1 Gawˇliˬtu 7 - Akha

Sheuˬ dahˬ dzaˬ-eu gaˇ kawˆ naˇ haˬ-eu

¹ Nymˬ-mˇ jawˇ poˆ-aˬ, naw maꞈ neh ngaˬ-ahˇ sahˬ boꞈ boꞈ ahˇ laꞈ-awˇ naˇ haˬ-euˬ gaˇ kawˆ kʼoeˇ ehˇ ma. Kʼaˬ dzeˇ zaˬ-aˬ, miˬ zaˬ maˬ sheuˬ ni jawˇ nya naˇ muiˬ meh.

² Ehˇ kʼawꞈ, aˬ cawˬ nehˬ-ehˇ joe ni muˇ juˇ juˇ-eu jeˬ jaˆ myaˬ-eu miˇ neh, kʼaˬ dzeˇ zaˬ yawˬ gʼaˬ na luꞈ miˬ zaˬ baw-eu tsaˬ-awˇ, zaˬ miˬ zaˬ yawˬ gʼaˬ na luꞈ kʼawꞈ kʼaˬ dzeˇ zaˬ baw-eu tsaˬ meh.

³ Kʼaˬ dzeˇ zaˬ gʼaˬ yawˬ ha-euˬ gʼawˇ mawˇ miˬ zaˬ gʼaˬ-ahˇ biꞈ-awˇ, miˬ zaˬ gʼaˬ kʼawꞈ yawˬ ha-euˬ gʼawˇ mawˇ kʼaˬ dzeˇ zaˬ gʼaˬ-ahˇ biꞈ-eu laꞈ kʼoeˇ, tiˬ gʼaˬ tiˇ gʼaˬ nui kʼahˇ mˇ byah-eu tsaˬ meh.

⁴ Miˬ zaˬ gʼaˬ yawˬ ha-euˬ gʼawˇ mawˇ-ahˇ yawˬ haˇ yawˬ ha maˬ uˆ lahˇ ni, kʼaˬ dzeˇ zaˬ gʼaˬ neh ya bi uˆ lahˇ meh. Kʼoeˇ gaˇ duˇ ni, kʼaˬ dzeˇ zaˬ gʼaˬ kʼawꞈ, yawˬ ha-euˬ gʼawˇ mawˇ-ahˇ yawˬ haˇ yawˬ ha maˬ uˆ lahˇ ni, miˬ zaˬ gʼaˬ neh ya bi uˆ lahˇ meh.

⁵ Tiˬ kʼehˬ tiˬ yamˬ laꞈ kʼoeˇ maˬ yuꞈ taꞈ ni guiˬ lahˬ shaˇ-eu gʼaˇ duˬ nyiˬ gʼaˬ luꞈ nui ma tsaˬ-awˇ ehˇ tsehˆ taˬ-euˬ aˇ yamˬ laꞈ kʼoeˇ maˬ ngeuˇ naˇ, tiˬ gʼaˬ tiˇ gʼaˬ maˬ yuꞈ taꞈ lehˇ ehˇ-eu maˬ tsaˬ-a. Aˇ yamˬ kʼoeˇ dzeuˇ naˇ, tiˬ kawˆ loꞈ-ehˇ paˇ yuꞈ paˇ jawˇ taꞈ-awˬ. Kʼoeˇ loꞈ-ehˇ maˬ jahˇ naˇ, naw maꞈ yawˬ ha-euˬ nui ma-ahˇ maˬ gʼaˬ leˇ-eu miˇ neh, nehꞈ Saˬdaˬ muˇ juˇ juˇ gaˇ maˬ dzeuˇ-iˇ nya-a.

⁶ Ngaˇ heu loꞈ-ehˇ ehˇ-eu heu-aˬ, ngaˇ kʼaˇ ehˇ-eu loꞈ-ehˇ maˬ geuꞈ-ehˇ maˬ gʼeh nya-a lehˇ dawˬ biꞈ-eu jeˬ-ehˇ ehˇ-eu maˬ ngeuˇ. Ngaˬ neh ehˇ-euˬ loꞈ-ehˇ mˇ-eu gʼaˇ duˬ aˬ kawˬ-aˬ biꞈ-eu jeˬ-ehˇ ehˇ-eu ma.

