(Job) 19 - Awajún: Apajuí chichame pegkejam Porciones del Antiguo Testamento y el Nuevo Testamento

¹ Nuna tusa nuigtu Job chichaak:

² “¡Make agkan idaitustajum, ipimtagme! ¡Atum tujutjum duka kuchiyai ijutbau najamaina imatijawai!

³ Kuashta minak pegkegchau chichagtagme. ¿Mina jutika waitkajakjumesh datsaamatsjumek?

⁴ Wi pegkegchaun takamsau amainaitag duka, atumnak pegkegchauk etamaitsui, duka ima mina utugchatjuke.

⁵ Atumek mina nagkaetasu pegkejam anenmamjume, wi jakun kakaumainchau wajasa pujag duwi dushiktaku imatjutagme.

⁶ Wi waitiag junak, Apajuí waittsati tujutmatai waitiag nunú shiig dekatajum. Kuntin chanua maatasa umigtayama numamtuk Apajuí umikbaunum pujusan waitiajai.

⁷ “Senchi untsumkan ¡mantuinawai! tusan imattaish, makichkish aijuinatsui. Yainkatajum taish, makichkish yaintuinatsui.

⁸ Apajuí minak nagkaemaki tusa jintan akigtujue. Tuja nuigtushkam jintan suwe etugtine.

⁹ Mina wajiig aidaun, tagkug aidaun, aents inakeg aidaun ashí yajutjuke; dutijak nuigtushkam eme anentsa diyam amainchau etine.

¹⁰ Minak makichkish wajigtuchu shiig wainak etine. ¡Numi kagkapejaí tegai ajapamu, ataktu tsapamaitsu numamtuk, tsagagnuap pujustatja tumainchau awajtuse!

¹¹ Nii kajekbaujin imatijawai, imatijak shiwaajui utugmaina dutijawai.

¹² Niina suntaji aidauk ashí nantagtujaje, nunikag mina jegajun tentea apakag uminas jetetuinak waitkajuinawai.

¹³ “Mina yatsug aidau mina kumpag aidaujai kajimatkitnume, dutikainak aents tikich nugkanmaya utugtaya dutikatnume tusa Apajuí tine.

^14-15 “Mina pataag aidaushkam kumpag aidaujai pachittsuk idaitusaje. Wijai ijunag yujajaku aidaushkam pachitkachaje. Mina inakeg aidaushkam aents tikich nugkanmaya wainchatai itugmaina dutijainawai.

¹⁶ Mina inakeg aidaun untsuaish aijuinatsui; kuashta untsuaish makichkish antugtuinatsui.

¹⁷ Mina duwagshakam wi mejeau asamtai tsuumjawai, tuja mina yatsug aidaushkam kajegtuinawai.

¹⁸ Uchi ai aidauwaske dushiktuinawai, eke yama wajain wekaesatag taig, dushiktuinawai.

¹⁹ Mina shiig kumpauchig aidaush kajegtuinawai, mina aneetaig aidau, shiwagmatuinawai.

²⁰ Watsajan ayatak ukunchik wajasjai, ashí jakan piipichin iwaakjai.

²¹ “Mina kumpag aidauwah, minash wait anenjugtajum, minak Apajuí waittsati tujutiu asamtai, wika senchi waitiajai.

²² ¡Make idaitustajum! atumek kuashta waitkagjume. ¡Apajuí waittsati tujutmatai waitiag duke ati!” tiuwai.