1 Laˬsaˬbaˬ 12 - Akha

Daˬbiˇ-euˬ mehˬ nah caw teh beh beh-euˬ Beˬyaˬmiˬ tsawˇ haˬ deuˬ

¹ Daˬbiˇ-aˬ, sahˬ paˬ Sawˇluˆ jawˇ gaˇ neh cehˆ doˆ-awˇ Ziˇkaˬlehˆ meuˬ-ahˇ jawˇ luꞈ-eu meh. Kʼoeˇ gaˇ, gʼoe coeˇ paˬ-ehˇ gʼeh-eu guiˇ deuˆ haw-euˬ yehˇ gʼawˬ mya gʼaˬ aˬ yawꞈ jawˇ paw cehˆ uˇ le-euˬ meh.

² Yehˇ kʼoeˇ deuˬ-aˬ, Sawˇluˆ-euˬ tsawˇ jeuˬ pyeuꞈ-eu Beˬyaˬmiˬ tsawˇ jeuˬ meh. Aˬ yawꞈ maꞈ-aˬ, aˇ maˇ laꞈ neh maˬ ehˇ, aˇ caˇ laꞈ neh maˬ ehˇ, kaˆ hawˇ-eu daˇ doˬ beuˆ dziˇ nya dui dui-eu tsawˇ haˬ deuˬ meh.

^3-7 Aˬ yawꞈ maꞈ kʼoeˇ taˆ uˆ lahˇ-eu gʼaˬ-aˬ, Giˇbyaˬ meuˬ-ahˇ jawˇ-eu Sheˬmawˬ-euˬ aˬ li Aˬheˇzaˬ hawˇ-eu Yawˇshaˆ aˬ nyaꞈ nmˇ meh. Yehˇ deuˬ-aˬ, Aˬzaˇmaˬbehˇ-euˬ aˬ li Yeˬzeˬlaˇ hawˇ-eu Peˬlehˆ, Aˬnaˬtawˇ meuˬ-ahˇ jawˇ-eu Beˬlaˬkaˬ hawˇ-eu Yeˬhuˇ, Tsawˇ myahˇ doˆ-eu “Yehˇ smˬ tseˇ gʼaˬ” laꞈ kʼoeˇ aˬ yuiꞈ tiˬ gʼaˬ pyeuꞈ-eu Giˇbyoˬ meuˬ-ahˇ jawˇ-eu Iˇshaˬmaˇyaˬ, Geˬdeˬlahˇ meuˬ-ahˇ jawˇ-eu Yeˬlaˬmiˇ, Yaˬhaˬzeˬlaˇ, Yoˇhaˬnaˬ, Yawˇzaˬbaˆ, Haˬliˇpaˬ meuˬ-ahˇ jawˇ-eu Eˬluˇzeˬ, Yeˬliˇmoˆ, Beˬliˇyaˬ, Sheˬmaˬliˇ, Sheˬpaˬtiˇ, Kawˇlaˆ aˇ jeuˬ Eˇlaˬkaˬnaˬ, Iˇshaˬyaˆ, Aˬzaˬyeˬlaˇ, Joeˬzeuˬ, Yaˬshawˇbamˬ, Geˬdawˬ meuˬ-ahˇ jawˇ-eu Yeˬhawˇlamˬ-euˬ aˬ li Joeˬlahˬ hawˇ-eu Zeˬbaˬdiˇ heu deuˬ meh.

