1 Gawˇliˬtu 14 - Akha

Yaw sahˇ Miˬyehˇ neh biꞈ leꞈ-euˬ laꞈ sawˬ nui deuˬ

¹ Gʼoeˇ-eu gaˬ-eu jeˬ-ahˇ naw maꞈ leh jeh dui dui paˬ-ehˇ gʼeh-eu meh. Saꞈ laˇ paw naw maꞈ za taˬ-euˬ laꞈ sawˬ deuˬ-ahˇ nui ma keuˆ-awˬ. Miˬyehˇ dawˬ kawˬ mehˬ nya ni za taˬ-euˬ laꞈ sawˬ-ahˇ, dawˬ tawˆ luꞈ naˆ maˬ tseˇ nui ma keuˆ-awˬ.

² Dawˬ gʼawˬ mya jeˬ ngehˬ-eu kʼoeˇ-aˬ, tsawˇ haˬ zaˬ-ahˇ ngehˬ cawˬ-eu maˬ ngeuˇ-a. Miˬyehˇ-ahˇ ngehˬ cawˬ-eu meh. Aˬ jeˬ miˇ neh ehˇ naˇ, aˬ yawꞈ ngehˬ-eu dawˬ kʼoeˇ-ahˇ tiˬ gʼaˬ-iˬ maˬ gʼoˆ shaw nya-a. Yaw sahˇ Miˬyehˇ-euˬ baoˬ-ahˇ gʼoe-eu laꞈ kʼoeˇ zaꞈ taˬ-euˬ yaw tsaˬ yaw dawˇjeˬ aˬ yawꞈ ngehˬ-eu meh.

³ Ehˇ kʼawꞈ, Miˬyehˇ dawˬ kawˬ mehˬ-eu tsawˇ haˬ-aˬ, tsawˇ haˬ zaˬ-ahˇ ngehˬ cawˬ-eu jeˬ pyeuꞈ-eu miˇ neh, aˬ cawˬ-ahˇ caw ba-eu, gʼaˬ biꞈ-eu, nui ma saˇ laˇ ni gʼaˬ biꞈ-eu dawˬ ngehˬ-eu tmˇ-eu, heu deuˬ mˇ nehˬ nya-eu meh.

⁴ Dawˬ gʼawˬ mya jeˬ ngehˬ-eu kʼoeˇ-aˬ, yawˬ ha gʼaˇ duˬ tehꞈ-ehˇ gaˇ dahˇ tsoeˬ-awˇ, Miˬyehˇ dawˬ kawˬ mehˬ-eu kʼoeˇ-aˬ, Ka li zaˬ aˇ muˇ muˇ lah ni gʼaˇ duˬ gaˇ dahˇ tsoeˬ-eu meh.

⁵ Naw maꞈ dawˬ tawˆ luꞈ dawˬ bi ngehˬ nya mawꞈ miˇ-a. Ehˇ kʼawꞈ, kʼoeˇ naˆ maˬ tseˇ Miˬyehˇ dawˬ kawˬ mehˬ nya-eu laꞈ sawˬ naw maꞈ bi za mawꞈ miˇ-a. Dawˬ gʼawˬ mya jeˬ ngehˬ gaˇ dawˬ tsuiꞈ yuˇ doˆ nehˬ nya-eu gʼaˬ jawˇ-awˇ, Ka li zaˬ aˇ muˇ muˇ lah-ehˇ gʼoˆ shaw-awˇ gaˇ dahˇ tsoeˬ leˇ ni maˬ ja mehˬ nehˬ nya naˇ, dawˬ gʼawˬ mya jeˬ ngehˬ-eu gʼaˬ naˆ maˬ tseˇ, Miˬyehˇ dawˬ kawˬ mehˬ-eu gʼaˬ gaˇ dahˇ tsoeˬ dzehˬ meh.

