1 Gawˇliˬtu 15 - Akha

Ka li gʼoꞈ dehꞈ laˇ-euˬ gaˇ kawˆ

¹ Aˬ yuiꞈ aˬ nyiˇ Ka li zaˬ deuˬ-oˇ, nymˬ-mˇ poˆ jawˇ-aˬ, ngaˬ neh naw maꞈ-ahˇ mehˬ nehˬ yaꞈ-euˬ Laˬ kʼaˬ cehˇ-eu Guiˬ lahˬ dawˬ paˇ ja noeˬ nehˬ-eu ma. Ngaˬ neh mehˬ-euˬ kʼoeˇ naw maꞈ ha geuꞈ gʼaˬ-awˇ, kʼoeˇ-euˬ kʼoeˇ taˆ naw maꞈ-euˬ jah-eu jeˬ ziꞈ luꞈ meh.

² Ngaˬ neh naw maꞈ-ahˇ mehˬ-euˬ kʼoeˇ-aˬ, Laˬ kʼaˬ cehˇ-eu Guiˬ lahˬ dawˬ meh. Naw maˬ yawꞈ ngehꞈ yawꞈ kuˬ-ehˇ jah-eu maˬ ngeuˇ lawˬ naˇ, Laˬ kʼaˬ cehˇ-eu Guiˬ lahˬ dawˬ-ahˇ ziꞈ dah ni tuˆ tehˬ taˬ-euˬ baˬ da neh ka kʼoꞈ-eu jeˬ za tehꞈ-a.

³ Ngaˬ neh za taˬ-euˬ huiˬ dui dui-eu gaˇ kawˆ naw maꞈ-ahˇ ngaˇ biꞈ nehˬ-euˬ ma. Kʼoeˇ-aˬ, Jaˇliꞈ laꞈ kʼoeˇ boꞈ taˬ-euˬ loꞈ-ehˇ, aˬ dui-euˬ iˬ baˇ gʼaˇ duˬ Ka li shiˇ-euˬ gaˇ kawˆ hawˇ-eu,

⁴ Jaˇliꞈ laꞈ kʼoeˇ boꞈ taˬ-euˬ loꞈ-ehˇ aˬ yawꞈ shiˇ-awˇ baꞈ pahˬ gʼaˬ ngeh, smˬ nah keuˆ laˇ naˇ Miˬyehˇ neh paˇ bi gʼoꞈ dehꞈ laˇ-euˬ gaˇ kawˆ hawˇ-eu,

⁵ kʼoeˇ naˇ, Beˬtuˆluˆ hawˇ-eu zaˬ lahˇ tseˇ nyiꞈ gʼaˬ-ahˇ bi mawˇ le-euˬ gaˇ kawˆ meh.

⁶ Kʼoeˇ naˇ, aˬ yawꞈ mehˬ nah caw teh-eu tsawˇ haˬ ngaˬ heˇ gʼaˬ dzehˬ ni-ahˇ, aˬ yawꞈ tiˬ yamˬ-ahˇ tehꞈ-ehˇ tsaˬ ni bi mawˇ le-euˬ meh. Tsawˇ haˬ kʼoeˇ deuˬ tiˬ paˆ na deuˬ shiˇ dzeuˇ-euˬ kʼawꞈ, myaˬ tiˬ paˆ iˬ nah keuˆ ni dehꞈ luꞈ-a siˬ.

⁷ Kʼoeˇ naˇ, Yaˬkoˆ-ahˇ bi mawˇ le-awˇ, gʼaˬ kʼehˇ dawˬ tawˆ luꞈ-ahˇ bi mawˇ le-euˬ meh.

⁸ Ngaˇ-aˬ, dehꞈ le yamˬ maˬ tsaˬ laˇ mi naˆ-ehˇ dehꞈ le-euˬ tsawˇ haˬ tiˬ gʼaˬ pyeuꞈ-eu kʼawꞈ, aˇ saˬ saˬ laˇ ngeh aˬ yawꞈ ngaˬ-ahˇ bi mawˇ le-euˬ meh.