Gaˆ tsawˇ jeuˬ laꞈ kʼoeˇ Daˬbiˇ-euˬ mehˬ nah caw teh-euˬ deuˬ

⁸ Heu-aˬ, bawˇ tsahˬ bawˇ dahˇ kʼaˇ shuiꞈ deh yaˇ laꞈ kʼoeˇ Daˬbiˇ taˆ tsoˆ-awˇ jawˇ ngeh, aˬ yawꞈ-euˬ guiˇ maꞈ laꞈ kʼoeˇ uˇ le-euˬ, guiˇ deuˆ-eu nya dui dui-eu tsawˇ myahˇ doˆ-euˬ Gaˆ tsawˇ haˬ deuˬ meh. Aˬ yawꞈ maꞈ-aˬ, dehˬ daˬ duˬ hawˇ-eu gahˬ baꞈ-awˇ guiˇ deuˆ-eu nya dui dui-awˇ, aˇ laˬ jaˬ shiˇ loꞈ-ehˇ guˆ laˇ paˬ-ehˇ gʼeh-eu tsawˇ haˬ deuˬ pyeuꞈ-eu uˬ taꞈ, gawˬ jawˬ-ahˇ jawˇ-eu kʼaˬ tsehˆ loꞈ-ehˇ kawˇ dui dui-eu meh.

⁹ Aˬ yawꞈ maꞈ laꞈ kʼoeˇ aˬ yuiꞈ geuꞈ-awˇ uˆ lahˇ-eu paw aˬ cawˬ naˆ maˬ tseˇ huiˬ dzehˬ-eu gʼaˬ Eˇzaˬ, nyiˬ gʼaˬ tiˬ gʼaˬ Awˇbaˬdiˇ, smˇ gʼaˬ tiˬ gʼaˬ Eˇliˇbaˆ,

¹⁰ oeˬ gʼaˬ tiˬ gʼaˬ Miˇshaˬmaˬnaˬ, ngaˬ gʼaˬ tiˬ gʼaˬ Yeˬlaˬmiˇ,

¹¹ koꞈ gʼaˬ tiˬ gʼaˬ Aˬtehˇ, shiꞈ gʼaˬ tiˬ gʼaˬ Eˇliˇlaˆ,

¹² yehꞈ gʼaˬ tiˬ gʼaˬ Yoˇhaˬnaˬ, gʼoeˬ gʼaˬ tiˬ gʼaˬ Eˇliˇzaˬbaˆ,

¹³ tseˇ gʼaˬ tiˬ gʼaˬ Yeˬlaˬmiˇ, tseˇ tiꞈ gʼaˬ tiˬ gʼaˬ Maˬkaˬbaˬneˬ meh.

¹⁴ Gaˆ tsawˇ haˬ heu deuˬ laꞈ kʼoeˇ, tiˬ paˆ na deuˬ-aˬ, tiˬ heˇ gʼaˬ kʼoeˇ taˆ uˆ lahˇ-eu aˬ yuiꞈ geuꞈ-awˇ, tiˬ paˆ na deuˬ-aˬ, tiˬ yaˇ gʼaˬ kʼoeˇ taˆ uˆ lahˇ-eu aˬ yuiꞈ geuꞈ-euˬ meh.

¹⁵ Tiˬ kʼoꞈ tiˬ poˆ ba la yaw beh siˬ-ahˇ Yawˇdaˬ lawˇ baˬ iˇ jeuˬ jeuˬ ngeh, aˬ yawꞈ maꞈ lawˇ baˬ tsehˆ-awˇ, lawˇ baˬ-euˬ nahˇ ma doˆ kʼehˬ ga kʼehˬ-ehˇ, kʼoeˇ baˬ heu baˬ-ahˇ jaˆ-eu deh ga-ahˇ kʼaˇ jawˇ-eu tsawˇ haˬ deuˬ, tsawˬ guˆ-iˇ-awˇ bi cehˆ byaˆ-eu meh.

Beˬyaˬmiˬ tsawˇ jeuˬ hawˇ-eu Yuˇdaˆ tsawˇ jeuˬ laꞈ kʼoeˇ Daˬbiˇ-euˬ mehˬ nah caw teh-euˬ deuˬ

¹⁶ Tiˬ poˆ-aˬ, Beˬyaˬmiˬ tsawˇ jeuˬ hawˇ-eu Yuˇdaˆ tsawˇ jeuˬ aˇ muˇ tiˬ muˇ, Daˬbiˇ jawˇ-eu taˆ-ahˇ le-euˬ meh.

