1 Laˬsaˬbaˬ 13 - Akha

Giˇliˇyaˆyeˬlmˬ meuˬ-ahˇ jaˆ-eu Dawˬ ma saˇ jaˇ Bahˬ keuˆ baꞈ doˆ laꞈ-euˬ

¹ Tiˬ heˇ gʼaˬ kʼoeˇ taˆ uˆ lahˇ-eu aˬ yuiꞈ deuˬ hawˇ-eu, tiˬ yaˇ gʼaˬ kʼoeˇ taˆ uˆ lahˇ-eu aˬ yuiꞈ deuˬ nehˬ-ehˇ, sahˬ paˬ Daˬbiˇ mehˬ bawˬ mˇ-euˬ meh.

² Iˇsaˬleˬlaˆ tsawˇ haˬ dawˬ tawˆ luꞈ-ahˇ aˬ yawꞈ heu loꞈ-ehˇ ehˇ nehˬ-euˬ meh. “Naw maꞈ kʼawꞈ nui ma tsaˬ-awˇ, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ kʼawꞈ nui ma tsaˬ naˇ, dzeˇ luꞈ-eu aˬ dui-euˬ miˇ kʼahˬ zaˬ deuˬ jawˇ gaˇ maˬ ehˇ, piˇ ma deuˬ hawˇ-eu Leˬbiˇ tsawˇ haˬ deuˬ jawˇ-eu meuˬ deuˬ-ahˇ maˬ ehˇ tsawˇ haˬ pyehˬ gʼeh-awˇ, heu gaˇ uiˬ laˇ ni bi kuˇ gaˬ-iˇ kaˇ-euˇ.

³ Kʼoeˇ naˇ, Sawˇluˆ sahˬ paˬ geuꞈ ngeh kʼahˇ maˬ kʼoꞈ ni bi jaˆ-euˬ Miˬyehˇ-euˬ Dawˬ ma saˇ jaˇ Bahˬ keuˆ baꞈ kʼoꞈ laꞈ-iˇ kaˇ-euˇ.”

⁴ Aˬ yawꞈ kʼoeˇ loꞈ-ehˇ ehˇ gaˇ tsawˇ haˬ dawˬ tawˆ luꞈ nui kʼahˇ shiˇ-awˇ, nui ma tsaˬ-eu meh.

⁵ Giˇliˇyaˆyeˬlmˬ meuˬ-ahˇ jaˆ-eu Dawˬ ma saˇ jaˇ Bahˬ keuˆ-ahˇ, Yeˬluˇsaˬlehˬ meuˬ-ahˇ baꞈ kʼoꞈ keuˆ laꞈ-eu gʼaˇ duˬ, laꞈ oˆ paw Iˇjiˇtuˆ miˇ kʼahˬ-ahˇ neh, laꞈ taˆ paw Haˬmaˆ gʼaˬ lahˇ-ahˇ keuˆ ni jawˇ-eu Iˇsaˬleˬlaˆ tsawˇ haˬ dawˬ tawˆ luꞈ-ahˇ, Daˬbiˇ neh kuˇ uiˬ-euˬ meh.

⁶ Kʼoeˇ naˇ, Jeˬluˇbeˬ mawˇ kawˇ kʼoeˇ taˆ Sahˬpaˬ Miˬyehˇ-euˬ tsawˇ myahˇ jaˆ-eu Dawˬ ma saˇ jaˇ Bahˬ keuˆ baꞈ kʼoꞈ laˬ-iˇ-eu gʼaˇ duˬ,Giˇliˇyaˆyeˬlmˬ lehˇ kuˇ-eu Yuˇdaˆ miˇ kʼahˬ Baˬlahˬ meuˬ-ahˇ, Daˬbiˇ hawˇ-eu Iˇsaˬleˬlaˆ tsawˇ haˬ deuˬ iˇ-euˬ meh.

