1 Gawˇliˬtu 3 - Akha

Miˬyehˇ-euˬ zaˬ kʼaˆ deuˬ

¹ Aˬ yuiꞈ aˬ nuiˇ Ka li zaˬ deuˬ-oˇ, Yaw sahˇ Miˬyehˇ za-euˬ tsawˇ haˬ deuˬ-ahˇ mehˬ-eu loꞈ-ehˇ naw maꞈ-ahˇ ngaˇ maˬ mehˬ nya-a. Miˇ tsaˬ zaˬ deuˬ hawˇ-eu Ka li zaˬ-euˬ jah-eu paw zaˬ yaw nyiˇ-ahˇ duˇ-eu deuˬ-ahˇ mehˬ-eu loꞈ-ehˇ tehꞈ-ehˇ naw maꞈ-ahˇ ngaˇ ya mehˬ-eu meh.

² Naw maꞈ-ahˇ dzaˇ yaw gʼahˇ maˬ bi dzaˬ ni, mawˇ neˇ aˬ coeˇ tehꞈ-ehˇ bi dawˇ-eu ma. Aˬ jeˬ miˇ neh ehˇ naˇ, naw maꞈ dzaˇ yaw gʼahˇ maˬ dzaˬ nya laˇ-aˬ siˬ. Nymˬ-mˇ keuˆ ni maˬ dzaˬ nya laˇ-aˬ siˬ.

³ Aˬ jeˬ miˇ neh ehˇ naˇ, miˇ tsaˬ zaˬ deuˬ dehꞈ-eu loꞈ-ehˇ naw ma dehꞈ luꞈ-a siˬ. Naw maꞈ yaw kaˬ myaˆ naˆ-awˇ iˬ dehˬ iˬ ceh jaˆ-eu kʼoeˇ-aˬ, naw maꞈ miˇ tsaˬ heu-ahˇ taꞈ-awˇ miˇ tsaˬ zaˬ deuˬ dehꞈ-eu aˇ tiˆ-ahˇ dehꞈ luꞈ-eu gaˇ kawˆ saˇ kiˇ pyeuꞈ-eu meh.

⁴ Naw maꞈ yaw kaˬ, “Ngaˇ-aˬ, Pawˇluˆ-ahˇ taꞈ-eu ma.” “Ngaˇ-aˬ, Aˬpawˇluˆ-ahˇ taꞈ-eu ma” lehˇ tiˬ gʼaˬ tiˬ jeˬ ehˇ-eu kʼoeˇ-aˬ, naw maꞈ miˇ tsaˬ zaˬ loꞈ-ehˇ dehꞈ-eu miˇ neh maˬ ngeuˇ-a loˇ.

⁵ Aˬpawˇluˆ aˬ suˇ gʼaˬ-a. Pawˇluˆ aˬ suˇ gʼaˬ-a. Nga nyaꞈ-aˬ, naw maꞈ jah laˇ ni sheuˬ gʼeh nehˬ-eu Miˬyehˇ-euˬ zaˬ kʼaˆ pyeuꞈ-eu tehꞈ ma. Nyiˬ gʼaˬ luꞈ yawˬ ha-ahˇ Miˬyehˇ neh kʼaˇ bi mˇ laꞈ-euˬ jeˬ mˇ-eu tehꞈ ma.

⁶ Ngaˇ-aˬ, ka-eu gʼaˬ pyeuꞈ-awˇ, Aˬpawˇluˆ-aˬ, iˇ cuꞈ shehˬ-eu gʼaˬ pyeuꞈ-eu meh. Ehˇ kʼawꞈ, aˇ bawˬ mehˇ laˇ ni jahˇ-eu gʼaˬ-aˬ, Miˬyehˇ meh.

⁷ Ka-eu gʼaˬ hawˇ-eu iˇ cuꞈ shehˬ-eu gʼaˬ-aˬ, ehˇ nyaꞈ nyeuˆ-eu maˬ ngeuˇ-a. Ehˇ kʼawꞈ, aˇ bawˬ mehˇ laˇ ni jahˇ-eu gʼaˬ pyeuꞈ-eu Miˬyehˇ-ahˇ ja ceuˬ dui dui paˬ-ehˇ gʼeh-eu meh.

