(Salmos) 119 - Awajún: Apajuí chichame pegkejam Porciones del Antiguo Testamento y el Nuevo Testamento

⁹⁷ ¡Amina chichamjum umiktin sukagtusuitam nuna shiig senchi aneau asan, kashi kashinig nuwig anentaimjai!

⁹⁸ Nunú chicham umiktin agagbau umiktajum tusa sukagtusuitam nunú mina shiwag aidaun nagkaesau yachamtijawai, wagki nunú jintinjau asamtai.

⁹⁹ Wika nuna ausa dekau asan, mina jintinjin aidaun nagkaesau chicham umiktin agagbauwa nuwi anentaimjai.

¹⁰⁰ Tuja amina chichamjum umiktin sukagtusuitam nuna umiau asan, múun amina chichamjumin etsejin aidaun nagkaesau amina chichamjumnak dekajai.

¹⁰¹ Amina chichamjumin umiktag tau asan, pegkegchau aina nunak idaisabiajai.

¹⁰² Tuja ame minak jintinjau asamin, aminu chicham umiktina nunak idaisachmaijai.

¹⁰³ Ame umiktin anagkagtuawaitam nunak mina kayakmataijuig shiig yumintsak dekapeajai, tuja mina wenujui dapa yumijin nagkaesau yumintsak dekapeajai.

¹⁰⁴ Amina chichamjum umiktin sukagtusuitam nuwiya unuimaju asan, waitjut aina nunak kajejajai.

¹⁰⁵ Amina chichamjum agagbauwa nunú jii ekemakbaujai betek, wi weamunum tsaaptin emawai, tukumak iyajai tusa.

¹⁰⁶ Wi yaunchuk chichaakun, umiktajai tiuwaitag nunak, ataktushkam tajai: “Amina chichamem pegkegma nunak dekas umiktatjai.”

¹⁰⁷ ¡Tuke Pujuuwah, shiig pimpikin wake besemag pujajai! ¡Ataktu ichichtugta, ame chichamjum wajintu chichawa dutiksamek!

¹⁰⁸ Tuke Pujuuwah, wi amina emematjam nunú shiig aneasam jujutkita, nuniakum amina chichamjumia nunú jintinjuata.

¹⁰⁹ Wika tuké jamainnum pujajai, tujash ame jintinjuamua nunak kajimattsujai.

¹¹⁰ Aents pegkegchau aidau, utugchatan apujtujuinawai, tujash amina chichamjum umiktin sukagtusuitam nunak kajimatkinuk idaitsujai.

¹¹¹ Amina chichamjum umiktina nunú minak tuké shiig aneasa pujutan sujawai.

¹¹² Wika amina chichamjum umiktin sukagtusuitam nunak wakejusan, atakea duwish tuke umiktin atajai, tusan tumamjai.

¹²⁹ Amina chichamjum umiktina duka shiig pegkejai; nuadui wika betek umiajai.

¹³⁰ Amina chichamjum etsegbauwa duka tsaaptinjai betekai; nuniau asa aents kakagchauchinak shiig dekamtikawai.

¹³¹ Amina chichamjum umiktin sukagtusuitam nuna dekatasan wakegajai, nuniakun itugkanuk shiig dekawag tusa anentaimkun waitiajai.

¹³² Tuke Pujuuwah, amina anempau aidau wait anentam dutiksamek, minash diigsam wait anenjugta.

¹³³ Amina chichamjum wajintua dutiksamek awekattsata; pegkegchau wagagkiti tusamek idaitusaipa.

¹³⁴ Aents pegkegchau aidau mantuawainum ayamjutkata, wika amina chichamjum umiktin sukagtusuitam nuna umiktasan wakegajai.

¹³⁵ Wi amina inakmetag dusha shiig aneasam diigsata, nuniakum nunú chichamem jintinjuata.

¹³⁶ Amina chichamjumin eme anentus uminachu asamtai, shiig senchi buutjai.

¹³⁷ Tuke Pujuuwah, amek pegkegmaitme; tuja ame suwimak sukagtam dushakam pegkegnum jintinkagtawai.

¹³⁸ Chicham umiktin ame sukagtusuitam duka waitchauwai, betek uminnai.

¹³⁹ Mina shiwag aidau amina chichamjumin uminachkui, kajeakun shiig senchi waitiajai.

¹⁴⁰ Amina chichamjumik ashí dekapsamu dekas pegkegmai, nuadui wika amina inakminuk nuna wakegajai.

¹⁴¹ Wika dushiktai, wainkauchitjai, tujash amina chichamjum umiktin sukagtusuitam nunak kajimattsujai.

¹⁴² Amina takatjum pegkeja duka tuké imanisag auwai, tuja amina chichamjum umiktin agagbauwa duka dekas shiig pegkegmai.

¹⁴³ Waitiakun wake besemag pujubiajai; tujash amina chichamjum umiktin sukagtusuitam nunak minak shiig anemtijusmayi.

¹⁴⁴ Ame chicham umikuitam duka makichkish yapajinchauwai. ¡Yainkata wisha nuna shiig antukan umiktajai!