(1 Reyes) 9 - Awajún: Apajuí chichame pegkejam Porciones del Antiguo Testamento y el Nuevo Testamento

Apajuí Salomógjai chicham umikbau

¹ Salomón jega Tuke Pujuu emematku ijuntain jegamak ashimak, nuigtu nii pujusa inamjatnunashkam ashimak, tuja tikichin nii dutikatag tibau aidaunashkam ashí umikui.

² Dutikamtai Tuke Pujuu yaunchuk Gabaógnum wantintukua dutiksag ataktushkam wantintukui.

³ Nunik chichajak: “Ame segatmaum nunak antugkajame. Nuadui juju ame jega wi tuke pujustin jegamkaum nunak tuke kuitamkattajai.

⁴ Tuja amina apa David mina umigtak shiig takasua imatiksamek wi chicham umikta tibauwa nunú ashí betek umiakminig,

⁵ wi amina apa Davitan anagkuakun: “ ‘Amina uchijum aidaunmayag makichik tuké Israel aents aidaun apuji atinai’ tiuwaitag nunak imatiksanuk amejai umiktatjai.

⁶ “Untsu ame, nuigtu amina uchijum wegantu agtina nunú mina chichameg umiktin agagbauwa nunú umitsuk tikich apajuímkugminig,

⁷ wi Israel aents aidaun nugka susauwaitag nuwi batsatjum nunak utsagtinaitjai. Tuja juju jega juna wi pujustinun etegkag nunashkam idaisattajai. Dutika ai tikich aents aidau Israel aents aidaunak dushikiagtinai.

⁸ Tuja juju jega juka tsaikam numi aidauk, kaya aidauk tuwasua weaku atinai. Dutika ai aents nuni nagkaemainak wainkag puyatuk tuke dushikis chichainak: “ ‘¿Wagkag Tuke Pujuush Israel aents aidau nugkenash, juju jega nii pujustin jegamkamua nujaish imatikayawa?’ tiagtinai.

⁹ Tusa tiagtai, tikich aents ditan chichajuinak: “ ‘Auk ditá muunji aajaku aina nunú Egipto nugkanum batsatun Tuke Pujuu jiija agkanmitkamaitak, nuna umigtsuk kajimatkiag tikichin apajuímainak idaisamu asa, suwimka suwak imatikae’, tiagtinai”, tiuwai.