(Habacuc) 2 - Awajún: Apajuí chichame pegkejam Porciones del Antiguo Testamento y el Nuevo Testamento

Apajuí inagnak Habacukan aikbau

¹ Nuna pachisan Apajuín segau asan, suntag jinta niimin ekemas niimak ekemama numamtuk Tuke Pujuush wajinjuttig tusan dakakun pujubiajai.

² Nunikan pujai Tuke Pujuu mina aijak: “Wi amina iwaintuktatjam nunú tablanum paan shiig wainmain agagta, dutikamu asamtai, tikich aidaush yupichuch ausatnume.

³ Nunú ame wainkattam duka juu tamawaikik nagkaemakchattawai, tujash amek waugtutsuk dakasta, nunú nagkaemaktinuk eke tsawan jegatsui. Tujash duka makichkish megkaetsuk tuké uminkattawai”, tujutmayi.

Aents pegkegchau aidaush wajukatnuk ainawa

⁴ “Tuja wi agagta tajam nunak juna tajai: ‘Aents pegkegchau emebau aidauk jinawagtinai, untsu aents pegkeg ima Apajuínak umijuidauk jinachagtinai.’

⁵ Aents emebau aidauk apu atag tusag wakegainawai, vino pegkejaitak enamkagtuwama nujai betek ainawai. Tikich aidau nagkaesau amí tuidau asag, makichkish ayámjutsuk yujajus aents tikich nugkanmaya aidaun amuinawai. Dita aidauk jaka megkaetaijai betek, tuja ukumatai aents jakaun dakitmaitsu nujai betek ainawai. Nunin asag ayatak wenawai.

⁶ Tujash ditak yana waitkainawa nunú pempeentuki dushikiam agtinai. Dutika dushikinak: ‘¡Ame tikich aents aidaun wajiiji yajutkam wiakuch wajasum nunak wait anentagme! ¿Amesh wajutiya kasamtash idaisattame?’

⁷ “Ame waitkam nunú pachiachbaunum pempeentugmakiag waitkagmasagtinai, imatijamainakui sapijai kujaitnaitme, tuja amina wajijum aidaunak ashí atanjamjagtinai.

⁸ Tikich nugkanmaya aidau ijunag chichama umikag, ame dita kasajauwaitam dutiksag ditashkam ashí kasagtamjagtinai. Dutik akikmaktatme ame juju nugka juwiya aents ijinkum yaakat aidau tsaikuitam nuadui.

⁹ ¡Kasamkamu aidau, tikich tsanuja yajutkamu aidaujai amina aentsjum aina nunú wiakuch awajsaum, nuadui aminak wait anentagme! Ame anentaimsamek, jutikanus shiig batsasainja tamestai.

¹⁰ Tujash ayatak datsanmain iwaintukume. Kuashat aents tikich nugkanmaya aidau ijinatjai tukamam, amek pempeentumakim amumakume.

¹¹ Yaakat peejamu aidau, jega ayanke aidaujai ame pegkegchau takamsamua nuna pachisag aentsjai betek senchi untsumiagtinai.

¹² “¡Amek aents aidau ijinkum, dita nugke atanjam nuwi yaakat najankaume, nuadui aminak wait anentagme!

¹³ Tujash ame waittsa umikum duka wainka imatikaume, aunak Tuke Pujuu ashí senchigtina nunú ashí apea tsaika ajapattawai.

¹⁴ Tuja Tuke Pujuun imanjiya duka, yumi nayantsan ipiamna numamtuk, ashí nugkanum piyaktatui. Nunikmatai ashí nuna dekawagtinai.

¹⁵ ¡Aents amejai tikiju batsatu vino drogajai pachimja ama amakuam enamkam wisu weakui, nunú diisam dushiki pujam nunak wait anentagme!

¹⁶ Tuke Pujuu aminak inastamjattawai, amek makichkish emematam amaitsume. Atum tikich aidau datsan dushikiajum dutiksag, atumnashkam Apajuí datsanmainun iwaintamkagtatui. Dutijamawagmatai emebau ainajum duka ememachu wajastatjume.

¹⁷ Muja Líbanonmaya kuntin aidau ijinauwaitam nunú aminak bakugmattawai. Ame aents aidau ijinamunum, tuja yaakat aidau tsaikbaunum, suwimak juki waitiakum amina pegkegchaujum akikmaktatme.

^18-19 ¡Babilonianmaya aidaunak wait anentuinajai! ¿Wagka atumesh wainka apajuímtai aidaunmash kajintsagmesh anentaimjume? ¿Wagka atumesh aannush yainkata tusagmesh segash yujagme? Auk numi, kaya, atum najanamu ainawai, tujash duka wainak ainawai. Auk jiju najana orojai, platayai ukatkamu iwakuchu asa nigki wajamainchau, tuja chichamainchau ainawai.

²⁰ Tujash Tuke Pujuuk niina jee pegkegma nuwi pujawai. ¡Niina emtinig ashí nugkanmaya aents aidauk takamtak pujustinme!” tajai.