1 Gawˇliˬtu 9 - Akha

Gʼaˬ kʼehˇ tiˬ gʼaˬ za-euˬ aˬ kawˬ-aˬ hawˇ-eu ya mˇ-eu gaˇ deuˬ

¹ Ngaˇ yawˬ ha mˇ mawꞈ-eu jeˬ maˬ mˇ nya ni bi ka lahˇ taˬ-euˬ tsawˇ haˬ nga loˇ. Gʼaˬ kʼehˇ geuꞈ luꞈ-eu tsawˇ haˬ maˬ ngeuˇ nga loˇ. Aˬ dui-euˬ Sahˬpaˬ Yeˬsuˇ-ahˇ ya mawˇ-euˬ tsawˇ haˬ maˬ ngeuˇ nga loˇ. Naw maꞈ-aˬ, Sahˬpaˬ Miˬyehˇ-euˬ gaˇ-ahˇ ngaˬ neh mˇ-awˇ mˇ doˆ shaˇ doˆ taˬ-euˬ aˇ siˬ aˇ lu deuˬ maˬ ngeuˇ te loˇ.

² Aˬ cawˬ ngaˬ-ahˇ Miˬyehˇ-euˬ gʼaˬ kʼehˇ lehˇ maˬ sawˇ kʼawꞈ, naw maꞈ sawˇ-eu tsaˬ meh. Naw maꞈ Sahˬpaˬ Miˬyehˇ laꞈ kʼoeˇ dehꞈ luꞈ-eu kʼoeˇ-aˬ, ngaˇ gʼaˬ kʼehˇ pyeuꞈ-eu saˇ kiˇ meh.

³ Aˬ cawˬ ngaˬ-ahˇ pyehˆ tseˇ laˇ naˇ, ngaˇ heu loꞈ-ehˇ ehˇ kʼoꞈ nehˬ ma.

⁴ Ngaˬ neh gaˇ mˇ-euˬ aˇ poeˬ ngaˇ dzaˬ dzaˬ dawˇ dawˇ za-eu maˬ geuˇ-a loˇ.

⁵ Gʼaˬ kʼehˇ nui deuˬ pyeuꞈ-eu Sahˬpaˬ Yeˬsuˇ-euˬ mehˇ nmˇ deuˬ hawˇ-eu Beˬtuˆluˆ maꞈ loꞈ-ehˇ, ngaˇ gʼeh Ka li-ahˇ jah-eu miˬ zaˬ tiˬ gʼaˬ sheuˬ-awˇ cah-eu aˬ kawˬ-aˬ maˬ jaˆ ta loˇ.

⁶ Maˬ ngeuˇ naˇ, Baˬnaˬbaˇ nga nyaꞈ tehꞈ-ehˇ yawˬ haˇ yawˬ ha ya poˆ dzaˬ ta loˇ.

⁷ Yawˬ ha-euˬ pyuˇ yuˇ doˆ-awˇ yehˇ geuꞈ-eu tsawˇ haˬ jawˇ meh loˇ. Aˬ gaꞈ yaˇ kmˇ mˇ-awˇ aˬ gaꞈ aˇ siˬ maˬ pyaˆ dzaˬ-eu tsawˇ haˬ jawˇ ta loˇ. Yawˇ bo-awˇ yawˇ-euˬ aˬ coeˇ maˬ nyehꞈ dawˇ-eu tsawˇ haˬ jawˇ meh loˇ.

⁸ Ngaˇ heu loꞈ-ehˇ ehˇ-eu heu, tsawˇ haˬ zaˬ-euˬ nui noeˬ ehˇ-eu nga loˇ. Zahˇ dawˬ kʼoꞈ dawˬ laꞈ kʼoeˇ kʼawꞈ kʼoeˇ loꞈ-ehˇ ehˇ taˬ-euˬ maˬ ngeuˇ-a loˇ.

⁹ “Cehˇ bi nawˬ-euˬ mawˇ neˇ-ahˇ mehˬ tsahˬ taˬ tsahˬ” lehˇ, Moˇseˬ-euˬ Zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ jaˆ meh. Miˬyehˇ neh kʼoeˇ loꞈ-ehˇ ehˇ taˬ-euˬ kʼoeˇ, mawˇ neˇ-ahˇ ehˇ mawꞈ ta loˇ.

