Matìo 17 - To kə Kəzə̀ kə̀ Fughu ko

Kôʼ e Yɛso è kuwnlo aŋ kwàʼ

¹ Ghəa tsuʼ n tsəghà tsughu tǔu, Yɛso n nì kɔ̀ʼ ndùw Pità ghèe ghê Dzɛ̂ms ghèe wàazə̀ Dzɔ̌n, ghe n nùghù kɔ̀ʼ ndùw an ndɔ̀ŋɔ̀ ndɔ̀ŋɔ̀ fə ukwàʼ a fughu ghee à nəŋ ko.

² Ù n nùghù kǔuwn kɔʼ fughu an sə kə ghee, sʉ u wə̄n wə n nyəghanlo tò ezuuw, ndzʉ tə wə̄n tə m fəmà nyə̀ghaan ndùw tǒ tsə̀.

³ Ghe n tɛ̀ fìi kɔʼ Musî ghèe Elaedzà mo ghe yia kə̂a ghəa gho ghèe ghê Yɛso.

⁴ Pita n dzɛ̀ â Yɛso enyəa, “Mughùbè, e nyɔʼɔ̀ dzɔ̂ɔ nù ghàʼ lô fɛ; abugho ghù ləgha, M̀ bəghaa kɔʼ ntughuu fɛ n təgha, fə mɔ̀ʼ â ghù, fə mɔ̀ʼ â Muwsî àsùghò fə mɔ̀ʼ â Èlaedzà.”

⁵ Ghəa ù naām kə̂a ghəa gho, ghe mo ekôʼ fə̀màfə̀m kə nyəghaan kə mbàʼ kə̀ li kə m bvʉ̀ tsə̀n tsughu ghee, dzə̀ è lì n dzɛ̀ sə wòʼ fughu am mbàʼ enyəa, “Wən lǒ wɛ waŋa Ŋ̀ gaʼ fə̀ŋ a zəŋò wən Ŋ̀ ŋgee duʼn nù ghàʼ à wə̄n; e zuuw nduw nlò â wə̄n.”

⁶ Ghəa tsə̀təndə̄ghā tə zuw tsughu, fə̂ŋ tə̀ m bàa ghee, ghe n tì bvʉ̀ pfʉ̌a naŋa ndùw èsʉ a ghueetsə̄.

⁷ Yɛso ŋ kuuwn bùghò mɔ̀m tsùgho ghee, dzɛ̀ â ghee enyəa, “Nùghu kɔʼ nlò, kǎ nlò tsəŋ.”

⁸ Ghe mo e baŋà lɛ̌ɛn kɔʼɔ nù, ghe ŋ kòʼ kɔʼ Yɛso, kè kôom kôʼ ghì à li yì.

⁹ A m bùghò ghe tsughuu wô ebàm aŋ ukwàʼ, Yɛso ŋ kùɛɛn tsughu ghee enyəa, “E kwo ghɛ̀ lô dzâa fəgha kəla ghɛ̀ kôʼ fɛ â ghùw, à gɔ̀ʼɔ̀ ko mò Wɛ ù Ghùw n lo kɔʼsə alo evʉ̄.”

¹⁰ Tsə̀təndə̄ghā tə n daŋso bvʉ â wə̄n enyəa, “À kǔuwn lǒ kwò ghê dèekə̀làŋ kuuwn dzɛ̂ enyəa, Elaedzà lo tèlè kì dzə alebùghò a?”

¹¹ Ù m bɛ̀lɛ̀ tsughu enyəa, “Elaedzà kùum bùghòo nù, ù bùghò biān naŋā aghəa a dzə̀m;

¹² M̀ fɛ so Ŋ̀ kuūwn dzâa wô â ghɛ̀ enyəa ù maā bughò, ghî ghə ŋ kè koʼòkɛlɛ wə̄n, ghe n tsôo ghə̌əŋ ndùw kô ghəa ghəla ghe ləghaa â wə̄n. Wɛ ù Ghùw lo bɔɔm faan sùghò èzə̀ aŋ ghùu ghee.”

¹³ Tsə̀təndə̄ghā tə fi daŋso zuwkɛlɛ nù enyəa, ù fɛ kə̂a ghəa Dzɔ̌n Fùghùu mùghù ŋ Kə̀zə̀ â ghee.

Yɛso bǎaŋ ghì fə kəbvʉ̀ fə li fo

¹⁴ A m bùghò ghe bughò kôʼ wô saʼ kə aghì kò, tûwbʉ̀ghà ù lòʼ n sə kɔʼ nyaʼa wò a vʉ̀a Yɛso, dzɛ̀ enyəa,

¹⁵ “Mughùbè, kwuso se zo a zəŋò wɛ̀ waŋā, nu ù bvʉ̀a kə̀bvʉ̀, vʉ̀a ù ŋgeē fanlo. Ù bùghòo an nə̀gha è li zo, ù m bvʉ̀ nyə ndùw aŋ uwə̀n, nəgha è li zo ù bvʉ̀ nyə tsughu alo mmùghu.