⁸ Ka-eu gʼaˬ hawˇ-eu iˇ cuꞈ shehˬ-eu gʼaˬ beu gaˇ duˬ maˬ jaˆ-a. Nyiˬ gʼaˬ luꞈ-ahˇ yawˬ ha neh kʼaˇ mˇ-euˬ loꞈ-ehˇ geuˇ ni Miˬyehˇ laꞈ sawˬ biꞈ nehˬ tehꞈ-a.

⁹ Aˬ jeˬ miˇ neh ehˇ naˇ, nga nyaꞈ-aˬ, Miˬyehˇ-euˬ gaˇ-ahˇ tiˬ kawˆ loꞈ-ehˇ mˇ luꞈ-eu gaˇ mˇ cawˬ pyeuꞈ-eu ma. Naw maꞈ-aˬ, Miˬyehˇ-euˬ deh yaˇ meh. Naw maꞈ-aˬ, Miˬyehˇ tsoˆ luꞈ-eu nymˇ meh.

¹⁰ Miˬyehˇ neh biꞈ laꞈ-euˬ guiˬ lahˬ-ahˇ gʼoe-awˇ, nymˇ tsoˆ nya dui dui-eu tsawˇ haˬ-euˬ gaˇ ngaˇ mˇ-awˇ, dawˬ pehˬ gawˬ dahˬ beh-awˇ, yawˬ gʼaˬ yawˬ neh paˇ gawˬ daˆ gʼeh leꞈ-euˬ meh. Nyiˬ gʼaˬ luꞈ yaw muiˬ paˬ-ehˇ shaˇ noeˬ-awˇ ya gawˬ tehꞈ-a.

¹¹ Aˬ jeˬ miˇ neh ehˇ naˇ, Miˬyehˇ neh Yeˬsuˇ Ka li-ahˇ tehꞈ-ehˇ dawˬ pehˬ gawˬ taˬ-euˬ meh. Dawˬ pehˬ yawˬ hmˬ yawˬ maˬ gawˬ paˇ nya-a.

¹² Tiˬ paˆ na deuˬ-aˬ, shuiˇ, pyuˇ, kʼaˬ lo sehˇ, heu deuˬ yuˇ-awˇ dawˬ pehˬ gawˬ taˬ-euˬ kʼoeˇ taˆ gawˬ daˆ gʼeh tehꞈ-a. Tiˬ paˆ na deuˬ-aˬ, daˇ kawˬ, yaˇ moꞈ, gʼo yoeˬ, heu deuˬ yuˇ-awˇ dawˬ pehˬ gawˬ taˬ-euˬ kʼoeˇ taˆ gawˬ daˆ gʼeh tehꞈ-a.

¹³ Aˬ yawꞈ gʼaˬ yawꞈ, yawˬ ha neh mˇ-euˬ muiˬ-eu doeˇ-eu gaˇ kawˆ-ahˇ, Ka li-euˬ Aˇ nah keuˆ le-awˇ pah mehˬ le ngeh ya mawˇ duˬ tehꞈ-a. Aˬ jeˬ miˇ neh ehˇ naˇ, Aˇ nah kʼoeˇ nah keuˆ le ngeh, yawˬ gʼaˬ na luꞈ kʼaˇ mˇ taˬ-euˬ jeˬ-ahˇ miˬ dzaˬ neh bi pah mehˬ tehꞈ-a. Muiˬ muiˬ doeˇ doeˇ miˬ dzaˬ neh bi lawˬ haw-awˇ, bi mawˇ duˬ laˇ tehꞈ-a.

¹⁴ Dawˬ pehˬ gawˬ taˬ-euˬ kʼoeˇ taˆ gawˬ daˆ taˬ-euˬ jeˬ-ahˇ miˬ dzaˬ maˬ puiˆ dzaˬ nya naˇ, nymˇ gawˬ-euˬ kʼoeˇ gʼaˬ laꞈ sawˬ za tehꞈ-a.

¹⁵ Ehˇ kʼawꞈ, tsawˇ haˬ tiˬ gʼaˬ na neh gawˬ taˬ-euˬ gaˇ miˬ dzaˬ neh puiˆ dzaˬ naˇ, aˬ yawꞈ neh mˇ taˬ-euˬ jeˬ smˬ-iˇ tehꞈ-a. Aˬ yawꞈ-euˬ gʼawˇ mawˇ law nmˇ-aˬ, miˬ dzaˬ puiˆ luꞈ gaˇ bi gʼeu doˆ-awˇ law-iˇ-euˬ loꞈ-ehˇ ya law-iˇ tehꞈ-a.