¹⁰ Aˬ dui-ahˇ ehˇ mawꞈ-eu maˬ ngeuˇ-a loˇ. Ngeuˇ meh. Aˬ dui gʼaˇ duˬ ehˇ taˬ-euˬ meh. Deh ma tsehˬ-eu gʼaˬ maˬ ehˇ, cehˇ yehˬ-eu gʼaˬ maˬ ehˇ, cehˇ za laˇ gaˇ noeˬ tmˬ-awˇ mˇ-eu meh.

¹¹ Naw maꞈ jawˇ gaˇ nga maꞈ guiˬ lah saꞈ laˇ-ahˇ taꞈ-eu siˬ yoeˬ sehˬ ngeh keuˆ-ehˇ-aˬ, shiˬ shaˬ jiˇ-ahˇ taꞈ leˇ-eu jeˬ yehˬ dzaˬ naˇ aˇ dzehˬ dzeuˇ ta loˇ.

¹² Naw maꞈ neh kʼoeˇ loꞈ-ehˇ gʼeh-eu jeˬ caw ba nehˬ-euˬ gaˇ aˬ cawˬ za geuˇ naˇ, nga maꞈ kʼoeˇ naˆ maˬ tseˇ maˬ za geuˇ-aˇ loˇ. Ehˇ kʼawꞈ, nga maꞈ kʼaˇ za geuˇ-eu jeˬ nga maꞈ maˬ geuꞈ-aˬ. Ka li gaˇ kawˆ Laˬ kʼaˬ cehˇ-eu Guiˬ lahˬ dawˬ mehˬ gaˇ jaˆ tsoeˬ-eu jeˬ maˬ bi pyeuꞈ-eu gʼaˇ duˬ, yawˬ jeˬ na luꞈ-ahˇ nga maꞈ daˬ dzeuˇ oˇ dzeuˇ yaꞈ-euˬ ma.

¹³ Uˬ duˬ tahˬ nymˇ nymˇ ma laꞈ kʼoeˇ gaˇ mˇ-eu tsawˇ haˬ deuˬ Uˬ duˬ tahˬ nymˇ nymˇ ma-ahˇ jaˆ-eu dzaˬ dzaˬ dawˇ dawˇ za-awˇ, lawˇ duˬ kʼoeˇ taˆ kʼaˇ lawˇ-euˬ jeˬ laꞈ kʼoeˇ, lawˇ-eu jeˬ mˇ nehˬ-eu gʼaˬ-ahˇ oꞈ-eu shaˬ bymˇ jaˆ-eu gaˇ kawˆ naw maꞈ siˬ duˬ-eu meh.

¹⁴ Kʼoeˇ loꞈ-ehˇ duˇ ni, Laˬ kʼaˬ cehˇ-eu Guiˬ lahˬ dawˬ kʼaˇ mehˬ-eu tsawˇ haˬ kʼawꞈ, kʼoeˇ loꞈ-ehˇ mehˬ-eu miˇ neh ya bi dzaˬ ya bi dawˇ meh lehˇ, Sahˬpaˬ Miˬyehˇ neh dawˬ biꞈ taˬ-euˬ jaˆ meh.

¹⁵ Ehˇ kʼawꞈ, ngaˇ za geuˇ-eu kʼoeˇ deuˬ-ahˇ ngaˇ maˬ geuꞈ-aˬ. Kʼoeˇ deuˬ-ahˇ za mawꞈ-eu miˇ neh nymˬ-mˇ sahˬ boꞈ heu taꞈ boꞈ-eu kʼawꞈ maˬ ngeuˇ. Ngaˇ nui ma huiˬ kʼaˇ za-eu heu-ahˇ aˬ cawˬ laˆ cawˆ laˇ gaˇ keuˆ naˇ, ngaˬ-euˬ gʼawˇ mawˇ shiˇ dah ma.