⁹ Aˬ jeˬ miˇ neh ehˇ naˇ, gʼaˬ kʼehˇ dawˬ tawˆ luꞈ laꞈ kʼoeˇ ngaˇ aˬ cawˬ naˆ maˬ tseˇ teˬ-eu gʼaˬ pyeuꞈ-eu ma. Miˬyehˇ-euˬ Ka li zaˬ aˇ muˇ-ahˇ kʼehˬ haw kʼaˆ haw-euˬ tsawˇ haˬ pyeuꞈ-eu miˇ neh, gʼaˬ kʼehˇ lehˇ bi kuˇ-eu kʼawꞈ maˬ geuˇ nya.

¹⁰ Ehˇ kʼawꞈ, Miˬyehˇ-euˬ guiˬ lahˬ baˬ da neh iˬ nah ngaˇ heu loꞈ-ehˇ ya pyeuꞈ laˇ-awˇ, aˬ yawꞈ neh ngaˬ-ahˇ biꞈ leꞈ-euˬ guiˬ lahˬ-aˬ, yawꞈ ngehꞈ maˬ ngeuˇ-a. Ehˇ kʼawꞈ, gʼaˬ kʼehˇ nui deuˬ naˆ maˬ tseˇ ngaˇ gaˇ mˇ-eu leh jeh dzehˬ-euˬ ma. Kʼoeˇ loꞈ-ehˇ mˇ-eu kʼoeˇ-aˬ, yawˬ haˇ yawˬ ha mˇ-eu maˬ ngeuˇ. Miˬyehˇ-euˬ guiˬ lahˬ ngaˬ nehˬ-ehˇ mˇ luꞈ-eu meh.

¹¹ Kʼoeˇ miˇ neh, ngaˇ mehˬ-eu maˬ ehˇ, aˬ yawꞈ maꞈ mehˬ-eu maˬ ehˇ, gaˇ kawˆ heu hmˬ tehꞈ-ehˇ mehˬ-awˇ, gaˇ kawˆ heu hmˬ-ahˇ naw maꞈ jah luꞈ-eu meh.

Aˬ dui gʼoꞈ dehꞈ laˇ-eu gaˇ kawˆ

¹² Ka li-ahˇ shiˇ-euˬ gaˇ bi gʼoꞈ dehꞈ laˇ-euˬ gaˇ kawˆ nga maꞈ mehˬ luꞈ-eu-aˬ, naw maꞈ tiˬ paˆ na deuˬ shiˇ-euˬ tsawˇ haˬ-ahˇ maˬ bi gʼoꞈ dehꞈ laˇ nya-aˇ lehˇ aˬ joˆ-ehˇ ehˇ nya te.

¹³ Naw maꞈ ehˇ-eu loꞈ-ehˇ ngeuˇ naˇ, Ka li-ahˇ bi gʼoꞈ dehꞈ laˇ-euˬ meh lehˇ ehˇ-eu kʼoeˇ kʼawꞈ maˬ ngeuˇ-aˇ.

¹⁴ Ka li-ahˇ bi gʼoꞈ dehꞈ laˇ-euˬ meh lehˇ ehˇ-eu kʼoeˇ maˬ ngeuˇ naˇ, nga maꞈ dawˬ mehˬ mehˬ-eu gaˇ dahˇ maˬ tsoeˬ-ehˇ, naw maꞈ jah-eu kʼawꞈ gaˇ dahˇ maˬ tsoeˬ-a.