¹⁶ Naw maꞈ-aˬ, Miˬyehˇ-euˬ uˬ duˬ tahˬ nymˇ pyeuꞈ-awˇ, Miˬyehˇ-euˬ Yaw sahˇ naw maꞈ laꞈ kʼoeˇ jawˇ-eu gaˇ kawˆ naw maꞈ siˬ duˬ luꞈ meh.

¹⁷ Kʼoeˇ miˇ neh, tsawˇ haˬ tiˬ gʼaˬ na Miˬyehˇ-euˬ uˬ duˬ tahˬ nymˇ-ahˇ laˆ cawˆ naˇ, aˬ yawꞈ-ahˇ Miˬyehˇ laˆ cawˆ tehꞈ-a. Aˬ jeˬ miˇ neh ehˇ naˇ, Miˬyehˇ-euˬ uˬ duˬ tahˬ nymˇ-aˬ, muiˬ-eu shawˇ-eu jeˬ pyeuꞈ-awˇ, naw maꞈ-aˬ, uˬ duˬ tahˬ nymˇ kʼoeˇ meh.

¹⁸ Tsawˇ haˬ tiˬ gʼaˬ-iˬ yawˬ haˇ yawˬ ha jaˬ myawꞈ myawꞈ-eu maˬ tsaˬ-a. Tsawˇ haˬ tiˬ gʼaˬ na miˇ tsaˬ heu kʼoeˇ taˆ zaˬ siˬ tsawˇ gahˇ ahˇ ma lehˇ noeˬ naˇ, aˬ diˇ aˬ maˇ tsawˇ gahˇ ahˇ-eu tsawˇ haˬ pyeuꞈ laˇ nya ni, tsawˇ gahˇ maˬ ahˇ-eu tsawˇ haˬ jeˬ huˬ pyeuꞈ-iˇ-eu tsaˬ meh.

¹⁹ Aˬ jeˬ miˇ neh ehˇ naˇ, miˇ tsaˬ heu kʼoeˇ taˆ zaˬ siˬ tsawˇ gahˇ lehˇ sawˇ taˬ-euˬ jeˬ-aˬ, Miˬyehˇ mehˬ shi tiˬ jeˬ-iˬ gaˇ dahˇ maˬ tsoeˬ-a. “Zaˬ siˬ tsawˇ gahˇ ahˇ-eu deuˬ gahˇ dui dui luꞈ gaˇ Miˬyehˇ lahˇ ju kʼmˇ paꞈ-eu meh” lehˇ, Jaˇliꞈ laꞈ kʼoeˇ boꞈ taˬ-euˬ jaˆ meh.

²⁰ “Zaˬ siˬ tsawˇ gahˇ ahˇ-eu deuˬ-euˬ nui noeˬ-aˬ, yawꞈ ngehꞈ meh lehˇ Miˬyehˇ siˬ nya meh” lehˇ, tiˬ tsahˇ paˇ boꞈ taˬ-euˬ jaˆ-eu meh.

²¹ Tsawˇ haˬ zaˬ-euˬ nui gahˇ gaˇ kawˆ tiˬ gʼaˬ-iˬ kʼahˬ sehˇ jehˆ-eu maˬ tsaˬ-a. Aˬ diˇ ehˇ naˇ, yawˬ jeˬ na luꞈ naw maꞈ-ahˇ oꞈ-eu meh.

²² Pawˇluˆ maˬ ehˇ, Aˬpawˇluˆ maˬ ehˇ, Beˬtuˆluˆ maˬ ehˇ, miˇ tsaˬ tahˬ kʼawˇ maˬ ehˇ, dehꞈ-eu hawˇ-eu shiˇ-eu maˬ ehˇ, heu ziˇ hawˇ-eu aˬ kaˇ kaˇ ziˇ maˬ ehˇ, dawˬ tawˆ luꞈ naw maꞈ-ahˇ oꞈ-eu meh.

²³ Naw maꞈ-aˬ, Ka li-euˬ pyeuꞈ-awˇ, Ka liˬaˬ, Miˬyehˇ-euˬ pyeuꞈ-eu meh.