1 Gawˇliˬtu 4 - Akha

Ka li-euˬ gaˇ mˇ-eu gʼaˬ kʼehˇ deuˬ

¹ Naw maꞈ nga maꞈ-ahˇ heu loꞈ-ehˇ noeˬ-eu tsaˬ meh. Nga maꞈ Ka liˬeuˬ gaˇ mˇ zaˬ deuˬ pyeuꞈ-awˇ, Miˬyehˇ-euˬ zaꞈ taˬ-euˬ yaw tsaˬ yaw dawˇ jeˬ-ahˇ haw piˇ luꞈ-eu tsawˇ haˬ meh lehˇ noeˬ-eu tsaˬ meh.

² Zaˬ kʼaˆ tiˬ gʼaˬ-aˬ, yawˬ ha-euˬ baw leˬ-ahˇ saˇ jaˇ maˬ ziꞈ-ehˇ maˬ gʼeh nya-a.

³ Naw maꞈ maˬ ehˇ, aˬ cawˬ maˬ ehˇ, ngaˬ-ahˇ yaw lehˬ poˆ gaˇ ngaˇ kʼahˬ maˬ lahˇ. Ngaˇ yawˬ haˇ yawˬ ha kʼawꞈ yaw lehˬ maˬ poˆ.

⁴ Ngaˬ-euˬ siˬ nya-eu nui ma shawˇ jehˆ ni jaˆ luꞈ ma. Heu loꞈ-ehˇ ehˇ ngeh, ngaˇ iˬ baˇ tiˬ pawꞈ-iˬ maˬ ahˇ lehˇ ehˇ mawꞈ-eu maˬ ngeuˇ. Ngaˬ-euˬ yaw lehˬ-ahˇ pyehˆ tseˇ-eu gʼaˬ-aˬ, Sahˬpaˬ Miˬyehˇ meh.

⁵ Kʼoeˇ miˇ neh, aˇ yamˬ maˬ keuˆ laˇ mi naˆ-ehˇ tsawˇ haˬ tiˬ gʼaˬ-ahˇ-iˬ naw maꞈ yaw lehˬ taˬ poˆ. Aˇ saˬ saˬ-eu yaˇ kʼaˬ daˇ-eu kʼoeˇ-aˬ, Sahˬpaˬ Miˬyehˇ oe keuˆ gaˇ ya dawˬ-eu meh. Yaw zahˇ laꞈ kʼoeˇ zaꞈ taˬ-euˬ jeˬ-ahˇ yaw shehꞈ laꞈ kʼoeˇ aˬ yawꞈ yuˇ doˆ laꞈ-awˇ, tsawˇ haˬ zaˬ-euˬ nui maˬ laꞈ kʼoeˇ zaꞈ taˬ-euˬ nui noeˬ-ahˇ aˬ yawꞈ pah dzeh tehꞈ-a. Kʼoeˇ ngeh jawˇ, tsawˇ haˬ yawˬ gʼaˬ na luꞈ-ahˇ oꞈ-eu geuˇ-eu loꞈ-ehˇ Miˬyehˇ ja ceuˬ nehˬ tehꞈ-a.

⁶ Aˬpawˇluˆ nga nyaꞈ-euˬ gaˇ kawˆ-ahˇ taꞈ leˇ-awˇ, naw maꞈ gʼaˇ duˬ shaˇ noeˬ-eu laꞈ kʼoeˇ ngaˇ heu loꞈ-ehˇ ehˇ-eu jeˬ pyeuꞈ-eu ma. Nga nyaꞈ-ahˇ haw-awˇ, Jaˇliꞈ laꞈ kʼoeˇ kʼaˇ boꞈ taˬ-euˬ loꞈ-ehˇ tehꞈ-ehˇ naw maꞈ caw teh-awˇ dehꞈ nya ni ehˇ-eu jeˬ pyeuꞈ-eu ma. Tiˬ gʼaˬ-ahˇ ja ceuˬ-awˇ tiˬ gʼaˬ-ahˇ ja doeˇ-eu jeˬ naw maꞈ jahˇ-eu maˬ tsaˬ-a.