¹⁵ Kʼoeˇ naˆ tehꞈ maˬ ngeuˇ ni, Miˬyehˇ neh Ka li-ahˇ bi gʼoꞈ dehꞈ laˇ-euˬ miˇ neh, Miˬyehˇ gaˇ kawˆ aˬ dui jaˬ myawꞈ paˇ myawꞈ gaˇ duˇ-a siˬ. Ehˇ kʼawꞈ, shiˇ-euˬ tsawˇ haˬ-ahˇ maˬ bi gʼoꞈ dehꞈ laˇ nya-a lehˇ ehˇ-eu kʼoeˇ ngeuˇ law nmˇ-aˬ, Ka li-ahˇ aˬ yawꞈ maˬ bi gʼoꞈ dehꞈ laˇ-aˇ.

¹⁶ Aˬ jeˬ miˇ neh ehˇ naˇ, shiˇ-euˬ tsawˇ haˬ-ahˇ maˬ bi gʼoꞈ dehꞈ laˇ law nmˇ-aˬ, Ka li-ahˇ kʼawꞈ maˬ bi gʼoꞈ dehꞈ laˇ-aˇ.

¹⁷ Ka li-ahˇ maˬ bi gʼoꞈ dehꞈ laˇ-euˬ law nmˇ-aˬ, naw maꞈ-euˬ jah-eu jeˬ yawꞈ ngehꞈ pyeuꞈ-awˇ, yawˬ ha-euˬ iˬ baˇ laꞈ kʼoeˇ jawˇ luꞈ tehꞈ-a.

¹⁸ Ka li-ahˇ jah-eu shiˇ dzeuˇ-euˬ tsawˇ haˬ deuˬ kʼawꞈ, piˬ-iˇ byoˆ-iˇ jiˇ-euˬ tehꞈ-a.

¹⁹ Ka li laꞈ kʼoeˇ aˬ dui noeˬ tmˬ-eu kʼoeˇ-aˬ, nymˬ-mˇ dehꞈ luꞈ-eu heu ziˇ gʼaˇ duˬ tehꞈ-ehˇ muiˬ-eu jeˬ ngeuˇ lawˬ naˇ, aˬ duiˬ-aˬ, gʼawˬ shaˇ shaˬ-ehˇ gʼeh dui dui tehꞈ-a.

²⁰ Ehˇ kʼawꞈ, maˇ maˇ ni ehˇ naˇ, Ka li-ahˇ aˬ diˇ aˬ maˇ bi gʼoꞈ dehꞈ laˇ-euˬ meh. Aˬ yawꞈ-ahˇ bi gʼoꞈ dehꞈ laˇ-euˬ kʼoeˇ-aˬ, shiˇ dzeuˇ-euˬ tsawˇ haˬ deuˬ-ahˇ bi gʼoꞈ dehꞈ laˇ-eu gaˇ kawˆ yaw duˬ yaw ciˇ bi baw laˇ-euˬ meh.

²¹ Aˬ jeˬ miˇ neh ehˇ naˇ, tsawˇ haˬ zaˬ tiˬ gʼaˬ baˬ da neh shiˇ-eu jeˬ keuˆ le-euˬ loꞈ-ehˇ, tsawˇ haˬ zaˬ tiˬ gʼaˬ baˬ da neh bi gʼoꞈ dehꞈ laˇ-eu jeˬ jaˆ laˇ-euˬ meh.

²² Tsawˇ haˬ dawˬ tawˆ luꞈ Aˬdaˬ-ahˇ taꞈ leˇ-eu laꞈ kʼoeˇ ya shiˇ-eu loꞈ-ehˇ, Ka li-ahˇ taꞈ leˇ-eu laꞈ kʼoeˇ paˇ ya gʼoꞈ dehꞈ laˇ tehꞈ-a.

²³ Ehˇ kʼawꞈ, aˬ yawꞈ gʼaˬ yawꞈ-ahˇ yawˬ ha-euˬ aˇ yamˬ tsaˬ laˇ ngeh bi gʼoꞈ dehꞈ laˇ tehꞈ-a. Ka li-ahˇ aˬ cawˬ jeˬ hu bi gʼoꞈ dehꞈ laˇ gʼaˬ-euˬ meh. Kʼoeˇ jiˇ naˇ, aˬ yawꞈ zaꞈ le ngeh, aˬ yawꞈ-ahˇ taꞈ-eu tsawˇ haˬ deuˬ-ahˇ bi gʼoꞈ dehꞈ laˇ tehꞈ-a.

