(Salmos) 127 - Awajún: Apajuí chichame pegkejam Porciones del Antiguo Testamento y el Nuevo Testamento

Ashí Tuke Pujuunmaya junawai

Salomón Jerusalén wakatatus wesa shiig aneak kantamamu

¹ Tuke Pujuu jegan jegamchataik, jegá jegamin aidauk wainak takak waituinawai; tuja Tuke Pujuu yaakta kuitamchataik, yaaktan kuitamin aidauk wainak kuitamak waituinawai.

² Ajakma yuwatatus takak, kashikmas nantaki tuke etsan akapakush, kuashat juuka yuwatnunig wainak imanik waituinawai. Nuninai Apajuík niina kumpajinak kanak tepetaish, nii yuwatnujinak ashí suwawai.

³ Iina uchiji aina duka, Tuke Pujuu anentag pegkejuch amasbau ainawai.

⁴ Ii datsa ajin iina uchiji akiinaina duka, aents maanitan yacha nuna flechajijai betek ainawai.

⁵ Nuadui aents kuashat uchigtina duka shiig aneasagtin ainawai. Tuja niina shiwaaji aidaujai igkuniakush dushikiam achatnai, niina uchiji kuashat asa, apajin ayamjukagtinai.