Taetùs 3 - To kə Kəzə̀ kə̀ Fughu ko

Dzì zəla ghî a Kəzə̀ ki alemùghù a te

¹ E zəə̄ŋ zee nduw ghî ghə̀a ghò enyəa ghe e zuuw nduw â tuw u enaʼ u ghee wo, àsùghò â ghì à li ghəla ghe lô ghî à səŋo ghò alo enaʼ. Ghe doʼò təla tsughuu ko aleghəəŋ ko ghəa à dzûŋ ghò.

² E tsʉā nduw ghee enyəa ghe ka e kəaa boon dzə ghəa e ghûw zò, ghe ka e kəŋo sugho shwaʼ wo. Ghe e kuuwn maʼn tsughuu ghue zo aŋ ghəa ghee à ghəəŋ gho, dèe nduw mwam è dzûŋ zò â ghì ghò a dzə̀m.

³ M̀ fɛ dzàa tɔŋlo enyəa an tì kə̀ li ko ghue e ughùe e sɛ̀, sɛ̌ fə̀ buʼ lo ghî à laʼso gho, sɛ̀ n zuuw yo â Zə̀ kò, ghəəŋ boon sùghò àghəa, ghe n sè məŋso sùghò sɛ̀, sɛ̀ m fə̀n dòʼò ndùw ùkɔ̀ a bâa fʉgha u mbī wo. Sɛ̀ m mughu aŋ kə̀f kə ebō, ki sugho kəmʉ̀nlo am fʉgha ù aghì. A m bâa ghì ghə̀n àdzə̀m, ghî ghə̀n à dzə̀m m bâa sùghò sɛ̀.

⁴ A m bùghò ghe kuūwn dê tsughu sɛ̀ â dzɔ̀ e Zə̀ kəla kə bəghaasəa sɛ̀, à ləgha e Wə̄n zo,

⁵ kə m bəghasə̄ tsughu sɛ̀. Kə ka fə bəghasə̄ dzə̌ sɛ̀ bòʼ ghəa a sɛ̀ à dzûŋ ghə̀là sɛ̀ lo mò sɛ̀ ŋ ghəŋlo, à fə̀ kuuwn lo bòʼ se e wə̄n è kwuso zo, Kə̀ fə̀ bəghasə̄ sɛ̀. Kə fə sɛ̀ bəghasə̄ aŋghəa Kə fə̀ tum wô Zuʼ tə̀ Zɔlɔ to enyəa tə bughò sûuw maʼà sɛ̀ aŋ ghəa a sɛ̀ à biigh gho, àsùghò enyəa, to sɛ̀ kuūwn kɔʼ mwam e sɛ̀, sɛ̀ kele tsughu mughù è fughu zo.

⁶ Zə̀ kə fə̀ sɛ̀ â Zuʼ tə̀ Zɔlɔ tə te tə ŋge fughu wò bòʼ Yɛso Kə̀lestò, Bəghambī fə̀ bughò kpuw an tuw u sɛ̀,

⁷ enyəa, bòʼ dzɔ̀ e Wə̄n n te zo, sɛ̀ è ke lo tsəghatsəgha a vʉ̀a Zə̀ kò, tò sɛ̀ è ke lo alenìi kelê mùghù è doʼn təla zəla sɛ̀ chiī tùʼ a te.

⁸ Ghəa ghə̀là Ŋ̀ kə̂a wô fɛ â ghù kùm lǒ èsəŋò. Ǹ ləghaa enyəa ghù è tughusō dzaā kweēn nduw ko ghəa ghən gho â ghee, to ghî ghəla ghe boo fughu tsughu â Zə̀ kò è ke tɔʼ lo alegaʼa tsughu fə̀ŋ aleghəəŋ ghəa à dzûŋ ghò. Ghəa a te a dzɔ̂ bùʼ nù yòsò sùghò â ghì ghə̀n à dzə̀m.

⁹ Kà è bwiī fwən wo ghɛ̀ à ghêe ghì ghəla ghe ləghaa alepfʉa dzughu gho an làʼsò tə aghəa, ŋkāa ghəla ghe taŋso wii to an zən a aghì mo ghe mafə̄ kpuuwn tsə̀ghà, boom naaŋ sùghò yò ghəla ghe zughùu zeē kùu ndùw làŋ kə Tə̀dzûu, bòʼ ghəa a te a tsəa yo aŋ ghə̀a è li zo, yia ki sughò yo fwàʼ kə̀ li ko.

¹⁰ Abugho ghùw lǒ am bvʉa zɛʼɛ̄ mò ù kì tənùʼ, ghɛ̀ ŋ kwɛ̀ɛn tsùghu wə̄n alekɔʼɔ̄ sə tənəghā tə bə̀ghà, mò ù kà zuw, ghɛ̀ n zə̀ghàa màʼà wə̄n, nyuʼu dzə̀m.

¹¹ Ghǔ n daŋso kele tsughu enyəa ŋgòʼò ghùw ù te lo mbaaŋ kə ghûw, bòʼ enyəa ghəa a wə̄n à biigh a dêe tə̀la wò nù fəgha kə̀là ù lo ghè kò.

Pôl tɔ̌ɔŋ zùw gùŋsò tsùghù Tǎetùs

¹² Abugho Ǹ lo tum wô Altɛ̄màs ŋkāa Tàekikùs a vʉ̀a ghù, ghù ke dəm tən tsughu enyəa ghù bugho koʼ mugho an Nìkopolès, tɔŋlo enyəa mùghò n tsə̀m enyəa Ŋ̀ kê ndùw mùghùun kə̌əŋ a fughu alo efwòo.

¹³ Də̀ma tən tsùghù sùghò alefughu eyôsò â Zenàs; tɔɔŋ dèekə̀làŋ vʉ̀, ghèe Àpolòs, abugho ghe lo so e zəghàa səā wô. Ghù ŋ ghəəŋ tsùghù sùghò enyəa e kwo ghe lô so e laʼà fəgha kə̀ li ko.

¹⁴ Ghəəŋ tsùghù sùghò enyəa ghî a sɛ̀ à zoʼn nduw aleghəəŋ tsəgha ghəa ghə̀là à lǒ à dzûŋ ghò, to ghe e lo aleyòsò ghì ghəla ghe ki yo, e kwo ghî a sɛ̀ ghəla ghe boō tsughu lò so e mūghùun tsɔ̀ kə emùghùu.

¹⁵ Ghî ghə̀n à dzə̀m ghe lô fɛ ghàʼ à ghee fughu wò ghɛ̀ â tɔɔŋ zo. Tɔɔŋ zùw tsùghù sùghò fən a sɛ̀ yìa à dzə̀m ghe lo mo ghe m boo fùghù sùghò â Yɛso Kə̀lestò. Dzùŋù ŋ Kə̀zə̀ mə̀ è lo â ghɛ̀ à ghee a dzə̀m.