(Proverbios) 20 - Awajún: Apajuí chichame pegkejam Porciones del Antiguo Testamento y el Nuevo Testamento

¹ Vino nampeamua nunú aentsun pegkegchau chichamtin emawai; uwaja nampetai aina duka utugchatan inimui; nuna uwag nampeauk shiig anentaimag chichatsui.

² Apu kajena duka león kajeak shinuwama imanai; tuja nuna apun ikajeauk nigki bakumawai.

³ Aents pegkegchau takatan tupanjauk jiyanitnak dakitawai; untsu anentainkachua duka jiyanitan wekaetawai.

⁴ Aents dakia duka aja takamain esat tepeau aig, takatsuk pujau asa, yumi tepeamtai nii yumainjig atsugtinai.

⁵ Aentsu anentaimtajig nayantsa kunajinia wainmaitsu numamtinai. Untsu aents yacha duka nuna takumpap tawa tusa shiig dekawai.

⁶ Kuashat aents aidau, amina kumpauchijum atajai tuinawai; ¿tujash dekas aents imanush igkumainashit?

⁷ ¡Aents pegkegchau takatan tupanjau aidaun uchiji aidauk, dita apaji pegkejan takajaku aina nujai betek pegkejan takainak, Apajuí yayamu asag shiig aneasagtinai!