¹⁷ Daˬbiˇ aˬ yawꞈ maꞈ-ahˇ tahˬ puˬ-iˇ-awˇ ehˇ-eu, “Naw maꞈ cawˬ cawˬ mawꞈ-euˬ nui ma ahˇ-awˇ, ngaˬ-ahˇ caw ba le-eu lehˇ laˇ-euˬ ngeuˇ naˇ, naw maꞈ-ahˇ ngaˇ ha geuꞈ ma. Ehˇ kʼawꞈ, muiˇ-eu deuˬ-euˬ aˬ laꞈ laꞈ kʼoeˇ, naw maꞈ ngaˬ-ahˇ a ahˇ nehˬ-eu lehˇ noeˬ taˬ-euˬ jaˆ naˇ, ngaˇ naw maꞈ-ahˇ tiˬ jeˬ-iˬ maˬ jahˇ kʼawꞈ, aˬ dui-euˬ aˬ poeˬ aˬ bawˇ deuˬ-euˬ Miˬyehˇ siˬ nya-awˇ, naw maꞈ-ahˇ kʼehˬ nehˬ kʼaˆ nehˬ laꞈ tehꞈ-a.”

¹⁸ Aˬ yawꞈ maꞈ laꞈ kʼoeˇ, aˇ nah tsawˇ myahˇ doˆ-eu yehˇ smˬ tseˇ gʼaˬ kʼoeˇ taˆ aˬ yuiꞈ geuꞈ-eu gʼaˬ pyeuꞈ laˇ-euˬ Aˬmaˬsehˇ kʼoeˇ taˆ, Miˬyehˇ-euˬ yaw sahˇ uˆ lahˇ le-awˇ, “Yeˬshehˇ-euˬ aˬ li Daˬbiˇ-oˇ, nga maꞈ nawˬ-euˬ tsawˇ haˬ pyeuꞈ-eu ma. Nawˇ hawˇ-eu nawˬ-ahˇ caw jaw-eu deuˬ gʼaˬ leˇ-eu guiˬ lahˬ za luꞈ-uˇ. Miˬyehˇ nawˬ nehˬ-ehˇ jawˇ meh” lehˇ ehˇ-eu meh. Kʼoeˇ naˇ, aˬ yawꞈ maꞈ-ahˇ Daˬbiˇ ha geuꞈ-awˇ, aˬ yawꞈ-euˬ guiˇ maꞈ kʼoeˇ taˆ uˆ lahˇ-eu aˬ yuiꞈ deuˬ bi geuꞈ-euˬ meh.

Maˬnaˇseˬ tsawˇ jeuˬ laꞈ kʼoeˇ Daˬbiˇ-euˬ mehˬ nah caw teh-euˬ deuˬ

¹⁹ Sahˬ paˬ Sawˇluˆ-ahˇ guiˇ deuˆ-iˇ-eu lehˇ iˇ luꞈ-eu Piˇliˇtiˆ tsawˇ haˬ deuˬ mehˬ nah Daˬbiˇ caw teh luꞈ ngeh, Maˬnaˇseˬ tsawˇ haˬ yehˇ tiˬ paˆ na deuˬ aˬ yawꞈ jawˇ paw cehˆ uˇ le-euˬ meh. Daˬbiˇ-aˬ, Piˇliˇtiˆ tsawˇ haˬ deuˬ jawˇ paw pyawˬ-awˇ sahˬ paˬ Sawˇluˆ-ahˇ guiˇ deuˆ-eu tsawˇ haˬ maˬ ngeuˇ-a. Daˬbiˇ nui ma paˇ laˇ-awˇ, aˬ yawꞈ-euˬ sahˬ paˬ pyeuꞈ-eu Sawˇluˆ jawˇ paw pyawˬ-awˇ aˬ yawꞈ maꞈ-ahˇ deuˆ laˇ gaˇ guˆ-eu miˇ neh, Piˇliˇtiˆ sahˬ paˬ deuˬ bawˬ dzaˬ-awˇ, aˬ yawꞈ-ahˇ Ziˇkaˬlehˆ meuˬ-ahˇ bi gʼoꞈ-iˇ-euˬ meh.

