1 Gawˇliˬtu 2 - Akha

Kamˇ shiˇ-euˬ Ka li gaˇ kawˆ Guiˬ lahˬ dawˬ

¹ Aˬ yuiꞈ aˬ nyiˇ Ka li zaˬ deuˬ-oˇ, ngaˇ naw maꞈ jawˇ gaˇ oe-awˇ Miˬyehˇ-euˬ zaꞈ taꞈ-euˬ yaw tsaˬ yaw dawˇ jeˬ gaˇ kawˆ mehˬ le ngeh, za siˬ tsawˇ gahˇ naꞈ dui dui-eu dawˬ yaw huiˬ ngehˬ le-euˬ maˬ ngeuˇ.

² Ngaˇ naw maꞈ nehˬ-ehˇ jawˇ luꞈ ngeh, Yeˬsuˇ Ka li gaˇ kawˆ hawˇ-eu aˬ yawꞈ laꞈ yaꞈ kʼoeˇ taˆ kamˇ shiˇ-euˬ gaˇ kawˆ kʼoeˇ maˬ ngeuˇ naˇ, nui jeˬ dawˬ tawˆ luꞈ-ahˇ ngehˇ byoˆ jiˇ ma lehˇ nui ma laꞈ kʼoeˇ noeˬ tsehˆ-euˬ ma.

³ Kʼoeˇ miˇ neh, naw maꞈ jawˇ gaˇ ngaˇ oe ngeh, ngaˇ nui ma baˬ dui dui-awˇ, guˆ dui dui-eu laꞈ kʼoeˇ yaw dzuˬ dzuˬ-euˬ ma.

⁴ Ngaˬ neh ngehˬ-euˬ tmˇ-euˬ dawˬ deuˬ hawˇ-eu dawˬ mehˬ mehˬ-euˬ gaˇ kawˆ-aˬ, tsawˇ haˬ zaˬ-euˬ zaˬ siˬ tsawˇ gahˇ-ahˇ gʼoe-awˇ mehˇ shuiˇ shuiˇ le-euˬ maˬ ngeuˇ. Yaw sahˇ Miˬyehˇ-euˬ baoˬ gaˇ kawˆ saˇ kiˇ kamˬ le-euˬ tehꞈ ma.

⁵ Kʼoeˇ miˇ neh, naw maꞈ-euˬ jah-eu jeˬ-aˬ, tsawˇ haˬ zaˬ-euˬ zaˬ siˬ tsawˇ gahˇ kʼoeˇ taˆ ziꞈ-eu maˬ ngeuˇ-a. Miˬyehˇ-euˬ baoˬ uˬ moˆ ziꞈ-eu meh.

Miˬyehˇ-euˬ zaˬ siˬ nui gahˇ

⁶ Guiˬ lahˬ saꞈ laˇ paw gʼaˬ kʼaˆ loꞈ laˇ-euˬ tsawˇ haˬ deuˬ-ahˇ-aˬ, zaˬ siˬ tsawˇ gahˇ-euˬ dawˬ mehˬ-euˬ ma. Ehˇ kʼawꞈ, zaˬ siˬ tsawˇ gahˇ kʼoeˇ-aˬ, miˇ tsaˬ heu-ahˇ taꞈ-eu zaˬ siˬ tsawˇ gahˇ maˬ ngeuˇ-a. Piˬ-iˇ byoˆ-iˇ luꞈ-eu miˇ tsaˬ heu kʼoeˇ taˆ uˆ lahˇ luꞈ-eu baoˬ kʼoeˇ deuˬ-euˬ zaˬ siˬ tsawˇ gahˇ kʼawꞈ maˬ ngeuˇ-a.

⁷ Ngaˇ mehˬ luꞈ-eu zaˬ siˬ tsawˇ gahˇ kʼoeˇ-aˬ, Miˬyehˇ-euˬ zaꞈ taˬ-euˬ zaˬ siˬ tsawˇ gahˇ meh. Zaˬ siˬ tsawˇ gahˇ kʼoeˇ-aˬ, tsawˇ haˬ zaˬ deuˬ maˬ siˬ nya-eu zaꞈ taˬ-euˬ jeˬ pyeuꞈ-eu meh. Ehˇ kʼawꞈ, aˬ dui yaw shehꞈ kʼahˬ sehˇ bi za-eu lehˇ, miˇ tsaˬ tahˬ kʼawˇ maˬ beh mi naˆ-ehˇ zaˬ siˬ tsawˇ gahˇ kʼoeˇ-ahˇ Miˬyehˇ tseˇ doˆ taˬ-euˬ meh.

⁸ Miˇ tsaˬ heu kʼoeˇ taˆ uˆ lahˇ-eu sahˬ paˬ sahˬ ma deuˬ zaˬ siˬ tsawˇ gahˇ kʼoeˇ-ahˇ tiˬ gʼaˬ-iˬ maˬ siˬ nya-aˬ. Siˬ nya law nmˇ-aˬ, yaw shehꞈ kʼahˬ sehˇ huiˬ dui dui-eu Sahˬpaˬ-ahˇ laꞈ yaꞈ kʼoeˇ taˆ maꞈ taꞈ sehꞈ-aˇ.

