(Oseas) 11 - Awajún: Apajuí chichame pegkejam Porciones del Antiguo Testamento y el Nuevo Testamento

Apajuík niina aentsjig intimkiu ainaig aneawai

¹ “Israel aents aidaunak tsakatuch ainaig nagkamsan aneen ayajai, wi ditanak mina uchig asagmatai, Egipto nugkanum batsatun jiijuitjai.

² Dutikamaitak mina umigtutan dakituinak nuni senchi tupanjuyanume, nuninak wainka apajuímtai aidaun emematuinak kuntinun maa apeenak, kugkuin inciensonashkam apeeyanume.

^3-4 Nunin ainaig wi ditan aneau asan uchijai betek jukin egkesan emayajai, dutikakun wekaetanash jintintuawabiajai, yutainash ayujiajai, utugchatnumash yaigkabiajai. Imatiksa kuitamaitak, Apajuíyap kuitamjamua tichau ainawai.

⁵ Nunidau asag mina umigtutnak dakitjau ainawai. Nuadui egiptunmaya aents aidau inainak waitkajaku aina nunak, yamaik asirianmaya ditanak inainak waitkasagtatui.

⁶ Dita yaaktaji aidaunak tsaigkagtinai, dutikainak aents aidaunashkam ijinawagtinai, nuna dutikainak dita anentaimjamujinak ashí idaimitkasagtinai.

⁷ Mina aentsug aidauk, wainka apajuímtai aidaun emematuinak mina umigtutnak dakituinawai. Nunidau asag mina idaitusag batsata nunisag batsamsatatus wakegainawai. Senchi untsumainawai, tujash makichkish ditan yayauk atsawai.

⁸ “¡Israel aents aidauwah, wika atumi aneakun shiig senchi waitiajai, nuadui wika kajimatkinuk idaimaitsujime! ¡Wika Admánmaya aents aidaun, Seboímnumia aents aidaujai dita pegkegchaujin ijinauwaitag imatikanuk tikima ijinmaitsujime!

⁹ Wika atumnak kajekbautkek suwimkanak amaschagtatjai, Tuja Efraín wegantu aidaunak ataktuk ijinashtinaitjai, wagki wika aentschauwaitjai, wika Apajuíyaitjai. Witjai Tuke Pujuu pegkegmanuk, wika atumjai ijutkau pujajai, wika atumin ijinatasanuk tachmajai.”