²⁰ Daˬbiˇ gʼoꞈ-iˇ luꞈ ngeh, aˬ yawꞈ jawˇ paw cehˆ uˇ laˇ-euˬ Maˬnaˇseˬ yehˇ deuˬ-aˬ, Aˬdaˬnahˬ, Yawˇzaˬbaˆ, Yeˬdeˬlaˇ, Miˇkeˬlaˇ, Yawˇzaˬbaˆ, Eˇliˇhuˆ, Ziˇleˬdehˇ aˬ ha maꞈ meh. Aˬ yawꞈ maꞈ dawˬ tawˆ luꞈ, Maˬnaˇseˬ miˇ kʼahˬ laꞈ kʼoeˇ tiˬ heˇ gʼaˬ kʼoeˇ taˆ uˆ lahˇ-eu yaw huiˬ deuˬ tehꞈ meh.

²¹ Aˬ yawꞈ maꞈ-aˬ, Daˬbiˇ-euˬ guiˇ maꞈ kʼoeˇ taˆ yaw huiˬ deuˬ geuꞈ-euˬ meh. Aˬ jeˬ miˇ neh ehˇ naˇ, aˬ yawꞈ maꞈ yawˬ gʼaˬ na luꞈ tsawˇ myahˇ doˆ-eu yehˇ deuˬ pyeuꞈ-eu meh.

²² Aˬ yawꞈ nah yawꞈ ehˇ gʼaˬ ni, Daˬbiˇ-euˬ guiˇ maꞈ laꞈ kʼoeˇ, tsawˇ haˬ yaw shuiꞈ uˇ lahˬ laˇ luꞈ-eu meh. Kʼoeˇ miˇ neh, gʼawˬ myahˇ maˬ gʼeh-ehˇ Daˬbiˇ-euˬ guiˇ maꞈ myaˬ dui dui laˇ-euˬ meh.

Daˬbiˇ-euˬ guiˇ maꞈ deuˬ

²³ Sahˬpaˬ Miˬyehˇ neh saˇ jaˇ dzaˬ taˬ-euˬ loꞈ-ehˇ, Sawˇluˆ-euˬ jawˇ duˬ-ahˇ Daˬbiˇ sahˬ paˬ pyeuꞈ laˇ ni, Daˬbiˇ Heˬbyoˬ meuˬ-ahˇ jawˇ luꞈ ngeh, yaw muiˬ paˬ-ehˇ dzaw nya taˬ-euˬ yehˇ gʼawˬ mya gʼaˬ aˬ yawꞈ-euˬ guiˇ maꞈ laꞈ kʼoeˇ uˇ laˇ-euˬ meh. Yehˇ kʼoeˇ deuˬ heu myaˆ ni byah-eu meh.

²⁴ Yuˇdaˆ tsawˇ jeuˬ laꞈ kʼoeˇ, dehˬ daˬ duˬ hawˇ-eu gahˬ baꞈ luꞈ-eu koꞈ heˇ yehꞈ yaˇ gʼaˬ,

²⁵ Suˇmoˬ tsawˇ jeuˬ laꞈ kʼoeˇ, yaw muiˬ paˬ-ehˇ dzaw nya taˬ-euˬ yehˇ shiꞈ heˇ tiˬ yaˇ gʼaˬ,