⁷ Naw maꞈ aꞈ cawˬ taꞈ-ehˇ huiˬ dzehˬ mahˇ dzeh ni aˬ suˇ gʼaˬ neh jahˇ-euˬ ta. Naw maꞈ kʼaˇ jaˆ-eu jeˬ dawˬ tawˆ luꞈ Miˬyehˇ neh biꞈ laꞈ-euˬ maˬ ngeuˇ-a loˇ. Toˆ-ehˇ ngeuˇ naˇ, naw maꞈ kʼaˇ za-euˬ jeˬ Miˬyehˇ neh biꞈ laꞈ-euˬ laꞈ sawˬ maˬ ngeuˇ-eu loꞈ-ehˇ aˬ joˆ-ehˇ kʼahˬ sehˇ jehˆ nya te.

⁸ Naw maꞈ kʼaˇ loˬ-eu jeˬ dawˬ tawˆ luꞈ jaˆ jiˇ ma loˇ. Naw maꞈ smˇ muiˬ muiˬ laˇ gʼaˬ-euˬ ma loˇ. Nga maꞈ sahˬ paˬ sahˬ ma maˬ pyeuꞈ laˇ-euˬ kʼawꞈ, naw maꞈ sahˬ paˬ sahˬ ma pyeuꞈ laˇ-euˬ te loˇ. Muiˬ tehꞈ-a. Nga maꞈ gʼeh naw maꞈ nehˬ-ehˇ tiˬ kawˆ loꞈ-ehˇ sahˬ paˬ sahˬ ma ya geuꞈ ni, naw maꞈ-ahˇ sahˬ paˬ sahˬ ma bi pyeuꞈ laˇ mawꞈ miˇ-a.

⁹ Mˬ taˆ gʼaˬ kʼehˇ dawˬ tawˆ luꞈ hawˇ-eu miˇ tsaˬ zaˬ dawˬ tawˆ luꞈ bi haw niˇ gʼa-eu gʼaˇ duˬ, Miˬyehˇ-euˬ gʼaˬ kʼehˇ pyeuꞈ-eu nga maꞈ-ahˇ miˇ kʼahˬ zaˬ mehˬ shi bi sehꞈ-eu lehˇ, Miˬyehˇ neh aˬ cawˬ jeˬ nah nah saˬ bi jawˇ laꞈ-euˬ jeˬ nga lehˇ noeˬ miˇ-a.

¹⁰ Nga maꞈ-aˬ, Ka li gʼaˇ duˬ aˬ dzawˬ aˇ gah pyeuꞈ-eu ma. Ehˇ kʼawꞈ, naw maꞈ-aˬ, Ka li laꞈ kʼoeˇ zaˬ siˬ tsawˇ gahˇ ahˇ-eu tsawˇ haˬ meh. Nga maꞈ gʼaˬ baˬ-awˇ, naw maꞈ gʼaˬ kʼaˆ-eu meh. Nga maꞈ-ahˇ aˬ cawˬ taˬ nyiˇ dui dui-awˇ, naw maꞈ-ahˇ taˬ huiˬ-eu meh.

¹¹ Nymˬ-mˇ keuˆ ni nga maꞈ mehꞈ luꞈ shuꞈ luꞈ-eu ma. Mehˬ tsoeˬ dm-eu maˬ jaˆ-ehˇ, aˬ cawˬ neh bi diˬ bi diˬ-ehˇ, yuꞈ zaˇ jawˇ zaˇ maˬ baw ni shaˬ luꞈ-eu ma.

¹² Nga maꞈ gaˇ mˇ sehꞈ leꞈ miˇ-a. Nga maꞈ-ahˇ yaˬ kʼehˇ yaˬ laˇ gaˇ dawˬ ngehˬ gʼeh nehˬ-awˇ, nga maꞈ-ahˇ kʼehˬ laˇ kʼaˆ laˇ gaˇ oˇ oˇ-ehˇ daˬ-eu ma.

¹³ Nga maꞈ-ahˇ yehˬ bawˬ sehˇ lu-ehˇ ehˇ laˇ gaˇ, dawˬ nahˬ yu ni ngehˬ kʼoꞈ nehˬ-eu ma. Nga maꞈ-aˬ, miˇ tsaˬ heu kʼoeˇ taˆ aˬ cawˬ maˬ geuꞈ nahˇ-ehˇ shehˆ dzeh taˬ-euˬ yaw jawꞈ yaw laꞈ-ahˇ duˇ miˇ-a.