¹⁶ Ngaˇ Laˬ kʼaˬ cehˇ-eu Guiˬ lahˬ dawˬ mehˬ-eu baˬ da neh kʼahˬ sehˇ jehˆ kʼaˇ za-eu maˬ ngeuˇ. Maˬ mehˬ-ehˇ maˬ gʼeh nya ni Miˬyehˇ neh ciˬ pi nehˬ laꞈ-euˬ meh. Ngaˇ Laˬ kʼaˬ cehˇ-eu Guiˬ lahˬ dawˬ maˬ mehˬ naˇ, ngaˬ-euˬ gʼaˇ duˬ aˇ naˆ ni guˆ kʼaˇ za-eu nga.

¹⁷ Ngaˇ yawˬ haˇ yawˬ ha nui ma keuˆ-awˇ mˇ-euˬ ngeuˇ naˇ, aˇ poeˬ za geuˇ tehꞈ-a. Ehˇ kʼawꞈ, Miˬyehˇ neh biꞈ laꞈ-euˬ gaˇ pyeuꞈ-eu miˇ neh, ngaˇ mˇ luꞈ-eu jeˬ pyeuꞈ-eu ma.

¹⁸ Toˆ-ehˇ ngeuˇ naˇ, ngaˇ aˬ geu jeˬ aˇ poeˬ za ta. Aˇ poeˬ maˬ yuˇ ni Laˬ kʼaˬ cehˇ-eu Guiˬ lahˬ dawˬ mehˬ-awˇ, kʼoeˇ loꞈ-ehˇ mˇ-euˬ baˬ da neh ngaˇ za geuˇ-eu jeˬ-ahˇ ngaˇ maˬ geuꞈ-euˬ kʼoeˇ-aˬ, ngaˬ neh za-euˬ guiˬ lahˬ ma.

¹⁹ Ngaˇ-aˬ, tsawˇ haˬ tiˬ gʼaˬ-iˬ-euˬ zaˬ kʼaˆ maˬ ngeuˇ-eu kʼawꞈ, tsawˇ haˬ gʼawˬ mya ni Ka li zaˬ bi pyeuꞈ laˇ-eu gʼaˇ duˬ, tsawˇ haˬ yawˬ gʼaˬ na luꞈ-euˬ zaˬ kʼaˆ geuꞈ-euˬ gaˇ duˇ ma.

²⁰ Yuˇdaˆ tsawˇ haˬ deuˬ-ahˇ guiˬ lahˬ dawˬ mehˬ ngeh jawˇ, aˬ yawꞈ maꞈ Ka li zaˬ bi pyeuꞈ laˇ-eu gʼaˇ duˬ ngaˬ-euˬ gʼawˇ mawˇ Yuˇdaˆ tsawˇ haˬ tiˬ gʼaˬ loꞈ-ehˇ dehꞈ-euˬ ma. Ngaˇ Moˇseˬ-euˬ Zahˇ dawˬ kʼoꞈ dawˬ uˬ moˆ jawˇ-eu tsawˇ haˬ maˬ ngeuˇ kʼawꞈ, Zahˇ dawˬ kʼoꞈ dawˬ uˬ moˆ jawˇ-eu tsawˇ ha deuˬ Ka li zaˬ bi pyeuꞈ laˇ-eu gʼaˇ duˬ, ngaˬ-euˬ gʼawˇ mawˇ Zahˇ dawˬ kʼoꞈ dawˬ uˬ moˆ jawˇ-eu tsawˇ haˬ geuꞈ-awˇ dawˬ mehˬ mehˬ-euˬ ma.

²¹ Kʼoeˇ loꞈ-ehˇ duˇ ni, Yuˇdaˆ tsawˇ haˬ-euˬ Zahˇ dawˬ kʼoꞈ dawˬ laꞈ nyiˇ jawˇ-eu aˬ cawˬ tsawˇ jeuˬ deuˬ Ka li zaˬ bi pyeuꞈ laˇ-eu gʼaˇ duˬ, ngaˬ-euˬ gʼawˇ mawˇ Yuˇdaˆ tsawˇ haˬ maˬ ngeuˇ-eu loꞈ-ehˇ geuꞈ-awˇ mehˬ-euˬ ma. Kʼoeˇ loꞈ-ehˇ mˇ-euˬ kʼoeˇ-aˬ, Miˬyehˇ-euˬ zahˇ dawˬ kʼoꞈ dawˬ-ahˇ ngaˇ maˬ caw teh lehˇ ehˇ mawꞈ-eu maˬ ngeuˇ. Ngaˇ-aˬ, maˇ maˇ ni Ka li-euˬ zahˇ dawˬ kʼoꞈ dawˬ uˬ moˆ jawˇ daˆ laꞈ-euˬ tsawˇ haˬ ma.