⁶ Teu baˬ da neh aˬ yuiꞈ aˬ nyiˇ Ka li zaˬ deuˬ-oˇ, naw maꞈ jawˇ gaˇ oe keuˆ ngeh ngaˇ dawˬ gʼawˬ mya jeˬ ngehˬ naˇ, naw maꞈ gʼaˇ duˬ aˬ jeˬ gaˇ dahˇ tsoeˬ nmˇ. Tiˬ pawꞈ-iˬ gaˇ dahˇ maˬ tsoeˬ-a. Miˬyehˇ neh pah mehˬ nehˬ laꞈ-euˬ jeˬ, zaˬ siˬ tsawˇ gahˇ, Miˬyehˇ gʼaˇ duˬ ngehˬ dah-eu dawˬ hawˇ-eu, mehˬ-eu tsoˆ-eu jeˬ, heu deuˬ-ahˇ naw maꞈ jawˇ gaˇ ngaˇ yuˇ leꞈ nehˬ-eu maˬ ngeuˇ naˇ gaˇ dahˇ maˬ tsoeˬ-a.

⁷ Yaw dehꞈ jeˬ maˬ ngeuˇ-eu, caˇ dawˬ caˇ ngeh baw-eu diˬ-eu keu ka deuˬ pyeuꞈ-eu bawˬ law, deuˇ-mˬ heu deuˬ-ahˇ kʼawꞈ, aˬ cawˬ gʼoˆ siˬ nya ni teˇ saˇ yaw lawˆ lawˆ-ehˇ maˬ baw maˬ diˬ mehˬ nya naˇ, aˬ cawˬ aˬ joˆ-ehˇ naˇ haˬ siˬ nya nmˇ.

⁸ Daˇ heh baw-eu tsawˇ haˬ kʼawꞈ, aˬ cawˬ gʼoˆ siˬ nya ni teˇ saˇ yaw lawˆ lawˆ-ehˇ maˬ baw gaˬ nehˬ nya naˇ, guiˇ deuˆ-eu gʼaˇ duˬ aˬ suˇ gʼaˬ lehˬ hmˬ nmˇ.

⁹ Kʼoeˇ gaˇ duˇ ni, naw maꞈ dawˬ gʼawˬ mya jeˬ ngehˬ-awˇ dawˬ mehˬ mehˬ ngeh, aˬ cawˬ maˬ naˇ haˬ siˬ nya naˇ, aˬ joˆ-ehˇ bi gʼoˆ shaw geuꞈ nmˇ. Naw maꞈ-euˬ dawˬ kʼoeˇ-aˬ, jaˬ lehˇ laꞈ kʼoeˇ ngehˬ dzeh gaˇ duˇ-eu tehꞈ meh.

¹⁰ Miˇ tsaˬ kʼoeˇ taˆ dawˬ gʼawˬ mya jeˬ jaˆ-eu meh. Ehˇ kʼawꞈ, dawˬ tsuiꞈ maˬ baw-eu dawˬ tiˬ jeˬ-iˬ maˬ jaˆ-a.

¹¹ Ngaˬ-ahˇ dawˬ ngehˬ cawˬ laˇ-eu tsawˇ haˬ tiˬ gʼaˬ-euˬ dawˬ-ahˇ ngaˇ maˬ siˬ nya naˇ, aˬ yawꞈ-aˬ ngaˬ-euˬ gʼaˇ duˬ yawˬ kʼahˬ yawˬ miˇ yawˬ-ahˇ jawˇ-eu tsawˇ haˬ loꞈ-ehˇ duˇ-awˇ, ngaˇ kʼawꞈ aˬ yawꞈ-euˬ gʼaˇ duˬ kʼoeˇ loꞈ-ehˇ duˇ tehꞈ-a.

¹² Yaw sahˇ Miˬyehˇ neh biꞈ leꞈ-euˬ laꞈ sawˬ deuˬ-ahˇ naw maꞈ za mawꞈ dui dui-eu loꞈ-ehˇ, yawˬ jeˬ na luꞈ kʼoeˇ taˆ Ka li zaˬ aˇ muˇ bi huiˬ bi mahˇ laˇ nya ni gaˇ dahˇ tsoeˬ leˇ dzehˬ-eu jeˬ-ahˇ naw maꞈ leh jeh dzehˬ paˬ-ehˇ gʼeh-eu meh.