²⁴ Kʼoeˇ naˇ, aˇ saˬ saˬ-eu aˇ nah aˇ yamˬ keuˆ le tehꞈ-a. Kʼoeˇ ngeh, Ka li-aˬ, uˆ lahˇ luꞈ-eu mˬ sahˇ miˇ sahˇ dawˬ tawˆ luꞈ-ahˇ maˬ ehˇ, sahˬ paˬ sahˬ ma dawˬ tawˆ luꞈ-ahˇ maˬ ehˇ, baoˬ dawˬ tawˆ luꞈ-ahˇ maˬ ehˇ, deuˆ gʼaˬ jiˇ-awˇ, aˬ yawꞈ-euˬ miˇ kʼahˬ Aˬda Miˬyehˇ-ahˇ a nehˬ tehꞈ-a.

²⁵ Aˬ jeˬ miˇ neh ehˇ naˇ, muiˇ-eu deuˬ dawˬ tawˆ luꞈ-ahˇ Miˬyehˇ deuˆ gʼaˬ jiˇ-awˇ, aˬ yawꞈ-euˬ aˬ kuiˇ pehˬ zaˬ uˬ moˆ bi jawˇ jiˇ ngeh keuˆ ni Ka li ya uˆ lahˇ tehꞈ-a.

²⁶ Aˬ cawˬ jeˬ nah nah saˬ bi deuˆ gʼaˬ-eu muiˇ-eu gʼaˬ-aˬ, shiˇ-eu jeˬ meh.

²⁷ Aˬ jeˬ miˇ neh ehˇ naˇ, “Miˬyehˇ-aˬ, dawˬ tawˆ luꞈ-ahˇ aˬ yawꞈ-euˬ aˬ kuiˇ pehˬ zaˬ uˬ moˆ bi jawˇ tehꞈ-a” lehˇ, Jaˇliꞈ laꞈ kʼoeˇ ehˇ taˬ-euˬ meh. “Dawˬ tawˆ luꞈ” lehˇ ehˇ-eu dawˬ kʼoeˇ dawˬ laꞈ kʼoeˇ Miˬyehˇ maˬ ahˇ leˇ-euˬ yaw duˬ baw meh. Aˬ yawꞈ-aˬ, dawˬ tawˆ luꞈ-ahˇ Ka li-euˬ uˬ moˆ bi jawˇ ni jahˇ-eu gʼaˬ meh.

²⁸ Ehˇ kʼawꞈ, dawˬ tawˆ luꞈ-ahˇ Ka li uˆ lahˇ-eu uˬ moˆ bi jawˇ gʼaˬ ngeh, Zaˬmaˇ pyeuꞈ-eu aˬ yawꞈ-aˬ, dawˬ tawˆ luꞈ-ahˇ aˬ yawꞈ-euˬ uˬ moˆ bi jawˇ ni jahˇ-eu gʼaˬ pyeuꞈ-eu Miˬyehˇ-euˬ uˬ moˆ jawˇ tehꞈ-a. Kʼoeˇ ngeh jawˇ, dawˬ tawˆ luꞈ kʼoeˇ taˆ Miˬyehˇ uˆ lahˇ jiˇ tehꞈ-a.

²⁹ Nymˬ-mˇ poˆ jawˇ-aˬ, shiˇ dzeuˇ-euˬ tsawˇ haˬ deuˬ-euˬ dah zaˇ iˇ cuꞈ bi shawˇ-eu deuˬ-euˬ gaˇ kawˆ aˬ joˆ-ehˇ ehˇ nmˇ. Aˬ yawꞈ maꞈ aˬ jeˬ-ahˇ noeˬ tmˬ-awˇ kʼoeˇ loꞈ-ehˇ mˇ ta. Shiˇ-euˬ tsawˇ haˬ-ahˇ maˬ bi gʼoꞈ dehꞈ laˇ nya-aˇ lehˇ tsawˇ haˬ tiˬ paˆ na deuˬ ehˇ-eu kʼoeˇ tsaˬ-eu ngeuˇ naˇ, aˬ jeˬ miˇ neh tsawˇ haˬ kʼoeˇ deuˬ shiˇ dzeuˇ-euˬ deuˬ-euˬ dah zaˇ iˇ cuꞈ bi shawˇ ta.