⁷ Maˇ maˇ ni ya ehˇ naˇ, naw maꞈ dawˬ tawˆ luꞈ ngaˬ loꞈ-ehˇ bi dehꞈ mawꞈ miˇ-a. Ehˇ kʼawꞈ, tsawˇ haˬ yawˬ gʼaˬ na luꞈ-ahˇ aˬ cawˬ-ahˇ biꞈ-euˬ gaˇ maˬ duˇ-eu laꞈ sawˬ Miˬyehˇ biꞈ taˬ-awˇ, tiˬ gʼaˬ tiˬ jeˬ za taˬ-euˬ meh.

⁸ Miˬ zaˬ maˬ sheuˬ-eu deuˬ hawˇ-eu miˬ coeˬ miˬ ma deuˬ-ahˇ, ngaˇ loꞈ-ehˇ cawˬ maˬ shaˇ baw ni jawˇ nya naˇ muiˬ meh lehˇ ehˇ mawꞈ miˇ-a.

⁹ Ehˇ kʼawꞈ, yawˬ ha-euˬ nui ma-ahˇ maˬ gʼaˬ leˇ naˇ, cawˬ shaˇ baw-eu tsaˬ dzehˬ tehꞈ-a. Aˬ jeˬ miˇ neh ehˇ naˇ, yuꞈ taꞈ jawˇ taꞈ mawꞈ-eu nui kʼahˇ-ahˇ dzahˬ tehˬ taˬ-eu naˆ maˬ tseˇ, cawˬ shaˇ baw-awˇ jawˇ-eu muiˬ dzehˬ meh.

¹⁰ Sheuˬ dahˬ dzaˬ-euˬ miˬ zaˬ yo zaˬ-ahˇ ngaˇ heu loꞈ-ehˇ dawˬ biꞈ-eu ma. Ngaˬ-euˬ dawˬ maˬ ngeuˇ. Sahˬpaˬ Miˬyehˇ-euˬ dawˬ meh. Miˬ zaˬ tiˬ gʼaˬ yawˬ ha-euˬ kʼaˬ dzeˇ zaˬ-ahˇ maˬ ya gʼawˬ-a.

¹¹ Maˬ gʼawˬ-ehˇ maˬ juˬ naˇ, yawˬ zahˇ yawˬ maˬ iˇ paˇ ni tiˬ gʼaˬ tehꞈ-ehˇ ya jawˇ meh. Maˬ ngeuˇ naˇ, yawˬ ha-euˬ kʼaˬ dzeˇ zaˬ nehˬ-ehˇ laˆ tsaˬ laˆ tsahˇ-awˇ paˇ jawˇ kʼoꞈ-eu tsaˬ meh. Kʼaˬ dzeˇ zaˬ deuˬ kʼawꞈ, miˬ zaˬ maˬ ya kʼoꞈ-a lehˇ ngaˇ ehˇ-eu ma.

¹² Nui deuˬ-ahˇ ngaˇ heu loꞈ-ehˇ ehˇ-eu ma. Sahˬpaˬ Miˬyehˇ-euˬ dawˬ maˬ ngeuˇ. Ngaˬ-euˬ dawˬ ma. Ka li zaˬ tiˬ gʼaˬ Ka li zaˬ maˬ ngeuˇ-eu miˬ zaˬ sheuˬ-awˇ, miˬ zaˬ kʼoeˇ gʼaˬ aˬ yawꞈ nehˬ-ehˇ dehꞈ daˆ leꞈ mawꞈ-eu nui ma ahˇ naˇ, maˬ ya kʼoꞈ nehˬ-a.

¹³ Ka li zaˬ tiˬ gʼaˬ, Ka li zaˬ maˬ ngeuˇ-eu kʼaˬ dzeˇ zaˬ-ahˇ dahˬ dzaˬ-iˇ-awˇ, kʼaˬ dzeˇ zaˬ kʼoeˇ gʼaˬ aˬ yawꞈ nehˬ-ehˇ dehꞈ daˆ leꞈ mawꞈ-eu nui ma ahˇ naˇ, maˬ ya kʼoꞈ nehˬ-a.