^26-28 Leˬbiˇ tsawˇ jeuˬ laꞈ kʼoeˇ, Aˬloˬ-euˬ aˇ jeuˬ kʼoeˇ taˆ aˬ yuiꞈ geuꞈ-euˬ Yeˬhawˇyaˬdaˬ hawˇ-eu aˬ yawꞈ-euˬ tsawˇ haˬ smˬ heˇ shiꞈ yaˇ gʼaˬ maˬ ehˇ, guiˇ deuˆ-eu paw nui ma kʼaˬ dui dui-eu Zaˬdoˆ hawˇ-eu guiˇ deuˆ-eu paw aˬ yuiꞈ geuꞈ-eu aˬ yawꞈ-euˬ aˬ yuiꞈ aˬ nyiˇ nyiˬ tseˇ nyiꞈ gʼaˬ maˬ ehˇ, ahˇ leˇ-ehˇ, dawˬ tawˆ luꞈ oeˬ heˇ koꞈ yaˇ gʼaˬ,

²⁹ Sawˇluˆ-euˬ aˇ jeuˬ aˇ ca pyeuꞈ-eu Beˬyaˬmiˬ tsawˇ jeuˬ laꞈ kʼoeˇ, smˬ heˇ gʼaˬ, (Beˬyaˬmiˬ tsawˇ jeuˬ myaˬ tiˬ paˆ-aˬ, kʼoeˇ ngeh yamˬ-ahˇ keuˆ ni Sawˇluˆ jawˇ paw pyawˬ luꞈ-eu meh.)

³⁰ Eˇpaˬleˬ tsawˇ jeuˬ laꞈ kʼoeˇ, yawˬ ha-euˬ aˇ jeuˬ laꞈ kʼoeˇ tsawˇ myahˇ doˆ-euˬ yehˇ nyiˬ muiˇ yehꞈ yaˇ gʼaˬ,

³¹ Nahˇ ma ga kʼehˬ paw baˬ-ahˇ jawˇ-eu Maˬnaˇseˬ tsawˇ jeuˬ laꞈ kʼoeˇ, Daˬbiˇ sahˬ paˬ bi pyeuꞈ laˇ ni mˇ-eu gʼaˇ duˬ tseˇ doˆ-awˇ pyehˬ gʼeh-euˬ tsawˇ haˬ tiˬ muiˇ yehꞈ heˇ gʼaˬ,

³² Iˇsaˬkaˬ tsawˇ jeuˬ laꞈ kʼoeˇ, aˬ yuiꞈ geuꞈ-eu nyiˬ yaˇ gʼaˬ hawˇ-eu, aˬ yawꞈ maꞈ-euˬ gʼaˬ zaˬ deuˬ (Aˬ yuiꞈ geuꞈ-eu kʼoeˇ deuˬ-aˬ, Iˇsaˬleˬlaˆ miˇ kʼahˬ aˬ geu jeˬ mˇ paˬ-ehˇ gʼeh-eu gaˇ kawˆ hawˇ-eu, aˬ geu ngeh yamˬ-ahˇ mˇ paˬ-ehˇ gʼeh-eu gaˇ kawˆ siˬ nya-eu meh.)

³³ Zeˬbuˬluˬ tsawˇ jeuˬ laꞈ kʼoeˇ, saˇ jaˇ ziꞈ-awˇ jah coeˇ-eu uˬ taꞈ, guiˇ deuˆ-eu keu ka aˬ geu jeˬ maˬ ehˇ zmˬ-awˇ guiˇ deuˆ-eu gʼaˇ duˬ lehˬ hmˬ dah taˬ-euˬ tsawˇ haˬ ngaˬ muiˇ gʼaˬ,

³⁴ Naˬtaˬliˇ tsawˇ jeuˬ laꞈ kʼoeˇ, aˬ yuiꞈ geuꞈ-eu tiˬ heˇ gʼaˬ hawˇ-eu, dehˬ daˬ duˬ hawˇ-eu gahˬ baꞈ luꞈ-eu tsawˇ haˬ smˬ muiˇ shiꞈ heˇ gʼaˬ,

