(Proverbios) 15 - Awajún: Apajuí chichame pegkejam Porciones del Antiguo Testamento y el Nuevo Testamento

¹ Pegkegnum aimawa nunú kajekbaunak imijiawai; untsu kajeka aimawa duka nuni senchi kajeamun inimui.

² Aents yacha shiig anentaimkau aina nuna chichameg unuimatan sukagtawai, untsu aents anentainkachu aina nuna chichameg pegkegchau ainawai.

³ Tuke Pujuuk ashí yantamnum pujawai, nuniau asa aents pegkeg aidaun pegkegchau aidaujai diyakui.

⁴ Pegkeg chichamua nunú aentsnak pegkegnum yayawai. Untsu pegkegchau chichamua nunú aentsu pujutin emestawai.

⁵ Aents anentainkachua duka niina apaji jintinmash dakitawai, untsu yacha shiig anentaimkauwa duka niina apaji chichamen antujui.

⁶ Aents Apajuí umigna duka shiig kuashat wajigtinai, untsu aents pegkegchauwa nunak niina wajijiya duke utugchatan itajui.

⁷ Aents yacha shiig anentaimkauwa duka nii dekamujin tikich aentsnash pegkejan jintintui. Untsu aents anentainkachu aina duka pegkegchauwa nuna jintintui.

⁸ Aents pegkegchau aidau Apajuí anentag suwaji tusag, kuntinun maa apeena duka Tuke Pujuunak shiig awagmatsui. Untsu aents pegkegchau takatan tupanjau aina nunú segamak Apajuík shiig antujui.

⁹ Tuke Pujuuk aents pegkegchau aina nuna pujutjinak dakitawai, untsu ya tudaun tupantug pegkejan takak pujawa nuna aneawai.