1 Gawˇliˬtu 10 - Akha

¹ Aˬ yuiꞈ aˬ nyiˇ Ka li zaˬ deuˬ-oˇ, Moˇseˬ-euˬ mehˬ nah caw teh-euˬ aˬ dui-euˬ aˬ poeˬ aˬ bawˇ deuˬ aˬ joˆ-ehˇ pyeuꞈ yaꞈ-euˬ gaˇ kawˆ naw maꞈ bi noeˬ mawˇ mawꞈ miˇ-a. Aˬ yawꞈ maꞈ dawˬ tawˆ luꞈ-ahˇ mˬ dmˇ dehˬ kaˬ nehˬ-awˇ, Iˬ ma laˆ shaˆ Yaw neˇ-ahˇ bi tsehˆ doˆ-euˬ meh.

² Moˇseˬ-euˬ zaˬ lahˇ geuꞈ-eu gʼaˇ duˬ, mˬ dmˇ hawˇ-eu iˬ ma laˆ shaˆ laꞈ kʼoeˇ aˬ yawꞈ maꞈ dawˬ tawˆ luꞈ iˇ cuꞈ shawˇ-euˬ meh.

³ Aˬ yawꞈ maꞈ dawˬ tawˆ luꞈ mˬ taˆ-euˬ dzaˇ tiˬ kawˆ loꞈ-ehˇ dzaˬ-euˬ meh.

⁴ Mˬ taˆ-euˬ iˇ cuꞈ kʼawꞈ tiˬ kawˆ loꞈ-ehˇ dawˇ-euˬ meh. Aˬ yawꞈ maꞈ nehˬ-ehˇ tiˬ kawˆ loꞈ-ehˇ iˇ luꞈ-eu mˬ taˆ-euˬ Kʼaˬ lo-ahˇ neh yoeˇ le-euˬ iˇ cuꞈ aˬ yawꞈ maꞈ dawˇ-euˬ meh. Kʼaˬ lo kʼoeˇ-aˬ, Ka li meh.

⁵ Ehˇ kʼawꞈ, aˬ yawꞈ maꞈ myaˬ ni tiˬ paˆ-ahˇ Miˬyehˇ nui ma maˬ tsaˬ-eu miˇ neh, bawˇ tsahˬ bawˇ dahˇ kʼaˇ shuiꞈ deh yaˇ-ahˇ bi shiˇ dzeh-euˬ meh.

⁶ Heu-aˬ, aˬ yawꞈ maꞈ loꞈ-ehˇ yaw haiˬ jeˬ-ahˇ aˬ dui maˬ mˇ-ehˇ yahˇ nya laˇ ni dzaw geuꞈ duˬ pyeuꞈ-eu meh.

⁷ Aˬ yawꞈ maꞈ tiˬ paˆ na deuˬ tahˬ pahˬ aˬ ma mawˇ kawˇ-ahˇ uˬ duˬ tahˬ-euˬ loꞈ-ehˇ aˬ dui maˬ ya tahˬ ni dzaw geuꞈ duˬ pyeuꞈ-eu meh. “Tsawˇ haˬ kʼoeˇ deuˬ nuiˇ-awˇ dzaˬ boˆ dawˇ boˆ boˆ-awˇ, tuˇ-awˇ gaˇ nyeh nyeh nyeh-ehˇ byawˬ gʼa mo gʼa-euˬ meh” lehˇ Jaˇliꞈ laꞈ kʼoeˇ boꞈ taˬ-euˬ meh.

⁸ Aˬ yawꞈ maꞈ tiˬ paˆ na deuˬ maˬ tsaˬ maˬ dawˇ-eu laꞈ kʼoeˇ kʼaˬ miˬ sheu-euˬ loꞈ-ehˇ aˬ dui maˬ ya sheu-a. Aˬ yawꞈ maꞈ kʼoeˇ loꞈ-ehˇ sheu-euˬ miˇ neh, tiˬ nah tehꞈ-ehˇ tsawˇ haˬ nyiˬ heˇ smˬ yaˇ gʼaˬ shiˇ-euˬ meh.

⁹ Aˬ yawꞈ maꞈ tiˬ paˆ na deuˬ Miˬyehˇ-ahˇ lawˬ haw-euˬ loꞈ-ehˇ aˬ dui maˬ ya lawˬ haw-a. Aˬ yawꞈ maꞈ kʼoeˇ loꞈ-ehˇ lawˬ haw-euˬ miˇ meh aˇ lawˇ neh bi toˆ sehꞈ-euˬ meh.

