(Salmos) 8 - Awajún: Apajuí chichame pegkejam Porciones del Antiguo Testamento y el Nuevo Testamento

Apajuí imanjiya nunú aentsu pujutjijai

David kantamamu

¹ Tuke Pujuuwah, ametme iina apuji, ashí tikich aidau nagkaesau muunmek. ¡Amina daagmek ashí nugkanum antunawai! ¡Amina imanjumek nayaim múunta nuna nagkaesauwai!

² Amina shiwaajum kajegtamainak mantamatag tinu aina duka, uchi tsakat aidau, uchi muntsu muntsuaku aidaujai shiig pegkegchin kantamaina duwi amina senchijum iwaintukam itatmikajume.

³ Ame nayaim najanamua nuna diisan, tuja nantu, yaya aidaujai ame najankamu aidau nayaimpinum ayá nunashkam wainkun

⁴ anentaimsan: ¡Aents aidautik pegkegmakesh ainatsji! ¡Tikima wainkauch ainaji! Nunin ajinish ¿wagka tujash puyatkagtusmesh kuitamkagtame?

⁵ Aentsuk ángelchawashit tumain najanauwaitme. Nuadui apu kuitamaina imatiksam kuitamam duka dutikame.

⁶ Tuja ashí ame najankamu aina duka ashí nii idaitusuitme, dutikakum tikich ame najankamu aina nuna nagkaesau emam apusauwaitme.

⁷ Dutikam uwig aidau buey aidau, kuntin ikamia aidau,

⁸ chigki yakí nanamin aidau, namak nayantsanmaya aidau, tuja tikich kuntin aidau nayantsanum ayá duka ashí nii idaitusuitme.

⁹ Tuke Pujuuwah, ametme iina apujimek, ametme ashí tikich aidaun nagkaesau dekas muunmek. ¡Amina daagminak ashí nugkanum dekainawai!