³⁰ Bi gʼoꞈ dehꞈ laˇ-eu jeˬ maˬ jaˆ-a lehˇ ngeuˇ naˇ, aˬ dui maꞈ kʼawꞈ aˬ jeˬ miˇ neh naˬ liˬ yawˬ laꞈ na luꞈ yawˬ ha-euˬ uˬ kʼawˇ gʼaˇ duˬ kʼahˬ ya lahˇ luꞈ ta.

³¹ Aˬ yuiꞈ aˬ nyiˇ Ka li zaˬ deuˬ-oˇ, shiˇ-eu jeˬ-ahˇ yawˬ nah na luꞈ ngaˇ ya tahˬ puˬ luꞈ-eu ma. Aˬ dui-euˬ Sahˬpaˬ Yeˬsuˇ Ka li-ahˇ taꞈ leˇ-eu yaw dehꞈ dehꞈ-eu jeˬ laꞈ kʼoeˇ naw maꞈ-ahˇ ngaˇ nui ma huiˬ kʼaˇ za-eu miˇ neh, ngaˇ heu loꞈ-ehˇ ehˇ tsehˆ peuˬ-eu ma.

³² Tsawˇ haˬ-euˬ nui noeˬ nui loˆ ya ehˇ naˇ, nymˬ-mˇ Eˇpeˇsu meuˬ heu meuˬ laꞈ kʼoeˇ “haiˬ-eu bawˇ tsahˬ jeˬ zaˬ” deuˬ-ahˇ ngaˇ dawꞈ ceh ceh naˇ, ngaˬ-euˬ gʼaˇ duˬ aˬ jeˬ guiˬ lahˬ baw ta. Shiˇ-euˬ tsawˇ haˬ deuˬ-ahˇ maˬ bi gʼoꞈ dehꞈ laˇ nya-eu ngeuˇ naˇ, “Ni shawˬ ya shiˇ-eu baˬ da neh dzaˬ byawˬ dawˇ byawˬ byawˬ kaˇ-euˇ” lehˇ ehˇ-eu dawˬ daˬ kʼoeˇ tsaˬ dui dui meh.

³³ Taˬ noeˬ lehˬ. “Maˬ muiˬ-eu deuˬ-ahˇ cawˬ cawˬ naˇ, yaw muiˬ jeˬ mˇ mawꞈ-eu nui ma cawˆ-iˇ tehꞈ-a.”

³⁴ Yaw tsaˬ yaw dawˇ jawˇ paw gʼoꞈ kʼoꞈ laˇ-awˇ, iˬ baˇ maˬ mˇ ni byehˇ-awˬ. Naw maꞈ tiˬ paˆ na deuˬ Miˬyehˇ-ahˇ maˬ siˬ nya nga lehˇ, naw maꞈ bi shaꞈ dawˇ ni ngaˇ ehˇ-eu ma.

Gʼoꞈ dehꞈ laˇ-euˬ gʼawˇ mawˇ

³⁵ “Shiˇ-euˬ tsawˇ haˬ-ahˇ aˬ joˆ-ehˇ bi gʼoꞈ dehꞈ laˇ nya ta. Gʼoꞈ dehꞈ laˇ-euˬ gʼawˇ mawˇ kʼoeˇ aˬ joˆ-ehˇ gʼeh ta” lehˇ, tsawˇ haˬ tiˬ gʼaˬ na naˇ haˬ mawꞈ tehꞈ-a.