⁹ Ehˇ kʼawꞈ, Jaˇliꞈ laꞈ kʼoeˇ heu loꞈ-ehˇ ehˇ taˬ-euˬ jaˆ-eu meh. “Myaˆ nuiˆ maˬ mawˇ haw-ehˇ, naˬ bawˇ maˬ gaˬ haw-euˬ, maˬ noeˬ doˆ coeˇ-eu jeˬ, Miˬyehˇ-ahˇ gaˬ-euˬ deuˬ gʼaˇ duˬ, Miˬyehˇ lehˬ hmˬ laˆ saˆ-euˬ meh.”

¹⁰ Ehˇ kʼawꞈ, Miˬyehˇ aˬ yawꞈ neh zaꞈ taˬ-euˬ jeˬ, aˬ yawꞈ-euˬ Yaw sahˇ Miˬyehˇ-ahˇ gʼoe-awˇ aˬ dui-ahˇ bi siˬ bi mawˇ laꞈ-euˬ meh. Aˬ jeˬ miˇ neh ehˇ naˇ, Yaw sahˇ Miˬyehˇ-aˬ, yawˬ jeˬ na luꞈ-ahˇ poˆ tseˇ-eu meh. Naꞈ dui dui gaˇ zaꞈ taˬ-euˬ Miˬyehˇ-euˬ nui kʼahˇ-ahˇ kʼawꞈ, poˆ tseˇ doˆ-eu meh.

¹¹ Tsawˇ haˬ tiˬ gʼaˬ-euˬ nui noeˬ-ahˇ yawˬ ha laꞈ kʼoeˇ jawˇ-eu yaw sahˇ maˬ ngeuˇ naˇ maˬ siˬ jiˇ nya-eu loꞈ-ehˇ, Miˬyehˇ-euˬ nui noeˬ-ahˇ kʼawꞈ, Miˬyehˇ-euˬ Yaw sahˇ maˬ ngeuˇ naˇ maˬ siˬ jiˇ nya-a.

¹² Aˬ dui-aˬ, miˇ tsaˬ heu-euˬ yaw sahˇ za taˬ-euˬ maˬ ngeuˇ. Miˬyehˇ neh aˬ dui-ahˇ kʼaˇ biꞈ laꞈ-euˬ jeˬ-ahˇ aˬ dui siˬ nya jiˇ ni, Miˬyehˇ neh kʼehˇ gʼeh leꞈ-euˬ Yaw sahˇ Miˬyehˇ za taˬ-euˬ ma.

¹³ Kʼoeˇ miˇ neh, tsawˇ haˬ zaˬ-euˬ zaˬ siˬ tsawˇ gahˇ neh mehˬ nehˬ laꞈ-euˬ dawˬ aˬ dui ngehˬ-eu tmˇ-eu maˬ ngeuˇ. Yaw sahˇ Miˬyehˇ neh mehˬ nehˬ tsoˆ nehˬ laꞈ-euˬ dawˬ ngehˬ-eu tmˇ-eu ma. Kʼoeˇ loꞈ-ehˇ ngehˬ-eu tmˇ-eu laꞈ kʼoeˇ, Yaw sahˇ miˬyehˇ za taˬ-euˬ tsawˇ haˬ deuˬ saꞈ laˇ paw taꞈ leˇ-eu yaw tsaˬ yaw dawˇ jeˬ-ahˇ gʼoˆ shaw nya ni ja mehˬ-eu ma.

¹⁴ Yaw sahˇ Miˬyehˇ maˬ za-euˬ tsawˇ haˬ aˬ geu gʼaˬ maˬ kaˬ, Miˬyehˇ-euˬ Yaw sahˇ neh biꞈ-euˬ jeˬ-ahˇ maˬ za nya-a. Kʼoeˇ loꞈ-ehˇ gʼeh-eu tsawˇ haˬ-aˬ, Miˬyehˇ-euˬ Yaw sahˇ neh biꞈ-euˬ jeˬ-ahˇ maˬ siˬ nya-ehˇ, aˬ yawꞈ-euˬ gʼaˇ duˬ tiˬ pawꞈ-iˬ gaˇ dahˇ maˬ tsoeˬ-a. Aˬ jeˬ miˇ neh ehˇ naˇ, kʼoeˇ-aˬ, gaˇ dahˇ tsoeˬ-eu meh lehˇ guiˬ lahˬ saꞈ laˇ paw neh tehꞈ-ehˇ ehˇ tsehˆ nya-eu meh.

¹⁵ Yaw sahˇ Miˬyehˇ kʼaˇ za taˬ-euˬ tsawˇ haˬ-aˬ, yawˬ jeˬ na luꞈ-ahˇ gaˇ dahˇ tsoeˬ-eu maˬ tsoeˬ-eu tseˇ paˆ nya-eu meh. Ehˇ kʼawꞈ, kʼoeˇ loꞈ-ehˇ gʼeh-eu tsawˇ haˬ-ahˇ aˬ cawˬ tiˬ gʼaˬ-iˬ maˬ tseˇ paˆ duˬ nya-a.

¹⁶ Jaˇliꞈ laꞈ kʼoeˇ heu loꞈ-ehˇ ehˇ taˬ-euˬ meh. “Sahˬpaˬ Miˬyehˇ-euˬ nui ma-ahˇ, siˬ du nya-eu aˬ suˇ jawˇ ta. Yawꞈ-ahˇ nui noeˬ nui duˇ biꞈ-awˇ, ja mehˬ nya-eu aˬ suˇ jawˇ ta.” Ehˇ kʼawꞈ, aˬ dui-aˬ, Ka li-euˬ nui ma pi luꞈ-eu tsawˇ haˬ ma.