¹³ Kʼoeˇ miˇ neh, dawˬ gʼawˬ mya jeˬ ngehˬ nya-eu tsawˇ haˬ-aˬ, yawˬ ha neh ngehˬ-euˬ jeˬ aˬ cawˬ gʼoˆ shaw ni ja mehˬ nya-eu laꞈ sawˬ biꞈ laꞈ-eu gʼaˇ duˬ guiˬ lahˬ shaˇ-eu tsaˬ meh.

¹⁴ Ngaˇ dawˬ gʼawˬ mya jeˬ ngehˬ-awˇ guiˬ lahˬ shaˇ naˇ, ngaˬ-euˬ saꞈ laˇ guiˬ lahˬ shaˇ luꞈ kʼawꞈ, ngaˬ-euˬ nui ma maˬ keuˆ-a.

¹⁵ Toˆ-ehˇ ngeuˇ naˇ, ngaˇ aˬ joˆ-ehˇ jahˇ paˬ nga. Ngaˬ-euˬ saꞈ laˇ guiˬ lahˬ shaˇ ma. Ngaˬ-euˬ nui ma kʼawꞈ guiˬ lahˬ shaˇ ma. Ngaˬ-euˬ saꞈ laˇ ja ceuˬ-awˇ caˇ ma. Ngaˬ-euˬ nui ma kʼawꞈ ja ceuˬ-awˇ caˇ ma.

¹⁶ Nawˬ-euˬ saꞈ laˇ tehꞈ-ehˇ Miˬyehˇ-euˬ guiˬ lahˬ-ahˇ ja ceuˬ naˇ, nawˬ nehˬ-ehˇ tiˬ kawˆ loꞈ-ehˇ uˬ duˬ tahˬ luꞈ-eu maˬ siˬ nya-eu tsawˇ haˬ nawˬ neh guiˬ lah shaˇ-euˬ gaˇ “Aˬ miˬ” lehˇ aˬ joˆ-ehˇ ehˇ caw nya nmˇ. Nawˇ aˬ jeˬ ehˇ luꞈ-eu aˬ yawꞈ tiˬ pawꞈ-iˬ maˬ gʼoˆ siˬ nya-a.

¹⁷ Nawˬ neh Miˬyehˇ-euˬ guiˬ lahˬ-ahˇ ja ceuˬ-awˇ guiˬ lahˬ shaˇ-euˬ shaˇ dawˬ kʼoeˇ yaw muiˬ kʼawꞈ, yawˬ gʼaˬ yawˬ gʼaˇ duˬ gaˇ dahˇ maˬ tsoeˬ-a.

¹⁸ Naw maꞈ yawˬ gʼaˬ na luꞈ naˆ maˬ tseˇ ngaˇ dawˬ gʼawˬ mya jeˬ ngehˬ nya-eu miˇ neh, Miˬyehˇ-euˬ guiˬ lahˬ-ahˇ ja ceuˬ-eu ma.

¹⁹ Ehˇ kʼawꞈ, Ka li zaˬ aˇ muˇ uiˬ leˇ-awˇ uˬ duˬ tahˬ ngeh, dawˬ gʼawˬ mya jeˬ tiˬ muiˇ dawˬ ngehˬ-eu naˆ maˬ tseˇ, aˬ cawˬ gʼoˆ shaw nya-eu mehˬ-eu tsoˆ-eu dawˬ ngaˬ dawˬ ngaˇ ngehˬ ma.

²⁰ Aˬ yuiꞈ aˬ nyiˇ Ka li zaˬ deuˬ-oˇ, naw maꞈ shaˇ noeˬ shaˇ sawˇ-eu paw dzeˇ zaˬ yaw nyiˇ loꞈ-ehˇ taˬ bi pyeuꞈ. Yaw haiˬ jeˬ mˇ-eu paw dzeˇ-aˬ, iˬ baˇ mˇ-eu maˬ siˬ nya-eu zaˬ yaw nyiˇ loꞈ-ehˇ bi pyeuꞈ-awˇ, shaˇ noe shaˇ sawˇ-eu paw dzeˇ-aˬ, tsawˇ mawˬ tsawˇ kʼaˆ loꞈ-ehˇ bi pyeuꞈ-awˬ.