¹⁴ Aˬ jeˬ miˇ neh ehˇ naˇ, Ka li-ahˇ maˬ jah-eu kʼaˬ dzeˇ zaˬ kʼoeˇ gʼaˬ-aˬ, aˬ yawꞈ-euˬ miˬ zaˬ-ahˇ taꞈ leˇ-eu laꞈ kʼoeˇ, Miˬyehˇ ha geuꞈ nya-eu tsawˇ haˬ pyeuꞈ laˇ-euˬ meh. Ka li-ahˇ maˬ jah-eu miˬ zaˬ kʼoeˇ gʼaˬ kʼawꞈ, Ka li-ahˇ jah-eu aˬ yawꞈ-euˬ kʼaˬ dzeˇ zaˬ-ahˇ taꞈ leˇ-euˬ laꞈ kʼoeˇ, Miˬyehˇ ha geuꞈ nya-eu tsawˇ haˬ pyeuꞈ laˇ-euˬ meh. Kʼoeˇ loꞈ-ehˇ maˬ jahˇ naˇ, aˬ yawꞈ maꞈ-euˬ zaˬ deuˬ lawˇ ciꞈ zaˬ-euˬ zaˬ deuˬ-ahˇ duˇ tehꞈ-a. Kʼoeˇ loꞈ-ehˇ jahˇ naˇ, zaˬ kʼoeˇ deuˬ Miˬyehˇ ha geuꞈ nya-eu tsawˇ haˬ pyeuꞈ laˇ tehꞈ-a.

¹⁵ Ehˇ kʼawꞈ, miˬ zaˬ yo zaˬ yaw kaˬ Ka li-ahˇ maˬ jah-eu gʼaˬ gʼawˬ mawꞈ-eu nui ma ahˇ naˇ, gʼawˬ luꞈ-uˇ. Kʼoeˇ loꞈ-ehˇ pyeuꞈ laˇ ngeh, miˬ zaˬ yo zaˬ laꞈ kʼoeˇ Ka li zaˬ pyeuꞈ-eu gʼaˬ-aˬ, paꞈ tawꞈ taˬ-euˬ jeˬ-ahˇ ya buˬ ya law-iˇ-euˬ gaˇ duˇ-eu meh. Naw maꞈ nui saˇ oꞈ-eu laꞈ kʼoeˇ ya dehꞈ ni Miˬyehˇ kuˇ-euˬ gaˇ duˇ-eu meh.

¹⁶ Ka li zaˬ pyeuꞈ-eu aˬ cawˬ-euˬ miˬ zaˬ deuˬ-oˇ, nawˬ-euˬ kʼaˬ dzeˇ zaˬ-ahˇ nawˇ maˬ ka kʼoꞈ nya-aˇ lehˇ ehˇ nya te loˇ. Ka li zaˬ pyeuꞈ-eu aˬ cawˬ-euˬ kʼaˬ dzeˇ zaˬ deuˬ-oˇ, nawˬ-euˬ miˬ zaˬ-ahˇ nawˇ maˬ ka kʼoꞈ nya-aˇ lehˇ ehˇ nya te loˇ.

Miˬyehˇ neh kuˇ doˆ-euˬ tsawˇ haˬ loꞈ-ehˇ dehꞈ-awˬ

¹⁷ Yawˬ gʼaˬ na luꞈ Miˬyehˇ neh kʼaˇ biˇ oꞈ nehˬ-euˬ loꞈ-ehˇ dehꞈ-awˇ, Miˬyehˇ neh bi kuˇ ngeh kʼaˇ pyeuꞈ luꞈ-eu loꞈ-ehˇ dehꞈ gʼeh-eu tsaˬ meh.

¹⁸ Baˆ kʼoˆ mehˬ dzaˬ yehˬ-euˬ tsawˇ haˬ tiˬ gʼaˬ Miˬyehˇ neh kuˇ-euˬ jeˬ-ahˇ ha geuꞈ gʼaˬ naˇ, baˆ kʼoˆ mehˬ dzaˬ yehˬ gʼaˬ-euˬ kʼoeˇ-ahˇ laˆ byoˆ-eu maˬ tsaˬ-a. Baˆ kʼoˆ mehˬ dzaˬ maˬ yehˬ-euˬ tsawˇ haˬ tiˬ gʼaˬ Miˬyehˇ neh kuˇ-euˬ jeˬ-ahˇ ha geuꞈ gʼaˬ naˇ, baˆ kʼoˆ mehˬ dzaˬ paˇ yehˬ-eu maˬ tsaˬ-a.

¹⁹ Aˬ jeˬ miˇ neh ehˇ naˇ, baˆ kʼoˆ mehˬ dzaˬ yehˬ-euˬ maˬ ehˇ, maˬ yehˬ-euˬ maˬ ehˇ, beu gaˇ duˬ maˬ jaˆ-a. Miˬyehˇ-euˬ zahˇ dawˬ kʼoꞈ dawˬ-ahˇ naˇ haˬ geuꞈ-eu tehꞈ-ehˇ gaˇ dahˇ tsoeˬ-eu meh.

