(Salmos) 95 - Awajún: Apajuí chichame pegkejam Porciones del Antiguo Testamento y el Nuevo Testamento

Apajuí shiig anentsa kantamjuawagmi

¹ Kaunatajum, Tuke Pujuu, iina kuitamjamak uwemtijamna nunú shiig aneasa kantamjuawagmi.

² Nii pujamunum wayawaja nii emematku kantamtai kantamjuawagmi.

³ Wagki Tuke Pujuuwai dekas múun senchigtin, ashí tikich apajuímtai aina nunashkam Apujiyai.

⁴ Nugkak initken nagkamas ashí Apajuí emetuam awai, tuja muja tsakaju aidaushkam niinu ainawai.

⁵ Tuja nayantsashkam nii najanamu asa ima niinuke. ¡Nugkanashkam nigki najanauwai!

⁶ Minitajum, Tuke Pujuu, iina najapauwa nunú tikishmatja emematiagmi.

⁷ Niyai iina Apajuíjig, tuja iik niina aentsji ainaji, nuadui uwija kuitamin niina uwigjin kuitamama numamtuk iinash kuitamjamui. Apajuí yamai atumin tujama nunú antuktajum.

⁸ “Yaunchuk Meribánum, tuja uwejush Masánmashkam Apajuí chichamen intimjukiu aina numamtuk wajakaigpajum.

⁹ Atumin muunjum aajaku aina duka kuashat wainchatai aidaun wi iwainamun wainainayatak, dekaskechua nunin diisu ainawai.

¹⁰ Nuadui nunú aents aidaun dakitjan cuarenta mijan pujubiajai, nuniakun: ‘Juju aents aidauk shiig wainak yujawai; núnidau asag mina chichamjunak umigtuinatsui’.

¹¹ Nuadui kajekan, chicham yapajiashtinun chichaakun: ‘Dita shiig batsamsatnun nugka pegkejan wi ditan anagkuawaitag nuwig ditak jegashtin atinme’ tiabiajai”, tiuwai Apajuí.