³⁶ Aˬ dzawˬ aˇ gah deuˬ-oˇ, naw maꞈ siˬ yoeˬ sehˬ ngeh, maˬ maˇ-eu siˬ yoeˬ aˇ ji maˬ ji laˇ nya-eu maˬ ngeuˇ-a loˇ.

³⁷ Cehˇ siˬ yoeˬ maˬ ngeuˇ naˇ nui jeˬ siˬ yoeˬ naw maꞈ sehꞈ ngeh, naw maꞈ neh sehˬ-euˬ kʼoeˇ-aˬ, aˇ nuiˆ tehꞈ meh. Dehꞈ laˇ mehˇ laˇ gʼaˬ-euˬ aˇ bawˬ sehˬ-eu maˬ ngeuˇ-a.

³⁸ Aˇ nuiˆ kʼoeˇ-ahˇ Miˬyehˇ nui ma kʼaˇ tsaˬ-eu loꞈ-ehˇ aˇ bawˬ bi bawˬ laˇ-eu meh. Siˬ yoeˬ aˬ yawꞈ jeˬ yawꞈ-ahˇ geuˇ-eu aˇ bawˬ bi pyeuꞈ laˇ-eu meh.

³⁹ Kʼaˇ dehꞈ kʼaˇ jawˇ-eu yawˬ jeˬ na luꞈ shaˬ jiˇ aˬ yawꞈ tiˬ jeˬ tehꞈ maˬ ngeuˇ-a. Tsawˇ haˬ-euˬ shaˬ jiˇ tiˬ jeˬ, jeˬ zaˬ-euˬ shaˬ jiˇ tiˬ jeˬ, aˇ jiˇ-euˬ shaˬ jiˇ tiˬ jeˬ, ngaˬ shaˬ-euˬ shaˬ jiˇ tiˬ jeˬ lehˇ, aˬ yawꞈ jeˬ yawꞈ beu gaˇ-eu meh.

⁴⁰ Mˬ kʼoeˇ taˆ jaˆ-eu jeˬ hawˇ-eu miˇ tsaˬ kʼoeˇ taˆ jaˆ-eu jeˬ lehˇ baw-eu meh. Mˬ kʼoeˇ taˆ jaˆ-eu jeˬ haw muiˬ-eu hawˇ-eu miˇ tsaˬ kʼoeˇ taˆ jaˆ-eu jeˬ haw muiˬ-eu maˬ duˇ leˇ-a.

⁴¹ Nahˇ ma kʼawꞈ, haw muiˬ-eu tiˬ jeˬ ahˇ-awˇ, ba la kʼawꞈ haw muiˬ-eu tiˬ jeˬ ahˇ-eu meh. Aˬ guiˇ kʼawꞈ, aˬ cawˬ-ahˇ maˬ duˇ leˇ-eu haw muiˬ-eu tiˬ jeˬ ahˇ-eu meh. Aˬ guiˇ tiˬ siˬ tiˇ siˬ kʼawꞈ, haw muiˬ-eu maˬ duˇ leˇ-a.

⁴² Shiˇ-euˬ tsawˇ haˬ deuˬ-ahˇ bi gʼoꞈ dehꞈ laˇ ngeh jawˇ kʼawꞈ, kʼoeˇ loꞈ-ehˇ duˇ tehꞈ-a. Baꞈ pahˬ-euˬ gʼawˇ mawˇ-aˬ, buꞈ-iˇ nya-eu jeˬ pyeuꞈ-eu meh. Ehˇ kʼawꞈ, bi gʼoꞈ dehꞈ laˇ-euˬ gʼawˇ mawˇ-aˬ, maˬ buꞈ-iˇ nya-eu jeˬ pyeuꞈ-eu meh.