²⁰ Yawˬ gʼaˬ na luꞈ Miˬyehˇ neh kuˇ-euˬ jeˬ-ahˇ ha geuꞈ ngeh kʼaˇ pyeuꞈ luꞈ-eu loꞈ-ehˇ dehꞈ gʼeh-eu tsaˬ meh.

²¹ Miˬyehˇ nawˬ-ahˇ kuˇ ngeh, nawˇ aˬ cawˬ-euˬ zaˬ kʼaˆ geuꞈ luꞈ te loˇ. Tiˬ jeˬ-iˬ maˬ ngeuˇ-aˇ. Ehˇ kʼawꞈ, nawˇ aˬ cawˬ-euˬ zaˬ kʼaˆ maˬ paˇ ya geuꞈ ni buˬ-iˇ-eu a kawˬ-aˬ za nya naˇ, muiˬ tehꞈ-a.

²² Aˬ jeˬ miˇ neh ehˇ naˇ, Sahˬpaˬ Miˬyehˇ neh kuˇ-euˬ zaˬ kʼaˆ tiˬ gʼaˬ-aˬ, Sahˬpaˬ Miˬyehˇ-euˬ buˬ-iˇ-euˬ tsawˇ haˬ pyeuꞈ-eu meh. Kʼoeˇ loꞈ-ehˇ duˇ ni, Ka li neh bi kuˇ-euˬ buˬ-iˇ-euˬ tsawˇ haˬ tiˬ gʼaˬ-aˬ, Ka liˬ-euˬ zaˬ kʼaˆ pyeuꞈ-eu meh.

²³ Miˬyehˇ neh naw maꞈ-ahˇ aˇ poeˬ biꞈ-awˇ zeuˇ tsehˆ gʼaˬ-euˬ meh. Kʼoeˇ miˇ neh, tsawˇ haˬ zaˬ-euˬ zaˬ kʼaˆ taˬ paˇ bi pyeuꞈ.

²⁴ Aˬ yuiꞈ aˬ nyiˇ Ka li zaˬ deuˬ-oˇ, yawˬ gʼaˬ na luꞈ Miˬyehˇ kuˇ ngeh kʼaˇ pyeuꞈ luꞈ-eu loꞈ-ehˇ Miˬyehˇ mehˬ shi dehꞈ gʼeh-awˬ.

Miˬ zaˬ maˬ sheuˬ-euˬ deuˬ hawˇ-eu miˬ coeˬ miˬ ma deuˬ gaˇ kawˆ naˇ haˬ-eu

²⁵ Naw maꞈ neh ngaˬ-ahˇ boꞈ naˇ haˬ laꞈ-euˬ smˇ miˇ maˬ iˇ ni jawˇ-eu zaˬ miˬ zaˬ deuˬ-euˬ gaˇ kawˆ-ahˇ taꞈ leˇ-awˇ, Sahˬpaˬ Miˬyehˇ-euˬ dawˬ ngaˇ maˬ za-aˬ. Ehˇ kʼawꞈ, Miˬyehˇ guiˬ lahˬ baˬ da neh jah coeˇ paˬ-ehˇ gʼeh-eu ngaˬ-euˬ nui noeˬ naw maꞈ-ahˇ biꞈ-eu ma.

²⁶ Nymˬ-mˇ keuˆ le luꞈ-eu shaˬ-eu zahˬ-eu aˇ yamˬ heu-ahˇ shaˇ sawˇ haw naˇ, tsawˇ haˬ aˬ geu gʼaˬ maˬ kaˬ yawˬ ha kʼaˇ pyeuꞈ luꞈ-eu loꞈ-ehˇ dehꞈ gʼeh-eu tsaˬ meh lehˇ ngaˇ noeˬ-eu ma.

²⁷ Miˬ zaˬ sheuˬ-euˬ ngeuˇ naˇ, byehˇ-eu taˬ paˇ leh jeh. Maˬ sheuˬ-euˬ ngeuˇ naˇ kʼawꞈ, sheuˬ-eu taˬ paˇ leh jeh.

²⁸ Nawˇ miˬ zaˬ sheuˬ naˇ, sheuˬ-euˬ kʼoeˇ iˬ baˇ mˇ-eu maˬ ngeuˇ-a. Kʼaˬ dzeˇ zaˬ maˬ baw-eu zaˬ miˬ zaˬ tiˬ gʼaˬ smˇ miˇ iˇ naˇ kʼawꞈ, smˇ miˇ iˇ-euˬ kʼoeˇ iˬ baˇ mˇ-eu maˬ ngeuˇ-a. Ehˇ kʼawꞈ, gʼeh nya naˇ, sheuˬ dahˬ dzaˬ-euˬ tsawˇ haˬ deuˬ miˇ tsaˬ heu kʼoeˇ taˆ ya tahˬ puˬ-eu shaˬ zahˬ kʼoeˇ deuˬ naw maꞈ kʼoeˇ taˆ maˬ bi keuˆ le mawꞈ nya.