²¹ Jaˇliꞈ laꞈ kʼoeˇ heu loꞈ-ehˇ boꞈ taˬ-euˬ meh. “Dawˬ gʼawˬ mya jeˬ ngehˬ nya-eu, tsawˇ haˬ deuˬ-ahˇ gʼoe-eu laꞈ kʼoeˇ, ngaˬ-euˬ tsawˇ haˬ heu deuˬ-ahˇ ngaˇ, dawˬ ngehˬ dawˬ tmˇ mˇ nehˬ ma lehˇ, Sahˬpaˬ Miˬyehˇ ehˇ taˬ-euˬ meh. Yawˬ kʼahˬ yawˬ miˇ yawˬ-ahˇ jawˇ-eu, aˬ cawˬ-euˬ mehˬ luˬ-ahˇ gʼoe-awˇ, aˬ yawꞈ maꞈ-ahˇ ngaˇ ngehˬ cawˬ kʼawꞈ, ngaˬ-euˬ dawˬ-ahˇ maˬ naˇ haˬ-aˇ.”

²² Kʼoeˇ miˇ neh, dawˬ gʼawˬ mya jeˬ ngehˬ nya-eu laꞈ sawˬ za-euˬ kʼoeˇ-aˬ, Ka li-ahˇ maˬ jah-eu tsawˇ haˬ deuˬ gʼaˇ duˬ zahˬ leˇ paˬ-ehˇ gʼeh-eu bi siˬ bi mawˇ-eu jeˬ pyeuꞈ-eu meh. Jah-eu tsawˇ haˬ deuˬ gʼaˇ duˬ maˬ ngeuˇ-a. Miˬyehˇ dawˬ kawˬ mehˬ-eu laꞈ sawˬ za-euˬ kʼoeˇ-aˬ, Ka li-ahˇ jah-eu tsawˇ haˬ deuˬ gʼaˇ duˬ bi siˬ bi mawˇ-eu jeˬ pyeuꞈ-eu meh. Maˬ jah-eu tsawˇ haˬ deuˬ gʼaˇ duˬ maˬ ngeuˇ-a.

²³ Ka li zaˬ aˇ muˇ muˇ lah-ehˇ uiˬ leˇ bymˇ leˇ-awˇ yawˬ gʼaˬ na luꞈ dawˬ gʼawˬ mya jeˬ ngehˬ ngehˬ-ehˇ lawꞈ gʼa luꞈ ngeh, maˬ siˬ nya-eu tsawˇ haˬ hawˇ-eu ka li-ahˇ maˬ jah-eu tsawˇ haˬ uˇ laˇ zaˬ naˇ, naw maꞈ tsawˇ uˬ uˬ-iˇ jiˇ-euˬ ngaˇ lehˇ maˬ ehˇ-aˇ loˇ.

²⁴ Ehˇ kʼawꞈ, yawˬ gʼaˬ na luꞈ Miˬyehˇ dawˬ kawˬ mehˬ luꞈ ngeh, Ka li-ahˇ maˬ jah-eu tsawˇ haˬ deuˬ hawˇ-eu maˬ siˬ nya-eu tsawˇ haˬ uˇ laˇ zaˬ naˇ, dawˬ kʼoeˇ-ahˇ ya gaˬ-eu baˬ da neh yawˬ ha-euˬ iˬ baˇ gaˇ kawˆ noeˬ siˬ leˇ-awˇ, aˬ yawꞈ neh kʼaˇ ya gaˬ-euˬ jeˬ aˬ yawꞈ-ahˇ yaˇ kʼaˬ daˇ tehꞈ-a.

²⁵ Zaꞈ taˬ-euˬ aˬ yawꞈ-euˬ nui noeˬ aˬ cawˬ mehˬ shi pah doˆ leꞈ-awˇ, pawˬ tsuiꞈ pawˬ dmˬ ga dmˬ-awˇ Miˬyehˇ-ahˇ uˬ duˬ tahˬ tehꞈ-a. “Naw maꞈ nehˬ-ehˇ Miˬyehˇ maˇ maˇ ni jawˇ-eu ngaˇ” lehˇ aˬ yawꞈ ehˇ tehꞈ-a.

