Matìo 19 - To kə Kəzə̀ kə̀ Fughu ko

Yɛso tsʉ̀ aghì aŋ ghùe è sɛɛ̄ zo an ndùghù è kə̀male

¹ A m bùghò Yɛso kə̀a mɛʼɛ̀ tsughu shwaʼ wən wo, ù n zə̀ghàa tsùghù Galèlîi dàŋsə kɔʼ dzùghù è Dzodàn, dàŋ ndùw am mbùʼ è Dzùdîa a ŋgùŋ è lì ezə̂.

² Ndə̀mà tə aghì tə̀ n tə̂əŋ bwìi ndùw a bàâ wə̄n, ù m baaŋ kɔʼ à dzaŋā gho a fughu.

³ Ghî a Falàsîi à li ghə n ndùw bùghò alebùghò baʼn kwu wə̄n, ghe m bvʉ̄ â wə̄n enyəa, “Lâŋ kə̀ boo nù enyəa ghùw lò nû alesɛ̀ɛ ghèe wì ù wə̄n abugho ghəa è li e sə kɔʼ ā, ŋkāa abugho ù tsə̀m tsughu aleghəŋlo êzə̀ à?”

⁴ Ù m bɛ̀lɛ̀ tsùghù enyəa, “Ghɛ̀ kaām tɔɔŋ kòʼ am Mwàʼsò kə Kəzə̀ enyəa aletsoō kaʼa nughù wô, Zə̀ kə fə̀ bɔm tsughu aghî, wìnûu àsùghò wìzən?

⁵ Zə̀ kə̀ n dzɛ̀ tsùghù enyəa, ‘Zən lò e ghee wìnû kè zəghàan taʼn tsughuu zə̂ ghèe tsele ù ndùw təmadzəə̄ŋ kɔʼ ghèe wī, ghee a te gho a bə̀ghà kè doʼò tsughu kə fəgha kə mɔ̀ʼ.’

⁶ À fi lo enyəa ghe kôom yò dzə̂ ghî ghò a bə̀ghà, ghe lo kəfəgha kə mɔ̀ʼ. E lo enyəa fəgha kə̀là Zə̀ kə̀ təmdzəə̄ŋ kɔʼ e kwo ko ghùw lo so e gbôo sɛ̂ɛ nù.”

⁷ Ghe m bvʉ â wə̄n enyəa, “À kǔuwn lǒ kwò Musî màʼa fə̀ fughu lâŋ kò enyəa mò ghùw so e sɛ̂ɛ ghèe wì ù wən a, ù m fùghù tsə̀ghà ndùw mwàʼsò kə ghùe è dzughū ko, daŋso sɛ̀ɛ tsùghu ghèe wə̀n à?”

⁸ Yɛso n dzɛ̀ â ghee enyəa, “Musî fə̀ zəghāa tsughu enyəa ghɛ̀ è gboō sɛɛ̄ ghɛ̀ à ghê yi ghɛʼɛ̄ gho mbuu fə̂ŋ tɛʼɛ tə ŋgee tughuu nù, alekaʼā nughù wô, à mò yo dzə êzə̀.

⁹ Ǹ so Ǹ dzâa wô sughò â ghɛ̀ enyəa; abugho ghùw tue maʼa wi, mò à yò dzə̂ enyəa wi ù wə̄n sə nùuŋ nù, ghùw u te m fi sə nùŋlò.”

¹⁰ Tsə̀təndə̄ghā tə n dzɛ̀ â wə̄n enyəa, “Abugho e lo êzə̀ â ghùw ghèe wì ù wə̄n, dzɔ̀ fi lo enyəa ghùw ka bìso nǐ wī.”

¹¹ Ù ŋ kuuwn dzɛ̀ â ghee enyəa, “À yò dzə aghî a dzə̀m ghe lô alezuūwkɛlɛ̂ fəgha kəla Ŋ̀ kə̂a tsughu, à lo ko ghî ghəla Zə̀ kə̀ lo mo kə̂ ŋ ghee â tɔ u te u fughu.

¹² Nu ghî à lo nû mo ghe yo alenì àyi, mo ghe mò dzə tən wo ghee êzə̀, à li yia lo mò à ghə̌əŋ tsughu aghî enyəa ghe ka yi a nî, à li yia lo nîi yô yi gho bòʼ ghəa e fɔ̀e è kəwālā. Ghùw wəla ù lò alebôo ghəa zən, ù boo.”

Yɛso fùghù ebughunlo â wɛghêtùghù gho

¹³ 13 A m bùghò kô tsuʼ ù li wo, ghe n nì wò wɛghêtùghù a vʉ̀a Yɛso enyəa to ù mò gaʼā tsughu aghu an tuw u ghee, ù gɔ̀ɔŋ tsughu â ghee. Tsə̀təndə̄ghā tə ŋ kee ndùw ghì a te gho;

¹⁴ Yɛso ŋ kuuwn dzɛ̀ â ghee enyəa, “Zə̀ghàa nlò wɛghêtùghu yi gho ghe bughò kôʼ mùghò, kǎ nlǒ ghee təghàsò sùghò; tɔŋlo enyəa fɔ̂e kəwālā u lɛɛn ŋgwàʼ zən.”

¹⁵ Ù n daŋso gaʼ tsughu aghu an tuw u ghee, fughu tsughu ghee â bughuun zo. Ghəa ù mìasò tsughu, ù mo è nughu.

