(Salmos) 14 - Awajún: Apajuí chichame pegkejam Porciones del Antiguo Testamento y el Nuevo Testamento

Aents pegkegchau aidaun pujutji

David kantamamu

¹ Aents anentainkachu aidauk: “Apajuík atsawai”, tuinawai. Nuadui dita anentainig ima pegkegchau aina nunú takatak ajuinawai, nuadui dita takamuji aina duka shiig dakitmainai. Tiki makichkiuchikesh pegkejan takauk shiig atsawai.

² Apajuík aents aidaunak nayaimpinum pujusag diyawai, makichkikesh shiig anentaimkau Apajuí umigmain atsuash tusa wainkatatus.

³ Tujash aents aidauk pegkegchau takatan yujajui, nunidau asag ashí betek tunamakaje. ¡Tiki makichkikesh pegkejan takauk shiig atsawai!

⁴ Pegkegchaun takau aina duka anentaimainatsui. Pag yuwa wamak amutiama numamtuk mina aentsug aidaun amuinawai. Nunú aents aidauk Apajuí yainkati tusagkesh makichkish Tuke Pujuunak segachu ainawai.

⁵ Nunú aents pegkegchaun takaina duka sapigmainak kujaidiagtatui. Tuja Apajuík aents ima niina chichamen umin aidaunum pujawai.

⁶ Atum pegkegchau aidautijum aents ujudauch ememachu aina nunú atsaneakjum dushikiagme, tujash Tuke Pujuu ditanak kuitamui.

⁷ ¡Israel aents aidaun uwemtijatin utusag Siógka mujajinia taawa! tusan wakegajai. Tuke Pujuu niina aentsji aina nuna pujutjin iwagtugmataig, Jacob Israel daagtina nuna uchiji aidauk ashí shiig aneasagtinai.