¹⁰ Aˬ yawꞈ maꞈ tiˬ paˆ na deuˬ Miˬyehˇ-ahˇ toˇ-euˬ loꞈ-ehˇ aˬ dui maˬ ya toˇ-a.‘ Aˬ yawꞈ maꞈ kʼoeˇ loꞈ-ehˇ toˇ-euˬ miˇ neh, shiˇ-eu jeˬ-euˬ mˬ taˆ gʼaˬ kʼehˇ neh bi laˆ cawˆ-euˬ meh.

¹¹ Gaˇ kawˆ kʼoeˇ deuˬ aˬ yawꞈ maꞈ kʼoeˇ taˆ keuˆ le-euˬ kʼoeˇ-aˬ, aˬ cawˬ bi dzaw geuꞈ-eu gʼaˇ duˬ pyeuꞈ-awˇ, aˬ dui kʼawꞈ dzaw geuꞈ-awˇ bi yahˇ-eu gʼaˇ duˬ boꞈ ka leꞈ-euˬ meh. Aˬ jeˬ miˇ neh ehˇ naˇ, aˬ duiˬ-euˬ ziˇ heu ziˇ-ahˇ miˇ tsaˬ heu aˇ saˬ saˬ-eu aˇ yamˬ peh le taˬ-euˬ meh.

¹² Ziꞈ dah ni yawꞈ luꞈ ma lehˇ noeˬ-eu tsawˇ haˬ aˬ geu gʼaˬ maˬ kaˬ, maˬ ya coˬ-iˇ ni yahˇ-eu tsaˬ tehꞈ-a.

¹³ Aˬ cawˬ maˬ ya puˬ maˬ ya mawˇ haw-euˬ muˇ juˇ juˇ-eu jeˬ-ahˇ naw maꞈ ya daˬ-eu maˬ ngeuˇ-a. Miˬyehˇ-aˬ, saˇ jaˇ ziꞈ dui dui-awˇ, naw maꞈ maˬ kamˬ coeˇ-eu muˇ juˇ juˇ-eu jeˬ maˬ bi keuˆ le-a. Naw maꞈ kʼoeˇ taˆ muˇ juˇ juˇ-eu jeˬ keuˆ le ngeh, kamˬ coeˇ ni aˬ yawꞈ gʼaˬ biꞈ nehˬ laꞈ-awˇ, buˬ-iˇnya-eu gaˇ ma shaˇ dahˇ nehˬ laꞈ tehꞈ-a.

¹⁴ Kʼoeˇ miˇ neh, ngaˇ gaˬ-eu aˬ yuiꞈ aˬ nyiˇ Ka li zaˬ deuˬ-oˇ, tahˬ pahˬ aˬ ma mawˇ kawˇ-ahˇ uˬ duˬ maˬ tahˬ ni yahˇ-awˬ.

¹⁵ Naw maꞈ-ahˇ noeˬ siˬ noeˬ mawˇ nya-eu tsawˇ haˬ loꞈ-ehˇ ngaˇ sawˇ-awˇ ehˇ-eu ma. Ngaˬ-euˬ dawˬ-ahˇ naw maꞈ tseˇ paˆ geuꞈ-awˬ.

¹⁶ Aˬ dui Sahˬpaˬ Yeˬsuˇ-ahˇ noeˬ keuˆ-eu Bawˬ-iˬ dzaˬ ngeh, Miˬyehˇ-euˬ guiˬ lahˬ-ahˇ ja ceuˬ-awˇ dawˇ-eu kʼmˬ maˬ-ahˇ taꞈ leˇ-awˇ ngaˇ heu loꞈ-ehˇ ehˇ-eu ma. Kʼmˬ maˬ kʼoeˇ ciˬ dawˇ ngeh, Ka li-euˬ shiˬ-ahˇ aˬ dui taꞈ leˇ-eu jeˬ pyeuꞈ-eu meh. Kaˬ muˇ ngawˬ pyehˬ-awˇ dzaˬ ngeh, Ka liˬ-euˬ gʼawˇ mawˇ-ahˇ aˬ dui taꞈ leˇ-eu jeˬ pyeuꞈ-eu meh.

