaˬ ehˇ nehˬ-euˬ meh.

Daˬbiˇ guiˬ lahˬ shaˇ-euˬ

¹⁶ Kʼoeˇ naˇ, Sahˬpaˬ Miˬyehˇ jawˇ-eu Sehˬ gʼawˆ-ahˇ Daˬbiˇ uˇ leˇ-awˇ nuiˇ-awˇ, heu loꞈ-ehˇ guiˬ lahˬ shaˇ-euˬ meh. “Miˬyehˇ pyeuꞈ-eu Sahˬpaˬ Miˬyehˇ-oˇ, ngaˇ maˬ ehˇ, ngaˬ-euˬ nymˇ jiˇ maˬ ehˇ, nawˬ neh mˇ nehˬ laꞈ-euˬ guiˬ lahˬ-ahˇ maˬ geuˇ nya.

¹⁷ Ehˇ kʼawꞈ, kʼoeˇ naˆ ni tehꞈ-ehˇ nawˇ maˬ juˬ-ehˇ, kʼoeˇ naˆ maˬ tseˇ gʼeh-eu jeˬ ngaˬ-euˬ kʼoeˇ taˆ nawˇ paˇ mˇ nehˬ laꞈ-eu lehˇ gʼeh-eu ngaˇ. Miˬyehˇ pyeuꞈ-eu Sahˬpaˬ Miˬyehˇ-oˇ, mehˬ hu paw dehꞈ daˆ leꞈ-eu ngaˬ-euˬ zaˬ ngaˬ-euˬ uˆ deuˬ gʼaˇ duˬ nawˇ ngaˬ-ahˇ saˇ jaˇ dzaˬ-awˇ, huiˬ dui mahˇ dui dui-eu tsawˇ haˬ tiˬ gʼaˬ loꞈ-ehˇ nawˇ ngaˬ-ahˇ taˬ huiˬ taˬ mahˇ nehˬ laꞈ-euˬ meh.

¹⁸ Heu naˆ maˬ tseˇ nawˬ-ahˇ ngaˇ tiˬ jeˬ-iˬ maˬ paˇ ehˇ nya miˇ-a. Ngaˬ-euˬ gaˇ kawˆ nawˇ yaw muiˬ-ehˇ siˬ duˬ-eu kʼawꞈ, nawˬ-euˬ zaˬ kʼaˆ pyeuꞈ-eu ngaˬ-ahˇ nawˇ taˬ huiˬ nehˬ laꞈ-euˬ meh.

¹⁹ Ngaˬ-ahˇ heu naˆ ni mˇ nehˬ laꞈ-awˇ, aˬ kaˇ ngaˬ-euˬ nymˇ jiˇ huiˬ dui mahˇ dui dui laˇ-eu gaˇ kawˆ nawˇ ngaˬ-ahˇ bi siˬ bi mawˇ laꞈ-euˬ heu-aˬ, nawˬ-euˬ nui kʼahˇ hawˇ-eu nawˬ-euˬ nui gaˬ meh.

²⁰ Sahˬpaˬ Miˬyehˇ-oˇ, nawˬ-ahˇ duˇ-eu tiˬ gʼaˬ-iˬ maˬ jawˇ-a. Nawˇ tiˬ gʼaˬ tehꞈ-ehˇ Miˬyehˇ pyeuꞈ-eu meh lehˇ, nga maꞈ aˬ myah luꞈ siˬ luꞈ ma.

²¹ Aˬ cawˬ tsawˇ jeuˬ-euˬ zaˬ kʼaˆ ya geuꞈ luꞈ ngeh, nawˬ-euˬ tsawˇ jeuˬ bi pyeuꞈ laˇ-eu lehˇ, nawˬ neh ka kʼoꞈ nehˬ-euˬ Iˇsaˬleˬlaˆ tsawˇ jeuˬ-ahˇ duˇ-eu tsawˇ jeuˬ, miˇ tsaˬ kʼoeˇ taˆ maˬ jawˇ-a. Nawˬ neh aˬ yawꞈ maꞈ gʼaˇ duˬ mˇ-euˬ huiˬ dui dui-eu gaˇ deuˬ hawˇ-eu, zahˬ leˇ dui dui paˬ-ehˇ gʼeh-eu gaˇ deuˬ baˬ da neh, miˇ tsaˬ kʼoeˇ taˆ nawˇ tsawˇ myahˇ doˆ luꞈ meh. Nawˬ-euˬ tsawˇ jeuˬ-ahˇ Iˇjiˇtuˆ miˇ kʼahˬ laꞈ kʼoeˇ neh nawˇ ka kʼoꞈ doˆ nehˬ laꞈ-awˇ, nawˬ-euˬ tsawˇ jeuˬ le luꞈ-eu gaˇ ma tiˬ kahˇ mehˬ hu, aˬ cawˬ tsawˇ jeuˬ deuˬ-ahˇ nawˇ teh dzeh nehˬ-euˬ meh.

