(Salmos) 130 - Awajún: Apajuí chichame pegkejam Porciones del Antiguo Testamento y el Nuevo Testamento

Tuke Pujuuwai kajintsa anentaibau

Jerusalén wakatatus wesag shiig anenaku kantamawagbau

¹ Tuke Pujuuwah, waanum initak egkema pujusan amina untsuagme.

² ¡Apuh, wi untsuajam nunú antugtukta! ¡Wi amina egakun untsumag nunú antugtukam yainkata!

³ Tuke Pujuuwah, ame tsagkugkagtugchawaitkuminig, iwakuk batsamaitsuji.

⁴ Tujash ame tsagkugkagtau asam, eme anentsa umijam atatme.

⁵ Wika Tuke Pujuuwai ashí mina anentaigjai, kajintsan pujajai. Tuja nii anagkagtuawa nunashkam dekaskeapi tajai.

⁶ Wika yaakta kuitamin wajupa asag tsawajat tusa, tsawantan dakajama numamtuk mina Apajuíjun dakajai.

⁷ Israel aents aidautigmek Tuke Pujuu taatnuji dakastajum; wagki niyai awai anentak, tuja ashí agkanmaetashkam.

⁸ Apajuí Israel aents aidaun tudaujinak ashí tsagkujug agkanmitkattawai.