⁷ Aˬbiˇnaˬdehˇ-euˬ nymˇ-ahˇ jaˆ-eu Dawˬ ma saˇ jaˇ Bahˬ keuˆ-ahˇ aˬ yawꞈ maꞈ baꞈ doˆ-awˇ, laˆ lawˬ yaw shuiꞈ kʼoeˇ taˆ baꞈ daˆ-awˇ, Awˇzah hawˇ-eu Aˬhiˇoˬ aˬ nyaꞈ-ahˇ laˆ lawˬ bi teh-euˬ meh.

⁸ Daˬbiˇ hawˇ-eu Iˇsaˬleˬlaˆ tsawˇ haˬ deuˬ-aˬ, deuˇ-mˬ diˬ, tahˬ diˬ, cehˇ lehˇ ciˆ-awˇ, daˇ heh baw-eu laꞈ kʼoeˇ, gʼaˬ kʼaˇ jaˆ-eu shaˇ-awˇ gaˇ nyeh nyeh-euˬ meh.

⁹ Ciˇdoˬ-euˬ cehˇ diˬ duˬ-ahˇ aˬ yawꞈ maꞈ oe keuˆ ngeh, mawˇ neˇ sahˬ tiꞈ tiꞈ-euˬ miˇ neh, Awˇzah gʼaˬ mehˬ hu paw coˬ-iˇ-awˇ, Dawˬ ma saˇ jaˇ Bahˬ keuˆ -ahˇ ya toeˬ ciˆ-euˬ meh.

¹⁰ Kʼoeˇ ngeh, Sahˬpaˬ Miˬyehˇ ja pyuˬ ni nui ma pehˇ laˇ-awˇ, Awˇzah-ahˇ sehꞈ-euˬ meh. Aˬ jeˬ miˇ neh ehˇ naˇ, Dawˬ ma saˇ jaˇ Bahˬ keuˆ-ahˇ aˬ yawꞈ toeˬ ciˆ-euˬ miˇ neh meh. Kʼoeˇ tsahˇ-ahˇ Miˬyehˇ-euˬ mehˬ shi aˬ yawꞈ shiˇ tsehˆ-euˬ meh.

¹¹ Kʼoeˇ miˇ neh jawˇ duˬ kʼoeˇ tsahˇ-ahˇ, kʼoeˇ ngeh nah neh dahˬ beh-awˇ Paˬyehˆawˇzah lehˇ kuˇ-euˬ meh. Sahˬpaˬ Miˬyehˇ nui ma pehˇ-eu laꞈ kʼoeˇ Awˇzah-ahˇ kʼehˬ nehˬ kʼaˆ nehˬ-euˬ miˇ neh, Daˬbiˇ nui ma pehˇ-euˬ meh.

¹² Kʼoeˇ naˇ, Miˬyehˇ-ahˇ Daˬbiˇ guˆ laˇ-awˇ, “Nymˬ-mˇ poˆ jawˇ-aˬ, ngaˇ aˬ joˆ-ehˇ paˇ jahˇ-awˇ Dawˬ ma saˇ jaˇ Bahˬ keuˆ heu hmˬ yuˇ gʼeh paˬ nga” lehˇ ehˇ-eu meh.

¹³ Kʼoeˇ miˇ neh, Bahˬ keuˆ kʼoeˇ Yeˬluˇsaˬlehˬ meuˬ-ahˇ Daˬbiˇ maˬ yuˇ kʼoꞈ gʼeh-ehˇ, Gaˬdaˇ meuˬ-ahˇ jawˇ-eu AwˇbehˆEˬdoˬ lehˇ kuˇ-eu gʼaˬ-euˬ nymˇ-ahˇ bi jaˆ yaꞈ-euˬ meh.

¹⁴ Bahˬ keuˆ kʼoeˇ ba la smˇ siˬ byah ni kʼoeˇ gaˇ jaˆ-awˇ, AwˇbehˆEˬdoˬ-euˬ nymˇ jiˇ hawˇ-eu aˬ yawꞈ kʼaˇ jaˆ-eu yawˬ jeˬ na luꞈ kʼoeˇ taˆ Miˬyehˇ guiˬ lahˬ biꞈ-euˬ meh.