Taetùs 2 - To kə Kəzə̀ kə̀ Fughu ko

Tsʉ̂ è dzûŋ zò

¹ Yia kuūwn bughò ghû a Taetòs, ghù ki alezōʼn nduw ko ghî ghò am fəgha kəla kə boōm dzəə̄ŋ nduw ghèe tsʉ̀ è səŋò zò (kùu ndùw Yɛso Kə̀lestò).

² E zoʼn nduw noo tə ayînû tò enyəa ghe e nyoʼn lo, ghe ki alemughu mughùu zə ŋkɔʼso zo, àsùghò enyəa ghe kele tsughu alekɔɔn tsughuu ghue e ghee zo. Ghe ki aletɔ̀ʼɔ̀ boō fughuu tsughu â Zə̀ kò, ghe e kum ki ləgha zo aŋ ghùe e ghee, àsùghò enyəa, mò à sə̌a kô kwò, ghe e kɔɔn tsughu ko fə̂ŋ tò am boo e ghee a zəŋò Yɛso Kə̀lestò.

³ À lò sugho eghəla ghù ki alezoʼn nduw sugho noo tə ayìzən to enyəa ghe mughùu tsughu mughùu zəla e fughuu nduw kɔʼso mò â Zə̀ kò aŋ ghəa a ghee a dzə̀m ghəla ghe ghəŋlo, ghe ka e maʼn dzə fom to, ghe ka fə̀ŋ ŋge gàʼ sùghò aleŋgee mʉa lʉ̀ mò. Ghe ki aletele fughuu ko tsʉ̂ è dzûŋ zò,

⁴ enyəa, ghe e lo aletsʉ̀ wâazən gho enyəa ghe e ləghaa num a ghee gho àsùghò wɛ a ghee gho,

⁵ ghe e lo wâazən ghəla ghe zumso tsughu ghue zo an ndughu tə anum, zuuw ndùw â num a ghee gho, mùghù mughùu è zɔlɔ zo, fwàʼà dzɔ̀ɔ ndùw sùghò an ndughu tə ghee, ki fə̂ŋ tə̀ dzûŋ tò, enyəa e kwo ghùw lò so e kə̂aa bǒon ghəa è li zo kùu ndùw shwaʼ u Kəzə̀.

⁶ À lò sugho eghəla, ghù ki aletsʉā nduw sugho waafəghàŋ à nûu ghò enyəa ghe e maʼn tsughu ghue zo alo aghəa a dzə̀m.

⁷ Ghuūghùe wʉ̂a Taetùs, ghù kì aledeē nduw tsə̌a aŋ ghəa à dzûŋ ghə̀là ghù ghəŋlo. E ti ko alo èsəŋò am fəgha kəla ghù děe ghè kò, e kwo ghù lò se nɔʼn ghəəŋ nù.

⁸ E kəaa nduw shwaʼ ù səŋò wəla ghùw yò alekomso ghù a te enyəa à lò agha, tǒ ghîikətuw ghə̂a à kele tsughu tuw kə̀ dəla ko an dziī zəla ghe lo kôom ki yô ghəa è biigh è li zo alekə̀a an zən e sɛ̀.

⁹ Zoʼn tsughu kɔ̀ɔ mò enyəa mə̀ è zuuw nduw â ghê mughùbè a ghee aletsəmso fə̀ŋ tə ghee alo aghəa a dzə̀m, mə̀ è ka e kəaa sugho tsə̀ghànlò u tə dzə̀ wò â ghee,

¹⁰ ŋkāa kɔ̀ɔ mə̀ è ka e tsɔŋɔ sugho fʉgha u ghee wo. Ghe ki alekuūwn deē nduw mwam è dzûŋ zò an dziī zəla ghùw lò alegaʼ fə̀ŋ a zəŋò ghee, to ghî ghə̀ è koʼo tɔɔ wo mwam e ghee è dzûŋ zò, ghî a te ghə e ləghaa alezəəŋ shwaʼ u Bəghambī ù sɛ̀, Kə̀zə̀.

¹¹ Tɔŋlo enyəa Zə̀ kə̀ n dè wò dzɔ̂ e wə̄n zo â ghì ghò a dzə̀m, aŋghəa Kə lo bəghasəā ghe a te.

¹² Dzɔ̂ e Kəzə̀ zən zoʼn wò sɛ̀ enyəa sɛ̀ tuū maʼà tsughu mughùu zəla à yò dzə̂ mughùu e ghì a Kəzə̀ zò, a ka fə̂ŋ tə̀ gaʼ sùghò am fʉgha u mbī wo, àsùghò enyəa sɛ̀ è naŋso tsughuu kə ebwìi kə sɛ̀ kò aŋ ghəa a sɛ̀ à ghəəŋ gho, sɛ̀ è ki fə̂ŋ tə̀ dzûŋ tò, mùghù sugho aŋghəa Zə̀ kə̀ ləghaa enyəa to a mô mùghu fɛ a te am mbī zən.

¹³ Ghàʼ ndzəmà chìi tùʼ aŋghəa ghàʼ ləə̄m tsuʼ ù ne wəla a kwo enyəa Yɛso Kə̀lestò lo bùghòo a te aŋ ghùe u kədə̀ŋ. Yɛso Kə̀lestò wən lo Zə̀ kə sɛ̀ kə̀ ghaʼa ko àsùghò Bəghambī ù sɛ̀.

¹⁴ À lǒ wə̄n wəla ù fə̀ kpuw an tuw u sɛ̀ alebəghaasə sɛ̀ aŋ ghəa a sɛ̀ à biigh gho, àsùghò alesùuw maʼà bòo tə sɛ̀ enyəa sɛ̀ doʼò tsughu a wə̄n gho aghî, a e moʼn təla ko aleghəŋlo èdzɔ̀.

¹⁵ E zoʼn nduw ghî ghò aŋ ghəa ghən gho, dzə̀là ndùw fə̀ŋ tə ghee, tsʉ̀a ndùw, geen ndùw sùghò ghee aŋ ghəa ghəla ghe ghəə̄ŋ bonlō, tǒ ghùw wəla ù ki daʼa kə te ko. E kwo ghù lò bomlo enyəa ghùw kòʼòkê ghù.