²⁹ Aˬ yuiꞈ aˬ nyiˇ Ka li zaˬ deuˬ-oˇ, ngaˇ ehˇ mawꞈ-eu-aˬ, heu loꞈ-ehˇ ma. Aˇ saˬ saˬ-eu aˇ yamˬ keuˆ le-eu gʼawˬ myahˇ ni maˬ paˇ ca meh. Iˬ nah taꞈ naˇ, miˬ zaˬ baw-eu tsawˇ haˬ deuˬ kʼawꞈ, miˬ zaˬ maˬ baw-eu tsawˇ haˬ deuˬ loꞈ-ehˇ jawˇ-awˬ.

³⁰ Tsawˇ ngoeˇ ngoeˇ luꞈ-eu tsawˇ haˬ deuˬ kʼawꞈ, maˬ noeˬ shaˬ-eu loꞈ-ehˇ jawˇ-awˬ. Uiˇ luꞈ-eu tsawˇ haˬ deuˬ kʼawꞈ, laˬ kʼaˬ maˬ cehˇ-eu loꞈ-ehˇ jawˇ-awˬ.

³¹ Miˇ tsaˬ shiˬ shaˬ jiˇ-ahˇ taꞈ leˇ-eu gaˇ mˇ-eu deuˬ kʼawꞈ, tiˬ byah tiˬ loꞈ maˬ mˇ ni jawˇ-awˬ. Aˬ jeˬ miˇ neh ehˇ naˇ, miˇ tsaˬ heu-euˬ seuˆ dzeuꞈ aˇ gʼehˇ byoˆ le luꞈ meh.

³² Naw maꞈ-euˬ nui ma laꞈ kʼoeˇ kʼahˬ lahˇ-eu jeˬ maˬ bi ahˇ mawꞈ nya. Miˬ zaˬ maˬ baw-eu tsawˇ haˬ-aˬ, Sahˬpaˬ Miˬyehˇ-euˬ gaˇ-ahˇ kʼahˇ kʼoꞈ-eu nui ma ahˇ-eu meh. Aˬ jeˬ miˇ neh ehˇ naˇ, Sahˬpaˬ Miˬyehˇ nui kʼahˇ shiˇ-eu jeˬ-ahˇ aˬ yawꞈ mˇ mawꞈ-eu meh.

³³ Ehˇ kʼawꞈ, miˬ zaˬ baw-eu tsawˇ haˬ-aˬ, miˇ tsaˬ shiˬ shaˬ jiˇ gaˇ kawˆ-ahˇ kʼahˇ kʼoꞈ-eu nui ma ahˇ-eu meh. Aˬ jeˬ miˇ neh ehˇ naˇ, aˬ yawꞈ-euˬ miˬ zaˬ nui kʼahˇ shiˇ-eu jeˬ-ahˇ aˬ yawꞈ mˇ mawꞈ-eu meh.

³⁴ Kʼoeˇ miˇ neh, nui noeˬ nyiˬ jeˬ neh bi gʼeu taw taˬ-euˬ gaˇ duˇ-eu meh. Kʼaˬ dzeˇ zaˬ maˬ baw-eu zaˬ miˬ zaˬ, maˬ ngeuˇ naˇ zaˬ miˬ aˬ buˇ zaˬ guˬ-aˬ, Sahˬpaˬ Miˬyehˇ-euˬ gaˇ-ahˇ kʼahˇ kʼoꞈ-eu nui ma ahˇ-eu meh. Aˬ jeˬ miˇ neh ehˇ naˇ, aˬ yawꞈ nyiˬ jeˬ maˬ noeˬ ni, nui ma gʼawˇ mawˇ dawˬ tawˆ luꞈ Miˬyehˇ-ahˇ a nehˬ mawꞈ-eu meh. Ehˇ kʼawꞈ, kʼaˬ dzeˇ zaˬ baw-eu zaˬ miˬ zaˬ-aˬ, miˇ tsaˬ shiˬ shaˬ jiˇ gaˇ kawˆ-ahˇ kʼahˇ kʼoꞈ-eu nui ma ahˇ-eu meh. Aˬ jeˬ miˇ neh ehˇ naˇ, aˬ yawꞈ-euˬ kʼaˬ dzeˇ zaˬ nui kʼahˇ shiˇ-eu jeˬ-ahˇ aˬ yawꞈ mˇ mawꞈ-eu meh.