¹⁷ Aˬ dui tsawˇ haˬ gʼawˬ mya gʼaˬ pyeuꞈ-eu kʼawꞈ, kaˬ muˇ tiˬ yaˆ tehꞈ miˇ neh, gʼawˇ mawˇ tiˬ mawˇ-ahˇ tehꞈ-ehˇ taꞈ-eu meh. Aˬ jeˬ mˇ neh ehˇ naˇ, kaˬ muˇ tiˬ yaˆ-ahˇ tehꞈ-ehˇ aˬ dui taꞈ-eu ma.

¹⁸ Iˇsaˬleˬlaˆ tsawˇ haˬ gaˇ kawˆ shaˇ sawˇ haw sheˇ. Lawˇ dzaˇ kʼaˇ dzaˬ-euˬ tsawˇ haˬ deuˬ-aˬ, lawˇ duˬ kʼoeˇ taˆ Miˬyehˇ-ahˇ lawˇ-eu jeˬ mˇ-eu laꞈ kʼoeˇ tiˬ gaˇ taꞈ-eu maˬ ngeuˇ-a loˇ.

¹⁹ Heu loꞈ-ehˇ ehˇ ngeh, tahˬ paˬ aˬ ma mawˇ kawˇ hawˇ-eu tahˬ pahˬ aˬ ma mawˇ kawˇ-ahˇ lawˇ nehˬ-euˬ jeˬ guiˬ lahˬ baw meh lehˇ ngaˇ ehˇ mawꞈ-eu nga loˇ.

²⁰ Maˬ ngeuˇ. Lawˇ ciꞈ za deuˬ-euˬ lawˇ duˬ kʼoeˇ taˆ lawˇ-euˬ jeˬ-aˬ, Miˬyehˇ-ahˇ lawˇ nehˬ-euˬ maˬ ngeuˇ-ehˇ, nehꞈ-ahˇ lawˇ nehˬ-euˬ meh lehˇ ngaˇ ehˇ mawꞈ-eu ma. Naw maꞈ nehꞈ-ahˇ maˬ bi taꞈ leˇ mawꞈ nya.

²¹ Sahˬpaˬ Yeˬsuˇ-euˬ kʼmˬ maˬ hawˇ-eu nehꞈ-euˬ kʼmˬ maˬ heu nyiˬ jeˬ luꞈ-ahˇ naw maꞈ maˬ dawˇ nya-a. Sahˬpaˬ Yeˬsuˇ-euˬ hawˬ jeh hawˇ-eu nehꞈ-euˬ hawˬ jeh heu nyiˬ jeˬ luꞈ-ahˇ naw maꞈ maˬ dzaˬ nya-a.

²² Sahˬpaˬ Yeˬsuˇ myaˆ naˆ ni aˬ dui mˇ-eu shaˇ-eu loˇ. Aˬ yawꞈ naˆ maˬ tseˇ gʼaˬ kʼaˆ dzehˬ ma lehˇ aˬ dui noeˬ te loˇ.

²³ “Yawˬ jeˬ na luꞈ mˇ kʼmˬ meh.” Ehˇkʼawꞈ, yawˬ jeˬ na luꞈ gaˇ dahˇ tsoeˬ-eu maˬ ngeuˇ-a. “Yawˬ jeˬ na luꞈ mˇ kʼmˬ meh.” Ehˇ kʼawꞈ, yawˬ jeˬ na luꞈ guiˬ lahˬ baw-eu maˬ ngeuˇ-a.

²⁴ Tsawˇ haˬ tiˬ gʼaˬ-iˬ yawˬ ha gʼaˇ duˬ muiˬ-eu jeˬ-ahˇ maˬ poˆ ni, aˬ cawˬ gʼaˇ duˬ muiˬ-eu jeˬ-ahˇ poˆ-eu tsaˬ meh.

²⁵ Naw maꞈ laꞈ kʼoeˇ siˬ nya-eu nui ma ahˇ-eu miˇ neh, lehˆ laꞈ kʼoeˇ shaˬ jiˇ ahˬ duˬ-aˇ kʼaˇ daˬ ahˬ taˬ-euˬ jeˬ-ahˇ maˬ naˇ haˬ tseˇ ni zeuˇ dzaˬ nya tehꞈ-a.

²⁶ Aˬ jeˬ miˇ neh ehˇ naˇ, “Miˇ tsaˬ tahˬ kʼawˇ hawˇ-eu kʼoeˇ-euˬ kʼoeˇ taˆ kʼaˇ jaˆ-eu yawˬ jeˬ na luꞈ Sahˬpaˬ Miˬyehˇ-euˬ tehꞈ meh” lehˇ, Jaˇliꞈ laꞈ koeˇ ehˇ taˬ-euˬ jaˆ meh.