²² Jah-eu gʼaˬ baˬ-eu tsawˇ haˬ deuˬ Ka li zaˬ bi pyeuꞈ laˇ-eu gʼaˇ duˬ, ngaˇ kʼawꞈ jah-eu gʼaˬ baˬ-eu tsawˇ haˬ geuꞈ-euˬ ma. Tsawˇ haˬ yawˬ gʼaˬ na luꞈ gʼaˇ duˬ yawˬ jeˬ na luꞈ ngaˇ geuꞈ doe-awˇ, aˬ yawꞈ maꞈ tiˬ paˆ na deuˬ-ahˇ aˬ joˆ-ehˇ jahˇ-awˇ ka kʼoꞈ paˬ nga lehˇ, kʼaˇ gʼeh nya-eu loꞈ-ehˇ leh jeh doe-euˬ ma.

²³ Laˬ kʼaˬ cehˇ-eu Guiˬ lahˬ dawˬ-ahˇ taꞈ-eu guiˬ lahˬ-ahˇ ngaˇ jiˇ za nya ni, Laˬ kʼaˬ cehˇ-eu Guiˬ lahˬ dawˬ gʼaˇ duˬ kʼoeˇ deuˬ dawˬ tawˆ luꞈ ngaˇ mˇ-euˬ ma.

²⁴ Cehˆ ceh ceh ngeh tsawˇ haˬ gʼawˬ mya ni uˇ leˇ-awˇ cehˆ kʼawꞈ, tiˬ gʼaˬ tehꞈ-ehˇ laꞈ sawˬ za-eu maˬ ngeuˇ-a loˇ. Kʼoeˇ miˇ neh, laꞈ sawˬ za nya ni cehˆ-awˬ.

²⁵ Tiˬ kʼehˇ laˇ kʼehˬ tehꞈ-ehˇ gmˬ-eu aˇ yehˆ neh jahˇ-euˬ shuiˇ uˬ kʼoˆ laꞈ sawˬ za-eu gʼaˇ duˬ, niˇ gʼa-eu tsawˇ haˬ yawˬ gʼaˬ na luꞈ yawˬ ha-euˬ nui ma-ahˇ ziꞈ dah ni nyehꞈ tehˬ taˬ-awˇ leh jeh leh jeh-ehˇ ya niˇ gʼa dzaw-eu meh. Aˬ dui-aˬ, mˬ maˬ maˬ byaˆ zaˇ ziˇ maˬ cawˆ-iˇ nya-eu jeˬ-ahˇ za nya ni leh jeh luꞈ-eu ma.

²⁶ Kʼoeˇ miˇ neh, cehˆ keuˆ duˬ-ahˇ dawˇ coe ni haw tsoˆ taˬ-awˇ ngaˇ cehˆ luꞈ-eu ma. Teˇ ceh ceh-eu jeˬ niˇ gʼa ngeh, maˬ teˇ zaw ni jaˬ lehˇ-ahˇ tehꞈ-ehˇ teˇ-eu tsawˇ haˬ loꞈ-ehˇ ngaˇ maˬ gʼeh.

²⁷ Aˬ cawˬ-ahˇ dawˬ mehˬ mehˬ-eu gʼaˬ geuꞈ-eu kʼawꞈ, yawˬ ha gʼaˬ Miˬyehˇ mehˬ shi smˬ-iˇ-euˬ tsawˇ haˬ maˬ ya pyeuꞈ-eu gʼaˇ duˬ, ngaˬ-euˬ gʼawˇ mawˇ gʼahˇ laˇ ni yawˬ haˇ yawˬ ha teˇ teˇ-ehˇ zuiˆ luꞈ-eu ma.