¹⁴ Naw maꞈ bi shaꞈ dawˇ-iˇ-eu lehˇ sahˬ boꞈ heu taꞈ ngaˇ boꞈ-eu maˬ ngeuˇ. Ngaˇ gaˬ dui dui-eu zaˬ deuˬ loꞈ-ehˇ naw maꞈ-ahˇ ngaˇ mehˬ-eu tsoˆ-eu jeˬ pyeuꞈ-eu ma.

¹⁵ Aˬ jeˬ miˇ neh ehˇ naˇ, zaˬ yaw nyiˇ-ahˇ bo saˆ-eu tsawˇ haˬ loꞈ-ehˇ naw maꞈ-ahˇ sheuˬ gʼeh-eu saˬ laˬ deuˬ maˬ gui jiˇ coeˇ ni jawˇ kʼawꞈ, naw maꞈ-euˬ aˬ da tiˬ gʼaˬ tehꞈ meh. Ngaˇ-aˬ, naw maꞈ jawˇ gaˇ Laˬ kʼaˬ cehˇ-eu Guiˬ lahˬ dawˬ hehˇ keuˆ laꞈ-euˬ gʼaˬ pyeuꞈ-eu miˇ neh, ka li laꞈ kʼoeˇ naw maꞈ-euˬ aˬ da pyeuꞈ laˇ-euˬ ma.

¹⁶ Kʼoeˇ miˇ neh, ngaˬ-ahˇ dzaw geuꞈ-eu gʼaˇ duˬ naw maꞈ-ahˇ ngaˇ shaˇ-eu ma.

¹⁷ Ngaˇ kʼoeˇ loꞈ-ehˇ noeˬ-awˇ, Sahˬpaˬ Miˬyehˇ laꞈ kʼoeˇ ngaˇ gaˬ dui dui-eu saˇ jaˇ ziꞈ-eu aˬ li pyeuꞈ-eu Tiˆmoˇseˬ-ahˇ naw maꞈ jawˇ gaˇ kʼehˇ gʼeh leꞈ-euˬ ma. Ngaˇ caw teh luꞈ-eu gaˇ ma pyeuꞈ-eu Ka li laꞈ kʼoeˇ aˬ joˆ-ehˇ ya dehꞈ ya jawˇ-eu gaˇ kawˆ kʼoeˇ hmˬ-ahˇ naw maꞈ maˬ ya ngehˇ ni aˬ yawꞈ sheuˬ gʼeh nehˬ laꞈ tehꞈ-a. Gaˇ kawˆ kʼoeˇ hmˬ-ahˇ ka li zaˬ aˇ muˇ kʼaˇ jaˆ gaˇ ngaˇ mehˬ-eu ma.

¹⁸ Naw maꞈ jawˇ gaˇ ngaˇ maˬ oe-aˇ lehˇ noeˬ-awˇ, naw maꞈ tiˬ paˆ na deuˬ nui ma huiˬ luꞈ meh.

¹⁹ Sahˬ paˬ Miˬyehˇ nui ma tsaˬ naˇ, gʼawˬ myahˇ maˬ gʼeh-ehˇ naw maꞈ jawˇ gaˇ ngaˇ oe-awˇ nui ma huiˬ-eu kʼoeˇ deuˬ ngehˬ-eu dawˬ-ahˇ naˇ haˬ-eu tehꞈ-ehˇ maˬ ngeuˇ ni, aˬ yawꞈ maꞈ baoˬ aˇ naˆ ni ahˇ nga lehˇ ngaˇ haw ma.

²⁰ Aˬ jeˬ miˇ neh ehˇ naˇ, Miˬyehˇ Miˇkʼahˬ-aˬ, dawˬ ngehˬ gaˇ taꞈ-eu maˬ ngeuˇ-a. Baoˬ ahˇ gaˇ taꞈ-eu meh.

²¹ Naw maꞈ aˬ geu jeˬ mawꞈ-eu nya. Ngaˇ daˇ cuiˇ yuˇ-awˇ oe gaˇ geuꞈ mawꞈ-eu nya loˇ. Maˬ ngeuˇ naˇ, gʼoeˇ-eu gaˬ-eu jeˬ hawˇ-eu nui nahˬ nui yu yuˇ-awˇ oe gaˇ geuꞈ mawˬ-eu nya loˇ.