³⁵ Naw maꞈ gʼaˇ duˬ gaˇ dahˇ tsoeˬ ni ngaˇ heu loꞈ-ehˇ ehˇ-eu ma. Naw maꞈ-ahˇ kaˬ naˬ-eu maˬ ngeuˇ. Naw maꞈ-ahˇ tsaˬ-eu muiˬ-eu jeˬ bi mˇ mawꞈ-awˇ, nui ma gʼawˇ mawˇ dawˬ tawˆ luꞈ Sahˬpaˬ Miˬyehˇ-euˬ gaˇ gʼaˇ duˬ tiˬ byah tiˬ loꞈ a nehˬ nya ni ehˇ-eu jeˬ pyeuꞈ-eu ma.

³⁶ Tsawˇ haˬ nyiˬ gʼaˬ ngehˬ cawˬ tsehˆ gʼaˬ taˬ-euˬ kʼawꞈ, maˬ sheuˬ dahˬ dzaˬ ni byehˇ-euˬ ehˇ-awˬ. Kʼaˬ dzeˇ zaˬ gʼaˬ zaˬ miˬ zaˬ kʼoeˇ gʼaˬ-ahˇ maˬ sheuˬ nehˬ-euˬ gaˇ noeˬ kʼahˇ mahˇ-eu uˬ taꞈ, aˬ yawꞈ-euˬ nui loˆ-ahˇ aˬ yawꞈ maˬ gʼaˬ leˇ-ehˇ sheuˬ mawꞈ-eu nui ma ahˇ naˇ, sheuˬ-eu tsaˬ tehꞈ-a. Kʼoeˇ loꞈ-ehˇ sheuˬ-euˬ kʼoeˇ-aˬ, iˬ baˇ mˇ-eu maˬ ngeuˇ-a.

³⁷ Ehˇ kʼawꞈ, kʼaˬ dzeˇ zaˬ gʼaˬ aˬ cawˬ neh maˬ kaˬ naˬ nehˬ-euˬ gaˇ, nui ma ziꞈ dah ni noeˬ tsehˆ-eu uˬ taꞈ, yawˬ ha-euˬ nui loˆ-ahˇ yawˬ ha gʼaˬ leˇ-eu laꞈ kʼoeˇ, zaˬ miˬ zaˬ kʼoeˇ gʼaˬ-ahˇ maˬ sheuˬ ma lehˇ ngeuˇ naˇ, aˬ yawꞈ jahˇ-eu kʼoeˇ tsaˬ meh.

³⁸ Kʼoeˇ miˇ neh, miˬ zaˬ sheuˬ-eu tsawˇ haˬ-aˬ, yaw muiˬ jeˬ mˇ gaˇ duˇ-eu meh. Ehˇ kʼawꞈ, miˬ zaˬ maˬ sheuˬ-eu tsawˇ haˬ-aˬ, kʼoeˇ naˆ maˬ tseˇ muiˬ-eu jeˬ mˇ gaˇ duˇ-eu meh.

³⁹ Kʼaˬ dzeˇ zaˬ baw-eu zaˬ miˬ zaˬ-aˬ, yawˬ ha-euˬ kʼaˬ dzeˇ zaˬ kʼaˇ dehꞈ kʼoeˇ keuˆ ni yawˬ zahˇ yawˬ maˬ ya iˇ paˇ-a. Kʼaˬ dzeˇ zaˬ shiˇ dzeuˇ naˇ, yawˬ ha kʼaˇ dahˬ dzaˬ-iˇ mawꞈ gaˇ dahˬ dzaˬ-iˇ nya meh. Ehˇ kʼawꞈ, Ka li zaˬ-ahˇ tehꞈ-ehˇ ya dahˬ dzaˬ-iˇ meh.

⁴⁰ Ngaˬ neh noeˬ-euˬ loꞈ-ehˇ ya ehˇ naˇ, maˬ dahˬ dzaˬ-iˇ ni jawˇ-eu-aˬ, aˬ yawꞈ gʼaˇ duˬ zaˬ dzehˬ meh. Ngaˬ neh noeˬ-euˬ heu Miˬyehˇ-euˬ Yaw sahˇ-ahˇ tsaˬ ma lehˇ ngaˇ jah-eu ma.