Ghùw u kǔu àsùghò fɔ̀e u Kəzə̀ wò

¹⁶ Zə m bùghò sə kɔʼ enyəa ghùw ù lì bùghò kòʼ wò Yɛso, bvʉ â wə̄n enyəa, “Wàdè, Ǹ lo aleghəə̄ŋ tsughu ghəa è dzûŋ è ghɛ zo tò Ŋ̀ kê kele mùghùu zəla e doʼò tən à?”

¹⁷ Yɛso n daŋso bvʉ â wə̄n enyəa, “À lǒ kwò ghù sò kì alebvʉā wô mugho â fəgha kəla kə dzɔɔ a? À lò ko sə e kətūw e ghûw ù mɔ̀ʼ, ù lǒ ghùw ù dzùŋ! Abugho ghù ləghaa alekelê mùghù è doʼn təla zo, e naaŋ lwâŋ u wə̄n wo.”

¹⁸ Ghùw ù te m bvʉ â Yɛso enyəa, “À lò lwâŋ ù ghɛ wo?” Yɛso n daŋso dzɛ̀ â wə̄n enyəa lwâŋ wəla u dzɛ̂ enyəa, “Kǎ ghùw wi, kǎ wi ù ghùw nyəŋè, kà tsɔŋ, kà doʼò bvʉ̂nɔ̀ʼ wə̀ agha.

¹⁹ E fughuu kɔʼso mò â zùghù ghèe tsùghò, ghù è ləghaa nduw sugho wàazùghù tò aŋghəa ghù ləghaa ghue wʉ̀a wò a te.”

²⁰ Ghùw vʉ n dzɛ̀ â wə̄n enyəa, “Ǹ naaŋ nù lwâŋ wə̀n wo ù dzə̀m; à è zəŋ buw mugho â kwò kò à?”

²¹ Yɛso n dzɛ̀ â wən enyəa, “Abugho ghù ləghaa aledòʼò ghùw ù tsəghatsəgha, ndǔw nǐi fěe tsughu fʉgha wəla ghù ki u dzə̀m, ghù dzughu kua u te wo â ghì à laa gho, tò ghù e ke kuuwn lo ghùw ù kǔu alo kəwālā; ghù daŋso nughu wo a bǎa mùghò tǒ tsə̀ndə̄ghā zaŋā.”

²² Ghəa ghùw vʉ zuw tsughu ghəa yi gho, ù n nùghù fùghù mo ù muŋe nù; tɔŋlo enyəa ù fə̀ ŋge ki ufʉgha.

²³ Yɛso fi daŋso nùghù dzɛ̀ nû â tsə̀təndə̄ghā tə wə̄n to enyəa, “Kùmkùm, aŋghəa Ǹ dzâa wô fɛ â ghɛ̀, e lo tughuu tsə̀ghà nù â ghùwkǔu alenyə am fɔ̀e u kəwālā.

²⁴ Ǹ so Ǹ dzâa kpeʼē wô â ghɛ̀ enyəa to kə̀anyòm kə̀ mbaā tsəghà nyə an sə e fəsāʼ tsə̀ghàtàʼà sə aŋghəa ghùwkǔu lo aletsə̀ghà nyə a te am fɔ̀e u Kəzə̀.”

²⁵ Aŋghəa tsə̀təndə̄ghā tə zuw tsughu ghəa zən, tuw kə m kpuw ghee, ghe m bvʉ tsughu enyəa, “À kǔuwn lò ndugho alezə̄ kə̄tūw à?”

²⁶ Yɛso ŋ kòom sɔʼ lɛɛn ko ghee enyə, dzɛ̀ tsùghù enyəa, “Â ghì ghò, e yo alesə̄. Â Zə̀ kò, aghəa a dzə̀m bùghuun nù alesə̄.”

²⁷ Pità mo e bɛlɛ̀ nù, dzɛ̀ tsùghù enyəa, “Kòʼô, ghàʼ m fʉgha waʼa wo u dzə̀m zəghàa tàʼà ndùw, nùghù wò a bàâ ghù. Ghàʼ lô fi kuuwn kele kə̀ kwò?”

²⁸ Yɛso n dzɛ̀ â ghee enyəa, “Kùmkùm, ghəa Ǹ dzâa wô fɛ â ghɛ̀, am mbī è fughu è te, abugho Wɛ ù Ghùw kè doʼ an ndàŋ è kə̀də̀ŋ è wə̄n, ghɛ̀ e ke doʼ sugho alo təndàŋ eghəm à ghè tò tə bə̀ghà, saʼâ nàʼà mə Ezə̀lɛ̂ mən èghəm à ghè mò m bə̀ghà.

²⁹ Ghùw wəla ù mò tso zəghàa maʼà wô dzə̂ waazə̂ ghò, zə̀ghàa wò tsele àsùghò zə̀, ŋkāa wɛ a wə̄n, sum e wə̄n, ŋkāa ndughu tə wə̄n, enyəa ù bughòo a bàâ mùghò, ù lo kelê fʉgha u te wo təbɔm, ù kele sughò mùghùu zəla e doʼò tən.

³⁰ Ndə̀m zəla è kuūwn lô sə ko êzə̄ŋ, ghe kê lò tsəgha kəbam, ghəla ghe lô bam ko êzəŋ, ghe kê kǔuwn lò kəsə.”