(Salmos) 122 - Awajún: Apajuí chichame pegkejam Porciones del Antiguo Testamento y el Nuevo Testamento

Jerusalén kantamjuamu

David Jerusalén wakatatus wesa shiig aneak kantamamu

¹ Tuke Pujuu jee pegkegma nuwi wemi tujutuinakui, wika shiig anebiajai.

² Jerusalégkah, yamai juwi waitinum kaunaji.

³ Jerusalén yaaktamamua nuwi ashí tikich yaakat aidaushkam ijutkau ainawai.

⁴ Ashí Israel aents Tuke Pujuun aentsji aidauk Jerusalén tuwainawai, Apajuín emematuinak, wagki nuwi Apajuí ememattajum tibau asag, nuna umiinak.

⁵ Nuwi awai chicham inagnatai, tuja Davitan pujusa inamtaijishkam.

⁶ Nuadui: “Jerusalégkah, aminak utugchatak atsugtamti; tuja amina anempaina dushakam agkan pujustinme.

⁷ Yaakat peeja apakbauwa nuna initken aents batsata dushakam agkan, tuja jega apu pujusa inamtaijiya dushakam waitkaschamu ati”, titajum.

⁸ Tuja mina yatsug aidaun kumpag aidaujai chichagkun: “Atumnash utugchatak atsugtamtinme”, tajai.

⁹ Untsu Jerusalégkah, aminig pujut pegkeg ati tusa wakegajai, wagki Tuke Pujuu amina Apajuígmi jee pegkegma nunú au asamtai.