²² Sahˬpaˬ Miˬyehˇ-oˇ, nawˇ-aˬ, Iˇsaˬleˬlaˆ tsawˇ jeuˬ-ahˇ mˬ maˬ maˬ byaˆ zaˇ ziˇ nawˬ-euˬ tsawˇ jeuˬ bi pyeuꞈ laˇ-awˇ, nawˇ aˬ yawꞈ maꞈ-euˬ Miˬyehˇ pyeuꞈ laˇ-euˬ meh.

²³ “Sahˬpaˬ Miˬyehˇ-oˇ, ngaˬ-ahˇ maˬ ehˇ, ngaˬ-euˬ zaˬ deuˬ uˆ deuˬ-ahˇ maˬ ehˇ, nawˬ neh saˇ jaˇ dzaˬ taˬ-euˬ jeˬ aˬ myah luꞈ bi keuˆ le-awˇ, nawˬ neh mˇ ma lehˇ ehˇ taˬ-euˬ loꞈ-ehˇ mˇ nehˬ laꞈ-awˬ.

²⁴ Nawˇ tsawˇ myahˇ doˆ dui dui-awˇ, ‘Baoˬ huiˬ-eu Sahˬpaˬ Miˬyehˇ-aˬ, Iˇsaˬleˬlaˆ tsawˇ jeuˬ-euˬ Miˬyehˇ meh’ lehˇ aˬ cawˬ ehˇ tehꞈ-a. Kʼoeˇ naˇ, ngaˬ-euˬ dzoeˬ dzaˬ aˬ myah luꞈ ziꞈ ni nawˇ jahˇ tehꞈ-a.

²⁵ Ngaˬ-euˬ Miˬyehˇ-oˇ, gaˇ kawˆ heu deuˬ dawˬ tawˆ luꞈ, nawˬ-euˬ zaˬ kʼaˆ pyeuꞈ-eu ngaˬ-ahˇ nawˇ pah mehˬ laꞈ-awˇ, ngaˬ-euˬ zaˬ deuˬ uˆ deuˬ sahˬ paˬ bi geuꞈ ma lehˇ nawˇ ehˇ-eu miˇ neh, ngaˇ nawˬ-ahˇ heu loꞈ-ehˇ guiˬ lahˬ shaˇ peuˬ-eu jeˬ pyeuꞈ-eu ma.

²⁶ Sahˬpaˬ Miˬyehˇ-oˇ, nawˇ Miˬyehˇ pyeuꞈ-awˇ, zahˬ leˇ dui dui paˬ-ehˇ gʼeh-eu saˇ jaˇ heu ngaˬ nehˬ-ehˇ nawˇ dzaˬ-euˬ meh.

²⁷ Ngaˬ-euˬ zaˬ ngaˬ-euˬ uˆ deuˬ, aˬ myah luꞈ nawˇ nui ma tsaˬ-eu tsawˇ haˬ deuˬ pyeuꞈ nya ni, aˬ yawꞈ maꞈ-ahˇ guiˬ lahˬ biꞈ nehˬ-awˬ lehˇ, nawˬ-ahˇ ngaˇ shaˇ-eu ma. Sahˬpaˬ Miˬyehˇ-oˇ, aˬ yawꞈ maꞈ-ahˇ nawˇ guiˬ lahˬ biꞈ nehˬ gʼaˬ-euˬ meh. Nawˬ-euˬ guiˬ lahˬ aˬ yawꞈ maꞈ kʼoeˇ taˆ mˬ maˬ maˬ byaˆ zaˇ ziˇ ziꞈ luꞈ-uˇ.”