(Isaías) 11 - Awajún: Apajuí chichame pegkejam Porciones del Antiguo Testamento y el Nuevo Testamento

David wegantunmaya apu wajas agkan pujutan sukagtustinai tibau

¹ David wegantuk numijai betek ajaka ajuamu atatui, tujash nuna wajautinia yamajam jeeka tsapaitnai.

² Nunikmatai Tuke Pujuu Wakani niyai pujus unuimatan, shiig anentaimtan, senchimetan, tuja Apajuín shiig wainu asamtai, puyatjus umigtan susatnai.

³ Nunú apuk aentsnak ayatak diisagkek suwimkanak susashtinai, tuja nuigtush ayatak chichaman antamuikik, nuni ati tusag chichamnak iwajachagtinai.

⁴ Aents kasagtai aidau, ujudauch aidaujai waitkam batsata nuna ayamjuktinai, dutikak untsu aents magkagtin, pegkegchau aidaunak suwimkan susa ijinatnai.

⁵ Niig pegkeg takatan dekaskea nujai ayamjak maanitkatnai.

⁶ Tuja nunú tsawan jegamtaig, lobo uwigjai ijunag pujuagtinai; ikamyawa chivojai ijunag kanitnai, untsu baka leónjai ijunag wekagas tsakagtinai, tuja uchi aidau nuna yutaijin ayujuinak yajuak awekaidiagtinai.

⁷ Tuja baka nuwa, chayú nuwajai shiig kumpaji agtinai, tuja uchiji aidaushkam nujai ijunag kajiitnai, tuja leónshakam bueyejai ijunag chijichin yuwagtinai.

⁸ Tuja uchi piipich aidaushkam dapijai wasugkabiagtinai, dapi pasugken pujaunash inua achiagtinai.

⁹ Nunú tsawantinig Tuke Pujuu mujanum puja nuig pegkegchau awajkagtumainuk makichkish atsutnai, wagki yumi nayantsanum pima numamtuk, Tuke Pujuu imanjinak ashí nugkanum dekawagtin ainawai.