⁴³ Baꞈ pahˬ-euˬ gʼawˇ mawˇ-aˬ, maˬ haw muiˬ-eu uˬ taꞈ, gʼaˬ maˬ ahˇ-eu gʼawˇ mawˇ pyeuꞈ-eu meh. Ehˇ kʼawꞈ, bi gʼoꞈ dehꞈ laˇ-euˬ gʼawˇ mawˇ-aˬ, haw muiˬ dui dui-awˇ, gʼaˬ ahˇ-eu gʼawˇ mawˇ pyeuꞈ-eu meh.

⁴⁴ Baꞈ pahˬ ngeh, shiˬ shaˬ jiˇ gʼawˇ mawˇ pyeuꞈ-eu meh. Ehˇ kʼawꞈ bi gʼo dehꞈ laˇ ngeh, saꞈ laˇ gʼawˇ mawˇ pyeuꞈ-eu meh. Shiˬ shaˬ jiˇ gʼawˇ mawˇ yawˬ mawˇ na luꞈ gʼaˇ duˬ saꞈ laˇ gʼawˇ mawˇ baw-eu meh.

⁴⁵ Aˬ jeˬ miˇ neh ehˇ naˇ, “Tsawˇ haˬ zaˬ yaw beh gʼaˬ pyeuꞈ-eu Aˬdaˬ-ahˇ, yaw dehꞈ bi dehꞈ-eu gʼaˇ duˬ beh taˬ-euˬ meh” lehˇ, Jaˇliꞈ laꞈ kʼoeˇ boꞈ taˬ-euˬ meh. Ehˇ kʼawꞈ, aˇ saˬ saˬ-eu gʼaˬ pyeuꞈ-eu Aˬdaˬ yawˬ gʼaˬ yawˬ-aˬ, dehꞈ-eu jeˬ biꞈ-eu Yaw sahˇ pyeuꞈ-eu meh.

⁴⁶ Saꞈ laˇ jeˬ huˬ maˬ ngeuˇ-a. Shiˬ shaˬ jiˇ jeˬ huˬ meh. Saꞈ laˇ-aˬ, jeˬ nahˬ meh.

⁴⁷ Aˬdaˬ yaw beh gʼaˬ-aˬ, miˇ tsaˬ neh tehˆ-awˇ, miˇ tsaˬ-ahˇ neh doˆ laˇ-euˬ jeˬ pyeuꞈ-eu meh. Aˬdaˬ nyiˬ gʼaˬ tiˬ gʼaˬ-aˬ, mˬ-ahˇ neh oe-euˬ meh.

⁴⁸ Miˇ tsaˬ-ahˇ taꞈ-eu tsawˇ haˬ deuˬ-aˬ, miˇ tsaˬ yuˇ-awˇ tehˆ taˬ-euˬ gʼaˬ-ahˇ duˇ-eu meh. Mˬ-ahˇ taꞈ-eu tsawˇ haˬ deuˬ-aˬ, mˬ-ahˇ neh oe-euˬ gʼaˬ-ahˇ duˇ-eu meh.

⁴⁹ Miˇ tsaˬ yuˇ-awˇ tehˆ taˬ-euˬ gʼaˬ-euˬ aˇ gʼehˇ aˬ dui pi luꞈ-eu loꞈ-ehˇ, mˬ-ahˇ neh oe-euˬ gʼaˬ-euˬ aˇ gʼehˇ aˬ dui paˇ ya pi tehꞈ-a.

⁵⁰ Aˬ yuiꞈ aˬ nyiˇ Ka li zaˬ deuˬ-oˇ, ngaˇ ehˇ mawꞈ-eu-aˬ heu loꞈ-ehˇ ma. Shiˬ shaˬ jiˇ gʼawˇ mawˇ heu-aˬ, Miˬyehˇ Miˇkʼahˬ-ahˇ jawˇ leˇ nya-eu jeˬ maˬ ngeuˇ-a. Buꞈ-iˇ nya-eu jeˬ-aˬ, maˬ buꞈ-iˇ nya-eu jeˬ-ahˇ maˬ za nya-a.