¹⁶ M̀ mô fɛ nî wò wə̄n â tsə̀təndə̄ghā təghà tò, ghe yia yô alebaaŋ wə̄n.”

¹⁷ Yɛso n daŋso bɛ̀lɛ̀ tsùghù enyəa, “Ghɛ̀ ghî a tì kə nɛ kən, ghɛ̀ kâ dɔ̀ɔm bǒo fughu â Zə̀ kò, ghɛ̀ kwo yo ghəa è dzuŋ zò ŋkāa è biigh zo, Ǹ lo bòʼò dòʼn tsùŋlò ênzə̂n sɛ̀ a? Nǐi wǒ wə̄n.”

¹⁸ Yɛso n daŋso tsə̀ghàsò tsughu kəlâŋ, bvʉ̀ kə n sə̀ nùghù tsughu a zəŋò wɛ vʉ̀, ù n daŋso tùghù e kɔʼ.

¹⁹ Tsə̀təndə̄ghā tə Yɛso tə̀ m bùghò tsɔŋ bvʉ â Yɛso enyəa, “À kǔuwn lǒ kwò ghàʼ maʼà yô aleshùaa sə zʉ̀ u te wo a?”

²⁰ Ù n dzɛ̀ â ghee enyəa, “À lǒ bòʼ ghɛ̀ kâ tɔ̀ʼ bǒo fughu â Zə̀ kò. Nu M̀ fɛ kùu dzàa wò nù â ghɛ̀, abugho ghɛ̀ mô bûʼ ki ko nyàaŋ fə eboo fo tò sam fə mustàd, ghɛ̀ mô lò nû aledzàa tsughu â kwàʼ wən wo enyəa, ‘Səəŋ dòʼò kəŋo ndùw fi ezə̂.’ To u mô səə̄ŋ doʼò kəŋo ndûw. To êzə̀, ghəa è li e mô yò aletsə̀ghàasə ghɛ.”

²¹ [À bɔ̌ɔm mìaa kô ègɔ̀ŋlò àsùghò dzughu è baa zo e lô aleghəŋlo ghùw shùa sə ŋgòʼ è dzàŋ zən.]

Yɛso kə̀a kpèʼê ghəa a vʉ e wə̄n

²² A fə̀ bugho tsə̀təndə̄ghā tə̀ bugho dzeŋe doʼò tsughu aŋ Galèlîi, Yɛso n dzɛ̀ â ghee enyəa, “Ghe lo kùʼù nìi fùghuu tsə̀ghàa ndùw nǔ Wɛ̀ ù Ghùw aŋ ghùu ghì ghò,

²³ ghe nîi wiī tsughu wə̄n, ghe lo zôo nughù kɔʼ wə̄n alo abugho tsuʼu n lo tsəghà tsughu n təgha.” Ghəa e te zə m fəmso tsughu tsə̀təndə̄ghā tə wə̄n enyə.

Ghəa à chuuw a kəmwàʼsò ghò an ndùghù è Kə̀zə̀ e ne

²⁴ A m bùghò Yɛso bùgho aŋ Kàpɛnùm ghèe ghê tsə̀təndə̄ghā tə wə̄n to, ghî ghəla ghe bvʉa chuw to an Ndughu è Kə̀zə̀ è ne m bùgho bvʉ̀ â Pità enyəa, “Mughùbè wɛʼɛ fughu ko nǔ chuw tə wə̄n an ndughu è Kəzə̀ è ne a?”

²⁵ Pità m bɛ̀lɛ̀ ndùw wə̄n enyəa, “Ù tsǔuw nù.” A m bùghò ù daŋso kwən nyə wo, Yɛso ŋ kə̀a ndùw dzə̀ àghəa â wə̄n enyəa, “Ghù mòʼò èndugho Sǎemòn? Dwə̀ŋ wə enaʼ u ki alebvʉ̄ kəŋgùu ŋkāa mwàʼsò kə̀ chuuw ko â ghê ndùghò a? Ghe ki alebvʉ â wɛ a kətsə̄ a te gho ŋkāa ghe ki alebvʉ â tùu tò a?”

²⁶ A m bugho ù bɛ̀lɛ̀ tsughu enyəa, “Ghe ki alebvʉ â tùu tò.” Yɛso n dzɛ̀ â wə̄n enyəa, “À fi lo enyəa wɛ a kətsə̄ a ki yo alechūw.

²⁷ To a mô zəghà ko nù, a ka boon fə̂ŋ tə ghee to. Ndùw nlò alo enyʉ̀ ghɛ̀ maʼa nduw saʼ fo, ghɛ̀ ni kɔʼ tsəgha e sʉesʉ zəla ghɛ̀ kwuu sə kɔʼ, ghɛ̀ zom tsughu dzughu e wə̄n zo, ghɛ̀ koʼ tsughu kua u fəŋgɔ̀ʼ wò a te, ghɛ̀ nduw fughu nduw â ghee enyəa à lǒ chuw è sɛ̀ a dzə̀m ghən.”