²⁷ Yeˬsuˇ Ka li-ahˇ maˬ jah-eu tsawˇ haˬ tiˬ gʼaˬ na naw maꞈ-ahˇ hawˬ kuˇ dzaˬ-awˇ, naw maꞈ dzaˬ-iˇ ma lehˇ noeˬ tsehˆ-euˬ ngeuˇ naˇ, naw maꞈ laꞈ kʼoeˇ siˬ nya-eu nui ma ahˇ-eu loꞈ-ehˇ, kʼaˇ shaˇ dahˇ taˬ-euˬ jeˬ dzaˬ nya tehꞈ-a.

²⁸ Ehˇ kʼawꞈ, “Heu-aˬ, tahˬ pahˬ aˬ ma mawˇ kawˇ-ahˇ lawˇ nehˬ-euˬ dzaˇ ma” lehˇ ehˇ nehˬ laꞈ naˇ, naw maꞈ-ahˇ ehˇ nehˬ laꞈ-euˬ gʼaˬ-euˬ gʼaˇ duˬ hawˇ-eu, naw maꞈ-euˬ siˬ nya-eu nui ma-euˬ gʼaˇ duˬ shaˇ noeˬ-awˇ, maˬ dzaˬ ni byehˇ-awˬ.

²⁹ Ngaˇ heu loꞈ-ehˇ ehˇ-eu-aˬ, naw maꞈ-euˬ siˬ nya-eu nui ma gʼaˇ duˬ shaˇ noeˬ-awˬ lehˇ ehˇ mawꞈ-eu maˬ ngeuˇ. Aˬ cawˬ-euˬ siˬ nya-eu nui ma gʼaˇ duˬ shaˇ noeˬ-awˬ lehˇ ehˇ mawꞈ-eu ma. Toˆ-ehˇ ngeuˇ naˇ, aˬ cawˬ-euˬ siˬ nya-eu nui ma gʼaˇ duˬ shaˇ noeˬ-awˇ yawˬ ha mˇ nya-eu jeˬ maˬ mˇ ni ya dzahˬ tehˬ ta loˇ lehˇ, tsawˇ haˬ tiˬ gʼaˬ na ehˇ mawꞈ tehꞈ-a.

³⁰ Yawˬ ha dzaˬ-eu dzaˇ gʼaˇ duˬ Miˬyehˇ-ahˇ ja ceuˬ ngeh, yawˬ ha neh Miˬyehˇ-ahˇ ja ceuˬ-awˇ dzaˬ-euˬ dzaˇ-ahˇ aˬ cawˬ aˬ jeˬ ehˇ kʼaˇ paˇ za ta lehˇ ehˇ mawꞈ tehꞈ-a.

³¹ Kʼoeˇ miˇ neh, dzaˬ-eu maˬ ehˇ, dawˇ-eu maˬ ehˇ, kʼaˇ mˇ kʼaˇ shaˇ-eu yawˬ jeˬ na luꞈ Miˬyehˇ-euˬ yaw shehꞈ kʼahˬ sehˇ doˆ laˇ ni mˇ-awˬ.

³² Yuˇdaˆ tsawˇ haˬ deuˬ-ahˇ maˬ ehˇ, Yuˇdaˆ tsawˇ haˬ maˬ ngeuˇ-eu deuˬ-ahˇ maˬ ehˇ, Miˬyehˇ-euˬ Ka li zaˬ aˇ muˇ-ahˇ maˬ ehˇ, coeˬ-eu ciˆ-eu jeˬ maˬ mˇ ni dehꞈ-awˬ.

³³ Ngaˬ neh kʼaˇ mˇ-euˬ loꞈ-ehˇ mˇ-awˬ. Ngaˇ kʼaˇ mˇ-eu jeˬ laꞈ kʼoeˇ, tsawˇ haˬ yawˬ gʼaˬ na luꞈ nui kʼahˇ shiˇ ni mˇ-eu ma. Aˬ yawꞈ maꞈ ka kʼoꞈ-eu jeˬ za nya ni, ngaˬ-euˬ gʼaˇ duˬ muiˬ-eu jeˬ-ahˇ maˬ shaˇ noeˬ-ehˇ, aˬ cawˬ gʼaˇ duˬ muiˬ-eu jeˬ-ahˇ shaˇ noeˬ-awˇ mˇ-eu ma.