⁵¹ Naˇ haˬ-awˬ. Zaꞈ taˬ-euˬ yaw tsaˬ yaw dawˇ jeˬ ngaˇ naw maꞈ-ahˇ ehˇ nehˬ nyaˇ. Aˬ dui dawˬ tawˆ luꞈ ya shiˇ jiˇ-eu maˬ ngeuˇ-aˇ. Ehˇ kʼawꞈ, aˬ dui dawˬ tawˆ luꞈ-ahˇ yaw shuiꞈ bi paˇ laˇ jiˇ tehꞈ-a.

⁵² Aˇ saˬ saˬ-eu daˇ heh teˇ saˇ mahˇ laˇ ngeh, tiˬ kʼehˇ laˇ kʼehˬ myaˆ nuiˆ kʼoˆ tehˆ tiˬ tehˆ laꞈ kʼoeˇ aˬ dui paˇ laˇ jiˇ tehꞈ-a. Aˬ jeˬ miˇ neh ehˇ naˇ, daˇ heh teˇ saˇ mahˇ laˇ ngeh, shiˇ-euˬ tsawˇ haˬ deuˬ-ahˇ tiˬ jawˇ-iˬ maˬ paˇ bi shiˇ-eu gʼaˇ duˬ bi gʼoꞈ dehꞈ laˇ-awˇ, aˬ dui dawˬ tawˆ luꞈ yaw shuiꞈ paˇ laˇ jiˇ tehꞈ-a.

⁵³ Buꞈ-iˇ nya-eu jeˬ-ahˇ maˬ buꞈ-iˇ nya-eu jeˬ bi pyeuꞈ paˇ laˇ-awˇ, shiˇ nya-eu jeˬ-ahˇ maˬ shiˇ nya-eu jeˬ bi pyeuꞈ paˇ laˇ tehꞈ-a.

⁵⁴ Kʼoeˇ loꞈ-ehˇ pyeuꞈ laˇ-awˇ, buꞈ-iˇ nya-eu jeˬ-ahˇ maˬ buꞈ-iˇ nya-eu jeˬ bi pyeuꞈ paˇ laˇ ngeh, Jaˇliꞈ heu deuˆ laꞈ kʼoeˇ ehˇ taˬ-euˬ byah laˇ tehꞈ-a. “Gʼaˬ leˇ-eu jeˬ neh shiˇ-eu jeˬ-ahˇ myoꞈ ahˇ-euˬ meh.”

⁵⁵ Shiˇ-eu jeˬ-oˇ, nawˬ neh gʼaˬ-euˬ aˬ lehˬ. Shiˇ-eu jeˬ-oˇ, nawˬ-euˬ byaˬ iˬ aˬ lehˬ.”

⁵⁶ Shiˇ-eu jeˬ-euˬ byaˬ iˬ-aˬ, iˬ baˇ meh. Iˬ baˇ-euˬ baoˬ-aˬ, Zahˇ dawˬ kʼoꞈ dawˬ meh.

⁵⁷ Ehˇ kʼawꞈ, Sahˬpaˬ Yeˬsuˇ ka li-ahˇ gʼoe-awˇ aˬ dui-ahˇ gʼaˬ leˇ-eu jeˬ biꞈ laꞈ-euˬ Miˬyehˇ-aˬ, guiˬ lahˬ huiˬ luꞈ-uˇ.

⁵⁸ Kʼoeˇ miˇ neh aˬ yuiꞈ aˬ nyiˇ Ka li zaˬ deuˬ-oˇ, gʼaˬ byehˆ maˬ byehˆ-ehˇ ziꞈ dah ni yawꞈ tehˬ taˬ-eu laꞈ kʼoeˇ, Sahˬpaˬ Yeˬsuˇ-euˬ gaˇ mˇ-eu yawꞈ ngehꞈ maˬ ngeuˇ-a lehˇ siˬ nya-awˇ, Sahˬpaˬ Yeˬsuˇ-euˬ gaˇ mˇ-eu leh jeh dui dui-awˬ.