(Salmos) 47 - Awajún: Apajuí chichame pegkejam Porciones del Antiguo Testamento y el Nuevo Testamento

Apajuíyai ashí nugka apujig

Coré uchiji aidau kantamawagbau

¹ Ashí aents aidautijum Apajuí uwejum awatitajum. Tuja nii emematkujum shiig aneasjum senchi kantamatajum.

² Wagki Tuke Pujuuwai ishamtai múun, ashí nugka apujiya duka.

³ Aents tikich nugkanmaya aidaun Apajuí depetuk, atum inagtajum tusa iina idaitugmasui.

⁴ Apajuí Jacopan aneau asa, nii wegantu aidautin etegtamjauwai, dutijama nugka pegkejan nii anagtabauwa nuna sujamsajui. Nunú nugka duwi ii eme anenmamji.

⁵ Tuke Pujuu Apajuík niina aentsji aidau shiig aneasag senchi kantamainak, nuigtu uwija kachujin umpuinak pampainamunum niina pujusa inamtaijin waya ekemsae.

⁶ ¡Kantamtai Apajuí kantamjuatajum! ¡Kantamtai iina apuji kantamjuawagmi!

⁷ Apajuíyai ashí nugkanmaya aidaun apuji, nuadui shiig aneasjum kantamjuatajum.

⁸ Apajuík nii pujusa inamtaiji pegkegma nuwi pujusag, ashí aents nugkanmaya aidaun inawai.

⁹ Tuja ashí tikich nugkanmaya apu eme anentsa diitai aidauk, Abrahama Apajuíjin ememattatus nii wegantu aidaujai ijunainawai.

¹⁰ Ashí aents nugkanmaya aina duka Apajuínu ainawai. Nuadui nii ashí inawai.