Uˬ duˬ tahˬ ngeh tsaˬ leˇ dzoeˇ leˇ-eu jeˬ loˬ-eu

²⁶ Aˬ yuiꞈ aˬ nyiˇ Ka li zaˬ deuˬ-oˇ, ngaˇ ehˇ mawꞈ-eu-aˬ heu loꞈ-ehˇ ma. Naw maꞈ uˬ duˬ tahˬ-eu lehˇ uiˬ leˇ ngeh, caˇ dawˬ caˇ-eu gʼaˬ, mehˬ-eu tsoˆ-eu gʼaˬ, Miˬyehˇ neh pah mehˬ nehˬ-euˬ jeˬ za-euˬ gʼaˬ, dawˬ gʼawˬ mya jeˬ ngehˬ-awˇ mehˬ-eu gʼaˬ, kʼoeˇ loꞈ-ehˇ mehˬ-euˬ gaˇ dawˬ tsuiꞈ yuˇ doˆ nehˬ-eu gʼaˬ lehˇ, gʼawˬ mya jeˬ baw-eu meh. Yawˬ jeˬ na luꞈ Ka li zaˬ aˇ muˇ gʼaˇ duˬ gaˇ dahˇ tsoeˬ-eu jeˬ ya bi pyeuꞈ meh.

²⁷ Dawˬ gʼawˬ mya jeˬ ngehˬ ngeh, nyiˬ gʼaˬ smˇ gʼaˬ uˬ taꞈ-ehˇ bi ngehˬ-eu maˬ tsaˬ-a. Tiˬ gʼaˬ saˇ-iˬ tiˬ gʼaˬ ngehˬ-awˇ, kʼoeˇ loꞈ-ehˇ ngehˬ-euˬ gaˇ dawˬ tsuiꞈ yuˇ doˆ nehˬ-eu gʼaˬ kʼawꞈ ya bi jawˇ meh.

²⁸ Ehˇ kʼawꞈ, dawˬ tsuiꞈ yuˇ doˆ nehˬ nya-eu gʼaˬ maˬ jawˇ naˇ, dawˬ gʼawˬ mya jeˬ ngehˬ-eu kʼoeˇ gʼaˬ ciˬ cuˇ ni naˬ leˇ-awˇ, Miˬyehˇ hawˇ-eu yawˬ ha yaw kaˬ tehꞈ-ehˇ ngehˬ-eu tsaˬ meh.

²⁹ Miˬyehˇ dawˬ kawˬ mehˬ-eu tsawˇ haˬ nyiˬ gʼaˬ smˇ gʼaˬ bi ngehˬ bi tmˇ-eu tsaˬ meh. Nui deuˬ-aˬ, aˬ yawꞈ maꞈ neh ngehˬ-euˬ jeˬ-ahˇ shaˇ sawˇ-eu tsaˬ meh.

³⁰ Ehˇ kʼawꞈ, kʼoeˇ gaˇ nuiˇ-awˇ uˬ duˬ tahˬ luꞈ-eu tsawˇ haˬ tiˬ gʼaˬ na Miˬyehˇ neh pah mehˬ nehˬ-euˬ dawˬ za-euˬ ngeuˇ naˇ, dawˬ ngehˬ luꞈ-eu gʼaˬ ciˬ cuˇ ni bi naˬ-eu tsaˬ meh.

³¹ Naw maꞈ yawˬ gʼaˬ na luꞈ dzaw geuꞈ-awˇ gʼaˬ ahˇ laˇ nya ni, yawˬ gʼaˬ na luꞈ tiˬ gʼaˬ saˇ-iˬ tiˬ gʼaˬ Miˬyehˇ dawˬ kawˬ mehˬ-eu tsaˬ meh.