³⁵ Daˬ tsawˇ jeuˬ laꞈ kʼoeˇ, dzaw nya taˬ-euˬ tsawˇ haˬ nyiˬ muiˇ yehꞈ heˇ koꞈ yaˇ gʼaˬ,

³⁶ Aˬshaˬ tsawˇ jeuˬ laꞈ kʼoeˇ guiˇ deuˆ-eu gʼaˇ duˬ lehˬ hmˬ dah taˬ-euˬ tsawˇ haˬ oeˬ muiˇ gʼaˬ,

³⁷ Yawˇdaˬ lawˇ baˬ nahˇ ma doˆ kʼehˬ paw baˬ-ahˇ jawˇ-eu tsawˇ jeuˬ deuˬ pyeuꞈ-eu, Luˇbeˬ tsawˇ jeuˬ, Gaˆ tsawˇ jeuˬ, Maˬnaˇseˬ tsawˇ jeuˬ tiˬ paˆ, heu deuˬ laꞈ kʼoeˇ, keu ka aˬ geu jeˬ maˬ kaˬ baꞈ-awˇ guiˇ deuˆ nya ni dzaw nya taˬ-euˬ tsawˇ haˬ tiˬ seh nyiˬ muiˇ gʼaˬ meh.

³⁸ Guiˇ deuˆ-eu gʼaˇ duˬ lehˬ hmˬ dah taˬ-euˬ yehˇ heu deuˬ dawˬ tawˆ luꞈ, Heˬbyoˬ meuˬ-ahˇ le-awˇ, Iˇsaˬleˬlaˆ tsawˇ jeuˬ dawˬ tawˆ luꞈ kʼoeˇ taˆ Daˬbiˇ sahˬ paˬ bi geuꞈ-eu gʼaˇ duˬ noeˬ tsehˆ taˬ-euˬ meh. Iˇsaˬleˬlaˆ tsawˇ haˬ nui deuˬ dawˬ tawˆ luꞈ kʼawꞈ, kʼoeˇ loꞈ-ehˇ noeˬ tsehˆ taˬ-euˬ meh.

³⁹ Kʼoeˇ gaˇ jawˇ-eu aˬ yawꞈ maꞈ tsawˇ jeuˬ Iˇsaˬleˬlaˆ tsawˇ haˬ deuˬ neh laˆ saˆ taˬ-euˬ dzaˬ dzaˬ dawˇ dawˇ deuˬ-ahˇ dzaˬ-awˇ, Daˬbiˇ nehˬ-ehˇ aˬ yawꞈ maꞈ smˬ nah jawˇ-euˬ meh.

⁴⁰ Laꞈ taˆ paw pyawˬ-ahˇ jawˇ saˬ saˬ leˇ-euˬ Iˇsaˬkaˬ tsawˇ jeuˬ, Zeˬbuˬluˬ tsawˇ jeuˬ, Naˬtaˬliˇ tsawˇ jeuˬ-ahˇ keuˆ ni, mahˬ tahˬ laˆ, law taw, mahˬ liˬ dzeuˆ, mawˇ neˇ heu deuˬ teh-awˇ, cehˇ meu, siˬ guˬ aˇ siˬ, aˬ gaꞈ aˇ siˬ yaw koˆ, saˬ loˬ tsiˇ, heu deuˬ tawˬ ha le-euˬ meh. Sehꞈ dzaˬ-eu gʼaˇ duˬ, mawˇ neˇ hawˇ-eu yawˇ deuˬ kʼawꞈ aˬ yawꞈ maꞈ teh leꞈ-euˬ meh. Iˇsaˬleˬlaˆ miˇ kʼahˬ kʼahˬ lah ni kʼoeˇ loꞈ-ehˇ laˬ kʼaˬ cehˇ dui dui-euˬ meh.