³² Miˬyehˇ dawˬ kawˬ mehˬ-eu gʼaˬ-aˬ, yawˬ ha neh za taˬ-euˬ Miˬyehˇ dawˬ kawˬ mehˬ-eu laꞈ sawˬ-ahˇ yaw muiˬ paˬ-ehˇ nyehꞈ tehˬ gʼaˬ nya-eu tsaˬ meh.

³³ Aˬ jeˬ miˇ neh ehˇ naˇ, aˬ dui maˬ tsaˬ maˬ dzoeˇ leˇ-eu jeˬ-ahˇ Miˬyehˇ maˬ geuꞈ mawꞈ-a. Tsaˬ leˇ dzoeˇ leˇ-eu jeˬ-ahˇ aˬ yawꞈ geuꞈ mawꞈ-eu meh. Miˬyehˇ-euˬ tsawˇ haˬ deuˬ-euˬ Ka li zaˬ aˇ muˇ yawˬ muˇ na luꞈ mˇ luꞈ-eu loꞈ-ehˇ,

³⁴ zaˬ miˬ zaˬ deuˬ-aˬ, Ka li zaˬ aˇ muˇ uiˬ leˇ ngeh ciˬ cuˇ ni ya jawˇ meh. Yuˇdaˆ tsawˇ haˬ-euˬ Zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ loꞈ-ehˇ, aˬ yawꞈ maꞈ dawˬ maˬ ya ngehˬ-a. Aˬ cawˬ-euˬ laꞈ oꞈ ya awꞈ-eu meh.

³⁵ Aˬ yawꞈ maꞈ tiˬ jeˬ paˬ siˬ duˬ mawꞈ-eu jaˆ naˇ, iˇ kahˇ-ahˇ jawˇ ngeh yawˬ ha-euˬ kʼaˬ dzeˇ zaˬ-ahˇ ya naˇ haˬ-eu meh. Zaˬ miˬ zaˬ deuˬ Ka li zaˬ aˇ muˇ laꞈ kʼoeˇ dawˬ ngehˬ ngehˬ-eu-aˬ, shaꞈ dawˇ paˬ-ehˇ gʼeh-eu tiˬ jeˬ meh.

³⁶ Miˬyehˇ dawˬ kawˬ-aˬ, naw maꞈ laꞈ kʼoeˇ neh doˆ le-euˬ jeˬ pyeuꞈ ta loˇ. Maˬ ngeuˇ naˇ, naw maꞈ jawˇ gaˇ tehꞈ-ehˇ Miˬyehˇ dawˬ kawˬ keuˆ le ta loˇ.

³⁷ Tsawˇ haˬ tiˬ gʼaˬ na, yawˬ ha Miˬyehˇ gʼaˇ duˬ ngehˬ dah-eu tsawˇ haˬ ma lehˇ noeˬ-eu maˬ kaˬ, saꞈ laˇ paw-euˬ laꞈ sawˬ za taˬ-euˬ tsawˇ ma lehˇ noeˬ-eu maˬ kaˬ, ngaˬ neh naw maꞈ-ahˇ boꞈ ahˇ laꞈ-euˬ sahˬ boꞈ heu Miˬyehˇ neh biꞈ-euˬ dawˬ meh lehˇ siˬ duˬ-eu tsaˬ meh.

³⁸ Ehˇ kʼawꞈ, sahˬ boꞈ heu-ahˇ aˬ yawꞈ maˬ haw cawˬ naˇ, naw maꞈ kʼawꞈ aˬ yawꞈ-ahˇ taˬ haw cawˬ.

³⁹ Kʼoeˇ miˇ neh, aˬ yuiꞈ aˬ nyiˇ ka li zaˬ deuˬ-oˇ, Miˬyehˇ dawˬ kawˬ mehˬ-eu jeˬ-ahˇ nui ma keuˆ dui dui-awˬ. Ehˇ kʼawꞈ, dawˬ gʼawˬ mya jeˬ ngehˬ-eu jeˬ-ahˇ kʼawꞈ taˬ laˆ tsoeˬ.

⁴⁰ Yawˬ jeˬ na luꞈ aˬ yawꞈ gaˇ yawꞈ tsaˬ ni bi jaˆ-awˬ.